【讀者分享】回應心理治療師Stephen：九型人格看普京，還可以看到甚麼？ (Patreon)

感謝Stephen嘅分享及分析。在九型人格上，自己也有一定嘅認識，我不敢自以為專家，也希望在這裏跟大家多分享一下。九型人格歷史非常長久，其實都已經幾難深究其來源，其中一個說法係糅合了古巴比倫以及遠東地區嘅一啲民間智慧，於大約70年代由美國一班臨床心理學家再次引入。現時坊間亦有非常之多嘅團體教授九型人格課程。九型人格，顧名思義，將人分為九個類別，每個類別都有自身嘅性格以及取態。九型人格相信每個人都有一個型格係佢嘅基本，主導了那一個人嘅行為及處事態度。在此也不會多花時間去描述，有興趣的話Google一下便有大量資訊。  

當我哋話普京可能係屬於8號（Leader，Challenger），就等我哋集中睇吓呢一個嘅號碼。8號係充滿自信、強悍、堅強和有超強意志力，同時亦有非常高度自我保護意識。一個健康正常嘅8號係可以足智多謀、直言不諱、果斷，能自我超越，用自己的力量改善他人的生活，變得英勇、寬宏大量和鼓舞人心。若是落入咗一個受壓迫嘅狀態就會變得自我為中心和專橫。8號覺得他們必須控制他們的周邊環境，尤其是人，因此有時會變得對抗和語帶恐嚇。要能夠號同8號平起平坐，必須要擁有同樣嘅氣場（Energy Level），否則會被8號不屑一顧。  

九型人格裏面，每個性格都會從兩方面去了解，分別係「基本恐懼」（Basic fear）以及「基本願望」（Basic desire）。8號的基本恐懼是怕被他人傷害或控制，因此會經常先下手為強；而基本願望則是保護自己，能夠掌控自己的生活和命運。8號在處理任何事情時候嘅主要動機就是想要自力更生，證明自己的力量並抵制其弱點，甚至主宰環境，並能控制自己的處境。  

在眾多類型中，8號喜歡接受挑戰。他們具有超凡魅力，具有說服他人跟隨他們進行各種事情的身心能力——從創辦公司、重建城市、經營家庭、若果係上到國家元首層面，會為咗啖氣發動戰爭，相反地都能夠締造和平，因為佢氣場甚強，擁有大將之風，其他領袖都會願意去聽其意見。  

因此如果我哋將8號呢一個嘅型格套入普京當中，相信大家會發現喺好多方面都能夠配合得到。正如Stephen嘅分享，九型人格師係從一個人嘅眼神動以及其對答作去作出判斷，雖然未必準確，也具備一定嘅參考價值。判斷一個人嘅性格其實也並非由九型人格師人去告訴大家，因為每個人自己係最清楚自己嘅，所以最後都係有自己去作出一個定論，九型人格師只係協助大家去更加了解各個性格嘅不同，所以唔係九型人格師話你係乜嘢你就真係一定係嗰個型格。話說回來，普京嘅言行舉止點樣會令到我哋覺得佢係一個8號「挑戰者」呢？如果從一個正面嘅角度去分析，佢喺發動戰爭之前其實有非常之多嘅名銜，例如喺武術嘅跆拳道及空手道都有非常出色嘅表現，得到甚多嘅國際銜頭，亦都經常喺國家媒體當中顯示自己強橫嘅一面；呢個當然係同佢以前任職KGB有關啦，同時間風格呢一樣嘢係非常之需要發自內心先至可以咁自然地流露出來，係冇得扮嘅。  

現時「入魔」之後嘅普京，那種不惜一切也需要入侵烏克蘭，就是到現在明知出師不利也都要死撐下去，甚至恐嚇使用核武等手段，亦都符合上面嘅8號性格原則。是次戰爭佢所堆砌出嚟嘅藉口背後嘅訊息其實也不難理解：歐盟及北約不斷「步步進逼」，背後有「美帝」搧風點火，於是乎便要「先下手為強」，如此就正正切合左8號嘅基本恐懼：怕被他人傷害或控制，亦都非常配合他們的基本願望：保護自己，能夠掌控自己的生活和命運。再簡單啲來講其實就俾啲顏色你睇。  

觀乎現時戰爭處於膠着狀態，顯然並不是普京嘅計算之內，難聽啲講，而家佢並冇任何下台階，所以俾人覺得有少少「頂硬上」嘅感覺。後續嘅發展，其實對我來講，就係有冇一個冠冕堂皇嘅下台階俾佢，不失面子之餘又可以停戰，減少損失。  

至於香港現時嘅最高領導人，我自己覺得佢未必係一個8號，佢好有機會係一個6號，仲要係我哋所謂嘅「驚青6」。喺度不作分析，若果真係有興趣嘅話可以再談。謝謝大家。