通脹一般有利股市。睇下日本同阿根廷嘅例子。另外，甚麼是「通脹」？咩係「通貨」？仲有，點避免泡沫？睇市盈率都有用嘅 (Patreon)

補充講返：日本迷失N年，經濟一路有增長，但股市大跌，點解？

日本股市翻生，亦唔多唔少因為通脹

日經爆煲時，70倍市盈率。咁你話估值重唔重要？

阿根廷股市，就另一個極端—經濟差，股市都勁，因為通脹！

於是有人問：大陸通縮，係咪會拖低股市？一半半

思想實驗：估下香港嚟緊會通脹，定通縮？

係咪兩個月嘅CPI負增長，就叫做「通縮」？

而仲有一個好重要嘅問題：咩叫「通縮」？邊個話CPI係「通脹」？

通脹係「通貨膨脹」，咁但，到底乜嘢係「通貨」？普通嘅貨？

講到尾，之前嘅日本股，或者呢幾年嘅港股，係個別例子定普遍？

一般都係Always bull market somewhere，好少全部股市都一齊長衰

1. 上篇寫咗日本股市，之後可能會詳寫日本經濟，肯定好多人有興趣。但上篇主要寫咗，日本迷失N年時經濟一路有增長，但股市一路跌。兩個原因。

補充講返：日本迷失N年，經濟一路有增長，但股市大跌，點解？

2. 第一個原因係上篇講嘅嘢：通縮。名義（Nominal）嘅GDP根本係收縮，但因為通縮，而似乎經濟收縮嘅幅度，低過物價跌幅，所以經濟仲係「增長」—因為經濟增長係計撇除通脹嘅real growth。

3. 仲唔明嘅，想像下一般地方比較「正常」嘅情況：名義GDP升咗5%，但有3%嚟自物價上升，所以實際增長係2%。咁在日本嘅情況，你當可能名義GDP跌2%，但物價跌3%，所以仲有1%實際增長。

4. 問題係，企業盈利就係nominal嘅嘢，幾多億就幾多億，唔會調整物價。咁所以企業盈利反而一路跌。而既然股市睇盈利，咁股市就唔得了。

日本股市翻生，亦唔多唔少因為通脹

5. 你亦可以話，近年日本股市翻生，亦係因為通脹重臨。所以可以話通脹係好東西。特別係通縮咗咁多年，有返通脹。

6. 至於日本股市之前一路差嘅原因，當然係估值，有機會細講，但當年市盈率70倍。你真係好少見成個指數可以70倍市盈率

日經爆煲時，70倍市盈率。咁你話估值重唔重要？

7. 呢度亦可以講：有啲人話點避免呢啲悲劇。咁以前都寫過，就係避免估值太貴時飛入去。不過，就真係講就易，做冇咁易。特別係個股，大把例子，Nvidia Tesla Amazon Netflix 呢啲，高增長，你見真係好長期都好貴，亦照升，甚至後來跌都冇穿返「最初」嘅位。當你個增長一路keep到，的確50倍100倍市盈率都冇事，因為盈利升幾倍，估值又低返落嚟。

8. 但如果講成個市場，就真係有個譜嘅。70倍市盈率嘅股市，當然買落去好大機會中伏　—　但當時，當局者迷，當時我估你同我都未買股票，但肯定一樣啲人覺得「日本例外」，「歷史上冇見過咁強嘅奇跡所以幾貴都值」，「日本企業盈利可以年年升幾倍」—而家當然得啖笑，但當年應該唔少人信。

9. 再順帶一提，你話A股高位得返一半，唔多唔少都係類似嘅原因。2007年嗰期亦係貴到無倫的。咁所以，避免呢啲位一注獨贏瞓晒落去囉。你一路有錢就買，咪唔會一舊大錢頂位買。

10. 而留意，因為大陸過去N年都通脹，同日本當時唔同。所以你見A股泡沫後，都真係冇日經嗰時跌得咁多嘅

阿根廷股市，就另一個極端—經濟差，股市都勁，因為通脹！

11. 順帶一提，耐唔耐都提嘅阿根廷股市，就係另一個極端。經濟梗係唔好，但因為股市係nominal，你啲公司係賺多咗錢就賺多咗錢。當然你個股市升幅一般跟唔上通脹（阿根廷通脹講緊100%以上），但對於外國人，就唔關你事。你睇阿根廷ETF今年升五成

12. 所以你可以好粗略咁講，通脹對股市是好東西。

於是有人問：大陸通縮，係咪會拖低股市？一半半

13. 最後一提，都可能有人講，「咁大陸通縮的話股市咪唔掂」—　答案yes and no，理論上係咁。不過首先，大陸或香港股市積弱仲有好多原因，通縮應該係相當唔重要嘅一個。

思想實驗：估下香港嚟緊會通脹，定通縮？

14. 又順帶一講，作為一個思想練習，你可以估下：嚟緊香港會通脹定通縮？我冇答案，如果好明顯嘅根本唔使練習，唔好玩。估通脹嘅，當然有原因，我Facebook都有寫。你見租金升緊（留意通脹計租金，唔係樓價）。另外，個個加人工，似乎會推高物價？

15. 但講通縮嘅，亦有一定道理。除咗話零售租金跌緊外，留意而家實在有啲似2000-2003年咁。港紙太強勢，日圓對港紙跌咗一大截，所以個個去日本消費。呢啲情況同當年有啲似。咁舊文寫聯匯都寫過：貨幣唔調整，就唯有資產價格調整。

16. 我冇答案，但你真係可以思考下，然後遲一兩年睇返，自己判斷係咪啱。啱唔啱都唔係最重要，最重要係如果估錯嘅，諗下點解。

係咪兩個月嘅CPI負增長，就叫做「通縮」？

17. 講返大陸，有個好重要嘅問題：只係兩個月嘅CPI按年跌，係咪就係一個長期趨勢？以前都試過，但不見得維持好耐。

而仲有一個好重要嘅問題：咩叫「通縮」？邊個話CPI係「通脹」？

18. 當然仲有最重要嘅一樣嘢：其實邊個話畀你知，CPI負增長，就係「通縮」？我知多數媒體都咁寫。鬼佬傳媒都好多時咁寫。你問唔少經濟學教授都會咁講　—　但真的嗎？正如我經常叫你地諗，咩係「通脹」？冇人話過CPI 或PCE係「通脹」—你見嚴謹啲嘅鬼媒，CPI或PCE升3%，佢地唔會寫inflation up 3%—而係寫「gauge of inflation up 3%」

19. 歸根究底，反而中文譯得好。「通脹」全名是甚麼？「通貨臌脹」。100萬嘅問題，咩叫「通貨」？

通脹係「通貨膨脹」，咁但，到底乜嘢係「通貨」？普通嘅貨？

20. 好多人，照字面解，就以為「通貨」即係「普通嘅貨」，「一般嘅貨」，好多嘢都貴咗，咪通貨。錯。錯到七彩。

21. 你識日文嘅反而會知咩係「通貨」　—　反正中文呢個詞（仲有好多詞）都係日文借返嚟。

22. 通貨，咪就係currency！通貨即貨幣，唔係「普通嘅貨」。正如「硬貨」係硬幣，「軟貨」係紙幣，「金貨」係金幣。

23. 見到冇？好多好簡單嘅嘢，你見唔少人都係誤解。所以又等我催眠你：睇少啲網上嘅垃圾，同少啲廢柴朋友傾計，多啲思考。

講到尾，之前嘅日本股，或者呢幾年嘅港股，係個別例子定普遍？

24. 其實講到尾，之前嘅日本股，或者呢幾年嘅港股，係個別例子定普遍例子？幾明顯係個別例子。其他股市升又唔講？一句，你開個MSCI World或者ACWI咪明。之後我會貼。

25. 不過你亦可以話，呢兩個都係比較大嘅市場　—　但你見佢地「迷失」嘅時間，似乎美股（同埋歐洲）就有得升。我甚至有啲懷疑（冇乜更多論據，只係直覺），兩樣嘢係有關嘅。即係好似啲人話，「啲錢唔炒日本/中國」，去晒美股咁。

一般都係Always bull market somewhere，好少全部股市都一齊長衰

26. 因為你真係見到，一般always a bull market somewhere，美股迷失十年就新興市場好，新興市場衰十年就美股好。始終錢就真係一般越印越多，總會係鑽咗去某啲地方。

27. 換個講法：一個股市長期跌，會。短期個個股市都跌，會。但長期個個股市都跌，近乎冇發生過（當然呢度嘅長期講幾年，你咁都冇耐性就唔使討論）

28. 呢個亦係點解你要分散。而你見到，日本股迷失廿年嘅，你當時有買美股夠戥勻有突。港股嘅情況亦係咁。

29. 更何況，都未得閒寫，但你鍾意可以拎個Excel自己玩　—雖然話日本股而家先返返三十幾年前高位　—　但，分段入市嘅，都應該十年前回咗家。

30. 美股「迷失十年」嘅情況亦一樣：啲人話十年都未回家，咁你最高位買先會咁啫。你平均地買嘅，肯定唔會咁。況且都未講，迷失完十年，打後十年就極強回報。咁你話「心灰意冷」，咪走寶。咁當然啦，你當時有分散其他市場嘅，就簡單好多

31. 咁你係要最高位時all in 摸頂就冇計（點避免呢啲？都有講過，咪唔好估值最貴時飛晒入去。咁你平時都有買，咪唔會只係最亢奮時飛晒入去）

32. 當然了，叫你搞足十年八年先上水面，就多數人覺得我玩嘢。咁所以，分散唔同市場囉。其實真係唔好同自己過唔去，唔好又想賺到盡，但又唔想有風險。我提供嗰啲，已經係大多數人做得到，風險唔會太高，而又幫到你上流嘅方法。