講你都唔信：日本「迷失廿年」中，絶大多數時間經濟都正增長。但點解股市唔掂？ 仲有：雖然好多遊客，但日本經濟收縮。因為99%人都高估遊客嘅貢獻！（兼講美股破頂，債息急跌，聯儲局減息） (Patreon)

美股越升越有，真係唔使討論。但年頭你買咗未？

下年美股點？遲下講。但納指升咗四成先飛入去，當然冇咁值博。

快講市況：通脹數據唔靚，但聯儲局終之擺明會減息了。狼來了

債息5厘落到4厘樓下—其實仲高過年初水平，但股市照升兩成

股市價值嚟自企業盈利，而盈利一般長升，所以股市長升。邊部份唔明？

不過，有冇例外？有！A港股股！

仲有冇例子？仲有！日本！呢個例子先奇怪！

你冇睇錯，日本「迷失廿年」，經濟都係正增長嘅

又話增長，咁點解啲人話日本GDP低過當年？因為通縮！

你話GDP離地。咁但日本一路低失業，低通脹。咁經濟有幾差？

你記住一樣嘢：「經濟增長」睇real growth，但股市睇nominal

正係因為通縮，所以經濟增長，但企業盈利一路低過當年！股市咪唔得

阿根廷就另一個極端，經濟收縮，但股市大升。因為通脹好勁！

「日本好多遊客經濟好好」—遊客消費幾多？日本GDP幾多？

呢篇亦都相當精彩，特別係講日本嘅部份，未寫過

美股越升越有，真係唔使討論。但年頭你買咗未？

1. 事忙，快手update市況。美股越升越有，年初坐到而家你點都20%回報以上，完全唔使用腦，瞓覺都得。多科技股嘅甚至30%以上都唔奇。咁當然好似我咁有港股嘅咪會拖低啲，但點都係贏錢，爭在多定少。問題只係你買得有幾大。

下年美股點？遲下講。但納指升咗四成先飛入去，當然冇咁值博。

2. 至於下年美股點？之後可以寫下，但怕且冇今年咁好。納指今年都升咗四成，當然係貴咗不少，值博率當然低過之前。咁又返返去老問題：年頭叫你買又唔買？真係唔使搞咁多嘢的。買得大，坐到年尾，等收成。年尾都輸錢？「咁等多年」。

快講市況：通脹數據唔靚，但聯儲局終之擺明會減息了。狼來了

3. 係乜推動美股？11月係「炒減息」。到12月，都差不多，但更加似成事。雖然星期二晚個通脹數據其實唔算好靚。但重點係，之後星期三晚，聯儲局出嘅經濟預測，基本上話你知下年減息3次。記唔記得早兩日先放風話唔會咁快討論減息？唔知想點。但當然可以自圓其說：下年減息，但冇話上半年減嘛。

4. 不過呢啲根本不重要，重要嘅甚至唔係美股破頂，而係債息已經由早兩個月嘅5厘，跌到去而家4厘樓下。冇呃你，呢啲都真係11月寫「買啦！仲等？」一早預計到嘅嘢　—　但當然預計唔到咁快發生，亦預計唔到一定發生。

債息5厘落到4厘樓下—其實仲高過年初水平，但股市照升兩成

5. 另一有趣嘅地方：你睇債息水平，仲係高過年頭。但今年美股已經升20%樓上。可見只要債息一見頂，股市爆發力極強。固然債息5厘變4厘，TLT都升唔少，但當然還是叫你買股票。況且我唔係好信有人拎幾百萬港紙買TLT（仲有，TLT就應該同返個股比，唔係同標普指數比）

股市價值嚟自企業盈利，而盈利一般長升，所以股市長升。邊部份唔明？

6. 市況講完，講返強調「長線」同「股市長線係升」。之前講打乒乓波，講股市唔係賭場，係「positive sum game」，創造價值。原本係在「甚麼是投資」最尾講，但寫到一半發生其他事。唔緊要，呢度快講返。股票創價嘅價值，當然係嚟自企業盈利，正係因為企業盈利長期上升，而股市汰弱留強，所以一般指數係向上。

7. 而家個個講印度，咁我舊年已經寫過印度ETF啦！但當然同啲人問越南（較多）或印尼（較少）一樣。你話印度越南印尼經濟會好，根本唔使討論，肯定好。但經濟好不一定等於企業盈利好，企業盈利好又不一定等於股市好　—　特別你睇一年半年，可以完全相反。但你睇得幾年嘅，就一般會見到（所以，要長線！長線就令到你啲「想法」實現）

不過，有冇例外？有！A港股股！

8. 咁但，有冇例外？有！邊度？都講過。中國。其實亦即係港股。問題在邊？寫過了。經濟一樣有增長，但對企業唔友善　—　唔係一路如此，但由習近平上台後就見到係咁。咁所以根本唔使七嘴八舌blahblahblah，你企業盈利唔得，咪港股唔得　—　　但呢個並唔代表「經濟冇增長」。經濟增長而企業盈利跌，就真係十分中國國情嘅一樣嘢了　—　幸好，呢個係好特定嘅例子（不過，小心越南嘅情況都可能係咁。印度就會好啲嘅，始終民主國家，好難特別仇商，好難太過國進民退。呢啲在我寫印度ETF都寫過）

9. 關於港股種種，信報月刊寫咗，attach埋畀你。有啲長但夠詳細，而上篇文都貼過上面嘅圖，一目了然。雖然類似嘅東西，早排都寫過。你睇騰訊5年前咩盈利？而家呢？相反，Facebook Nvidia嘅盈利就不停破頂。再加埋中資估估值收縮（可能因為政治風險，可能因為前景放慢），咪會見到有咁情況。

仲有冇例子？仲有！日本！呢個例子先奇怪！

10. 咁仲有冇另一個例子？有！日本！不過更有趣嘅係，日本在所謂「迷失廿年」，經濟大部份時間都係正增長的（金融海嘯當然全世界都收縮）　—　係！你冇睇錯，好多人係唔知的。

11. 只係呢個圖，已經值回票價啦。你見日本GDP，長期都係正增長。冇錯係慢，但唔係「倒退」。

你冇睇錯，日本「迷失廿年」，經濟大多數時間都係正增長嘅

12. 咁但，點解你有時聽到啲人話，日本GDP仲未返到當年水平？因為一樣嘢：通縮。

13. 我諗我寫過無數咁多次，what we talk about，when we talk about 經濟？甚麼是經濟？甚麼是經濟增長？

又話增長，咁點解啲人話日本GDP低過當年？因為通縮！

14. 首先，經濟就真係應該睇GDP，冇得傾，真係冇更好嘅一個single indicator，你見人地認真討論都係用呢樣嘢講

15. 咁但當然，有啲人覺得係「象牙塔」嘢，的確有時同「普通人」嘅生活可能脫節。咁你問普通人嘅，最大影響，一定係開工足唔足，有冇人工加，易唔易搵工，同埋啲嘢貴唔貴　—　即係「就業＋通脹」。你見講「痛苦指數」都係呢兩味。

16. 畢竟你有工開，加人工，然後通脹唔勁，唔會加埋人工都追唔上物價，咁你就好難話「經濟好差」　—　呢個正係香港而家嘅情況！所以香港人是好有趣的！（不過，香港呢排你做老細就冇咁爽。請唔到人，人工升，但產品又加唔到價。所以老細aka資本家心中嘅「經濟情況」同普通打工仔，真係可以唔同）

你話GDP離地。咁但日本一路低失業，低通脹。咁經濟有幾差？

17. 咁如果你用呢個標準，日本打工仔體會到嘅經濟一路都係咁差（日本讀者應該講粗口了）。基於好多原因（亦有文化同政治上嘅原因），你見日本長期都失業率都唔太高。通脹就更加係冇，甚至好多時間係通縮。

18. 咁，日本既然一路低失業，低通脹（甚至負通脹），仲要經濟有增長。咁啲人講話「迷失十年」係乜？頂多增長慢啫，但點解又話倒退？點解日本股市又頹足多年？

19. 呢度涉及一樣好淺，但好多人都完全唔理嘅嘢：甚麼是經濟增長？

你記住一樣嘢：「經濟增長」睇real growth，但股市睇nominal

20. 你平時在媒體上見到嘅「經濟增長」，就是GDP growth．有時按年，有時按季，有時按季再年度化　—　但重點係，你見到嘅，差不多全部都係「實際增長」，亦即係real growth

21. 即係乜？即係，扣除咗通脹嘅增長。換句話講，有啲傻仔會以為「經濟增長3%但通脹5%其實即係負增長」，錯到無倫。因為你平時見到嘅「經濟增長」，係扣除咗通脹—　　實際上嘅技術嘢好複雜，計real growth 嘅「通脹」同平時你咩CPI PCE係另一樣嘢，但原理上係咁。

22. 搞清晒呢啲嘢後，你就明白個重點：日本冇錯係有「經濟增長」，但上面講過，「經濟增長」係計及通脹嘅嘢　—　偏偏日本好長時間係通縮嘅。咁即係乜？即係個GDP嘅數字金額，之前一路跌，只係因為通縮，所以話經濟仲有增長。

23. 舉個例，可能舊年GDP係1萬億，今年係9800億，你話收縮2%。但假設通脹係 -3%，咁就變咗個GDP「實則增長」1%．

24. 好誤導？其實唔係。計real growth當然係有原因，只係日本嘅情況比較特別咁解。亦都同樣地，你可能見到有啲地方，GDP由900億變到10000億，但依然「經濟倒退」　—　若果通脹好高嘅地方就會。

25. 講咗一大輪，即係點？即係好簡單。冇錯，日本嘅經濟係「增長」，但只係因為通縮。咁固然都係real growth。

26. 但你可以抄低呢句嘢：企業盈利，就係nominal 嘅嘢。股市，亦係nominal．

正係因為通縮，所以經濟增長，但企業盈利一路低過當年！股市咪唔得

27. 正因為通縮，所以即使經濟有增長（real growth），但企業盈利往往係負增長。咁就死得。因為我地平時睇股市估值，睇咩市盈率，都係睇間公司賺錢，係nominal 嘅嘢。

28. 好極端地講，你間公司當年賺10億，而家賺8億—咁就算當中「經濟增長」都好，其他嘢不變下，你嘅股價都應該係當年嘅80%。

而你亦可以話，正係因為而家通脹重臨，日本股先翻生！

29. 以上呢種real vs nominal嘅問題，林少陽早排在明報都有講，又attach埋畀你。順手話你知，係我inspire佢寫呢篇嘢嘅，佢就在日本，我同佢傾開計，咁佢在日本當然懶諗題目，就將我同佢傾嘅嘢寫落去　—　然後再講一次，你地網上睇嗰啲，堅係垃圾。

「日本好多遊客經濟好好」—遊客消費幾多？日本GDP幾多？

30. 關於「日本經濟」，遲下整個專題講。因為真係好多人錯到七彩，基本嘢都錯晒。例如好多人真係以為自己點巴閉，「個個香港人去日本就拉動日本經濟」。又或者以為股市好即係代表經濟好（甚至以為股市好就帶動經濟好）。又或者以為日圓大跌就幫到出口幫到經濟（唔使入口嘅？）。請睇，日本經濟最新係收縮嘅

31. 定你班友真係以為好多遊客就帶動經濟增長？你可以諗幾個問題。第一，日本一向都咁多遊客架啦。個「帶動」嚟自乜？第二，嗰啲咩「旅遊業貢獻GDP幾多」嘅數字，有冇認真用腦諗過？例如你可能聽話泰國旅遊業貢獻兩三成GDP—問題嚟啦喎，疫情間，零旅客啦　—　但你有冇見泰國GDP冇咗兩成？又唔會架喎。但當然仲有第三，你講到日本游客洗幾多錢咁大把。即使用上面嘅粗淺計法，有冇計過，其實佔日本嘅GDP幾幾多？

32. 你可以極速望下，一季遊客消費，應該1.2萬億日圓。一年就5萬億日元。然後睇下，日本GDP幾多？答案係600萬億日圓。

33. 咁所以，5萬億vs 600萬億，你覺得多咗人去日本，就幫到日本經濟？

34. 但我保證，你問其他人，十個有九個都同你咁講，都話你知多返好多遊客，消費力強，旅遊業好重要　—　根本冇人發現，日本經濟嘅貢獻，唔係嚟自啲遊客。