買啦！仲等？（八）—港股低殘之迷 (Patreon)

港股可能值得睇返好啲。但呢個同經濟無關

經濟股市當然兩回事，你睇阿根廷？日本？德國？

好多你聽到嘅「傳統智慧」，「理所當然」，都係錯嘅

人民幣跌，就已經係一個好大嘅原因

但最重要嘅因素，就真係外資沽，而冇乜人買返

固然中資公司增長乏力係一個問題，政府對資本家唔友善也是問題

相比於盈利跌，更大因素係估值跌，de rating是也

睇幾個具體例子：地產商股價N年新低，但明顯啲盈利唔係

騰訊今年頭三季盈利，已經超過2018全年。但股價呢？

領展派息，其實同2019年差不多。但市值呢？

盈富基金，同高位比，派息少咗兩三成。但恒指唔止跌兩三成啦

估值跌，好多原因。增長放慢係原因，債息高係原因。情緒都係

但當然，政治原因都係有嘅。

1. 話咁快又去到11月尾，舊年（2022）固然慘不忍賭，但今年你成績如何？照計應該未贏得返2022年輸嘅錢，但今年點都應該有啲進帳。上兩篇同大家講咗啲心法嘢，仲有日本歐洲美國。日本歐洲嘅，普遍不算太貴，還可以買，但揀股真係難，你試過就知，畀我揀多次寧願買ETF。美股嘅，都快手講過，我就睇M7以外嘅東西，但因為我已經買齊7隻，不代表你不能買。諗嚟諗去唔知點嘅，SPY QQQ算，總好過乜都唔做。

2. 今篇，就講港股。都令人幾頭痛，過去N年你完全唔買就最好，雖然我都係有買嘅。未來？唔知。

港股可能值得睇返好啲。但呢個同經濟無關

3. 不過我估港股嘅情況，值得睇返好啲，首先唔好同我講「香港經濟好差」之類。首先我唔覺得香港經濟好差，好差啲人何來錢去日本去深圳？借孖展的？（不過最新你見通脹同失業都開始升了，香港讀者記住保住份工）。二來，經濟同股市兩回事。

經濟股市當然兩回事，你睇阿根廷？日本？德國？

4. 你唔信嘅，隨手幾個例子。首先，Facebook寫咗，今年其中一個最強嘅股市，係阿根廷。美金計都升40%，披索計更加不得了，但經濟完全係一鑊泡，三位數通脹（所以股票保值！）。

5. 嫌極端？好個別嘅細市場例子？都係嘅，咁你睇德國，夠大啦？今年經濟一樣收縮，點都差過香港中國，但股市照升，今年升12%，吹咩。

6. 仲有，更好笑嘅，日本！日本剛剛先公佈經濟收縮。定你以為咩日圓狂跌有助出口？（係喎，唔使入口嘅？）。好多遊客有助經濟？但日本股有幾強，個個都知。

好多你聽到嘅「傳統智慧」，「理所當然」，都係錯嘅

7. 於是你見到，好多你以為嘅「常識」，根本係錯嘅。我順手建議你睇埋Attachment Ken Fisher嗰篇文，唔算寫得太好，但值得你睇下。好多「市場智慧」，都係錯嘅，包括所謂嘅「中東開戰油價實升」，笑死人。

8. （然後等我又再講一次：叫你幾百蚊訂傳媒就話貴，話冇時間，但我見好多人好多時間睇垃圾KOL的，而家我幫你畀埋錢，冒住侵犯版權嘅罪行，attach埋畀你，這是不對的。當然我唔會畀人拉（啩），但另一個問題係，次次attach埋畀你，變相你更加唔會有誘因自己訂）

人民幣跌，就已經係一個好大嘅原因

9. 港股積弱嘅原因，以前都略寫過。首先固然係人民幣弱勢，香港上市嘅多數係大陸公司，以港紙計價，啲盈利資產全部打折。另外亦係高息，但未必咁易解釋到點解美股照升，港股咁差。

但最重要嘅因素，就真係外資沽，而冇乜人買返

10. 當然最重要嘅因素係，外資的確狂沽。當中涉及好多「非財務」嘅考慮。有啲根本唔畀買，有啲怕畀人鬧，有啲見人沽佢當然都沽，而不幸地雖然係平，但「唔夠錢」買返上去。歐美嘅基金沽，咁你同中國友好嘅國家，所謂嘅中東佬（況且，都唔係好友好啫），夠唔夠錢買？就算佢夠錢，又係咪想買？想買，又係咪要而家買？「不如睇定啲」　—　呢啲都係唔係好精準嘅講法，但至少你明白我講乜。

11. 換個比喻，如果間公司，只係個坐住2%嘅股東，不問價狂沽，咁當然都會質到個股價好低，但我會話畀你知「梗係仆去買」，「同公司本身價值無關」，亦會有其他人願意買。例如最新 Jeff Bezos沽Amazon，有何問題？

12. 但如果係個坐住70%嘅大股東狂沽呢？都未必有咁多人敢買，甚至要買返上去都要幾長嘅時間。大約係咁。

固然中資公司增長乏力係一個問題，政府對資本家唔友善也是問題

13. 事實上你見到，唔係因為「經濟差」。固然我寫過，你亦見到，中資公司嘅盈利增長乏力。我亦講過，問題並不在於民唔民主，而係「畀唔畀商家賺錢」。雖然民主國家一般不能太仇富（因為富人掌握好多資源，影響到政治），但想講，中國曾經對資本家都幾友善，正如早幾年嘅越南（而家好似未必）。所以你見港股A股曾經都喪炒，但自習近平上台後，當然係兩回事。

14. 但，經濟唔太好（咁你見中國係放慢咗好多），或者公司盈利增長乏力（亦係有數字睇到丫，內銀得返低單位數，仲有一大堆蝕錢嘅內房類），都係事實，但未必係事實之全部。

相比於盈利跌，更大因素係估值跌，de rating是也

15. 講得簡單啲，市值＝盈利Ｘ市盈率。咁盈利係跌咗，但你見市值跌嘅幅度更多更多，就同後面嘅「市盈率」因素有關。事實上你睇啲市盈率嘅圖，或股息率嘅圖，都會睇到（當然背後又同債息有啲關係，係好多因素的）

16. 咁港股（同大陸）嘅情況，就「盈利」增長乏力甚至倒退，但更要係市盈率大跌　—　而留意其實呢兩個 item並非完佺獨立，好多時係同方向郁。盈利大升啲人咪畀好高市盈率，掉轉都係，咁亦做成股市大升大跌。

17. 以上呢啲，你睇港股市盈率股息率都睇到。

睇幾個具體例子：地產商股價N年新低，但明顯啲盈利唔係

18. 再畀幾個具體例子你。唔講數字嘅，早排都寫過，你睇新世界或者恒隆新地，股價十幾廿年新低，但明顯啲公司嘅盈利唔係十幾廿年新低，可見將來都唔似會，係咪？

騰訊今年頭三季盈利，已經超過2018全年。但股價呢？

19. 太虛嘅，咁睇實數。騰訊。2018年，盈利787億人仔。好，大陸經濟爆煲呀嚴管科企呀乜乜乜，今年頭三季純利，已經超過2018年全年。不過股價呢？而家仲低過當年一截。而騰訊已經唔係「殺估值」嘅重災區

領展派息，其實同2019年差不多。但市值呢？

20. 睇多隻，領展。呢隻甚至仲簡單，睇派息得了。2019年（留意3月結），派息2.7。而家？剛剛上半年1.3，照計下半年唔會減，你當全年2.6，低過當年少少。但你睇股價，2018年（記住2019年3月結）70蚊80蚊，而家一半都冇。固然供咗股，咁但你計埋多咗20%股票都好，個市值都係低過當年一大截。這也是估值下調嘅效應絶對明顯過盈利（或派息下調）

盈富基金，同高位比，派息少咗兩三成。但恒指唔止跌兩三成啦

21. 最後，直頭睇，盈富基金，即係當恒指。最新12個月，派0.65。2018或2019年代，近9毫子。咁你見到，真係派息（懶搵盈利）可能跌咗兩三成　—　但恒指由高位，就唔止跌兩三成啦。

22. 唔好忘記。舊年跌到15000點添，其實由嗰個低位起計都升咗兩成，「咁係咪牛市」？

23. （補充：嚴格嚟講，盈富基金就應該睇盈利，唔係派息。其實一般都係睇盈利，只係領展比較特別）

24. 以上種種，都畀你見到，股價跌幅，唔止因為盈利，亦因為估值

25. （話說回頭，在恒指嘅情況，又真係比較大部份係因為盈利下跌。你睇上面市盈率嘅圖都知，冇錯估值係低咗，但唔係低咗好多，唔係以前我地講內銀嗰啲當年幾十倍市盈率而家幾倍。所以你見恒指，其實唔係「極之痴線地平。舊年15000點就真係好平」）

估值跌，好多原因。增長放慢係原因，債息高係原因。情緒都係

26. 估值跌，原因好多。債息高係一個因，盈利增長放慢係一個原因，情緒係一個原因（今年盈利就跌兩成啫，點知下年會唔會又跌多兩成，點知會唔會變零，點知會唔會所有公司都蝕錢，點知台海會唔會打仗，點知外星人會唔會侵略地球）

27. （不過，盡量避免太多用「情緒」去解釋或者去預測，因為情緒呢啲嘢話變就變，升得5000點包保個個變晒樂觀）

28. 但當然了，外資狂沽，亦係一個原因。而呢個動作，並唔完全係因為金融上嘅考慮，亦有政治上嘅壓力。

29. 講咗一大輪，無非想講：港股差，固然因為盈利差，但亦有估值嘅問題。估值，就有因為債息，有因為增長，但亦有政治考慮。

但當然，政治原因都係有嘅。

30. 咁三個原因之中，反而「增長」未必會好快返嚟，都講咗習近平對資本家不友善，完全睇唔到會大放鬆（雖然其實都放咗少少）。債息，就明顯見到跌咗。至於政治考慮嘛，你都見到中美關係係緩和咗嘅。

31. 不過啦喎，大家都知美國下年大選，到時係咩世界，又真係唔敢講。最重要係，到底拜登連任定侵侵回朝，會對中資股好啲？其實好難答。

32. 而點講都好，外資要沽嘅，總會沽晒。

33. 無論如何，港股嘅情況，我都仲有買。買乜？亦都之前提過。你懶睇嘅，咁話埋你知，都係一係科技股，一係啲真係派到高息嘅股票（領展，長江基建，甚至中移動）

34. In case又有人唔聽書，月頭我先貼過「持倉入面嘅重磅股」，月頭嘅文，自己搵吧，唔使再問我買咗乜了，不能每日答一次。