買啦！仲等？（七）—　美股有幾強？美股買乜好？新錢我未必買Magnificent 7。另外，仲有人要講係「熊市」。而即使真係「熊市」，我亦唔明有乜好討論。熊市唔買，牛市先買？ (Patreon)

美股貴，港股廢，但其他市場呢？估值都算OK合理

日本股持倉全公開—不過揀多次，都係買ETF算。

美股當然有溢價，可能都會持續。但即使同自己歷史比，都係比較貴

美股連升4星期，低位都升返10%，離今年新高不遠

之前做定期嘅，好難話錯。但股票可以升得好快。定期到期時又另一世界

「負面消息」—MSFT又話Open AI內鬥，NVDA又有人減持，FB又冇人用

標指升20%，離高位6%，仲有人話「幻覺」，「熊市未完」，咩構造？

美股由乜推動？係咪只升大企？只升Magnificent 7？都睇你點睇

留意分析員上調M7盈利嘅幅度，遠高過大市，之前業績亦普遍幾好

但另一方面，ARKK，VB等等都不錯，small cap唔係冇力

不過新錢，我都主要係買M7以外嘅嘢

咁買債呢？減息係咪應該買債？

執著於咩「熊市」，完全多餘。熊市唔買，唔通牛市先買？

一般人嘅想法，其實覺得「跌咗20%會再跌」，但係咪事實？

今年美股跌完10%，即時就反彈。油價跌完20%，也即時反彈

1. 上篇講咗啲心法嘢。但重點係：而家新錢我反而係買非美股多啲（但再講一次：唔係唔買美股！只係相對地買少啲！況且我已經坐住唔少美股）

美股貴，港股廢，但其他市場呢？估值都算OK合理

2. 原因都係同估值有關。美股偏貴，港股就夠殘但當然大家好有戒心。但而家新錢，我比較多放去港股（但唔係叫你買晒港股！！！），不過港股留返最尾一篇講（可能今晚或聽朝出）。呢篇講咗「其他」，同埋美股先

3. 其他股市？早兩篇貼過圖，日本歐洲啲估值，都尚算合理

4. 日本股以前寫過渣住乜，有讀者問，咁呢度重覆一次：日清（2897），日航（9201），全日空（9202），Donki（7532），Mizuno（8022），Panasonic（6752），樂天（4755），LY（4689，即係以前嘅Z Holdings，LINE + Yahoo Japan）．最後兩者仲係輸緊錢，都幾失敗。若果再揀過呢，就寧願買ETF算！成個日本倉，夾埋都係跑輸大市。

日本股持倉全公開—不過揀多次，都係買ETF算。

5. 歐洲公司？得閒再研究。但你見奢侈品股近期麻麻（但未算好差），當然同大陸生意麻麻有關。而奢侈品股估值一向貴，但奇怪在你見更貴嘅愛馬士就企得硬過LVMH。也是嗰句，唔想搞咁多嘅，ETF吧。

美股當然有溢價，可能都會持續。但即使同自己歷史比，都係比較貴

6. 美股呢？首先講過多次，都真係唔平。但成個市場又係咪好貴？又不算。留意最好都係自己同自己比，唔好拎美股同港股比。而你見美股真係近十幾年對其他市場都好大溢價。會唔會持續？唔知，可能一半半機會。但即使美股同自己歷史嘅估值比，都唔係平　—　固然之後債息跌，理論上可以支持高啲估值。所以可能仲有得升，但，真係唔係算好平

美股連升4星期，低位都升返10%，離今年新高不遠

7. 無論如何，近排美股走勢相當好，連升四個星期，低位都升返10%，納指更強。又等我重覆嗰句，「舊年叫你買又唔買？」，「年頭叫你買又唔買」？

之前做定期嘅，好難話錯。但股票可以升得好快。定期到期時又另一世界

8. 之前做咗定期存款嘅，嗰刻好似幾爽，亦好難話「唔理性」。無風險5厘息喎大佬，點都理性過信無驚無險十幾厘息嗰啲友仔。問題係，也是limit晒自己嘅upside，股市一升，幾日就可以5%。然後最慘你啲定存可能下年先到期，到時固然應該做唔返5厘息，一個唔該啲股票升到好貴，就仲難搞，買又怕摸頂，唔買又唔知點　—　呢啲東西，之後再講，但好快咁話畀你知，點解幾時都係應該100%股票，因為股票upside太大，但又郁得太快。

「負面消息」—MSFT又話Open AI內鬥，NVDA又有人減持，FB又冇人用

9. 美股有幾強？星期一晚，你見Facebook Page有貼，星期一晚，Visa Facebook Microsoft Nvidia 齊齊破頂。Facebook 啲人又話冇人用，Microsoft又話Open AI內鬥，Nvidia 又話索羅斯軍師減持 - 可見你要搵「負面因素」，幾時都有。但股價話知你。

10. 至於大市，其實標普指數離今年高位只有1%，分分鐘今晚就破頂。同歷史高位比，都好似係5%左右。又係嗰句，舊年又唔買？年頭又唔買？甚至早前高位回調10%，都係好好嘅機會。

標指升20%，離高位6%，仲有人話「熊市反彈」，「熊市未完」，咩構造？

11. 不過更好笑嘅係。Noting personal，但真係畀你見到，納指低位升咗四成，標普指數差不多破頂，都仲有人同你講「幻覺」，「熊市未完」。多次講過，唔好執著於呢啲論述。現實就係今年你買標普指數，贏20%，講完。

美股由乜推動？係咪只升大企？只升Magnificent 7？都睇你點睇

12. 睇返多啲美股嘅升勢，係由乜帶動？都係有啲撲朔迷離。固然你成日聽到係Magnificent Seven（M7，傳統嘅FAAMG 再加Nvidia Tesla）帶動，問題係呢堆股票本身就佔指數好重。唔係由呢啲帶動，難道可以由WeWork帶動？

13. 認真少少睇，你見到既然睇Equal weight index（即係假設標普500每隻都佔０0.2%）跑輸標普指數，就真係見到升勢集中在大股（不過個圖係兩星期前嘅）

留意分析員上調M7盈利嘅幅度，遠高過大市，之前業績亦普遍幾好

14. 但不一定只係M7，亦不一定係唔健康」，反正你見分析員上調啲盈利都幾明顯高過大市，而之前啲業績亦普遍幾好。

但另一方面，ARKK，VB等等都不錯，small cap唔係冇力

15. 但另一方面，你睇「契媽」Cathie Wood隻ARKK低位都彈好多，而佢隻嘢係啲細嘢多。仲有，睇羅素2000指數（細價股多），近期升勢同標普指數不相伯仲。你見隻VB表現都不錯，低位都升10%。咁又係咪細價股冇力？似乎唔係。

16. 但你問我，新錢我都係主要會買M7以外嘅嘢。

不過新錢，我都主要係買M7以外嘅嘢

17. 其中一個原因，就係你見似乎好多要買嘅基金，都買晒。王弼啲文都係一時時，但今次寫咗一樣嘢（我又幫你attach埋，唔再重覆啲例牌對白了）：「有研究指出，年初只有12%的對冲基金持有Magnificent 7的股票，現在已增加至99%！可見人有我有「慌死執輸」（fear of missing out，FOMO）的階段已過，明年的前景又如何？」（而佢篇文亦有講羅素2000指數）

18. 我冇睇佢呢個「研究」嘅source，但同我見到嘅嘢，都係差不多。固然不代表佢地唔可以或者唔會再加，但「追貨」動力已經冇之前咁大。

19. 然後再講一次：唔係叫你唔好買！只係因為我自己都買咗唔少，7隻都有，所以我先唔使特別再加。你冇嘅當然可以買（但，不如買QQQ簡單啲）。抱歉咁長氣，但發現好多時啲讀者真係會曲解。

咁買債呢？減息係咪應該買債？

20. 至於買債？唔好啦啩。冇錯呢期美債價格都升，梗係啦，債息跌咪就係債價升，一體兩面。你買TLT之類，低位都升10%　—問題係，SPY QQQ都唔止啦，而再之後嘅upside呢？債券嘅upside，好難比得上股票。

21. 呢個課題之後會再講。但簡單嚟講，除非退休冇收入，否則都係100%股票。真係退休冇收入呢？其實都應該有返五六成係股票。

執著於咩「熊市」，完全多餘。熊市唔買，唔通牛市先買？

22. 最後容許我再回帶講多樣嘢：執著於咩「熊市」，真係令我極之R頭。熊市點解唔買得？甚至我會話，熊市平嗰時唔買，唔通牛市摸頂先買？就算港股都係啦：舊年熊市14000點唔買，唔通牛市34000點買？明明平時又個個講低買高沽。

23. 當然我知好多人心中諗乜，最好就「確認見底」先買，去到14000我買完即升，然後到34000點我即沽。你做到嘅，我可以摺埋我呢個Patreon，跟你搵食。

24. 但即使以上嘅想法，都解釋唔到。點解跌市時，你去叫啲人買股票，佢會同你講「呢排係咁跌喎」，「熊市」喎。

一般人嘅想法，其實覺得「跌咗20%會再跌」，但係咪事實？

25. 我同情地理解，其實佢地嘅意思係「跌咗20%喎，即係會繼續跌，有排跌，咁所以唔好買住」。似乎係咁。又，你學多一樣嘢：了解下其他人，或者自己，講某啲嘢時，「真正」嘅意思係乜。

26. 「熊市」又如何？高位跌20%，哦。咁當然如果你一路坐住，代表你輸咗20%。但呢啲都係人人已知嘅嘢，你話畀我知，之前10000點，而家8000點，問有乜價值？

27. 除非你話到畀我知，原來「熊市」，原來跌咗20%，就即係會跌多啲，跌耐啲。咁我梗係唔買住。

28. 但呢個佢地以為嘅東西，係咪事實？明顯就唔係！以前都寫過。

今年美股跌完10%，即時就反彈。油價跌完20%，也即時反彈

29. 今年美股並冇高位跌20%，但高位跌過10%，所謂嘅「調整」。咁但，你見到我都貼過，首先呢個係史上第103次嘅調整，家常便飯，平均一年就有一次。另外，過去15次調整，3個月收復失地，一年後平均升10%

30. 固然，不代表每一次都係咁，而打後一年升返10%，其實亦只係「OK好」嘅升幅，因為標普指數平均一年都差不多升10%

31. 但最重要嘅係：咪就打破咗你覺得，「調整就唔好買，會繼續跌」呢種想法。

32. 在「熊市」嘅情況，根本一樣。數字話畀你知，熊市下買，回報當然好過牛市下買。

33. 另一個未必好恰當嘅例子，我Facebook有貼到：早排油價，亦都進入「熊市」（真係說好了的中東開戰油價會升）。問題係，一跌完20%，之後就反彈返。再一次畀你見到，所謂咩「momentum」，跌開繼續跌，只係人云亦云，冇話跌咗20%就會一路跌

34. 但當然，十分十分十分重要：我冇話畀你知油價會繼續反彈，更加唔係叫你買。要買就買股票。遲下先再幫個「甚麼是投資」埋尾，但黃金石油之類，如果計real terms，應該唔係投資。

35. 下篇就講港股

36. In case又有人唔聽書，月頭我先貼過「持倉入面嘅重磅股」，月頭嘅文，自己搵吧，唔使再問我買咗乜了，不能每日答一次。