買啦！仲等？（外傳）—　有關De=rating，再講多啲　—　盈利升，股價係可以跌的 (Patreon)

有關De=rating，再講多啲　—　盈利升，股價係可以跌的。美股都會

股市當然係由盈利推動，唔使拗呢樣嘢。

德國股神科斯托蘭尼嘅「狗同主人」理論

三點補充，睇「金句」要小心

小心：你就咁Google，會搵到唔少垃圾

你應該長期追蹤啲好嘅作者，而唔係有事Google

唔係喎，埃汾話啲Blogger曲解科氏，但佢自己都有唔同演繹喎

盈利同股價，當然係「有關係」，但唔係同步。所以實脫節。

而我不知道「經濟」同「股市」可以點同步

澳門經濟增長100%，咁馬交股係咪升100%？又，澳門經濟好唔好？

Facebook 盈利新高，但股價未新高。大家樂友邦更不用講

咁既然股價同盈利都唔同步，盈利增長都可以股價跌，咁盈利咪冇用？

我個幾鍾意今次呢篇，簡簡單單，但幫你思考

1. 繼續呢個「買啦？仲等！」嘅系列。呢篇應該算係「外傳」

有關De=rating，再講多啲　—　盈利升，股價係可以跌的。美股都會

2. 補充少少之前嘅文，有講過港股嘅De-Rating。記住好有用嘅方程式，市值＝盈利X市盈率。De Rating就係市盈率跌得好勁，往往令到你盈利高咗，市值都仲會跌。但呢種現象，唔止出現於港股，其實成日發生，只係程度上分別

3. 咁而應該寫過好多次，最後推動股價嘅，都係盈利。你講幾日就乜都唔使解釋，但長遠地，股市都係由盈利推動（留意，唔一定係經濟，兩樣嘢，雖然經濟去到崩潰的話盈利好少唔死）。

股市當然係由盈利推動，唔使拗呢樣嘢。

4. 請不用同我拗呢樣嘢，十分簡單，你睇返全球最大市值嘅公司，基本上同全球最賺錢嘅公司，都係差不多同一堆。咁仲使講？即使你話有一期，蝕錢但狂升嘅公司，Tesla NetFlix 同Amazon之類，最後都真係賺大錢（雖然未必有蘋果微軟咁多）。真係長期輸錢嘅公司，係會死的，例如WeWork

5. 仲唔信嘅，呢個圖。講完（2019年的，懶搵新，但原理一樣）

德國股神科斯托蘭尼嘅「狗同主人」理論

6. 但你睇上面嘅例子都知道，盈利同股價之間，往往唔同步。好合理，因為投資幾時都係炒預期。幾日就固然唔使討論，但即使係中長期，往往都唔係真係同步。德國股神科斯托蘭尼嘅「狗同主人」比喻好，盈利係隻狗，股價係個主人，咁你放過狗就知係咩回事。

三點補充，睇「金句」要小心

7. 呢度補充三點。第一，科斯蘭托尼啲書係好東西。不過聽落淺其實深，因為佢未必有乜實例，而佢已經死咗好多年，佢啲書你當普通書咁睇，欣賞下老人家嘅智慧，但切忌就咁背金句。

8. 你應該做嘅，係成本書睇，感受佢。反正佢啲書唔長又唔深，好快睇完。咁我知你話冇時間。但即係，寧願你用睇1000句金句嘅時間，睇一本書。真係唔得？「咁可能金句都唔好睇」，因為識少少扮代表，可能仲危險過唔識。

9. 第二，佢個比喻原本係講「經濟」，但我不太同意，我認為係「盈利」。上面嗰類股市VS盈利嘅圖，如果你用股市VS經濟，應該冇咁靚嘅。

小心：你就咁Google，會搵到唔少垃圾

10. 最重要係第三：如果你學我咁，就咁上網Google「科斯托蘭尼　狗和主人」，你會搵到好多垃圾。例如呢篇。我搵到好多台灣文（可能因為科斯托蘭尼在台灣比香港出名），好多都咁夾曲解咗個理論，夾硬用科氏啲嘢，去講自己想講嘅嘢。例如頭先嗰篇，人地原本講係經濟，佢就講咗係「均線」—完全兩回事。寫文嘅都係咁（公平講句，都唔算好垃圾，但曲解咗），YouTube上更多垃圾。

11. 而特別留意，你在YouTube IG Facebook，甚至用Google，唔多唔少出嚟嘅嘢，都同你平時睇嘅嘢有關。大家聽過啲算法，迴音谷之類，你鍾意食屎嘅，質多啲畀你食。所以我經常叫你地，平時唔好睇咁多垃圾。有啲可能以為朋友send畀佢，睇下無妨　—　但你真係高估咗自己嘅自制力，「好似吸毒咁」，一次都唔好試。你睇睇下固然自己都變埋垃圾，就算你睇完唔信，都會在你上網習慣度留下痕跡呀。

你應該長期追蹤啲好嘅作者，而唔係有事Google

12. 所以第四，識睇當然睇原文。唔睇書都好，你睇Blog也可，搵啲好嘅作者，然後長期追佢嘅文　—　而唔係想知乜就去Google然後睇彈出嚟嘅文

13. 你搵一啲Factual 嘢，無傷大雅嘅資料，當然可以Google。想知間餐廳地址，烏拉圭人口，舊年邊隊拎世界盃，可以。但涉及稍為深啲嘅問題，「點解烏拉圭咁多人自殺」（我Facebook會寫），就唔好Google　—　特別係，好多人分唔到咩係好文。

14. 我搵畀你嗰條link，係誠品，引返書入面嘅嘢　—　而唔係你啲網友自行演繹（台仔好鍾意，香港人？就書都唔會睇，仲好笑）。所以應該講咗多次，睇下書，睇下傳統媒體（網上版也可），睇啲好嘅作者，而唔係睇啲二三手嘢。

15. 仲有留意，我呢個誠品嘅link，唔係Google Results 頭幾個，我拉到好落的　—　因為我見到二手嘢，然後見到有問題，就唔會引畀你

唔係喎，埃汾話啲Blogger曲解科氏，但佢自己都有唔同演繹喎

16. 慎防你會質疑我話，唔係喎埃汾，「你夠曲解啦」，科氏原本講經濟，你又話應該係盈利喎。呢度就補充：首先，你就應該信我嘅功力。第二，最重要嘅係：我會話返畀你知原文係點，但我點理解，覺得邊度不足　—　你大可以自己判斷，你可以覺得科氏原教旨先係啱，我唔啱。但你睇台仔文，就直頭改頭換面咗，你根本唔知原本係乜，仲以為科氏真係咁講。

17. 而我話埋你知，點解我去「修正」科氏嘅講法？好簡單，我講咗，佢死咗好耐。佢年代，股市同當地經濟嘅關係，比而家大得多。當時根本未有Google 蘋果呢啲環球大科企。冇錯，當年都有麥當勞可口可樂，但全球化程度爭好遠。見到冇？我係話埋你知點解我會咁演繹。

盈利同股價，當然係「有關係」，但唔係同步。所以實脫節。

18. 講遠咗，講返呢個「盈利」同「股價」嘅關係，明顯係「有關係」，但唔係同步。所以平時啲人講咩「股價同盈利脫節」（or even worse，「股價同實體經濟脫節」），你見我成日都恥笑。因為投資永遠炒預期。

19. 你睇到嗰刻，盈利好似好，你唔明做乜股價會跌。但之前嗰個股價Dynamics嘅系列咪示範過，好景有盡，否極泰來。你見Facebook Netflix之類，大瀉之時，仲係一片美好。相反，股價見底大反彈時，業績仲係好差的。大轉角位時，特別會出現呢啲情況。

20. 於是乎，如果你去隔多層，講「股市同經濟」，我就真係唔知可以點唔脫節，幾時都脫節。呢樣嘢講咗多次，但不厭其煩不停講。因為好多人嘅思維，就係邊度經濟好，股價就會好，我就買邊度　—　呢度涉及咗三樣嘢，每步都可能出錯。

而我不知道「經濟」同「股市」可以點同步

21. 首先好多人判斷「經濟好」都極有問題，往往係升咗你咪話經濟好。日本經濟好好咩？咪玩啦。另外，經濟好股價亦未必會好， Facebook有寫阿根廷，遲下再寫。但當然仲有，所謂「經濟數字」，一年出四次（失業率之類就個個月有嘅）。

22. 正如我之前講，澳門嘅GDP，增長一倍　—　固然澳門冇交易所，但假想實驗，即使有，又會唔會一日升100%？唔會啦。退而求其次，澳門股，有冇一日升100%？都冇啦。仲有，睇報導見到，澳門嘅經濟規模，已經反彈到疫情之前啦　—　但你問下你啲網友，覺得澳門經濟好唔好（又或者，問下澳門人）。

澳門經濟增長100%，咁馬交股係咪升100%？又，澳門經濟好唔好？

23. 所以人人講經濟，而我不知道甚麼是經濟。香港之前一路低通脹（回升中），低失業（都升緊），個個加人工，拎晒啲錢去日本消費，然後「經濟好差」，唔覺得搞笑？順手一講，呢種覺得經濟唔好嘅現象，全球都有，亦係人性。可以睇呢篇文。

Facebook 盈利新高，但股價未新高。大家樂友邦更不用講

24. 即使只講企業盈利，同股價「唔同步」嘅情況，都仲有好多。真係隨手可以搵到好多例子。最簡單，Facebook，近期股價屢創一年新高，但依然同歷史新高仲有啲距離　—　不過，咪話公司上季收入盈利已經係歷史新高。咁所以，你見到真係唔同步。用人話講：而家盈利高過之前好多，但市值反而低過。咁係乜作怪？當然係估值，個市盈率。點解個市盈率低咗？好多原因，甚至冇人知，但我相信唔多唔少係因為債息。

25. 咁你見到，即使美股都有呢啲情況。咁去到港股，就更加多。舉多幾個例子畀你。最簡單，大家樂。未出業績但出咗盈喜，半年盈利2億。未返返到去歷史高位，但已經係2019年社運後最好嘅半年。但你睇股價？社運前27蚊，2019年爆埋社運後後都仲有19蚊。而家係10蚊有找，早排見過8蚊

26. 咁你話，係咪關經濟事關盈利事？明顯係因為個估值。

27. 睇多個例子，友邦。剛剛出咗第三季嘅數，新業務價值，係史上所有第三季嘅新高。當然啦，開返關，大陸人嚟買保險。咁但股價呢？70蚊，高位係100蚊

咁既然股價同盈利都唔同步，盈利增長都可以股價跌，咁盈利咪冇用？

28. 呢堆例子話畀你知，港股好，美股好，雖然盈利同股價有「關係」，但唔會同步，特別係好多人太過短視。新鮮滾熱辣嘅例，Nvidia 盈利同收入創晒新高啦，高過預期添，但業績後股價照跌　—　但，你話「唔跟盈利」？你睇兩日就梗係咁講。但一句，做乜公司股價呢幾年先咁多倍？唔止係因為「炒AI」（WeWork夠創共享經濟啦），而係因為，佢盈利真係升咗好多好多倍嘛　—疫情前一季幾億純利，而家一季100億，咁你話，股價點會唔係由盈利帶動？

29. 好啦，睇完晒，你明白咗啦喎，但可能都會問　—　咁即係我買中盈利增長嘅公司，都可能輸錢？係！當然！經常會發生！你歷史高位買Facebook而家都輸錢啦。

30. 咁可以點避免？答案都係：好難避免。咁但，首先，盡量避免「只係」在最貴估值時買。好多讀者會問，成日講估值估值，但你發現真係冇絶對標準　—　係永世都冇的，否則就唔會有買賣啦，全世界都知平，仲邊有人賣畀你？但你問良心都知，市場係好亢奮定好悲觀，你係感受到嘅，係咪？

31. 咁最後，科氏嘅故事咁啫：你啲盈利真係一路增長嘅，股價點都係會返嚟嘅。港股可能有啲極端，但你見其他市場都會係咁。就算等耐啲，都應該係會　—　就算你都係輸錢，你都唔會輸好多（例如友邦，唔會輸得死你）。但你睇真係冇盈利嘅公司，你係可以輸晒的。

32. 最後一提：戒咗嗰啲「XX冇用」嘅思維，我成日見人講。打疫苗都會中招，所以疫苗冇用。配安全帶都有機會撞死，所以冇用。盈利升唔等於股價升，所以睇盈利冇用。xG高唔等於贏波，所以睇xG冇用

33. 你發現好多懶醒嘅人，好鍾意呢種句式。拿，呢度又教埋你，點樣識別啲水平低嘅人。