股價Dynamics 最終回（九）—　Netflix，你單獨睇呢篇都得 (Patreon)

股價Dynamics最後一篇，你只睇呢篇都得

睇返Netflix 股價，幾時見頂，幾時見底？高位插幾多？

FB Netflix都係科技股，見頂時間差不多。但見底時間爭咗半年，點解？

納指22年兩個底，Netflix跟第一個，FB跌第二個，跌多一半。點搞？

FB Netflix都係高位跌75%。但一隻跌半年，一隻跌一年。反彈力度亦唔同

事後講，Netflix嘅生意似乎比FB穩定啲。但點解又同疫前高位爭得多啲？

生意模式，估值，疫情受惠股

NetFlix 2022年兩棍大插，半年跌75%，乜事？

4Q20 我先join Netflix—咁仲有乜人未上？然後上客果然見頂！

22年1月4Q21業績太插，但明明業績好過預期，「好消息」

係收入增長放慢丫，但之前都係架啦。點解嗰次先跌？因為唔係睇呢啲！

到22年4月1Q22業績，一晚插四成，又發生乜事？

去到7月嘅2Q22業績，上客量跌連兩季，但股價都冇事好好思考：你有冇cut到Netflix？

但連續兩季用戶流失，大家一定覺得間公司玩完

1. 歡迎新舊讀者，有啲技術問題（在家工作係好多技術問題的），幾日冇寫文，應該解決得七七八八，會急起直追。

股價Dynamics最後一篇，你只睇呢篇都得

2. 繼續我地呢個系列，最後一篇，甚至你只睇呢篇都可以。之後講返市況（好快講嘅：而家你估債息見底想買債當然得，但除非你就退休，否則股票嘅長遠upside始終大啲）

3. 呢篇講Netflix，照舊畀晒啲業績你（英文，幾次重要嘅我會貼埋中文）。Excel有數。2Q21，3Q21，4Q21，1Q22，2Q22，3Q22，4Q22，1Q23，2Q23，3Q23。留意公司月中出業績，1月， 4月，7月，10月。

睇返Netflix 股價，幾時見頂，幾時見底？高位插幾多？

4. 好啦，介紹返個股價圖先。Netflix股價，2021年10月見頂，700蚊，然後2022年5月見底，180蚊。而家就400蚊（剛升咗一棍）

5. 好啦，重覆返，Facebook股價，就2021年9月見頂，380蚊。然後2022年11月見底  90蚊。而家就300蚊。

6. 你可以抄低上面兩段佢

FB Netflix都係科技股，見頂時間差不多。但見底時間爭咗半年，點解？

7. 同樣係「科技股」，你見到見頂嘅時間差唔多，但見底時間就爭好遠。都真係唔係好同，明顯同兩間公司本身嘅情況都有關

納指22年兩個底，Netflix跟第一個，FB跌第二個，跌多一半。點搞？

8. 睇埋大市，納指都係21年10月左右見頂。Facebook Netflix都差不多同時見頂。但底呢？其實都幾複雜。納指22年6月好似一個底，但真底去到22年10月尾（然後22年尾仲有次接近底位）

9. 咁你見到Netflix就跟納指第一個底， 但Facebook跟第二個。當中隔咗成半年，然後呢段時間（即係Netflix見底到Facebook見底），Facebook都仲要跌多一半。再強調返，兩隻嘢見底嘅時間，真係爭好遠。

FB Netflix都係高位跌75%。但一隻跌半年，一隻跌一年。反彈力度亦唔同

10. 不過我地又計下數。Facebook高位跌75%先見底，亦即係得返四份一，但之後彈返300%，而家係高位80%。Netflix 高位一樣跌75%先見底，一樣得返四份一。但只係彈返100%多啲，而家係高位60%都冇

11. 你仲可以留意埋，雖然都係高位跌75%，但Netflix係跌得急過Facebook嘅。NetFlix就跌半年見底，Facebook就跌足一年（但調整嘅深度差不多）

事後講，Netflix嘅生意似乎比FB穩定啲。但點解又同疫前高位爭得多啲？

12. 當然事後我地都大約可以講，Netflix嘅業務好似「穩定」啲。最多係話上客慢咗咁啫，你唔會見啲收入盈利真係好大幅波動。但Facebook嗰期，又燒錢元宇宙呀，又話畀iOS個私隱設定限制呀，記唔記得，盈利試過「腰斬」？（一般即係指跌一半）

13. 以上種種，你可以用嚟解釋點解Facebook搞好耐先見底，因為嗰啲咩「元宇宙燒錢」嘅嘢去到後啲先爆出嚟。你亦可以解釋到，點解Facebook見底後彈得多過Netflix，因為盈利波動大啲，回復幅度都大啲。

14. 但，何解Netflix啲盈利收入好似冇咁波動，但一樣都要跌75%？又何解見底後反彈力度弱好多？講多次，Facebook而家股價係高位八成，Netflix 六成都冇。

生意模式，估值，疫情受惠股

15. 股票唔會講嘢，但我估好重要嘅一樣嘢：估值。

16. 照計唔使計實數，但你肯定知道Netflix講市盈率市銷率等等，貴過Facebook好多。唔多唔少因為Netflix係一間細好多嘅公司（市值係Facebook四份一樣都冇）。

17. 當然仲有，Netflix在疫情間係被視為「疫情受惠股」，而Facebook就冇乜呢回事。咁疫情間，前者就被追捧，但都未使等疫情過後，到啲人發現增長放慢，要上嘅客都上晒，就未必支持到咁貴估值。

NetFlix 2022年兩棍大插，半年跌75%，乜事？

18. 呢度我地就可以由頭到尾睇返Netflix近年（呢五年啦，唔係由佢創業開始）股價走勢嘅Dynamics．

19. 2020年時，佢股價都係跟大市行，2月疫情全球開花時狂跌，3月聯儲局無限QE時就狂升，到2021年都係比較跟大市嘅，亦同納指差不多時間見頂

4Q20 我先join Netflix—咁仲有乜人未上？然後上客果然見頂！

20. 特別講多次，「疫情受惠股」，睇住呢個圖先，都重要，陣間貼詳細。你見到2Q20上咗1000萬客，好勁，果然係受惠。有趣嘅係，睇下4Q20。點解？「我就係嗰時先join的」，因為我去台北隔離十四日。

21. 好啦，嗰時我都講笑話，「我都上埋，仲有乜人未上？」，你亦可以咁樣諗　—　事實亦似乎係咁。嗰季上咗850萬客　—　呢個就係短期嘅頂了（上客量，未講其他嘢）

22. 又係考古時間，你睇股價圖，好明顯見到兩棍大插。22年1月4Q21業績，出完跌20%。22年4月 1Q22業績，跌25%。呢兩次業績，兩棍加埋中間，股價已經跌咗七成。股票係可以好波動的

23. 最尾，你會見到股價有一棍反彈20%（留意在個圖上冇兩棍大插咁明顯，點解？上次解過啦，股價跌咗，數字細咗嘛。你睇Log scale就會見到，但我唔再貼了）。呢棍就係最新呢次嘛，上個月中，3Q23。咁你見業績好（中文呢度），上到880萬客（留意係2Q20後最高，估佢唔到），加上仲加價，收入增長加快。呢啲就不詳細講了。

22年1月4Q21業績太插，但明明業績好過預期，「好消息」

24. 最有興趣，都係睇返嗰兩棍大插，發生乜事。再講一次，係22年1月4Q21業績，同埋22年4月 1Q22業績。

25. 睇表（好重要，Excel都有），固然你會見到4Q21收入按年升16%，同3Q21一樣。去到1Q22直頭大幅放慢，「所以就跌」？但又好似唔係咁簡單。因為之前幾次業績，都好似見到收入增長有放慢，但嗰時股價都冇大瀉。

係收入增長放慢丫，但之前都係架啦。點解嗰次先跌？因為唔係睇呢啲！

26. 咁固然一方面係因為22年頭開始估好快加息（結果3月加）。但亦留意：其實啲人好多時唔係睇Netflix嘅收入甚至盈利，而係睇個上客量。

27. 咁你話，點解係咁？點解有時啲股票唔係「睇收入同盈利」？以前解過，例如保險股都唔只係睇收入盈利。最簡單嘅解法：你啲客有一定嘅預期壽命，有咗客，就自然之後收入會嚟。所以你一季啲收入下跌未必好致命，如果上到好多客咪得，收入會返嚟。

28. 咁你點知「睇」乜？其實媒體平時有講，你亦可以多思考。

29. 講返，我地睇下，上客數字點影響股價？

30. 22年1月4Q21業績（ 中文呢度），股價大跌20%。乜事？其實業績極靚，但完美示範「好消息會死」。上客好靚呀，828萬。但指引下季（1Q22）得250萬，同之前比慢好多。仲要分析員估係會上690萬，咁股價當然死得

到22年4月1Q22業績，一晚插四成，又發生乜事？

31. 然後最正嘅係：下季仲要係連呢個大幅下調嘅數都做唔到！所以插多棍

32. 22年4月 1Q22業績，中文呢度。一日跌25%，就真好差了，史上第一次上客量倒退，同公司之前自己指引（上250萬）都爭好遠，仲要分析員估上270萬。然後公司仲要指引再下跌流失200萬戶，咁梗係死得。當日跌過四成（一日跌四成！），最後都要跌25%

去到7月嘅2Q22業績，上客量跌連兩季，但股價都冇事

33. 有趣嘅係乜？就係去到呢個位，股價就見底了。果然係「壞消息」就應該買，係咪？

34. 去到7月嘅2Q22業績（中文），已經冇事啦。係喎，訂戶跌咗100萬　—　但好過嘛，乜都消化晒。股價有得彈添呀。打後就穩步上返去。

35. 我諗呢度幾次業績，畀你充份見到，股票係點樣「炒預期」，好業績反而大跌，差業績反而見底。除咗係預期，亦同公司指引有關。

好好思考：你有冇cut到Netflix？

36. 當然了，仲有一個問題：Netflix嗰時連跌兩季用戶流失，史上第一次。咁你以為玩完啦，特別係你上網，一定係見到一沉百踩，講啲戲垃圾（一向都垃圾），唔再吸引之類。

37. 呢種謬誤，寫過多次，人性就係用最近發生嘅嘢，去推斷將來。並唔係咁易估到啲嘢會鐘擺（當然，有時真係唔會擺）

但連續兩季用戶流失，大家一定覺得間公司玩完

38. 但撫心自問，你有冇cut到？我就冇啦，雖然我好少用。點解？「平嘛」。一個月一舊水，真係唔覺嘅。

39. 呢個亦係Netflix其中一個最聰明嘅地方（但當然人人會抄）—冇錯，「其實我Patreon都係咁上下」，100蚊，你唔會肉痛嘛，未必篇篇啱睇，但當支持下我都好嘛。記得叫多啲人支持。

40. 呢個「股價Dynamics系列」，完晒，記得溫熟佢。