買啦！仲等？（二）—美股值博率唔算好高，但我都放心買。你想貪多啲嘅，咁如果再調整，而債息冇大升，就放心買吧 (Patreon)

快手寫埋呢個「買啦！仲等？」。留意下星期又出CPI數字

美股真係唔算太值搏，Facebook Nvidia升咗幾倍啦。但冇計

美股真係唔平，但好似冇乜平過。平你又未必敢買

美股又貴，港股又廢，咁有冇啲有建設性啲嘅提議？都有嘅

好相信美債債息已經見頂。所以如果再有大調整，應該放心買

其實美股剛剛咪高位回咗10%，但你係咪敢買係咪捉到？

美股上星期連升5日，一星期升6%，係咩概念？

然後早兩個星期，先講緊「美股兩星期跌5%，全年升幅得返7%」

講到尾，一字咁淺，都係因為債息啫。只睇一樣就睇呢樣，唔係烏克蘭

上星期10年美債一星期跌26點子，半年最大跌幅

關鍵嘅問題：到底個債息係咪會再落？定會反彈？

咁你就要諗下，到底係乜推動個債息落。係咪結構性嘅嘢？

結論：我就放心買，但你想貪多啲嘅—如果調整而債息冇升，就放心買吧

快手寫埋呢個「買啦！仲等？」。留意下星期又出CPI數字

1. 都係快手寫晒呢個「買啦！仲等？」先，費事有乜突發事件（主要係下星期會出CPI數字）。另外，應該星期六外遊一星期，如無意外嗰個星期就出埋堆「甚麼是投資」，因為齋打字冇乜數冇乜圖，用Notebook都搞得掂

美股真係唔算太值搏，Facebook Nvidia升咗幾倍啦。但冇計

2. 正題，大把嘢講，但都係一句「買啦？仲等！」。雖然美股真係唔係好值博—例如你諗下：Facebook Nvidia升咗幾倍你先飛入去，值搏率當然低咗好多（雖然呢啲係事後先知嘅）。當然並唔係話升咗幾倍唔可以再升幾倍（睇返蘋果Steve Jobs死嗰時嘅例子，打後仲升多十幾廿倍），但即係值博率真係冇一年前咁高。而舉例Facebook 啲盈利又唔係可以倍倍聲咁升（雖然已經係季度新高！），Nvidia啲估值又冇點平過（人人都識講AI，就會係咁）

3. 講得再簡單啲，你睇美股啲市盈率，好難話平。雖然個難搞嘅地方係，美股又真係好似好少會平，然後平嗰時總係講到世界末日，唔敢買的。

美股真係唔平，但好似冇乜平過。平你又未必敢買

4. 而更難搞嘅係，你見平嘅港股，上星期升一浸後，近幾日又冇乜力，又跑輸返美股。於是你真係難免陷入嗰種「港股廢美股貴」嘅兩難。

5. 你問我就當然唔使諗咁多，有錢就買入去，分散地域。但真係幾時都有啲讀者有比較大舊錢，想搵好啲嘅時機。

6. 咁既然美股又話市盈率唔算好貴但又未算好抵，港股夠抵但又冇力。但我又話有錢唔怕買，但又唔係極之值得買。即係點？有冇啲比較有建設性嘅提議？

美股又貴，港股又廢，咁有冇啲有建設性啲嘅提議？都有嘅

7. 或者咁講今篇嘅重點：我就好放心而家買，因為我唔介意「唔係好抵時」都照買，甚至唔介意「相當唔抵時」都買，因為我會分散時間。但如果你真係想等「抵啲」，想等調整先買—咁如果再嚟一個比較大嘅調整，你就真係放心買啦。

8. 當中嘅重點係：我相當相信，美債嘅債息，應該已經見咗頂。呢度成個系列嘅文都係基於呢個假設。「咁會唔會有機會錯？」。當然都會！冇包生仔。但我真係相當相信呢樣嘢。

好相信美債債息已經見頂。所以如果再有大調整，應該放心買

9. 然後有咗呢樣嘢做個後盾，咁即使你覺得而家唔係好抵—可能回下就會抵。再加上，估值係相對嘅，相對返個債息。即係話，回得10%甚至20%，然後既然債息應該見咗頂，咁你買啲嘢嘅下行風險，應該唔係太大。

其實美股剛剛咪高位回咗10%，但你係咪敢買係咪捉到？

10. 呢度就可以講兩樣嘢。第一，其實美股，剛剛之前咪就高位回咗10%囉！調整嘛！我之後會整半篇講下呢回事，但，你見真係調整後買是幾好嘅主意。今次亦係，甚至唔使等，因為剛跌完10%，美股低位就反彈返6%。不過，即使你敢買都好，你見機會都係閃一閃，話咁快一星期就彈返6%

11. （順手呢個例子你可以思考下：點解啲人講「熊市」，係幾咁之無謂同浪費時間。「調整」一樣之嘛，係咪調整完多數會再跌？好似唔係。咁你同我講「高位跌咗10%」，即係有乜意義？代表你唔應該買咩？唔係）

12. 仲有，我本人就未必會「趁調整先買」，但我亦唔會介意「跌落嚟嗰時買」。而最重要係：好多人見到升咗係唔敢買，跌10%後佢去買，佢就覺得好似抵啲　—　特別係如果佢買完就升返—當然有啲比較「孤寒」嘅，又會想等跌20%先買，甚至跌完20%又想等跌多10%，又或者跌到30%又唔敢買。又或者係等嚟等去等幾年都等唔到，錯失晒機會，呢啲問題全部都講過。

13. 問題係，個反彈都算幾急。恒指，就固然低位都升6%，大家樂341 TVB 511之類出盈喜，低位都升返三四成，不過呢期港股又冇乜力，唔講咁多住（但都留意埋：領展業績唔差，亦根本冇減派息，照計真係最壞情況已過）

美股上星期連升5日，一星期升6%，係咩概念？

14. 你睇美股，上個星期就低位升返6%，納指都係大約升6%，而Cathie Wood隻ARKK一個星期升差不多20%，好似係歷嚟最好嘅單星期表現（因為呢期啲細科企升得多過Big Tech，原因不明，可能真係太殘）。

15. 一個星期升6%係咩概念？你不妨拎嚟同我成日講嘅：美股一年都係升10-12%左右，去比較下。問題係，呢啲10-12%，當然係一啲年份好好，一啲年份好差。而即使在真係升10%嘅年份，你見都係上上落落，往往可能一兩個星期就貢獻晒全年嘅升幅　—問題你根本捉唔到

然後早兩個星期，先講緊「美股兩星期跌5%，全年升幅得返7%」

16. 而家個情況都有啲類似。舉例畀你睇，信報嘅「本周美股焦點」幾好睇（唔使錢的，App即時新聞有）。你睇，再對上一個星期（10月30號），先講緊標指兩周插半成 全年升幅餘7%　—　但然後上星期連升5日，就已經追返6%。呢度只係一兩星期間嘅事，點估？

17. （亦因為無數呢啲咁嘅例子，所以我覺得你太過在意去想time the market，最後只會煩著自己。況且個副作用係你往往未必買得大）。

18. 咁講咗一大輪，到底點解忽然間美股高位調整10%後，一個星期就升返6%，搞到你唔敢追？

講到尾，一字咁淺，都係因為債息啫。只睇一樣就睇呢樣，唔係烏克蘭

19. 講到尾，一字咁淺，都係因為個債息。所以真係好重要，而唔係乜嘢經唔經濟，甚至地緣政治，甚至一啲業績上好細嘅嘢你去放到好大。

上星期10年美債一星期跌26點子，半年最大跌幅

20. 有數你睇，上星期10年債息，跌咗26點（0.26%），半年以嚟最大單星期跌幅。然後你見美股就一星期升6%，好耐冇咁強。兩者差不多係同步的。所以真係見到債息跌就買股票，都一般唔會死錯人（唔會死得太錯啦）

21. 睇長少少，你見到10年債息10月中時升到5厘，真係驚（亦所以話點解啲美股唔係好值博）。但然後，半個月多啲，已經由5厘跌到4.5厘，亦係相當大嘅跌幅。

關鍵嘅問題：到底個債息係咪會再落？定會反彈？

22. 於是乎你可以話，關鍵嘅問題係：到底個債息係咪一路會再落？怕唔怕反彈？一如以往，呢啲問題當然答案。但之前都講咗幾次，我相當相信，個債息已經見咗頂

23. 點解？咁就要睇下背後，到底係由乜推動個債息低。下篇詳細講，但不外乎都真係因為啲就業數字開始放慢，見到就業市場開始降溫。然後市場都估今年都唔會再加息（記唔記得10月時聯儲局都仲係引導今年仲有一次加，唔知10月定12月？結果10月尾嗰次，即係上星期嗰次，就冇加。12月都應該唔會。下篇詳細講），再加上聯儲局啲官員似乎呢排放軟口風，又加上美國最新個發債規模低過預期，似乎都留意到市場擔心財赤，擔心借錢太多

咁你就要諗下，到底係乜推動個債息落。係咪結構性嘅嘢？

24. 上面呢啲嘅「理由」，似乎係比較solid，比較結構性嘅。你甚至可以粗淺地理解：「既然加完息，好大機會2024年上半年減息，咁債息照計唔跌都好難再破頂」

25. 呢篇實在表達得唔係太好。但講到尾嘅結論：我十分堅定相信，債息已經見咗頂，再破頂嘅機會極低。係咪會一路跌唔敢講，但亦唔奇。所以相反地，你買股票，雖然未必包升，亦唔敢話唔會再跌，但應該整體值博。

26. 或者再簡單啲：而家我就放心買，但你仲想「貪」多啲嘅，都得。如果美股忽然無啦更跌多10%，然後又唔係特別因為債息升，而係其他奇怪「理由」（例如甚麼地緣政治風險），咁就應該可以放心買。

結論：我就放心買，但你想貪多啲嘅—如果調整而債息冇升，就放心買吧

27. 不過，提提你：剛剛呢次嘅10%調整，咪正係因為債息升囉。你要真係「債息又低但股票又冇乜原因忽然跌而你又唔驚」，真係唔係咁易嘅。

28. 講過多次啦，次次你事後睇返買股票嘅良機，你都發現「嗰一刻」你係驚到癲的。將來係咁，以後都會係咁，呢啲就係股市嘅精髓。

29. 所以如果再跌，而債息唔升嘅，放心買吧。如果再跌但債息升？「其實都放心買」，因為我睇死債息唔會真係再上返5厘。咁但，隨機應變啦，係教你思考啫，你不能拎住我呢句嘢然後乜都唔理。好簡單，例如嚟緊啲通脹忽然大升溫，咁以上講嘅嘢，當然唔成立了

30. 所以都話，唔止要知啲嘢升跌，最好仲要知「點解」。因為如果我真係「知道」係啲結構性因素，我就會有信心，知道係一個中期嘅趨勢，唔只係短期嘅random noise—偏偏冇人會話到畀你知點解，你在媒體上見到嘅未必係「真理由」，係靠你自己感受的。