照計大家唔會買私募基金（雖然有啲有上市）。但由呢啲超級大戶，我地睇到啲乜？留意，啲友買私募基金，都係預15-25%回報，7-12年，但低波幅。呢啲就大戶啦！學下啦 (Patreon)

投資就係長線，長線就係三五七年，甚至十年廿年

股票係投資，但唔代表你任何買法都係投資

私募基金，是甚麼東西？

咪又係炒嘢。咁私募基金，同普通基金，有乜分別？

副作用就係，私募基金嘅流動性低。但你話呢個係壞事？錯，係好事！

所謂「缺點」，如果你唔介意，就會變咗優點

Liquidity premium：太古A太古B

同樣地，你投資嘅回報，嚟自你肯接受風險—因為好多人唔肯

私募基金，投資年期7-12年，回報15-25%，波幅低。有乜啟示？

今日又試下用啲新角度講故事。睇下所謂嘅「超級大戶」，私募基金，同埋傳奇嘅耶魯基金Yale Endowment，到底點投資？佢地一樣係長線，分散，「同埋一年15%咁上下」

亦可以特別留意10-16段講嘅嘢

投資就係長線，長線就係三五七年，甚至十年廿年

1. 兜兜轉轉，講一大輪。其實投資一定係「長線」，長線講緊幾年，好難答實你幾多年，但都話係三五七年，甚至係十年廿年。啲人聽到呢度嘩嘩聲，甚至以為我講笑。但唔少我賺咗幾個開嘅股票，都坐咗五年，甚至十年（當然你今年年頭買Facebook Nvidia都可以一個開，呢啲亦係投資，只係唔係成日會出現，況且同一個操作，亦可以令年一年輸70%。）

2. 之前寫過「甚麼是投資」呢個系列，半途停咗，但都係講「股票就係投資」（我冇話「只係得股票先係投資」，邏輯要清晰），因為佢創造價值。搞清楚，創造價值唔係因為股票會升，而係因為背後嘅盈利一路升（你可以話買樓都係咁，租金一路升）

股票係投資，但唔代表你任何買法都係投資

3. 問題係，即使股票係投資，不代表你「任何買法」都係投資。否則我唔會話買股票係投資，賭期指唔係投資。因為你諗真啲，買標普指數咪即係睇升，咁同我買期指有乜分別先？好似冇乜分別，如果你係睇幾日的話。所以，係咪投資，除咗睇工具本身，亦睇你點去用（當然，你買期指長坐都唔會變投資的）

4. 今日忽然見到有篇嘢講私募基金private equity，所以想借題發揮講多啲。又係講甚麼是投資，你應該預期乜回報，以及點解要長線

5. PE是甚麼，詳細是甚麼我就不解，著實我亦都唔係好熟，冇做過相關嘅工作，肯定有讀者熟過我。但大家可能都聽過下，例如凱雷Carlyle。之前入股中國麥當勞，後來又賣返出去，賺一大筆。

私募基金，是甚麼東西？

6. 極簡單嚟講PE就係Pool咗一大堆人嘅錢，但係去買啲冇上市嘅東西。最常見可能係上市前投資，咁上市咪套現。又或者有啲上市公司會賣盤畀PE，然後執靚佢又再上市。

7. 咁PE嘅錢邊度嚟？可以係好多人，理論上可以係個人投資者，因為PE公司自己亦都可以上市，正如基金嘅公司（例如香港嘅惠理Value Partners，外國嘅BlackRock）都可以上市。

8. 但多數都係其他機構投資者，有錢佬，保險公司，養老基金（上面篇文就有講）。仲有傳奇嘅耶魯基金Yale Endowment（呢個陣間細講，耶魯咁有錢，亦多得呢個基金。啲友捐咗錢，呢個基金再去滾大佢）

咪又係炒嘢。咁私募基金，同普通基金，有乜分別？

9. 咁PE同普通基金最大分別在邊？其中一個大分別，就係PE 買嘅係非上市嘅東西。但你買隻基金，一般都係啲公開有得trade嘅嘢。

副作用就係，私募基金嘅流動性低。但你話呢個係壞事？錯，係好事！

10. 所以一個「副作用」就係，PE嘅流動性低。你買股票嘅，想套現，基本上兩日實收得。你有孖展戶口嘅根本即日已經拎到錢走。基金嘅，都可能係多幾日。但PE，就不能你話沽就沽，往往要鎖你

11. 咁你話呢個係「缺點」？呢個就係我最想強週嘅東西！唔該，一定記住以下嘅嘢。因為唔會太多人同你講。好重要！好重要！好重要！

12. 所謂「缺點」，根本係相對嘅，特別在投資市場上。因為啲係有個價的，啲「缺點」往往反映在價格上。掉返轉頭，如果呢啲好多人唔鍾意嘅「缺點」，你唔介意，就變咗係你好大嘅優勢。

所謂「缺點」，如果你唔介意，就會變咗優點

13. 講得極端啲，個男仔或女仔好靚，但原來扯大鼻鼾嘅，個個都頂唔順。但咁啱你天賦異稟，你係瞓到隻死豬咁嘅，咁就一拍即合。你就壓倒其他更好條件嘅人，抱得美人歸　—　留意佢嗰樣唔好嘅嘢，冇消失過，但因為某啲原因，你食咗，其他人唔食。

14. 好多時商業個世界就係咁，其他人受唔住嘅嘢，你受得住，就有額外補償畀你

15. 唔講咁深嘅，等於可能份工開通頂，但有啲人天生就係夜貓。其他人頂唔順，佢反而無所謂，咪拎多啲人工。

16. 你睇Money Ball亦有講，有啲球員可能樣樣衰衰，或者個名奇奇怪怪，但呢啲同佢地打波嘅能力無關。佢地因為呢啲嘢而變得平，你去招攬，咪有著數。

17. 咁同投資有乜關係？有，liquidity premium！講術語即時好型

18. 夠老嘅投資者，知道香港有太古A同太古B，19同埋87，本質上係同一樣嘢，但太古好早玩同股不同權。已故嘅東尼（Tony Measor，都香咗好多年），一路講佢買太古B，唔係太古A。點解？正係因為太古B嘅流動性低好多。你心諗，傻的？點解買流動性低？但正係因為流動性低嘅嘢，好多人唔願買，反而抵買。

Liquidity premium：太古A太古B

19. 換一個角度，「流動性」係好多人要求嘅嘢，佢地會畀溢價。但你唔要求呢樣嘢，就有平嘢。類似嘅故事，你可以拎去睇Google A 同 Google C

20. 咁即係點？套落PE嘅例子，正係因為PE嘅投資者犧牲咗流動性，佢地就換到更大嘅回報！呢個亦可以話係「等價交換」，唔係有更高嘅回報，我點解要犧牲流動性？

21. 套落去我地嘅主題，其實差不多。好多人都係要出出入入，你唔使嘅，你坐得長嘅，就值得有更高回報。

22. 畢竟我好似成日講，但永遠冇乜人理嘅一個問題：點解你會有回報？點解市場要獎勵你？唔係你有乜咁叻，係因為你犧牲咗一啲嘢。例如講「甚麼是投資」，我已經講過，在個比較哲學嘅層面，投資就係犧牲咗今日嘅享樂，換除日後更大回報。

同樣地，你投資嘅回報，嚟自你肯接受風險—因為好多人唔肯

23. 而另一個講法，我亦講過，Price of Admission．呢篇係極好嘅文（唔係我寫）。風險就係price of admission，唔存在你又怕風險又要高回報。實情你嘅回報，就係嚟自風險嘅取捨。食多啲風險，瞓得冇咁安樂，自然回報高啲。想穩穩陣陣做定存，自然回報低。

24. 不過呢個系列亦有一個核心思想：風險，係可以通過一啲嘢去減低。首先係分散，另外係長線　—　留意，兩樣都係好多人會質疑，好多人唔想做嘅嘢　—　正係因為咁，先會有用！人人怕做嘅嘢，你去做，自然有回報。

私募基金，投資年期7-12年，回報15-25%，波幅低。有乜啟示？

25. 講返篇PE嘅報導，好短啫（下面條友講自己嘢你可以唔使睇），你可以留意下，有邊幾個重點。即係話，畀你「間書」，會間邊段？

26. 佢報導嘅標題，固然係講呢啲嘢係退休基金新寵。上面都有講，耶魯基金傳誦一時，亦因為耶魯基金係比較早去投資私募嘅大學endowment 　—　你諗真啲，你唔係好預期大學嘅endowment 會買呢啲嘢，你亦可以話係因為人做佢唔做，先有好回報。

27. 但我特別想你留意一樣嘢：私募資產的投資期平均約7至12年

28. 見到冇？根本呢啲投資年期，唔係天方夜譚。我唔明做乜經常有人同我講「人生有幾多個十年」「in the long run we are all dead」，呢排唔少人同我講，我其實唔知佢想表達乜。

29. 你見啲人，平時講咩大戶心法，咩神級交易員，咩大戶。咁你見，大户一樣係坐咁長，只係你平時只留意啲炒出炒入嘅「大戶」

30. 另外，亦可以留意報導入面嘅一句：私募資產因投資期長，故可緩和投資市場的波動性　—　波動性係乜？咪就係風險。你坐得長，咪低風險。

31. 仲有最重要嘅一句：加上每年回報可高達15%至25%　—　其實我好懷疑去唔去到25%，但當然佢賣花讚花香，會講大啲。但，「大戶」都係15-25%一年咋下。呢啲就係realistic 嘅回報　—　仲要係大戶，仲要好可能係樂觀估計，仲要係犧牲咗流動性，坐得長。

32. 所以，唔好再同我講嗰啲「我希望3年100萬炒上500萬」之類嘅不切實際想法，或者「我唔貪心但希望無驚無險一年20%回報」。寫過好多次，比較好彩嘅你一年可能可以去到15%，勁叻又有啲運氣嘅嘅可能去到20%，但比較正常嘅預期，都係10-15%　—　固然不代表唔會有讀者幾年啲嘢升幾倍，有可能。正如如果我有幾百萬個讀者，都總有個會中六合彩，但呢個唔係你合理嘅預期。