「美股一年升20%後，下年會點？」（四之二）　—　估值好重要！歷史係傾向「物極必反，而唔係「貴嘅可以更貴」 (Patreon)

美股升完20%後，下年多數都升，但升幅就細好多了。

咁點算？沽晒啲美股？梗係唔係。教埋你點應對

「升咗好多先買，蝕章」vs 「升完十倍可以再升」

估值：一隻嘢升咗十倍不等於就超貴，而跌咗九成亦不一定超平

「貴嘅唔代表會跌，貴可以繼續貴，可以更貴」

估值好重要！特別係睇大市，總有個譜

你睇唔同估值下入市嘅回報，咪知估值有幾緊要！

唔睇市盈率，睇equity risk premium/earnings yield gap又點？

你會見到，幾次earnings yield gap夠大時，都係入市良機

美股升咗20%後，下年回報就差啲　—　咪因為貴咗囉

你睇圖見到：2023年嘅升市，主要係因為估值擴張帶動

呢類「美股升跌完幾多，之後會點」嘅嘢，好值得思考

「其實無論美股上半年大升，定大跌」，下半年都多數升—咁睇嚟做乜？

所以：真係唔好怕咩熊市。跌完買入去，就真係一般好過升時買

1. 有讀者講，上篇都仲未入直路。唔好咁心急，係要舖排的。況且，一早講咗戲肉在第三篇（應該仲有第四篇）`。但其他嘢一樣重要。否則你去睇啲「兩句講完」得啦，但你知係學唔到嘢的，否則你都唔會訂呢度啦。

2. 卒之入直路，我地去睇，100億嘅問題：「美股一年升20%後，下年會點？」

美股升完20%後，下年多數都升，但升幅就細好多了。

3. 心急嘅，不如畀咗結論你先：就係，美股一年升20%後，下年多數都會升（但，美股係咪都係升多跌少架啦！），但平均升幅細好多　—　甚至冇「平時」咁好。簡單嚟講，升咗20%後飛入去，就當然未必咁好。

咁點算？沽晒啲美股？梗係唔係。教埋你點應對

4. 不過又係好怕啲人聽一半唔聽一半：「咁即係沽晒啲美股呀？」—唔係！我講埋對策你知，最後先解。但講埋點做：幾時都係睇你本身渣住乜。已經好多美股嘅？咁就易答：我唔會叫你沽，但你嘅新錢，應該多數都唔好再放美股。但本身冇乜美股嘅？咁你係可以繼續買嘅。

5. 因為講到尾，投資唔係睇一年。

＝＝＝＝＝＝＝＝

6. 返返去我地嘅世紀問題，我話做埋結論畀你，而家美股，值博率唔係太高。原因？就係估值。用好通俗嘅講法講：「升咗24%你先飛入去，就梗係冇咁值搏」啦。如果你講納指嘅，「升咗50%你先飛入去，就梗係冇咁抵」。如果你講個股嘅，「Nvidia升幾倍你先飛入去，當然冇咁抵」（但最好講大市，因為個股嘅盈利波動更大）

「升咗好多先買，蝕章」vs 「升完十倍可以再升」

7. 不過又嚟啦喎：事實上，升咗幾倍，不等於唔可以再升，係咪？呢個真係一定要記住。Steve Jobs死時，蘋果已經升咗N咁多倍，佢已經無人不識，好似全世界都用緊　—　但佢死後十幾年，蘋果再升咗十幾廿倍。

8. 經常都係呢種「升咗好多先飛入去驚摸頂」，同埋「但升完可以再升」嘅矛盾中掙扎，係咪？幾時都係矛盾

9. 不過留意，蘋果嘅例子係個股，亦因為盈利增長強（Nvidia嘅例子一樣）。如果講指數，嗰個「升咗好多啦喎」嘅恐懼，係更加真實，更加有道理嘅　—　雖然我話你知，實行上好簡單，唔使畏高：你分段買咪得。你總唔會所有錢都摸頂，你一買就股災，咁你之後咪低位可以慢慢買。但你一注獨贏嘅，就真係可能摸正個頂，好大件事。

估值：一隻嘢升咗十倍不等於就超貴，而跌咗九成亦不一定超平

10. 大家都知，一隻嘢升咗十倍不等於就超貴，而跌咗九成亦不一定超平。呢度就拉到去估值。成日話美股貴，咁大家都聽聞。咁但首先，有幾貴？都好難度。另外仲有最難搞嘅嘢：

「貴嘅唔代表會跌，貴可以繼續貴，可以更貴」

11. 啲人可以話，貴嘅唔代會跌，貴嘅可以繼續貴，可以更貴。的確係咁。「港股夠平足多年啦」，也有道理。但另一方面，你又見過好多貴一貴入市，然後輸到七彩嘅情況。

12. 正如眾多爭拗一樣，唔量化，就冇乜意思，只係浪費時間。以下我會說服你：估值好重要

估值好重要！特別係睇大市，總有個譜

13. 特別你講大市，個「鐘擺」更加明顯。美股都總唔會幾百倍市盈率，但個股可以。知唔知點解？因為大市唔會好似Nvidia咁，一年盈利升幾倍。咁所以，就更加睇估值。亦因為咁，指數波幅咪細啲，標指總唔會一年跌八成，但Nvidia會。當然有辣有唔辣，指數亦好難一年升幾倍，Nvidia就可以

14. 估值重唔重要？好重要！好重要！你問點量度，係難嘅。點知幾多倍？都難計。甚至你話，點知幾多倍叫平，幾多倍叫貴？都難答　—　係，好多都難答，但難答不代表估值就不重要。

15. 而如果你講「大市」，就比較易答。即係標普指數50倍市盈率，我就唔會飛入去了

16. 水就吹咗好多，睇實數。

你睇唔同估值下入市嘅回報，咪知估值有幾緊要！

17. 邊位覺得「估值唔重要」嘅，睇以上嘅圖。你話估值重唔重要？唔明嘅解你知，佢統計返，在標普指數唔同市盈率下入市，你將來10年嘅回報，最好同最壞，以及個標準差。留意個回報係每年平均

18. 我費事畫圖，但你明顯見到，平嗰時買，回報當然好過貴嗰時買啦。咁你話估值重唔重要？

19. 你講咩「貴嘅可以繼續貴」，甚至「貴嘅可以更貴」—可能幾個星期，幾個月都仲係。啲人炒發夢股都係咁講。但你見到時間一長，最後就係臣服於地心吸力　—　啲發夢股咪死晒囉。嗰時啲人都話「唔使睇估值」，邊使有盈利，貴可以更貴　—　until it doesn’t work

20. 嫌上面個圖年代久遠下話？this time is different 下話？

21. 咁睇呢圖，近代少少，也是講上面嘅嘢，畫埋圖畀你。留意個R squared好高，代表個相關性好大。好明顯的，貴買就易出事。雖然好難捉，貴可能事後先知，所以更加要分段。

22. 所以，你仲係咪夠膽話估值唔重要？

唔睇市盈率，睇equity risk premium/earnings yield gap又點？

23. 咁再畀多最後一個圖你，類似嘅圖肯定貼過。Equity Risk Premium，或者叫earnings yield gap．新鮮，2023年11月嘅圖

24. 甚麼東西？最初兩個圖，睇估值都係用市盈率，唔夠全面。即使用埋所謂嘅Shiller PE，Adjust PE，CAPE（CA係cyclically adjusted），都仲有一個盲點：冇計及當其時嘅息口。因為大家都大約見到，低息似乎可以支持高嘅市盈率，高息就支持唔到了

25. 上面嘅Equity risk premium，或earnings yield gap，無非就係計埋個債息。詳細計法？1/PE – 10年債息。我當16倍PE，1/16係6.25%，減走債息4%，就係2.25%

26. 理論上，呢個數字越大，即係股市越平，越抵搏，反之亦然。當然你幾時都可以講「平嘅可以再平」。但又係嗰句，你睇幾耐先？

你會見到，幾次earnings yield gap夠大時，都係入市良機

27. 睇返個圖（貼多次），至少你會見到，有幾次呢個東西升到好高時，都代表股市平，你買落去應該抵玩　—　只係每次你當時都覺得個世界會玩完

28. 最明顯就係2008年雷曼爆煲後，或者2020年疫前股災時（2011嗰次？我都唔肯定，可能係同歐債危機有關）

29. 咁你話，估值重唔重要？然後你睇圖見到，美股似乎已經去到近年最貴，

30. 不過有樣嘢可以補充：債息可以再跌，你債息跌多幾厘嘅，圖入面個equity risk premium，又大返幾厘，呢個亦好可能係股市仲係咁強嘅原因。

＝＝＝＝＝＝

31. 去返我地個終極問題，「美股升完20%後，下年會點？」—答咗你，多數下年照升，但升幅冇20%，甚至好可能低過「平常」時間。所以真係唔多值搏。

美股升咗20%後，下年回報就差啲　—　咪因為貴咗囉

32. 諗真啲，呢個結論，係咪令你咁意外？其實咪就係上面講咗一堆嘅嘢：市盈率貴嗰時，將來回報咪低啲囉！

33. 當然你可以拗一樣嘢：可能出年啲企業盈利大升呢？咁個市盈率咪低返。的確，幾時都有呢個可能。指數升咗，不代表一定貴咗。睇市盈率嘛，咁盈利可以增長嘛

你睇圖見到：2023年嘅升市，主要係因為估值擴張帶動

34. 不過幾樣嘢：首先，講指數，唔係個股，你盈利忽然大升嘅機會，實在唔係咁高。你睇圖見到，明顯2023年嘅升市，主要係因為估值擴張帶動，所以股市真係貴咗

35. 另外，而家係比較「正常」嘅時期。睇圖，你話雷曼爆煲後，啲盈利可以大起大落。疫情下亦都係。但我估2024年，真係好難見到盈利去到好大反彈。

36. 但當然仲有第三：扯，咁史上每次高市盈率時，你都可以咁講架啦，都可以話「可能之後啲盈利大升呢？」—事實上，泡沫總有幾分真實成份，特別去到指數，總不能係憑空亂咁升。但你睇歷史似乎都仲係見到，多數升完20%後，值搏率已經冇咁高。

呢類「美股升跌完幾多，之後會點」嘅嘢，好值得思考

37. 呢度可以再講一樣嘢：呢類東西，「美股升跌完幾多，再飛入去，之後會點」。因為好玩，亦可以啟發到你思考。

38. 你可以搵舊文，我至少寫過兩次咁嘅題材。第一次係2022年上半年好差，我睇返歷史上上半年咁差，之後會點。第二次就係2023年中，上半年好好，我又睇返上半年咁好，下半年係咪就冇嘢睇。

39. 嚟啦喎，好重要好重要：

40. 你唔使睇返，我都可以話你知：「無論上半年係好差，定好好」，你都會見到美股下半年多數係升嘅。

41. 原因？好簡單，因為美股本身就係升多過跌嘛！你個 condition係上半年升又好，上半年跌又好，出嚟都係見到升多跌少。

「其實無論美股上半年大升，定大跌」，下半年都多數升—咁睇嚟做乜？

42. 咁整嚟做乜？當然有意義。因為雖然「係咪都係升」，但真係睇到，個平均升幅似乎唔同。仲有，個贏錢嘅次數，亦都真係唔同。你亦可以將呢啲情況下嘅升幅同贏錢次數，同「所有年份」去比，咪知值博率高唔高

43. 而你睇嗰兩篇舊文，就會見到今篇講嘅嘢：估值好重要。

44. 亦即係點？即係，「美股上半年大跌後你買」，嘅回報，就真係好過「美股上半年夭升後」你買。

45. 咪就係上面啲圖講嘅嘢囉，估值好重要。你思考下，然後下一篇真係睇數字

46. 不過再講一次：美股升完20%，下年多數都升嘅，但升幅多數都冇20%，甚至比「平常」時期低，值搏率已經唔係好高（但，冇叫你沽晒佢）

所以：真係唔好怕咩熊市。跌完買入去，就真係一般好過升時買

47. 最後：其實咪真係還原基本步—唔好怕咩「熊市」—跌咗落嚟，當然更加值搏，跌嗰時唔買，唔通升晒先買？

48. 固然我叫你全天侯，任何時間都可以買，任何時間都100%股票。唔使怕跌市時接刀，亦唔使怕高追　—　但真係兩樣揀一樣的話：唔怕跌市時買嘅勇氣，先係最重要（但亦可能好耐都等唔到一次跌市，所以，都係分段啦）

49. 然後，其實上面呢啲嘢，咪已經話畀你知：歷史，係傾向「物極必反」派啱。因為估值就係鐘擺，太貴時股市會跌，太平時股市會升。

50. 雖然你唔搞咁多嘢的話，根本之前咪貼過，股市係長升嘅。除非你覺得幾年時間係好長，你等唔到，咁幫你唔到。

51. 下篇戲肉，正式講晒啲數字！但唔好以為拖時間，呢兩篇嘅嘢，重要過戲肉。否則我唔使打咁多字