買啦！仲等？（五）　—　今年合埋眼亂掟飛鏢，都應該贏錢。除非你只買港股，或只買債。另外，炒減息，當然都係照買股票。 (Patreon)

皆大歡喜，美國CPI低過預期。早就叫你買啦！仲等？

Costco 微軟　Amazon Facebook都新高了，仲等？

之前嘅10%回調，話咁快美股就低位彈返10%，兩星期多啲

美股一年升幅先大約10%—往往兩星期就升晒全年。問題係點捉？

我叫你stay invested，但執行上真係難的，因為人性有弱點

係架，恒指高低位一年都35%，年年扑中，三十年1萬變8000萬

畢菲特都只係一年22%回報，已經係股神兼首富。咁你話捉唔捉到35%?

今年股市，極之易玩。你唔好只買港股就得。呢個亦唔係過份要求

47隻國家ETF，六成都贏錢，亂買都中，拉勻回報6%。點輸錢？

咁買乜輸錢？買債咪輸錢。炒減息，一樣係買股票！下篇解

極速廣告：Tax loan

URTH VT 都雙位數回報啦，一半港一半美股都肯定贏錢

1. 好快整多篇。因為結果美國出咗CPI數字，低過預期。想睇詳細數字嘅，Trading Economics有。快手講畀你聽嘅：Headline inflation按年升3.2%，上次係3.7%，預期係3.3%，見到明顯放慢，似乎下次會再放慢。按月嘅，CPI保持唔變，預期係升0.1%，上次係按月升0.4%。核心CPI呢？按年升4%，上次係4.1%，預期係4.1%

皆大歡喜，美國CPI低過預期。早就叫你買啦！仲等？

2. 咁，就皆大歡喜啦。你估到個劇本：通脹似受控，加息預期當然跌（唔貼圖了），更多人相信已經加完息，甚至下年年中就減息。10年債息就急跌，差不多一日跌18點子，去返4.5厘樓下，一個月低位。

3. 更重要當然係，美股又升500點。我買嘅嘢當中，Costco，Amazon，Facebook，同微軟都一年新高了。Costco以外嗰三隻，月頭講「埃汾持股」時都有講，係渣得比較多嘅股票。微軟其實係歷史新高添，實情，係咪一定要買啲好fancy妤多人講嘅股票？你係為圍爐，為有人認同，定係想改善生活質素？又係嗰句，投資市場上，多數人講嘅嘢，多數都錯。

Costco 微軟　Amazon Facebook都新高了，仲等？

4. 另外想提嘅係，一般講法，5%叫pull back（中文唔知叫乜），10%係correction（調整），20%係熊市。好啦，之前美股就真係高位跌咗10%，調整啦。

之前嘅10%回調，話咁快美股就低位彈返10%，兩星期多啲

5. 但話咁快，而家美股低位又升返10%了，分分鐘有機會再挑戰今年新高。

6. 都講過多次，美股往往一年嘅升幅，都係10%咁上下（今年暫時17%左右），咁你見即使好似郁得冇個股咁快嘅大市指數，都係可以冇乜事然後兩三星期升10% - 即係你全年嘅升幅，可能就係嚟自嗰兩個星期。

7. 而搞笑在，呢兩個星期根本好似冇乜特別有利消息（除咗剛剛嘅通脹數字）—可見咩好消息，都係升咗啲人先拎出嚟講。

美股一年升幅先大約10%—往往兩星期就升晒全年。問題係點捉？

8. 當然實際上，睇個例子，當1 月升10%，之後2月跌返晒出嚟，然後個個月都平收，到12月又升多10%　—咁你好難話全年嘅升幅，係嚟自1月定12月，冇得咁分，係一連串嘅過程。

9. 但不停講呢樣嘢，都係比較感受下股市係咩回事。就係咁跌下升下，拉勻其實每日只係升少少，又或者係升跌市嘅日子根本差不多，但累計出嚟就會有幾好嘅升幅。

10. 可惜係，你永遠冇法只係捉升嗰幾日。以前都貼過個圖（我本書都有），叫大家stay invested。因為用返以上嘅演繹，即使大牛市，往往成個升幅，都係「嚟自」好少數幾個好強嘅交易日。幾十年你錯過幾十個最好嘅交易日，回報就爭好遠

我叫你stay invested，但執行上真係難的，因為人性有弱點

11. 但當然了，一般叫人唔好time the market，都唔係咁易。因為亦係人性嘅弱點，人係鍾意「搵規律」，天邊有舊雲又覺得似魔鬼，烤多士又覺得見到聖母像。人係唔鍾意「隨機」嘅（所以，如果只推介一本書，就係Fooled by Randomness，唔該你正經咁睇，唔好睇人地嘅懶人包）

12. 況且，如果你捉到Timing嘅，回報可以好誇張。以前都寫過，恒指一年高低位，都差不多35%—即係你年年最低位買最高位沽，就一年35%回報。美股冇數在手，但例如2020年，你低位買嘅，年尾指數都升65%。

係架，恒指高低位一年都35%，年年扑中，三十年1萬變8000萬

13. 咁你心諗，喂，「我唔貪心」，但捉指數，一年高低位都35%啦。不如集中試下做呢樣嘢？不如試下點捉？

14. 問題就當然係：講咁易咩。好簡單，你見話要捉timing嗰啲，有邊個發到達？好似一個都冇。你偶然有幾次中幾倍都得，但長期呢？況且，你又買得幾多？

畢菲特都只係一年22%回報，已經係股神兼首富。咁你話捉唔捉到35%?

15. 事實好簡單：畢菲特一年都係大約22%回報—已經係世界頂級（差不多十大）嘅富豪。咁你覺得，有冇可能長期捉到高低位？（有啲仲諗住槓杆添）。點解你會信可做到呢樣嘢？或者你信有人可以做到？（而佢又未發達）。

16. 定只係心魔，因為你「想去相信」呢樣嘢？人就係相信自己想會發生嘅嘢

17. 再另一個角度講：我當年20歲開始，1萬蚊買股票，一注獨贏。每年35%，30年你已經8000萬身家。8000倍回報，但你有冇見過有嘅咁事？（有嘅，中六合彩囉）

18. 你要做嘅嘢，係買得大，同埋夠長期，唔好太多出出入入。出出入入捉到高低位當然開心（你睇Facebook Nvidia都一年升幾倍喎），問題係你太多出出入入，想捉timing，差不多一定買唔得大，亦唔會坐得長，亦即係贏唔到大錢。我Microsoft Nvidia Facebook呢啲贏幾倍，都係靠坐得耐（都未夠十年）

今年股市，極之易玩。你唔好只買港股就得。呢個亦唔係過份要求

19. 你可以開下個Monitor Excel。唔好信啲網友講，以為人人股市都輸錢。痴線，今年股市不知幾咁易玩　—　你買晒港股就梗係死。

20. 當然唔好話年頭做槓杆買晒Nvidia 咁屈機，我地講啲正常做到嘢。喂，「全餐」URTH，今年都升15%啦。VT都12%啦（多啲新興市場）。

URTH VT 都雙位數回報啦，一半港一半美股都肯定贏錢

21. 又或者，我當你一半美股，一半港股（我大約係咁，不過港股冇一半嘅），咁贏錢定輸錢呀？梗係贏錢啦。美股升18%，港股跌14%，但照計點都有3厘息收到，即係跌11%左右。拉勻，18減11除2，3.5%。當然唔係好靚，但至少真係見到，一半港股一半美股都唔會輸錢啦！

22. 然後你睇個Excel，環球ETF - 呢啲全部美股都買到，所以唔係強人所難。留意全部美金計價，計埋匯率變動了。

23. 呢度47個國家，六合彩咁。我當你搵隻馬騮亂掟，都係贏錢的！

47隻國家ETF，六成都贏錢，亂買都中，拉勻回報6%。點輸錢？

24. 呢47個國家ETF，拉勻就平均6%，即係你年頭隻隻買100蚊，而家就6%回報。唔算太好，但肯定唔會輸錢。計中位數呢？都有5%。最好嘅升成37%，好係波蘭，打係希臘巴西阿根廷，而我唔知呢啲地方經濟有幾好。所以，你真係覺得股市表現同經濟掛勾？另外睇國家數目，六成幾嘅股市都係升嘅，差不多三份之二。所以，真係亂掟都贏錢　—除非你只買港股

25. 咁今年買乜會輸錢？你估到了，買債就輸錢！TLT今年仲輸緊超過10%，同買港股差不多

26. 但你再諗下，其實年頭你去諗，「應該就快加完息，我去買債ETF」，合唔合理？好難話荒謬。但呢個就係投資可恨又有趣嘅地方：聽落有道理嘅嘢，未必會賺到錢。

27. 下篇我會詳細講（可能要到星期六）。但簡單嚟講：估加完息，甚至估減息，當然係買股票（而唔係買債！）。實情，任何情況下，其實都係應該買股票而唔係買債。

咁買乜輸錢？買債咪輸錢。炒減息，一樣係買股票！下篇解

28. 原因？預告少少。其實上一篇有講過個概念：upside同downside．你今日去買隻美債，回報就鎖定咗，你知道幾多。可能係5年每年5%？聽落幾好。但，upside呢？冇，你就只會拎到呢個回報。但股票，兩個星期已經可升10%，5年分分鐘一個開。

極速廣告：Tax loan

29. 最後，極速廣告，遲下先詳細講。不過想借Tax Loan嘅，我同MoneyHero有合作緊呢兩間（即係我係有錢分嘅）。

30. 一檔係花旗，一檔係中信銀行。留意同舊年東西唔同，亦同你之前上Mox借唔同（所以嗰時推介畀你地！真係好嘢），呢兩個，唔會即時睇到你借幾錢要幾多息。知唔知點解？你估都估到，就係想避免公開價格。倒唔係有乜古惑，而係希望唔想惡性競爭。因為你知我知，個客揀Tax Loan，差不多只係會睇錢。我甚至唔使考慮間銀行就唔就腳，會唔會執笠（「最好佢執咗你唔使還添」「你就想」），啲職員係咪靚仔靚女。你只關心有冇啲hidden charge或者古惑嘢，但在政府監管下，間間都一定要畀個APR你，連恰啲友唔識計數（同你講「月息1厘」等你以為好平）都唔得。所以，就變咗鬥marketing了

31. 咁你大約估到（我都係段估），花旗啲息會貴啲啩，信銀平啲。不過呢，花旗嗰個就只要你申請，批唔批都有禮券送。

花旗申請link呢度

中信銀行申請link呢度

32. 循例提返，唔好借錢投資。況且我估啲息都唔會平。你借三四厘息嚟投資就真係搵自己笨。