［年度鉅獻］「美股升咗20%後，下年會點？應該點做？（一）　—　股市唔使睇利好利淡因素，唔使睇地緣政治，甚至唔使睇經濟。齋睇冷血數字最實際。另外，到底係「有智慧不如趁勢」，定係「否極泰來」？你話呢？ (Patreon)

「美股升咗20%後，下年會點？應該點做？

「美股升咗20%後，下年會點？應該點做？

唔使去討論有乜利好利淡因素，浪費時間

唔使去討論烏克蘭打仗，哈馬斯，台灣打唔打仗，浪費時間

唔使討論會唔會爆金融危機（爆咗啦），唔使討論經濟。浪費時間

股市同經濟嘅關係，就係冇乜關係。嚴格講仲係有啲負相關

2008年，經濟增長，股市香晒。2009年，經濟收縮，股市大彈

個別例子？咁你睇2020，2021，2022，咪一樣

一年表現都已經冇乜關係，何況你地睇幾個星期幾個月

市值＝盈利Ｘ估值　—　但邊樣重要啲？

除咗睇盈利同估值，仲可以睇乜？答案係：冷血地，乜都唔睇，全量化

好消息壞消息，經濟好定唔好，任你講，所以齋睇數字最科學

用冷血嘅數字，可以反駁好多似是而非嘅myth

「有智慧不如趁勢」，定「否極泰來」？趨勢派，定物極必反？

升開繼續升，定係升得太多就爆煲？你話呢？

但如果我去量化，well define個問題，就分到高低了

過去唔一定代表將來，但連過去都fit唔到嘅，就算吧啦

1. 大家新年好，畀個年度鉅獻你。重點應該在第三篇。但講到尾，就係一路都講嘅：「美股升咗20%後，下年會點？應該點做？」

2. 2023年，大家應該回報不錯，點都應該賺錢。唔係嘅，真係檢討下，唔係講笑，拎47個國家嚟掟飛鏢都12%。當然，你全部QQQ嘅，全年五成回報添，亦唔係天方夜譚搵嚟講。你美股一半港股一半嘅，回報應該係5-7%咁上下（港股有息收嘛）—不過更重要嘅係你買得大。

唔使去討論有乜利好利淡因素，浪費時間

3. 今次唔咁多口水，直接講展望。先講美股，加埋少少其他市場，有機會先講少少港股。但記住，我唔會同你去研究乜鬼「下年有乜利好利淡因素」，唔通兩邊列晒，邊一邊多就嗰邊贏？

唔使去討論烏克蘭打仗，哈馬斯，台灣打唔打仗，浪費時間

4. 同樣地，唔會同你討論下年美國大選，甚至俄羅斯會唔會停火（應該會）以色列會唔會停火（應該會）台海會唔會打仗（應該唔會）　—　講過多次，呢啲絶對係浪費時間。

5. 甚至唔使研究「會唔會爆金融危機」　—　2023咪爆幾間銀行咗囉，美股一樣喪升。

唔使討論會唔會爆金融危機（爆咗啦），唔使討論經濟。浪費時間

6. 甚至我唔同你研究經濟增長—都真係浪費時間。2023年中國經濟增長好過美國添，so？股市呢？香港經濟增長好過好多地方添，港股又點？香港人日講夜講，新加坡又贏，又話金融又去晒，企業又去晒，遊客又去晒，結果經濟增長1%。歐洲經濟衰退，但歐股照樣升得好。阿根廷3位數通脹，股市表現就全球最好。日本一樣收縮（定你以為好多遊客帶動經濟？不如計下日本GDP幾多，遊客消費有幾多咁大把？），但日本股一樣做好。

股市同經濟嘅關係，就係冇乜關係。嚴格講仲係有啲負相關

7. 仲唔信嘅，送多個圖畀你，Facebook 寫過文。股市同經濟嘅關係？就係近乎冇關係。

8. 嚴格嚟講，就似乎有啲負關係：其實合理。首先，股票炒預期，而經濟有周期，經濟數據滯後。你見到經濟差時，往往股票已跌晒，掉轉都係。

2008年，經濟增長，股市香晒。2009年，經濟收縮，股市大彈

9. 最經典嘅例子？2008同2009。2008年，美國經濟有增長，但美股當然跌到七彩。2009年美國經濟收縮，但美股大反彈　—　咁你當然知道：2008年尾雷曼爆煲嘛，然後救市嘛　—　正是如此！所以，經濟同股市，咪唔相關，甚至係「負相關」。

10. 另外有種講法，都唔係啱晒，但有一定道理：經濟差，咪要放水囉。經濟好，咪要加息。唔係完全啱，但你拎去睇2008同2009，都係咁

個別例子？咁你睇2020，2021，2022，咪一樣

11. 嫌年代太久遠？扯，你睇2020年同2021 2022年，咪就完全一樣囉！2020年經濟梗係死，但股市狂升。到2021 2022？經濟好，但乜都升晒啦，之後加息，咪股市死

12. 見到冇？要講經濟我一樣熟過好多人，但真係浪費時間，只係聽落去好似好專業。

一年表現都已經冇乜關係，何況你地睇幾個星期幾個月

13. 留意以上，我講嘅已經係一年嘅股市！對好多人嚟講（但唔係我），已經叫做「長期」。一年都唔關事，何況啲人話睇幾個星期，幾個月？

14. 好多投資者，就係庸人自擾，驚呢樣驚嗰樣，然後到太貪心時又忘記最大嘅風險（高追！）。

市值＝盈利Ｘ估值　—　但邊樣重要啲？

15. 再講一次，股市唔係睇地緣政治，亦唔係睇經濟。咁睇乜？好簡單，還原基本步，市值＝盈利Ｘ估值。

16. 兩樣邊樣重要？好似都寫過，短期就當然係估值重要，但長期就睇盈利。而投資係睇長期，所以你問我：就盈利重要啲。

17. 另一個睇法：估值始終係鐘擺（特別係大市），但盈利可以不停上，所以最後都係睇盈利

18. 不過，盈利係好難知道的。你日日用嘅公司，你都未必知，更何況你講咩光刻機AI。例子：大家知唔知，YouTube應該係長期蝕錢的？每次我同人講啲人都好震憾。唔係喎，咁多人用，咁多廣告。但就係從來都冇賺過錢。

19. 正如之前個個話冇人用，過時嘅Facebook，盈利同收入就去到歷史新高。

20. 盈利往往唔係咁易估，亦唔係呢篇文先講嘅嘢。咁估值呢？也是一樣難估，但反而比較有個譜。因為盈利可以一路升，但估值，特別係成個市場嘅估值，都係鐘擺。

21. 今次個系列唔講盈利，但可能講少少估值。

除咗睇盈利同估值，仲可以睇乜？答案係：冷血地，乜都唔睇，全量化

22. 咁除咗睇盈利同估值，仲可以睇乜？答案係：冷血地，乜都唔睇。只睇數字

好消息壞消息，經濟好定唔好，任你講，所以齋睇數字最科學

23. 呢種方法好似「唔科學」，實情咁先係最科學。因為就係撇除晒上面啲啲吹水嘅咩利好消息利淡消息，經濟好定唔好　—　呢啲嘢絶大多數都係事後講，而且任你搬龍門。正如我話日本經濟收縮但股票照升，一定好多人出嚟講話GDP唔代表經濟。咁你問佢乜先代表，佢會話睇加人工，睇失業率，睇通脹　—　但呢方面香港就非常好添啦，咁港股又咁差？但佢地又會再搬龍門。乜嘢係經濟？任你講。

24. 甚麼「政治事件」，「危機」，一樣都係任你講。2023年美國爆咗幾間銀行添，如果年尾埋單大跌，你咪話「因為」呢啲嘢。2023年中東爆咗幾十年最大嘅衝突，如果年尾埋單大跌，你咪話「因為」呢啲嘢

用冷血嘅數字，可以反駁好多似是而非嘅myth

25. 齋睇冷血數字，有一個好大嘅好處：可以駁拆好多myth（迷思），好多似是而非，任你講嘅嘢　—　包括上面嗰啲。包括「加息股市無運行」（請睇2023），包括「經濟好股市好　經濟差股市差」（請睇2023），包括「地緣政治風險升溫就買溫唔好買股」（請睇2023）

26. 呢啲，都係幫你思考嘅方法。

「有智慧不如趁勢」，定「否極泰來」？趨勢派，定物極必反？

27. 今次系列，會特別針對一樣嘢，會睇下兩種你成日聽，而可能有啲矛盾嘅理論。一種叫做「有智慧不如趁勢」（呢句嘢廢得很），背後係相信momentum，trend，升開繼續升，「趨勢派」。第二種係「否極泰來」，均值回歸，谷底反彈，升得太盡就會爆煲，升得多就跌返，跌得多就升返，鐘擺，「物極必反」派

升開繼續升，定係升得太多就爆煲？你話呢？

28. 問題嚟啦喎：你係邊種人？你會信邊種？你覺得邊種比較可取？睇答案前，你自己諗下，同埋諗下點解。

29. 答案嚟啦喎

30. 答案係：根本係問錯問題！呢啲冇well define嘅問題，根本冇得答。你一定可以搵到例子去「證明」升開繼續升，但又一樣搵到例子「證明」升得多會爆煲。你冇好嚴重咁定義，就係廢話，浪費人生

但如果我去量化，well define個問題，就分到高低了

31. 例如點？例如至少，要有個time frame，咁先可以驗證。例如係點？美股連升三年後，多數係再升定多數跌？如果連升三年後，多數升嘅，咁你至少可以話，在呢個context下，似乎「趨勢派」啱。如果連升三年後，多數跌嘅，咁咪可以話「似乎係物極必反」　—　最重要係乜？最重要係，你可以用歷史數字驗證。

過去唔一定代表將來，但連過去都fit唔到嘅，就算吧啦

32. 雖然過去唔一定代表將來，但連過去都fit唔到嘅，好難話係咩大道理。即係點？即係有人同你講：美股升開三年，多數之後跌。咁但如果歷史上都見到唔係咁嘅，九成都再升嘅　—　咁你已經可以reject呢個理論。歷史上已經錯到九彩，都唔好講將來（而即使真係中，亦可能只係運氣）

33. 咁所以，下篇真係嚟啦喎。咁到底，美股一年升咗20%後，下年多數會點？「趨勢派」，咪話升開有條路，動力夠，繼續升（但記住一樣嘢：美股多數就係升喎）。「物極必反派」，咪話升咗咁多，冇乜力，多數跌

34. 咁，驗一驗咪知囉！

35. 順手提提你，呢啲嘢，甚至同「估值」都有啲關係。下一篇講，但戲肉應該係第三篇。不過，係不能齋睇戲肉嘅。