［減息，一樣係買股票］（一）：AKQJ10，排球隊故事。如果魚蝦蟹買中雞係一賠十，我根本唔使理任何嘢，狂買雞就得。 (Patreon)

減息，點解唔係買債

美股已經連升4星期，挑戰歷史高位

減息又買股票？係！咁加息呢？都係買股票！咁即係冇講過？睇你點睇！

有冇聽過一個叫做「煙傾女積十」嘅遊戲？騎呢到一個點

派牌估公仔，估中有分，煙5分，傾4分

我個同學，就不停「煙！煙！煙」。無聊到一個點，但點解？

咁但，同我地講投資有乜關？好簡單，股票就係煙，債就係10

對，有啲時間，債券會跑剷贏。但why bother？正如有時會出King

例子：排球隊，S隊同B隊。大家都有機會打爛地，但最後技高者勝

1. 我個人覺得呢篇係近半年最有趣嘅文，值得你珍藏，亦都唔長。雖然可能有啲奇怪

2. 快手完埋呢個系列。呢四篇集中講「減息，點解唔係買債」

減息，點解唔係買債

美股已經連升4星期，挑戰歷史高位

3. 買啦？仲等！咁你見美股已經連升4個星期，挑戰歷史高位。

4. 故事大家都知，通脹受控，加息應該差不多搞掂。嚟緊睇幾時減息，而當然債息係率先下跌。

減息又買股票？係！咁加息呢？都係買股票！咁即係冇講過？睇你點睇！

5. 咁即係，減息買乜好？好多人會有唔同嘅想法，但好似寫過多次：當然都係買股票。下？減息又買股票？係！咁加息呢？都係買股票！扯，咁即係冇講過！Yes and No，但真係買股票，冇乜點死錯人。

6. 詳情，你可以睇返我在信報月刊嘅文，attach埋畀你，有埋兩個表，雖然我估多數人都唔睇。

有冇聽過一個叫做「煙傾女積十」嘅遊戲？騎呢到一個點

7. 費事成日寫得咁悶，畀個可能有啲騎呢但有趣嘅真人真事你聽。我唔知大家，有冇聽過一個遊戲，叫做「積傾囡積十」（正是AKQJ10），多數你都冇聽過，有嘅話我知。我懷疑係我一個騎呢小學同學發明出嚟嘅，因為除咗嗰一次我聽過後外，從來都冇聽過呢個遊戲。

8. 是咁的，近四十年前，我仲係小學生。嗰時冇手機，乜都冇，又冇乜王管。唔知搞乜，可能出去參觀定乜，坐一程好長嘅巴士返屋企。嗰時啲小學生，坐巴士，時間仲好似好長，可以玩到好多遊戲。同學唔知做乜有副啤牌，而我地好乖的，唔會賭錢，甚至唔會鋤大Dee．佢就提議玩呢一個，我聽都未聽過嘅「煙傾囡積10」遊戲。

派牌估公仔，估中有分，煙5分，傾4分

9. 遊戲是點嘅呢？好簡單，佢就拎副啤牌出嚟，一隻一隻咁派出嚟—實情我派，甚至搵第個師奶派都得，不是重點。然後，參賽者，即係我同佢，就去估開出嚟嘅係乜牌。估中煙（A）嘅就5分，估中傾（K）就4分，咁囉。

10. 好啦，寫路去之前，你不妨諗一諗，呢個遊戲玩落去會點。點解呢個遊戲騎呢之極，lame到不能，Pathetic之極

我個同學，就不停「煙！煙！煙」。無聊到一個點，但點解？

11. 遊戲開始，我好快就發現無聊到一個點。因為我就得閒估下積，得閒估下十。但我個同學，好似撞邪咁，只會不停咁估「煙，煙，煙」，佢根本唔使睇出咗乜嘢牌

12. Of note：理論上出晒四隻煙，佢就唔會再咁估，又或者出咗三隻都可能要變。但總之，初段時就係咁，而根本玩咗一陣，已經完全唔好玩。

13. 你仲係唔明？咁我解到明。你固然可以去「time the market」，去估下會出傾定10。問題係個遊戲設計：隻煙5分。「咁根本已經唔使討論落去」，你嘅最好方法，就係不停咁估煙。

14. 仲唔明？再講白啲。根本你估傾，都唔會畀佢估煙有幾多優勢　—　就算有，都會被煙嘅高回報蓋過晒。所以根本唔使估，十分lame地，佢就不停估煙。無聊到一個點。

15. 用一個懶係學術嘅方法講：expected return＝payoff X odds．但當大家估個odds都冇優勢，咁梗係揀最大payoff嗰個。你玩魚蝦蟹，六門一樣回報。如果買中雞1賠10，咁你根本每一舖都長買雞就得。

咁但，同我地講投資有乜關？好簡單，股票就係煙，債就係10

16. 咁同我地講投資有乜關？好簡單，股票就係隻煙，債券係10（或者積）。股票長期跑贏其他資，是常識。你唔信嘅，睇埋我個Excel．

對，有啲時間，債券會跑剷贏。但why bother？正如有時會出King

17. 對，嚟緊我地都仲會討論，可能你會見到某啲時期，可能債券係跑贏股票，真的有何能。但why bother？首先，你估呢啲時機嘅能力，有幾高？另外，就當你估中都好，捉到一啲債券跑贏股票嘅時期都好　—　咁你幾時褪返出嚟，轉投股票？冇人話你知。

18. 但第三，最重要嘅：唔量化的話，好似係「各有勝長」，有啲時間股票好，有啲時間債券好。有時開傾，有時開煙。問題係：首先，股票跑羸嘅時間，一定多過債券跑贏。另外，股票跑贏嗰時嘅升幅，遠遠夠cover跑輸債券嗰啲時間輸咗嘅嘢

19. 所以，Practically，你根本唔使搞咁多嘢。唔係「哦見到減息就去買債」，首先，已經升咗。另外，真係唔係咁思考。你唔使好似小學埃汾咁，估傾估10，你係好似我小學同學咁，不停估煙，已經夠。佢當然會「估錯」，但不見得我會準過佢。最重要係：佢估中時嘅回報，一定高過我估10估積。

20. 第時我發咗達，變咗畢菲特，就肯定會講呢個遊戲。呢個例子呢篇文，極之有佢嗰啲故事作風格。

21. 呢個故事，好值得你去思考。

例子：排球隊，S隊同B隊。大家都有機會打爛地，但最後技高者勝

22. 其實我在信報月刊都用咗個例子，但當其時諗唔起「煙傾女積十」呢個故事，否則應該寫落去。我在信報月刊嘅例子，冇咁好，但反正寫咗，我又重新解一次畀你知。

23. 假設有兩隊波，你當打排球，打好多局。S隊同B隊，S隊明顯實力較好。問題係，個場地開分兩邊，你當有邊係爛地，只要你在嗰邊打，點好波都難打。即係如果S隊在好地B隊在爛地嘅時間，當然S隊極大優勢。但如果B隊在好地S隊在爛地嘅時間呢？就係B隊有極大優勢贏（雖然S隊好波啲）

24. 問題嚟啦，你係個落注嘅人。我當賠率一樣，成個賽事，你應該買邊隊？取決於乜？你應該問乜問題？

25. 首先你應該問，「咁根據乜機制，決定邊隊在爛地？」「大家有幾多時間在爛地？」。問得好，你可以當係有個轉盤轉出嚟　—　但實際上個轉盤十格有七格都係B隊爛地，補充話你知，B隊在爛地嘅時間比較多

26. 仲有第二個問題：S隊在爛地時，會係劣勢，但會輸幾多分？B隊在爛地時，又會輸幾多分？咁話你知，由於S隊實力強啲，所以佢地打爛地都會輸，但只輸少少。但到B隊打爛地時，就會兵敗如山倒。

27. 寫到咁，你絶對明晒：既然多數情況係B隊爛地，仲要S隊實力高啲，打爛地時輸得少，打好地時贏得多，咁梗係買S隊啦。

28. 正是如此。畢竟，S隊實力較強，仲要B隊多數都打爛地。

29. 寫到好明啦，S隊係股票，B隊係債券。你可能會話，下局係爛地啦喎，咁我老死買B隊！可能係，我唔知。但首先，你不能只買一局，你買成個賽事。甚至冇人提你幾時大家轉場地。另外，根本S隊實力強啲，我盲買落去，必定好過你買B隊。正如我小學同學長估煙一樣。

30. 你根本唔使因為估加息減息，而去買債，咁往往因小失大。

31. 用金融語言講：A）多數時間，都係股票跑贏。B）股票跑輸時，唔會輸好多。但股票跑贏時，可以贏好多 C）你亦好難估到，幾時係邊樣跑贏。所以三樣加埋，當然長期係股票跑贏，我根本唔使搞咁多嘢。

32. 好好思考下，之後嘅文再講。但結果真係畀晒你：幾時，都係100%股票，買乜鬼債。除非你差不多退休（但退休都應該有60%股票）

33. Last thing：我甚至連我同學叫乜名都唔記得，亦唔記得個樣。相信佢同我都估唔到，四十年後我會記得呢件事，仲要可以拎嚟寫文講投資。果然人生唔係一條直線，Steve Jobs去Sit書法堂，居然幫到佢大業。

34. 所以，思考比一切嘅「硬技巧」都重要。