買啦！仲等？（六）—今年肯買嘅，贏錢非常容易。最重要係想法，第二係買得大，之後係資產配置，最後先係揀股同時機 (Patreon)

美股已經連升4星期，港股都有啲起色

美元回落，人民幣即彈，港股即穩。可見講咩經濟爆煲根本唔係嗰回事

油價熊市，更加有利通脹回落，更加有利停加息

冇錯，市場之前8次炒停加息都錯。但首先，不代表今次都會錯

另外，次次「炒錯加息」又如何？今年美股照升20%。所以，「錯」又點？

心態：你點對待投資？股市點運作？　你點理解，又會影響你買得大唔大

賭仔心態買股票，一定買唔得大，亦即係永遠改善唔到生活

資產配置，聽落好pro好深，其實一字咁淺

揀股同時機「最不重要」—其實唔係不重要，但控制唔到

買指數就真係未必會發達，但做到衣食無憂，都係可以嘅

新錢我買非美股多過美股，主要原因係估值。但唔係叫你買晒港股

美股已經連升4星期，港股都有啲起色

1. 已回香港，會密返出文。下次再外遊，可能選擇直頭唔寫，寧願之前塞晒畀你。因為用部碌卜寫真係極唔方便，屋企就雙芒，好唔同嘅。

美股已經連升4星期，港股都有啲起色

2. 不過今次呢個「買啦？仲等！」系列時機真係一流，你見呢排美股已經連升四星期，近乎收復返晒之前10%調整嘅失地，任你買。頹爆港股都有啲起色，雖然依然跑輸。

美元回落，人民幣即彈，港股即穩。可見講咩經濟爆煲根本唔係嗰回事

3. 又，似乎港股回穩其中一大原因係人民幣回穩，亦即係美元回落（雖然你見日圓仲係好弱，另一個故事）。可見之前講又話經濟爆煲呀，俄佬阿根廷佬換晒啲人民幣去買美金，人民幣頂唔住呀，外匯儲備冇晒呀，要搶香港嗰啲呀，然後港紙就會爆煲呀　—　你見呢啲講法，垃圾到不得了。你睇緊呢啲KOL嘅，唔好再睇，否則祝你好運。你有啲朋友send畀你嘅，疏遠佢，或者當佢透明，mute咗佢，唔好auto save佢send嚟嘅相，除非你覺得你晚年佢可以接濟你，每個月畀返幾皮嘢你　—　以上種種相當認為，唔好當我講笑。幾咁多人都忽略咗，食垃圾多，個人都變垃圾。你揀乜股都救唔返。

4. 另一個港股回穩原因唔多唔少都係中美關係緩和（是真的），之後解

油價熊市，更加有利通脹回落，更加有利停加息

5. 大故事都係嗰味，通脹回落（留意近排油價高位回落兩成，說好了的地緣政治油價大升，笑死，又一堆垃圾分析），聯儲局唔使再加息，甚至下年減息。冇錯係狼來了，但最後隻狼都會嚟。

6. 我甚至呢刻都唔敢講一定唔會加息，之前睇報導話呢種「炒停加息」嘅期望，落空咗好多次，好似6次定8次—呢個真係事實。而「市場諗乜」，在呢個情況，我地睇得到的，平時你睇啲CME之類咪見到，睇報導都會見到

冇錯，市場之前8次炒停加息都錯。但首先，不代表今次都會錯

7. 問題係，市場錯足6次或8次，又如何？首先，市場成日錯，不代表佢下一次都會錯—呢種謬誤，亦好常見。例如2020美國大選，當時民調拜登大幅領先，咁啲人會講返，車，民調都好信，2016夠話希拉莉領先啦。冇錯，2016係錯咗（加上美國選舉人票嘅制度，比較易「爆冷」），但呢個不代表「所以2020年落後嗰個就照樣會贏」

另外，次次「炒錯加息」又如何？今年美股照升20%。所以，「錯」又點？

8. 另外，「錯」又如何？唔好執著於呢樣嘢。市場係「錯足」好多次，可能今年都錯咗3-4次，但美股一路升，而家差不多升20%，錯又點？

9. 好啦，學到嘢啦喎。記住，最最重要，係你嘅心態，你點對待投資，你覺得股市係甚麼一回事，你點理解呢個世界，市場係點運作嘅，呢啲嘢錯咗嘅，好難贏大錢。

心態：你點對待投資？股市點運作？　你點理解，又會影響你買得大唔大

10. 第二重要嘅，當然係買得大。呢個又受到你心態影響。例如你只視股票係賭場，買少少玩下，贏10%就走，輸5%止蝕。咁你唔會買得大，我見好多人，都係幾百萬身家，拎幾萬蚊玩股票　—　如果你剩返嘅錢買樓還好（當然買港樓近年輸錢，但我講至少心態上，有fully invested），剩低啲錢閒置嘅，根本只係自欺欺人。你「成日贏」又點？幾百萬身家拎幾萬蚊出嚟，100%回報，倒不如你幾百萬瞓落去，一年10%回報。

11. 仲唔明？咁可以睇下我平時啲賭波Facebook Post　—有啲人買股票就係咁嘅心態。你見我賭波，買得細，因為知道negative sum game（「甚麼是投資」系列有講！）。咁就算我往績好（畀埋個Excel你！），啱多過錯，又如何？贏晒輸晒，咪幾千蚊，唔會對我生活有乜好大影響。

賭仔心態買股票，一定買唔得大，亦即係永遠改善唔到生活

12. 你咁嘅心態買股票，「好處」表面係輸咗都唔會死人，但實際嘅壞處係贏咗都冇用。而最重要係：股票係positive sum game，值得你大大力買落去。

資產配置，聽落好pro好深，其實一字咁淺

13. 然後？就係資產配置。講到好似好pro好深，其實就只係「啲錢點分」，「幾多錢買樓幾多錢買股票幾多錢買債」。我當然叫絶大多數人都100%股票，但你話你50-50，一半買債，也冇壞。留意，個前題你係100% invested，即使30%股票70%做定期，都總好過放曲奇餅罐嘅人（何況太多現金會畀人呃）。你有投資先有得配置，投資太錢嘅，贏幾多都冇用

14. 最不重要嘅？其實係時機，同埋揀股。其實或者唔應該話「最不重要」，但真係你好難控制，往往係運氣因素。你話時機唔重要咩？之前篇文咪講過，港股每年高低位都35%，你年年低位賣高位沽，好快發達，勁過畢菲特，但請問如何做到？（教你做嘅，都係老千，因為「瑞士山區肺測試」）。同樣地，你話揀股唔重要咩？我十年前買Nvidia，或者十幾廿年前買Tesla Netflix，已經發達。問題係，「你不如話坐時光機去買六合彩」。況且，畀你揀中，都好多時坐唔穩　—　我都好平買過Tesla，應該十幾廿倍回報，「但好早沽咗」。

揀股同時機「最不重要」—其實唔係不重要，但控制唔到

15. 所以揀股同時機，事後睇可能好重要，但你好難掌握到，所以算吧啦。個比喻好似話，你中到六合彩，梗係對你人生好有幫助。你避開到次空難，梗係對你人生好有幫助。正如你問我，你老豆係咪李嘉誠，當然重要。但點掌握？掌握唔到，所以「唔重要」。

買指數就真係未必會發達，但做到衣食無憂，都係可以嘅

16. 另一個角度睇，例如過去幾十年，我買股票嘅，都係長升不輸。買美股嘅，我求其買QQQ或SPY都得。退而求其次嘅，全餐VT或URTH都得。我甚至一半港股一半美股，過去幾十年，都係相當不錯（當然你買中WeWork就另一個問題，亦點解「揀股」未必咁易，買個股買中可以好勁，但亦可能輸晒。指數未必夠你發達，但夠你衣食無憂財務自由，同埋唔會輸死你）

17. 好啦，講咗一堆心法，都係講返市況。當然係買得。問題又係，買乜？

18. 幾時都係分段，分散。但而家新錢可能我甚至係非美股多過美股

19. 唔！係！完！全！唔！買！美！股！　—　我唔明點解啲人會誤解。所以再講一次，唔係叫你完全唔買美股！係個新錢投入嘅分佈！更加唔係叫你沽晒啲美股轉去第度！

新錢我買非美股多過美股，主要原因係估值。但唔係叫你買晒港股

20. 原因之前講過，不外乎都估值。個配置上我新錢甚至會係港股多過美股，仲有啲歐洲日本。當然你唔一定要照跟，但一般唔好太側埋一邊。其他市場升，你就不停輸錢，係極難受嘅，分分鐘影響埋你嘅心態，從此唔相信股票，只會做賭徒，亦即係永無搵大錢嘅一日　—　你話，過去幾年買港股係咁。正是！但，買美股都試過咁的，著名嘅「迷失十年」，2000-2010，舊文寫過

21. 至於美股近期咩情況？買乜？下篇講，會即時出埋。