買啦！仲等？（一）—埃汾倉重磅股大公開 (Patreon)

Patreon出咗個Collection 系列，好事

「買啦！仲等？」對我嚟講係偽命題，但唔係個個係我嘛

任何時間你問我，我都答你「買得」。不過程度都有分別，呢刻比較有信心

但最好嘅時間？「就梗係舊年」。冇呃你。FB NVDA升咗幾多？指數呢？

你需要嘅唔係質疑，係樂觀，係客觀數字，同埋遠離啲傻仔

埃汾倉，都真係跑贏大市。但坐住乜？公開下

其實咪同之前貼差不多，因為持股只會越嚟越多

但你見到，重倉股，整體都係跑贏大市的

不過呢種只係數學現象。道理唔深，但你買基金時留意下

叫你「買啦！仲等？」應該唔太難。但你諗下點解？

你見到近排港股美股都回升返，今年贏錢唔難，但好少人講股票。好事。

買乜？下篇預告。但，梗係買股票啦。唔想諗？ETF啦

1. 呢個「買啦！仲等？」都可以講返三四篇。但意思好明顯啦

Patreon出咗個Collection 系列，好事

2. 快手講下，Patreon（卒之）出咗個Collection嘅功能。對於我呢類長氣作者幾有用，例如啲乜乜101系列呀，金本位制呀，聯匯呀，一年回顧呀，甚麼是投資呀之類最啱。不過唔知舊文有冇得放（應該有嘅），得閒搞下。當然你亦可以用我個Google sheet Patreon Index

「買啦！仲等？」對我嚟講係偽命題，但唔係個個係我嘛

3. 好啦，其實個題目「買啦！仲等？」對我嚟講係偽命題，我一向都有錢就買。不過唔係所有讀者都好似我咁。總有啲人係會問買得未，當然係買得。

4. 固然你任何時間問我，我都答你買得，頂多係買乜嘅選擇，可能某啲市場我覺得太癲太貴叫你買其他市場，或者某啲類型股票我覺得太貴叫你買第樣。不過天地良心，你見呢一兩個月我都講啲心法知識考古歷史之類多，明顯因為市差（港股）同市悶（美股），我亦唔覺得股票好吸引（港股OK嘅）。

任何時間你問我，我都答你「買得」。不過程度都有分別，呢刻比較有信心

5. 不過到呢刻，我就話你知，我嘅「信心」比較強返啲。但你話係咪「好強」？唔係。係咪「最強」？又唔係。而家係咪「最好嘅時機」？長期讀者一定知答案：最好嘅時機當然係舊年

但最好嘅時間？「就梗係舊年」。冇呃你。FB NVDA升咗幾多？指數呢？

6. 冇講笑，差不多Exactly 一年前。你望下Facebook Nvidia Netflix舊年呢個時間幾錢？（其實Netflix唔係升好多，都話舊年5月見底，剛剛嘅文講咗）

7. OK，你會話只係揀啲好嘅嚟講。「咁你買SPY都贏15%啦」

8. OK你話你冇買美股，「咁你買港股都贏11%啦（有息收喎）」

你需要嘅唔係質疑，係樂觀，係客觀數字，同埋遠離啲傻仔

9. 所以呢，你需要唔係不停質疑，而係客觀數字，同埋樂觀（雖然盲目樂觀未必好，但如有懷疑，都係保持樂觀），同埋買得大，睇少啲股票，睇少啲垃圾評論。否則又烏克蘭又哈馬斯又俄羅斯兵變又美國加息又SVB執笠（仲有冇人記得呢間大銀行執咗？），嚇都嚇死你。記住，遠離啲杞人憂天嘅人，更加遠離啲陰謀論嘅人。樂觀嘅人未必發達，但發達嘅好似全部都樂觀。

埃汾倉，都真係跑贏大市。但坐住乜？公開下

10. 講返，唔知有冇人係畀我Facebook呢個「埃汾倉表現」吸咗入嚟。固然Facebook寫啲嘢唔好信晒，不過呢度都可以良心保證，啲數字係真嘅，甚至唔係我計，係錄音版助手幫手計的。

11. 咁你見，都真係叫跑贏大市，未計收息添喎（港股點都收咗3%息），算好叻架啦！咪話多數基金經理跑輸，即係我勁過50%以上基金經理 ，更唔好講C基金之類嘅垃圾（但，都有讀者拎大舊錢去買　—　其實不如益我啦）

12. 當然了，一剎那嘅光輝未必永恒，其實我20同21年，都幾明顯係跑輸嘅（順帶一提，因為我始終係不停咁有新錢去買，所以好多時升市咪跑輸，跌市咪跑贏）

13. 好啦，好似一兩年前公開過個持股全名單，寫咗幾篇文（成100隻喎）。不再重覆，反正都係咁上下嗰啲嘢，有加冇減（都話我唔沽股票，咁除非爆煲，除牌，畀人買咗，或私有化啫，否則持股數字只會多不會少）

14. 但，即管講下啲倉位較重嘅股票。留意，只係客觀數字。不一定代表呢刻我仲買緊，不一定代表呢刻我覺得你應該買，也不一定代表升得最多（「咁可以係我幾年前拎咗幾十億買WeWork而家得返幾百萬但仲係最大持股」）

ETF：盈富基金2800，國指ETF 2828，VOO，QQQM，EMXC，IDEV

港股：匯控5，港交所388，騰訊700，地鐵66，長江基建1038，中銀香港2388，渣打2888，中移動941，友邦1299，領展823

歐洲：LVMUY，HESAY

美股：NVDA，SCI，AAPL，AMZN，MSFT，META，GOOGL

15. （心水清嘅讀者見到，早兩個月老虎證券講座有貼過。當然有少少變動，啲嘢升升跌跌，或者有啲新錢，但整體差不多一樣）

其實咪同之前貼差不多，因為持股只會越嚟越多

16. 咁你見到，似乎係好過大市嘅。美股就固然係，港股都係（仲有得收埋息）

但你見到，重倉股，整體都係跑贏大市的

17. 但小心啲：其實你搵第二個嘅倉位，甚至你自己嘅倉位，都會見到呢種現象。唔記得正式名稱叫乜，姑姐叫「出頭鳥假象」。

18. 即係點？好簡單，咁例如如果年頭，隻隻嘅金額差不多（雖然事實唔係），咁當然今年表現好嘅，升成個幾開嘅（例如Facebook），自然就會變咗重磅。跌到九彩嘅，自然重磅都變輕磅。

不過呢種只係數學現象。道理唔深，但你買基金時留意下

19. 所以，「組合重磅股」就往往係「跑贏」

20. 呢種現象好易明，但真係好多人都忽略。例如你睇基金就見到咁，一般佢都要話你知十大持股之類。咁你見到，嘩，嗰十大都跑贏大市喎，即係佢有信心買大嗰啲都掂　—　其實，係假象。

21. 當然，最好就根本唔好買基金。但你買ETF有時都會遇到呢種現象。

叫你「買啦！仲等？」應該唔太難。但你諗下點解？

22. 我估，我去說服你「買啦！仲等？」應該唔會太難。知唔知點解？「因為呢排啲嘢慢慢升返上嚟」。一年前跌得急，你就會驚嘅。今次陰啲陰啲跌（主要講美股），但上星期美股連升五日，幾好。

23. 好在乜？好在其實你見真係好少人講股票。但明明今年全球股市表現唔差。美股固然升14%（仲想點？）。你話cherry pick嘅 ，咁你睇URTH，一樣升12%，滿意冇？

你見到近排港股美股都回升返，今年贏錢唔難，但好少人講股票。好事。

24. 咁你話，扯，URTH咪即係美股。咁咪話，根本你港股一半美股一半，今年都仲係贏錢（港股有3厘息喎）。甚至馬騮亂掟，幾十個市場亂咁揀，今年都係贏錢居多，拉勻亦係贏錢（可以參考我個Excel）

25. 呢啲位嘅錢，亦即係過去一年嘅錢，就相當易賺。因為你見真係冇乜人講，證明啲嘢唔係升到癲晒，證明啲估值唔會癲晒（但亦未必係好平）

26. 所以，我叫你「買啦！仲等？」，應該夠說服力。問題係，你會問我「咁買乜」？

買乜？下篇預告。但，梗係買股票啦。唔想諗？ETF啦

27. 下篇我會詳細講，但可能大家都知，近排全球股票反彈嘅原因，同之前回調嘅原因差不多。講嚟講去，又係美國加息，債息高，美元強，就不利股市。而家估加完息啦，債息回啦（回得好快的！），美金弱返啦，就萬事大吉。呢啲不難明，多數人都同意

28. 問題係，買乜？之前都有唔少讀者，都會覺得，「停加息，債息落，咪買美債，買美債ETF」

29. 呢個做法不能話「錯」，我亦不會完全反對。但又係嗰句，除非你係退休人士。否則，100%股票吧。你去買美債，照計風險近乎零，會有啲回報。買TLT，風險都不太大（但之前高位跌一半—不過跌咗一半咪冇咁大風險！），照計會有啲回報。

30. 但最大嘅問題係：Upside有幾多？應該好肯定嘅係：股票嘅upside，照計點都高過債券。你直接買美債嘅，咁根本已經cap晒自己嘅upside—隻嘢到期畀返100蚊你，又知晒會每年幾多息，你點可能仲有upside？唔通債主會益你無啦啦還多啲？定奬勵你下年忽然派多啲息？好似從來冇咁嘅事．TLT會好少少，但風險一樣大啲。講贏大錢，一般都只係得股票（同埋某啲時空下嘅樓）

31. 股票買乜？你要玩到好刁鑽都得。真係問嘅，可能又係啲高息股，甚至係領展823之類（咁你又話驚香港經濟崩潰公屋商場都要劈租，或者驚港紙爆煲，或者驚外星人侵略，咁就唔使討論的）。

32. 咁但，其實最重要係態度，心態，同埋行動。買啦，諗唔到就指數ETF啦，SPY 2800幫到你。唔想美股就IDEV啦，新興市場走中國就EMXC啦。揀個股係過癮，而且學到嘢，況且upside好可能大過指數（你中嘅話：個股可以一年升幾倍，指數冇乜見過）。

33. 但，買指數，總好過你左諗右諗然後錯失機會，到啲嘢升晒先飛入去。買指數，一年10-12%，幾好架啦　—　因為大多數人連呢個回報都做唔到的。最緊要係呢個回報之下，仲要買得大，坐得長。