【讀者分享🇨🇳】軍訓前傳：參加「暑假軍事夏令營」的統戰經歷 (Patreon)

沈先生你好，剛剛見到你關於香港學生未來有可能都要接受軍事訓練的文章，有一些經歷覺得可以分享。  

所謂香港學生的軍事訓練，其實一早已經有，只是作為統戰工具。叫做青少年暑假軍事夏令營。入過去見識過，當年作為學員嘅每日日記仲係到，見到你篇文章先翻出嚟睇下。  

當時參加嘅心境係點嘅呢？當時自己自發走入去想見識下，最後當然長見識：軍官食煙，學識基本係冇、紅底小粉紅同學無極限北韓式愛國表現、官方無下限想洗腦promote愛國情緒、民族主義。當時仍未有運動，宜家自然看得更清。By the way 入之前突登睇完1984一次，好似打疫苗一樣哈哈。 

睇返日記，第一首學識的軍歌有以下句子：「聽黨指揮，能打勝杖，作風優良」，之後有歌唱祖國之類之類。每日都有「學習」課程，我特別抄低咗幾句，當時應該有少少嚇親我：「軍魂就是黨指揮槍」、「和平是打出來的！能戰方能止戰！」「改革開放以來，中國的法治觀念深入人心」，好彩的是我當時基本上以doublethink嘅概念看待我聽到嘅野。最後當然有首歌要學：回歸頌。當時嘅我，每句都有問號，回歸的驕傲永刻在我心上？祖國的智慧？

最恐佈嘅事情係咩呢？第一，佢有一晚播咗一套電影《紅海行動》。我會話播呢套電影係用心險惡，當時在場最細嘅係中四（或者中一，我唔肯定），其實大家都唔係大個，或者心智都唔係好成熟。套電影唔少充滿血腥恐怖嘅場面，而出現呢啲場面完全不是為咗藝術效果，我會話係為咗激發觀眾嘅愛國情懷，民族主義，即係，令大家都覺得中國好強大，外侮永遠要被中國打敗，中國永遠係偉光正。當然，可能紅底學校教育一向如此？我唔知，但呢次係我第一次感受到佢地為咗宣揚個種嘅意識形態，可以做到幾盡。去到最後完場，見到唔少人都嚇親。  

第二，有一個軍事迷嘅同學，出身紅底學校。軍事知識甚至多過某啲軍人，所謂「積極學習」的榜樣。有個環節突然邀請佢分享下入咗軍營幾日嘅感受，我地見到嘅唔係一個人，而係一個黨嘅宣傳機器同工具。係嗰個moment，滿口讚頌黨嘅偉光正，積極學習嘅重要性，表達對軍人嘅敬意。開頭同結束仲要對在場嘅軍官致敬(敬禮) 。思想改造莫過於此。但我同時會諗，當我地上堂學到長征係勝利，而不是逃亡。熟識黨史嘅佢，係咪真係咁諗？  

對了，好多日嘅中午，都會播出由你身邊同學錄音講講呢段時間嘅反省同「學習」，你講嘅野仲會有人睇過先出到街。印象中我都有寫過，家陣諗返先明白恐佈之處。大家可以試想像小朋友嘅學校每日lunch hour 就係播同學學習國安法、「基本法」嘅得著，白色恐佈，就是這樣來的。  

當然，最大得著除咗係領教過統戰心法與意識形態改造嘅厲害之餘，我都學識咗摺豆腐被，終於明白軍隊自豪感之所在(笑) 。呢次經歷一直想寫出嚟，終於有機會，警戒一下仲會生活係香港嘅人，特別係有子女或者想做父母的。  

我諗呢方面統戰係永遠唔會停止。香港人，撐住。