買啦！仲等？（三）—市場恐唔恐懼？睇乜指標？美股以外嘅股市似乎估值合理。講到尾，呢排債息做乜係咁跌？幾時減息？ (Patreon)

別人恐懼時我貪婪，至理明言，但平時你點感受？好睇你識啲乜人

咁會 唔會有乜量化指標？都介紹兩個（唔係VIX）

往績如何？都真係幾燈的

基金佬指標呢？一樣咁燈！

咁但VIX又另一個故事喎，數據打交喎，點解？點算？

美股以外嘅市場，就唔算太貴嘅　—當然睇歷史平均都有局限

一切都話同美國債息見底有關，咁睇返呢排三大推低債息事件

又狼來了，又估幾時停加息，幾時減息。但狼真係嚟咗的

分分鐘已經完成加息，當然睇埋下星期嘅通脹數字先

市場估Terminal rate 大約5.4%，即係點？

1. 繼續呢個「買啦！仲等？」系列

別人恐懼時我貪婪，至理明言，但平時你點感受？好睇你識啲乜人

2. 首先第一樣嘢，「別人恐懼時我貪婪」，真係至理明言，但好難運用。首先，市場情緒係點，都根本唔易判斷。當然去到最亢奮同最恐懼時會睇到，但中間嗰啲位多數都係估估下，甚至好視乎你識乜人，好視乎你社交媒體follow乜人，咁你知有啲人永世都驚聽日伊朗打仗後日台灣打仗，另外有啲人就永遠樂觀（好似我咁）。

3. 但當然，例如連超級大淡友都走去入市，可能就係股災先兆。又或者連埃汾都開始話好驚，咁可能係入市機會。不過呢啲都係要最貪婪最恐懼嘅位先望到

4. 咁而家呢？其實唔知。但都有啲算係可以量化嘅指標

咁會唔會有乜量化指標？都介紹兩個（唔係VIX）

5. 例如呢個，AAII Bull Bear Spread．咩嚟？美國老散協會之類，就統計散戶嘅情緒，填survey咁。呢度亦睇到數同圖（對你幾好！）

6. 好啦，睇圖見到，美國散戶完全唔亢奮。咁最重要係，「往績」如何？夠唔夠燈？係咪佢地驚你就入市，佢地樂觀你就走？

往績如何？都真係幾燈的

7. 望落，都似乎係。持別幾個大轉角位，例如舊年9月10月嗰時，最悲觀，就係見底之時。咁2020年2月3月嗰時，當然都係咁（世紀疫情嘛）。仲有，2021年頭，人人好興奮，咁你見都真係離場之時

8. 當然有其局限，同埋即使係AAII Bull Bear Spread，幾時係頂幾時係底都可能事後先見到。但真係見到，啲友係幾燈嘅，萬變不離其宗。

基金佬指標呢？一樣咁燈！

9. 咁基金經理會唔好少少？答案係，都差不多！

10. 呢個，NAAIM，主動投資者協會，基金佬。呢個調查統計佢地嘅倉位（但只係自己報）

11. 睇圖，其實都係差不多，特別係舊年個底，正係股市個底。當然你可以話同步，甚至互為因果，啲友倉位低，沽貨，個市咪跌。但總之至少事後睇，佢地驚嗰時，你去買，就似乎幾好。

12. 咁散仔又好，基金佬又好，而家都驚驚地

咁但VIX又另一個故事喎，數據打交喎，點解？點算？

13. 以上類似嘅嘢寫過多次，但永遠可以有新體會。長期讀者一定會聽過VIX，甚至埃汾講過VIX大法（十分粗略地：VIX升到30你就放心買啦）。咁但，你睇VIX，呢排係非常之低的，唔似恐懼喎。

14. 兩種嘢打交！點算？冇乜點算，根本呢啲嘢經常都出現，靠你判斷。以前寫過，十箋燈著六菚你去買，又可能太早怕中伏。但十箋著晒先買，又可能太遲，甚至係幾十年都等唔到一次，冇得完美

15. 但認真講，我會信VIX多啲（但從來唔一定係二選一）。原因好簡單：上面講嘅乜乜協會，嗰啲調查，任啲人自己報。係咪講真話，冇人知。之前我耐唔耐貼，美銀美林嘅機構投資者統計，亦有呢個問題。仲有，既然人人都識睇呢啲統計，自然有人有誘因造假，明明好貪都扮好驚。當然仲有，同你睇網友嘅情況一樣：有啲講到好有信心，但根本冇買嘅，咁意見係不值一文的。講到世界末日，但唔敢瞓身沽空，咁即係自己都唔信啦。

16. 所以，我比較信VIX，同埋上次講過嘅美股估值之類。而家嘅美股，麻麻地啦，唔係好值搏但還可以。

美股以外嘅市場，就唔算太貴嘅　—當然睇歷史平均都有局限

17. 另外又整多圖畀你。亦係睇市盈率，咁似乎美股以外嘅東西，估值係比較合理嘅

18. 不過幾時都係，所有指標都有佢局限，用5年10年定20年又唔同。原理上面講咗，不再重覆。

19. 值得講嘅係，既然啲非美股，市盈率估值同歷史平均比唔算太貴　—而既然美債債息已見頂。咁似乎就真係博得過。個邏輯係：低嘅債息，應該可以支持高過歷史平均嘅估值。例如歷史平均係15倍，而家係14倍　—　咁你最驚係會唔會失驚無神變到10倍咁。但，如果債息會一路跌，咁呢種「跌到變10倍」嘅可能，應該唔係太高

20. 但當然，幾時都係，冇包生仔，否則人人發達。港股你咪見到不停de rate，計市盈率都係越嚟越平，呢排都未翻生。所以呢，都係要地域分散。

一切都話同美國債息見底有關，咁睇返呢排三大推低債息事件

21. 其實講咗好多，都係同「美國債息見頂」有關。當然大家想知係咪真見頂，會唔會有機會反彈之類。永冇答案，但可以睇多啲嘢去諗。

22. 所以，就由到底點解啲債息回得咁快開始講。上篇都大約提過，三樣嘢。首先美國啲就業數字疲弱（咁仲加乜息？），另外亦係美國嘅發債規模少過預期（啲人冇咁驚債務問題一路失控），當然仲有聯儲局月頭議息，唔加息預咗，但啲指引都似乎偏向好大機會「夠皮」。

23. 三管齊下，債息就大跌，至少事後睇係咁。睇埋呢個圖，十分形象化。

24. 然後呢啲，照計都係比較solid嘅證據（特別係發債規模低過預期），比較結構，怕且冇咁易只係一個月貨仔（所以小心下星期嘅通脹數字—如果太高，以上講嘅嘢就全部收檔）

又狼來了，又估幾時停加息，幾時減息。但狼真係嚟咗的

25. 無論如何，「又再開始估今次真係停加息」，「好快真係減息」：係，你會話狼來了，但狼來了個故事最後隻狼都真係出現嘛。冇錯係今年年頭講到年尾，等極都未減，甚至而家都未敢講實加完。冇錯個市係上上落落　—　但，咪話美股今年都雙位數升幅啦！Facebook Nvidia升成倍幾啦。係咁玩的，就係咁希望又落空，升下又跌下，但拉均慢慢爬上去。你等「真係確認」加完息或減息，就蚊都瞓。

分分鐘已經完成加息，當然睇埋下星期嘅通脹數字先

26. 講到尾，又係睇下市場預期，又係睇CME。拿，12月同1月嘅會，都仲有人估加息的，但少數（雖然唔係完全冇）。特別留意埋12月又係大會，又有經濟預測。提返你，9月時聯儲局嘅預測，仲係話今年會加多次息。但11月頭嗰次已經冇加，得返12月嗰次—而我估應該唔會加。咁亦即係話：局方啲嘢，都不能盡信。都啱嘅，都係摸住石頭過河，睇數字啫

27. 所以，真係睇埋下星期嘅通脹數字，照計開埋出嚟就知12月加唔加（而12月嗰次會係同個通數數字公佈叠埋一齊的）

市場估Terminal rate 大約5.4%，即係點？

28. 你見市場價格 imply嘅terminal rate（即係聯邦基金利率去到呢個位就最高嘅峰值），而家去到5.4%左右。提返你，而家聯邦基金利率區間係5.25-5.5，中間數即係5.375% —　即係，估加完了。

幾時減息？快啦。咁等減息先買定而家先買？你話呢？

29. 幾時減息？仲未知。但睇市場，就見到下年年中差不多減息。你見5月嘅會，已經近一半人賭減息。

30. 遲下可以又再深究下「等減息先買定買定先」，但一般嚟講，而家半年前，差不多了。只係啲估值唔係太平咁解，調整下更好。