［預告篇］美股下年展望　—　今年升咗20%，咁下年又點？答案：多數冇咁值博。冇計，今年年頭你又唔買，升咗20%飛入去，當然貴一截。 (Patreon)

「美股一年升完20%後，下年會點？

嚴格嚟講，唔使思考的，因為有晒數據睇。

下年多數照升，但升幅好可能冇20%

但，我以上講嘅，係咪真？大家對客覯現象，係咪有同樣觀察？

我同你講股市創造財富，咁你話「唔係喎，港股呢？」—咁冇嘢好討論

賭錢係negative sum game，但冇話「任何人任何時間都輸」

邊度 verify？自己做一次！因為睇答案，你唔會學到任何嘢

好啦，美股升完20%，下年多數都升，但冇咁多　—　然後又點？

「唔夠20%但都係升丫都買得過」，定「唔夠20%不如買其他嘢好過？」

提你：今年美國執咗兩間好大嘅銀行，瑞信都香埋。你預先知道會點？

你預先知道會爆「金融危機」，有冇用？定害咗你？

BlackPink續約，哈馬斯沽空以色列，中國信貸評級被下調，侵侵上台

太古地產，盈利跌70%。嘩，商場又死，寫字樓又死　—股價連升兩日

所以，唔好問我「有人話2024年會金融危機，你點睇？」

2022年，真係有讀者問我，Elon Musk話會爆危機。真係爆。又點？

今個系列重要，應該完全唔同風格，唔再重覆嗰幾味。主要睇數字。就係「美股今年升咗20%，咁下年又點」。之後既然有讀者點唱，即管講下個股

呢篇算係導讀。記住，改變你嘅思考。

「美股一年升完20%後，下年會點？

1. 年尾當然會同大家做回顧展望，一向都話回顧重要過展望，但今年同你寫咗展望先。因為簡單啲。況且做回顧，只怕我又太快重覆早排幾篇講過嘅嘢。

2. 話埋畀你知，個展望主要係講美股（當然之後我都會講港股）。題目都畀埋你：「美股一年升完20%後，下年會點」。

嚴格嚟講，唔使思考的，因為有晒數據睇。

3. 你都可以思考下，美股今年升完20%，下年會點　—嚴格黎講呢個根本唔係「思考」嘅問題，因為大家都有晒數據，亦易搵，易計。你要嘅自己都好快睇到呢個問題（今年升完20%，下年會點）嘅答案 - 但呢啲只係最初步嘅嘢（當然好多人連呢啲都唔識），你知道答案，但點去演繹，先係最重要

下年多數照升，但升幅好可能冇20%

4. 你真係可以自己做一次，但我話定你知：美股一年升完20%，下年都多數係照升嘅。不過，升幅就多數冇20%了。亦即係話，明年好可能差過今年（但我冇話會跌，亦冇話你唔應該買。記住：係配置。唔係估以後發生乜事）

但，我以上講嘅，係咪真？大家對客覯現象，係咪有同樣觀察？

5. 呢度兩樣嘢，第一，你可以verify下係咪真係咁，我第4段寫嘅嘢，係咪真？唔好人講你又信，你應該試下自己verify 下，特別係有啲嘢好易verify（好似上面講嘅）。呢度亦可以岔開，也是張五常在《經濟解釋》講嘅嘢，李天命亦講過類似嘅嘢，我都講過—　大家嘅討論，一定要有個common ground。例如對客觀嘅現象大家都同意。

6. 否則我話美股升多過跌，你話根本唔係，咁冇嘢好討論。至於李天命就講「定義」，大家定義唔同，更加係浪費時間。而你見好多討論都係咁。例如講「香港經濟好唔好」，甚至你地同我講「股市係咪長升」。咁「香港經濟」係講GDP， 定講你搵工易唔易通脹高唔高，定講你「覺得」好唔好？同樣地，好唔好係指同預期比丫，同舊年比丫，定同歷史趨勢比？同索馬里比定同巴勒斯坦比？冇一個好大家同意嘅定義，即係嘥時間。

我同你講股市創造財富，咁你話「唔係喎，港股呢？」—咁冇嘢好討論

7. 等於我同你講股市創造財富，咁有啲人話「唔係喎，港股呢？」。「唔係喎，美股高位買都可以坐十年喎」，咁亦係浪費生命的。

8. 十分肯定地，「創造財富」，唔係講你「任何位買都唔會輸」，亦唔係同你講「任何市場都唔會輸」。正如隻嘢致癌唔係你食完就聽日死，對你有益嘅食物唔係你不停食都唔會爆肚。我以為呢啲係常識。

賭錢係negative sum game，但冇話「任何人任何時間都輸」

9. 正如賭錢係negative sum game，但唔係代表「任何人任何時間都輸」，有人發大達添　—　而呢類東西，我好肯定討論「甚麼是投資」嗰時講過。我以為係常識，但你見啲人一講投資就冇晒常識，只會同你講「港股呢？」。

10. 好啦喎，首先，你 verify下我講嘅係咪事實，係咪真係「美股升完20%，下年多數都升，但升幅多數冇20%」（留意呢度你要verify 兩樣嘢：係咪「多數升」，以及係咪「多數唔夠20%」）。你發現唔係嘅，咁未必你錯或我錯，可能年期唔同，到時再睇點解唔同。

11. 呢啲係最基本嘅練習，亦唔花時間，值得你用少少時間去試下。否則，你就往往係任人點，今日聽呢個人話有智慧不如趁勢（全無內容嘅一句嘢），升開就繼續升。聽日又聽另一個人講話物極必反，升咗咁多唔好追

邊度 verify？自己做一次！因為睇答案，你唔會學到任何嘢

12. 你問，邊度verify？「Google啦」，美股每年回報幾多，公開資料。再唔係，你問Chatbot可能都直接答到你—甚至你可能搵到我上面嘅結論。

13. 不過，我係相當唔鼓勵大家就咁去搵答案。因為抄答案，係冇意義嘅，你讀過咁多年書都知學唔到嘢。你就等於聽人點，可能今日呢條友話係咁，但你後日聽第個，又唔係咁講（點解矛盾？可能只係大家拎嘅年期唔同），你只會畀人牽住走，冇晒獨立思考（賣保險賣基金嘅人就會利用呢啲嘢：唔係假嘢，但係選擇性嘅資料）。

14. 所以，最好當然你自己由raw data做一次。實情亦都唔複雜丫，大深太花時間我就唔會叫你做，但要答「美股一年升完20%，下年會點」，我肯定90%嘅讀者，在一兩小時之內都可以做得完。

15. 邊度有source？「其實我以前有個risk and return」嘅Excel File咪有齊囉！今篇特登唔attach畀你，睇你平時有冇做功課有冇save低我啲嘢。放心，到出篇文時會放返出嚟。

好啦，美股升完20%，下年多數都升，但冇咁多　—　然後又點？

16. 而去到第二部份，即使你真係同意咗我嘅結論（美股一年升完20%，下年多數都升，但多數唔夠20%）都好　—　咁但，應該點演繹？應該點變做行動？具體啲講，你應該諗「唔夠20%但多數都仲係升丫都應該加倉」，定係「都唔夠20%不如買其他嘢好啲」，就好唔同了　—　雖然兩者都係基建於同一種數字。

「唔夠20%但都係升丫都買得過」，定「唔夠20%不如買其他嘢好過？」

17. 所以講到氣咳都再講：多思考，多諗呢啲原理上心法上嘅嘢，而唔係只係追住今日發生乜，呢個人講乜，嗰個人講乜。

提你：今年美國執咗兩間好大嘅銀行，瑞信都香埋。你預先知道會點？

18. 提提你：今年（2023）美國執咗兩間大銀行（頭20大，夠大啦？），仲有瑞信都香埋。可能你都唔記得咗。而美股歐股照升不誤。

19. 所以你不妨諗下，你一早「知」會發生金融危機，對你嚟講有冇用？甚至可能根本唔係壞事？因為如果2022年尾有印度靈童話你知「美國20大銀行兩間會爆煲，瑞信都會爆煲」—　我估你應該覺得「咁我去瞓身沽空美股歐股」

你預先知道會爆「金融危機」，有冇用？定害咗你？

20. 有關呢個盲點，極之有趣，你可以睇我明報篇文，attach埋畀你。好多人都以為，就係要估下年發生乜事。而我係唔同意嘅。一來估唔到，二來估到你都會應對錯誤。

BlackPinkg續約，哈馬斯沽空以色列，中國信貸評級被下調，侵侵上台

21. 我用咗四個例子，Black Pink續約，哈馬斯疑似提早沽空以色列ETF，中國信貸評級被下調，仲有薯條哥間公司當年因為估侵侵上台而大手沽空美股　—　四個例子，都涉及「預先知道一啲事」，大家都以為一定幫到投資，但有冇諗過會令你死快啲？Black Pink續約股價實升？真係？（雖然真係升）。偷襲以色列，佢股市就實跌？（應該係，結果都係，但只係因為以色列相對細）。信貸評級下調，股市就實跌？而最應棍嘅當然係：侵侵上台，美股就實跌？當時真係好多人咁估，但結果美股不停破頂

太古地產，盈利跌70%。嘩，商場又死，寫字樓又死　—股價連升兩日

22. 最新嘅例子，係太古地產。嘩，出盈警喎，盈利跌70%喎。香港玩完啦，寫字樓又冇人租，商場又冇人去。股價仲唔死？偏偏，就係連升兩日。

23. 想唔想知點解？好簡單：你估，今日先知寫字樓租金跌商場租金跌？要宣佈先知？（當然你再細睇，會見到佢盈利只係因為物業重估而跌），仲暗示會保持到派息

24. 呢個例子，極之簡單咁示範咗，股市係點運作，你要點思考。

所以，唔好問我「有人話2024年會金融危機，你點睇？」

25. 所以？所以，真係唔好嚟問我「有人話2024年會有金融危機 ，你點睇？」—點睇？開CNBC睇．因為真係應該2022年，真係有讀者同我講，Elon Musk話會爆金融危機喎，你點睇？　—　好啦，結果佢真係估中喎。咁但，難道我因為2023年可能會爆金融危機（最後真係爆），我就2023年頭大手沽空美股？你話呢？

2022年，真係有讀者問我，Elon Musk話會爆危機。真係爆。又點？

26. 更何況，「乜嘢叫金融危機？」—唔好笑呀，定義的重要嘛。你覺得Sillcon Valley Bank，Signature Bank，First Republic Bank（全部都唔細嘅銀行呀下！）爆煲，係咪金融危機？擺明係啦。你仲話唔係嘅，瑞信爆埋都仲唔係金融危機？但年尾你見冇乜人會咁講　—　點解？因為股市升丫嘛！見到搞笑嘅地方未？升，你咪話唔係危機囉

27. 同樣地，2022年，聯儲局暴力加息，股債雙殺　—　你一樣可以話係金融危機！因為跌嘛。

28. 但，好肯定嘅係，似乎冇理由係睇之後股市嘅反應，去「定義」件事係咪危機。否則雷曼爆煲都唔係危機啦，美股連升十年添。

29. 所以，咩叫「金融危機」？爆又點？唔爆又點？呢啲好值得你思考

30. 下篇同你解，到底美國一年升完20%，之後會點