【讀者分享🇭🇰】Say Good Hong Kong Story (Patreon)

香港國際金融峰會揭幕，特首比卡超致詞艷驚四座。比卡超用英語致詞，網上有媒體將佢嘅說話節錄，我叫做睇咗當中嘅幾句，啲英文我隻隻字都識，拼埋一齊就有啲𢱑頭，恕小弟不才。

既然自己英文咁渣，於是乎就嘗試將佢講嗰啲英文放去Google翻譯，等我了解吓佢講乜嘢。誰知Google翻譯認真厲害，驚為天人，竟然將佢翻譯做完全一字不漏嘅完整中文句語，唔知係咪因為份稿係用中文寫嘅呢？寫完之後就放咗去翻譯軟件，將佢轉做英文就算數呢？咁樣算唔算係泄露國家機密㗎⋯⋯

佢最後更加話：Go for it. Get in front, not behind。點啊，咩意思呢？原來佢話「去吧，走在最前，不是後面」。真係陰公，少啲想像力，都唔知佢噏乜。有傳媒將啲相片釋出， 200多名「全球」金融界精英，喺場內托腮皺眉頭睇手機打喊露，你講緊個故仔肯定好正，好好聽好吸引，Bravo！

開頭係威係勢，又話有邊啲巨企嘅大佬會俾面出席，最後有幾個淆底，用咗各種唔同嘅原因，缺席峰會，搞到特區政府我估都幾冇癮。話時話，呢二百幾人豁免唔使隔離，唔知佢哋夜晚去邊度食嘢呢？據聞中環好多嘅食肆，因為疫情關係做唔住生意，唔係執咗就晨早已經拉閘閂門，以往夜夜笙歌嘅中環，只係剩返蘭桂坊叫做可以去happy下，唔知特首講嗰個「街道安全，而且可能比以前更熱鬧」，係咪講緊平行時空嘅香港呢？

老老實實，搞埋啲咁嘅大龍鳳之前，係咪應該洗吓太平地搵返咋臨記，起碼夜晚搞番㷫個中環，唔好搞到咁核突得唔得呀？你估嚟緊呢班人從來冇嚟過香港咩？佢哋係咪未去過彌敦道？未去過星光大道？走入廣東道發覺十室九空，呢個「故仔」認真好聽。一個唔覺意落區嘅時候被「動態清零」突發封區，真係「良好經驗」。出街食飯又要紅黃藍碼，又要用「安心出行」，班老外都唔知你咩嚟嘅，真係多謝晒。

所以點解我哋做唔到官，係因為呢啲咁高智慧嘅安排，實在唔係普通人可以處理到。me so sorry me no know how do it喇。

算啦，冇咩嘅話，我返出去先。

⏺ 延伸視頻：「嘩埋嚟睇埋嚟揀」「義和團刀槍不入」 「新香港」金融峰會八大奇景賞析
https://www.youtube.com/watch?v=hKSYo0BOUZE