［買啦！仲等？］（四）Facebook 微軟 Costco Donki 日清都新高啦 (Patreon)

美股真係唔算太抵買，但買落去都OK嘅

風險管理：買美股未必抵買，但downside應唔會太大

股票upside可以無限，downside只有100%。聽落好廢，但有乜意思？

第一：槓杆downside就唔止100%。第二：長淡必死。仲有第三

只要債息見頂，股票downside唔會太大。「但三四成都係會的！」

你高估值遇上暴力加息，就好似2022咁，Facebook都高位跌七成

仲等？Facebook 微軟 Costco Donki 日清都新高啦

上星期寫完「買啦！仲等？」—嗰日美股連升就斷纜，又做「燈」

唔好跟市太貼：冇錯聯儲局好似「放鷹」。但一日後納指又升2%

但當然，一切都假設「債息見頂」，咁要留意今晚CPI，仲有單花邊

1. 外遊實在比較難寫文，不過都盡量出返，費事太耐冇。外遊時啲文，就多數冇相冇表了，好花時間的。

美股真係唔算太抵買，但買落去都OK嘅

2. 首先，呢個「買啦！仲等？」系列實在幾重要。美股肯定唔係太抵買，無論係睇絶對估值（純睇幾多倍）定相對於美股歷史平均，定係相對於債息。

3. 但，如果嗰個「債息已見頂」嘅估計正確，咁即使估值唔係好平，買落去OK嘅。首先第一點，如果債息跌，其他嘢不變，咁股市相對於債息個估值，會平咗（而經過2022年嘅慘況，應該冇乜人仲敢講「債息同股市無乜關」「估值唔重要」）

4. 仲有，若果「債息見咗頂」呢個估計正確，咁即使買美股未必好抵，未必即升—但至少，輸大錢嘅機會，應該唔係好大。

風險管理：買美股未必抵買，但downside應唔會太大

5. 呢度我唔知算唔算示範咗「風險管理」。但即係，睇upside之餘，又要睇downside—呢種原理或思考，都唔少人知。問題係你買股票，就唔係好似買馬買波，或者教科書上啲例子咁簡單。好多時你連個upside同 downside幾多都唔知。理論上股票嘅upside可以幾百萬倍，而downside就只係100%　—　聽落好廢，但首先：有啲人買啲嘢downside唔止100%嘅，例如衍生工具，例如涉及槓杆嘅嘢（當然你可話「隻嘢」（例如層樓）一樣都只係100% downside，係你買嘅方法嘅問題，但不用執著於字眼，我地講結果）

股票upside可以無限，downside只有100%。聽落好廢，但有乜意思？

6. 而第二，股票upside理論上無限，downside只得100%　—　所以，根本長淡必死。亦唔存在咩「好淡對決」，「好友淡友」。長遠嚟講，只有long先係投資。

7. 諗一個好簡單嘅例子：講到港股咁廢，好似人人皆知。咁但，我當年年年沽空港股都好（實務上唔係天方夜譚丫，我信你會估到）—有幾多回報？可能幾年都只係50%唔夠（港股高位跌到而家都好未夠50%）—甚至未計你借貨啲成本，同埋派息要嘔返出去（應該係）。但你諗下，過去幾年，你買隻美股升幾倍，唔係太難。所以做淡嘅嘢，講易過做。睇淡容易做淡難。你有見邊個真係沽空股市搵到大錢？近乎冇。

第一：槓杆downside就唔止100%。第二：長淡必死。仲有第三

8. 仲有第三，講到煩。但既然一隻股票最多只能跌100%—咁即係話，你贏嘅股票贏得夠大嘅，根本唔怕輸幾隻total loss．但就真係要你贏得夠大。你賺20%「食糊」嗰啲就死得　—　賺埋都唔夠你輸。我就有一啲贏咗幾倍嘅股票，所以夠我去cover一啲輸大錢嘅股票

9. 好啦，講返個downside—我嘅意思係：而家呢啲位，美股唔係太平。但只要債息真係見咗頂，照計你唔會點輸大錢。

只要債息見頂，股票downside唔會太大。「但三四成都係會的！」

10. 不過又係活學活用啦，講嘢，特別係投資嘅嘢，最緊要乜？量化！幾多叫「輸大錢」？我指嘅係，輸六七成嗰啲！至於你話輸兩三成嘅，根本任何時間可以發生，大牛市之中都會。甚至大市都會，更唔好講個股（大牛市都有公司執笠啦）

11. 但即係，只要啲債息唔再上，照計就唔會好似2022年咁，你買Facebook Nvidia Netflix高位輸六七成咁囉。「但輸三四成係幾時都會發生的」。

12. 然後你亦見到，2022年嗰啲大跌，就係高估值遇上債息由低位1厘幾升到上5厘。咁只要啲嘢唔重演，正正常常嘅大調整，應該唔會見到呢啲嘢高位輸六七成嘅。而家估值高，但冇嗰時咁高（留意企業盈利都升咗）。當然仲有，照計唔會而家5厘息再加多4厘啩？

13. 況且，咁上次呢啲嘢高位跌六七成我都頂住冇沽啦，「嚟多次都唔怕嘅」

你高估值遇上暴力加息，就好似2022咁，Facebook都高位跌七成

14. 實際上呢？其實我呢啲假設都可以量化嘅，但真係搵到數字先再分享。即係點？例如咪可以統計下，唔同形態下嘅「股災」或「熊市」。都有人會統計過，唔同原因搞出嚟嘅「股災」「熊市」，都有唔同特質。例如由金融危機爆出嚟嘅，多數都好大鑊，呢個大家都估到。咁會唔會係有統計到，「只要唔係暴力加息，就唔會跌得太多（即係上面講嘅六七成）」？唔知，照計可以認真做，真係做研究嘅應該咁做（而唔係去直線邏輯，唔量化地作故事，因為咁，就會咁，就會咁）。但我暫時冇見過類似嘅數字，只係憑我嘅「直覺」

仲等？Facebook 微軟 Costco Donki 日清都新高啦

15. 講遠咗，你見近期股市，都仲係幾好的。美股固然連升兩星期，Facebook Costco都創52星期新高，Nvidia都差不多，而微軟直頭創歷史新高。其他市場呢？你見我Facebook都有貼，Donki，日清食品之類，亦係歷史新高。

16. 上次寫咗，美股以外嘅市場，估值應該算幾合理。

上星期寫完「買啦！仲等？」—嗰日美股連升就斷纜，又做「燈」

17. 仲有，非常搞笑地，上星期我寫「買啦！仲等？」嗰日，星期四美股連升就斷咗纜！債息又升返。如果出面啲友仔，可能又話我「燈」。咁呢度啲讀者照計唔會，但亦真係自己都要戒呢種思維：唔好太在意短期嘅變化，股票短期走勢，真係有極大嘅隨機成份。例如我當你真係睇好，甚至知道一隻股票之後會好掂，而可能最後你真係啱　—　但佢都唔會係一個月升足20日的！冇理由你講完之後，嗰日跌5%，你就全盤否定自己。

18. 講返，點解星期四升勢忽然斷纜？就係因為有人話鮑威爾「放廌」—今次你都真係可以咁理解，因為佢話「對通脹回落到2%信心不大，如果經濟強勁推動通脹就唔排除再加息」—固然在心中，都係官方嘢，講咗第於冇講。但的確似乎應該對於近期嘅「炒加完息」有啲打擊。

19. 但結果呢？所謂「放鷹」拖低大市，只係維持咗一日咁大把。到星期五，美股又再升，納指升足2%，微軟創埋歷史新高。結果美股已經連升兩星期，升咗7%了，納指直頭差不多升10%

唔好跟市太貼：冇錯聯儲局好似「放鷹」。但一日後納指又升2%

20. 結論？都真係唔好跟市太貼，亦唔需要。要真係睇長期趨勢。睇唔透嘅，就唔好搞咁多嘢。最好就壞消息買，但好難。所以就冇消息買。都做唔到嘅？咁至少分散去做，壞消息冇消息時都會買啲。最差就係「好消息」時飛晒入去

但當然，一切都假設「債息見頂」，咁要留意今晚CPI，仲有單花邊

21. 最後，一路都講「債息見咗頂」呢個假設。叫得假設，就梗係有機會錯。之前提過，今個月出嘅美國CPI數字，十分關鍵。就係今晚會出。詳情睇Trading Economics。懶嘅我話埋你知，街估Headline CPI按年升3.3%，上次係3.7%，即係進一步放慢。CPI按月升幅街估升0.1%，上次係升0.3%。核心CPI呢？街估按年升4.1%，同上次一樣，個放緩就冇咁明顯了。

22. 另外，忽然間見到有呢單不太多人講嘅嘢：講由今次CPI開始，個計法係轉咗嘅。同啲醫療保險費用嘅計法有關，話可能會影響咗個CPI—你可以話有啲耐人尋味，時機亦有啲有趣。

23. 陰謀論嘅難免會估，係咪個數字會「唔得」所以政府放定風　—　呢個猜測，我都唔會完全抹殺。問題係，其實對你理解聯儲局嚟緊嘅取態，似乎冇乜幫助。一方面，你可以話「即係個數字會高，要再加息」。但另一方面，你亦可以估「即係個數字高政府都唔會理，會話只係計法轉咗」。

24. 我就唔會太聚焦於呢樣嘢，不過咁啱見到，又睇下之後點發展。