補充幾個：你嘅投資回報，90%由資產配置決定，而唔係時機同揀股。另外，長坐係一定會中熊市，但根本唔係問題。第三，債券之後應該好，但股票更好。不過，如果60-40嘅，即使美股＂迷失十年＂，60-40三年就回家。年紀大嘅值得諗下 (Patreon)

補充：資產配置，決定你90%嘅表現，而唔係揀股

你可能揀中幾倍幾十倍嘅馬，但亦可能輸晒。所以長遠都係：唔好賭

3年就會有一次熊市：「咁咪唔應該長坐！因為長坐實遇到熊市」—錯！

11月債市，升4.5%，史上第8最好。11月股市，升9%，史上第18好

債券單月表現好後，似乎之後三五年，都會幾好

咁即係買債都好？不過留意兩點。首先，數字係幾時？第二，股票呢？

想再穩陣啲？咁就60-40

60-40．輸雙位數嘅年份，極少（可惜唔係冇）

近50年，差不多所有美股跌嘅年份，債券都升。

即使美股「迷失十年」都好：60-40，三年就已經水面

1. 呢篇短短地。算係補充少少，講點解減息都係買股票。不過，如果年紀大嘅，60-40亦相當可取（但點都要有一半以上係股票）

2. 順手少少補充，關於「資產配置決定你命運90%」，同埋「長坐咪一定會遇熊市？」

3. 有讀者話想講多啲個股，也可，不過完埋呢篇先。嚟緊仲有個展望：「美股升完20%，下年會點」—聽個題都夠吸引啦可？亦簡單易明。之後可能同你講下買乜股

補充：資產配置，決定你90%嘅表現，而唔係揀股

4. 但，既然有讀者問開個股。上篇已經強調：資產配置決定你9成命運，揀股其實真係不重要。呢個真係違反你常識，所以值得細諗。

5. 不過諗真啲：你有可能揀中升幾倍嘅嘢，但你亦有可能揀中輸一截嘅嘢。而即使你揀中升幾倍嘅股票都好：你買幾多？（其實又係配置問題）。又坐到幾耐？（所以要長線）。又係咪坐得穩？（所以要stay invested）

你可能揀中幾倍幾十倍嘅馬，但亦可能輸晒。所以長遠都係：唔好賭

6. 點解「資產配置」重要過揀股同時機？可以補充下：想像一個好奇怪嘅世界。你只可以幫襯馬會賭馬賭波。或者做定期。

7. 咁可以肯定嘅係：長賭嘅，必輸。做定期嘅，已經係最好選擇。所以根本你最初100%定期，定100%馬會，已經決定一切。

8. 固然你會話：我可能買中幾倍幾十倍嘅嘢。但另一方面，你亦有機會輸死。所以，講到尾，有時中，有時伏，拉長時間就會抵消。重點其實始終係你買邊種資產（在呢個假想例子，買定期），同埋買幾多。

3年就會有一次熊市：「咁咪唔應該長坐！因為長坐實遇到熊市」—錯！

9. 另外補充下呢個圖。有啲人嘅演繹係：嘩，咁即係我長坐，實會遇到熊市架喎（當20%回調）。答案：係！2020大家咪經歷過。但有何問題？因為個盲點係：長期投資，你更加大機會，差不多保證你會遇到一個好嘅升市。

10. 而股市，係升多過跌嘅。唔信嘅，講「美股升20%後，下年會點」我會再同你睇

11. 希望大家思考下。但再講一次，11月頭我叫你「買啦！仲等？」。咁你都唔滿意嘅，我都唔知可以點了。因為明顯地，呢啲已經係好難得嘅好月份，仲要咁啱我time得中。數學常識話你知，未來幾年，照計我都好難再有一次做得咁好。

11月債市，升4.5%，史上第8最好。11月股市，升9%，史上第18好

12. 呢兩個圖貼過，11月嘅債市，升4.5%，史上第8最好單月表現。11月嘅股市，升9%，史上第18最好單月表現。

13. 之前嘅演繹，我話你知，即係債券史上第8好嘅表現，先等於股票第18好嘅月份一半。所以當然買股。

債券單月表現好後，似乎之後三五年，都會幾好

14. 不過，不如再畀多個演繹你。如果你夠細心嘅（如果你真係有留意到，畀個叻自己），你會見到。喂，債券一個月升4.5%，我話已經係史上第8好。不過你可能留意到，個表右邊嘅嘢　—　似乎每次債券單月表現好，之後都會更好喎。坐得三年五年嘅，差不多次次贏錢。（拿！時間嘅優勢呀！），最重要係，個升幅都好似幾好。你見最好嗰20個月，打後5年，買債回報84%喎　—　咁係相當好嘅數字喎！

咁即係買債都好？不過留意兩點。首先，數字係幾時？第二，股票呢？

15. 咁望落去，似乎……買債券又唔係咁唔可取？不過，始終兩樣嘢。首先，你見入面啲月份，差不多全部都係80年代，而當時係極高息嘅年代，極高通脹，狂加息再減落嚟。似乎而家就唔係同一回事。

16. 亦即係話，債券好表現嘅月份，差不多全部嚟自80年代。仲係咪真係好比？冇答案。但你睇股票表現最好嘅月份，似乎唔係咁集中在某個時期。

17. 另外，你會見到，其實在股票表現最好嘅月份，打後5年，股票嘅表現，都係相當好，好過債券嘅（然後等我再講一次：坐足5年，平均差不多贏成個開　—　咁你堅持要拎唯一嗰一次嚟講，我唔知你係同我過唔去，定同自己過唔去）

想再穩陣啲？咁就60-40

18. 預告定（定其實係回帶？），想再「穩陣」啲嘅，60-40吧，60股票40債，55歲以上可以考慮。犧牲少少回報，但減低啲風險，值得的。你亦可以睇埋我attach嘅Excel.

60-40．輸雙位數嘅年份，極少（可惜唔係冇）

19. 咁首先你會見到，多數年份都有OK嘅正回報。而輸雙位數嘅年份，極少（但唔係冇，冇得避免，而不幸地有兩次都係千禧年後嘅事，而再上一次係1974年了）。

近50年，差不多所有美股跌嘅年份，債券都升。

20. 另外，近五十年（其實近百年都係），你見到差不多所有美股跌嘅年份　—　債券都係升嘅。未必補得返晒，60-40有好多時都要輸錢，因為股票跌幅大過債券升幅（股票本身波幅就大過債嘛！）。但至少幫到你減低損失。呢啲就係分散嘅好處，特別啱啲好怕輸錢嘅人，又或者開始接近退休嘅。

21. 不過不幸地，2022年正係少數地股債雙殺（記住，係冇得完全避免的）—但又十分弔詭地—結果2022年就係入市嘅極好機會。今年就完全反轉。

即使美股「迷失十年」都好：60-40，三年就已經水面

22. 呢個圖偉大！另外你會見到，如果60-40，即使係美股「迷失十年」，你都一早返家鄉！2003已搞掂！美股00 01 02連跌三年都好，你都好快上返水面。因為嗰三年債券表現好，00年幫你唔使輸錢，01 02要輸，但03年已經追返晒

23. 計埋數：01年輸5%，02年再輸7.2%，即係100蚊變88蚊。03年升返17%，當然係水面

24. 係咪偉大先！所以你問我，強如美股都會有「迷失十年」。咁點算？好簡單。「分散買其他嘢。又或者，「等多十年」。都唔啱聽嘅？咁60-40，已經幫你3年回家

25. 事實上60-40（以及所有分散嘅策略），就係幫你減低風險。在呢種情況，即係減低個maximum drawdown。居然有人仲要問，點解要分散。

26. 咁所以，將近退休嘅，當然係要股債分散。除非你話我知你可以在99年散晒啲股票，轉手買債，然後02年又買返晒股票，到07年就全部清倉渣現水。「點解唔順手沽空埋美股呀？」

27. 呀當然了，如果你60嘅股票，唔係美股，而係環球股票。照計00 01 02嗰幾年嘅數仲靚，但近十年就冇咁靚了

28. 下篇就講埋，「美股一年升20%，下年會點」