股價Dynamics （八） —Facebook 最終篇。2022年嗰浸大插，發生乜事？又，去邊睇公司指引？去邊睇分析員預期？ (Patreon)

都係回顧歷史，但當然有用，因為到第時你就冇咁多時間冇咁冷靜

然後你見，近嚟Netflix同Facebook嘅業績，都大約用呢啲嘢解釋到

上幾篇仲講漏一樣嘢：2022年頭Facebook嗰下大插

嗰次收入增長「仲有」20%，點解都大跌

睇指引，你就見到個收入增長會大跌

咁啱嗰次亦係公司改名META後第一次業績。「不過而家仲燒緊錢」

仲有，邊度睇公司指引？

點解睇「評級」睇「目標價」多餘？

1. 好，反正市況靜，係回咗啲但又唔係好恐慌又唔似真係好平（港股就幾平嘅），所以都係可以繼續講下歷史

都係回顧歷史，但當然有用，因為到第時你就冇咁多時間冇咁冷靜

2. 呢個系列夠傷神，而且係「回顧歷史」，但我覺得極之有用。因為到「將來」出業績或者無事無幹股價大升大跌時，你未必有咁多時間慢慢睇數慢慢諗。而家呢啲等於平時嘅操練，到真係比賽時，你受嘅壓力就係另一回事。到時先再問人，到時先再搵嘢睇，就蚊都瞓。

3. 就算你有時間慢慢諗，都肯定會畀市場嘅氣氛影響咗。我地舉例呢兩隻嘢，試過一晚跌25%，唔驚就假（亦證明啲「止蝕」好難實行）。

然後你見，近嚟Netflix同Facebook嘅業績，都大約用呢啲嘢解釋到

4. 況且，你話只係歷史嘢，冇用？至少你見，近來佢地出業績，啲股價走勢，都同我地呢系列嘅「解釋」有啲似。明顯地唔只係「好消息」就升，更加唔係「數字靚」就升。都係睇預期，指引，估值。

5. 上幾篇講Facebook，講咗見頂同見底嗰時嘅收入走勢，往往係收入增長放慢時，股價已見頂，即使增長「仲係幾好」都冇力上。同樣地，收入跌幅靠穩時，股價已見底，即使「仲係幾差」。上次亦教咗你，即使你等到「出完多一季業績確認」，然後先沽走/先飛入去，都仲係有啲水位嘅。

6. 當然你想捉得再靚啲，就可以睇埋啲指引，自己計數。

上幾篇仲講漏一樣嘢：2022年頭Facebook嗰下大插

7. 不過，上幾篇講Facebook漏咗一樣嘢。我講咗21年9月見頂時嘅業績，亦講埋22年10月尾（舊年呢個時間）見底時嘅業績（也是插咗一大棍）

8. 不過漏咗中間嘅一次，2022年2月嗰棍大插。在個圖度太明顯了—　冇錯係股價21年9月見頂，增長亦見頂，但22年2月嗰棍大插先真係「響起警號」，亦都嚇走勢啲人，亦為22年嘅全球股市大跌掀起序幕（留意，2月尾先烏克蘭打仗，但啲人回顧嗰時就會分唔到先後，所以要仔細啲）。

9. 咁嗰次業績，發生乜事？英文呢度，中文呢度。

嗰次收入增長「仲有」20%，點解都大跌

10. 睇黃色，你會見到個收入增長，「仲有」20%，但首先係已經慢過之前兩季（股價亦之前見咗頂）。當然更重要係見到指引差，下季270-290億。咁基本上即係收入增長會由20%，跌到單位數（最後亦真係得返單位數），而呢個數亦遠低過分析員預期（街估300億）

11. 睇指引，你就至少知道「點解」會大跌。固然未必事前避到，但至少你知道乜事，或者出埋先沽走，都仲有啲水位嘅。

12. 當然仲有加埋，史上第一次按年利潤跌啦。仲有估值啦，當時又預會加息啦（結果3月開始加），用戶數字又低過預期啦等等。打後一路跌，玩到第三季個業績先真係見底，然後90蚊上返300蚊　—　都係預期，同埋周期啫。一兩年之前，你見啲人講到公司無所不能不受疫情影響，然後講到Facebook 已死，然後最後又發現唔死，根本只係畀股價影響然後講故事。（但當然，你睇收入，都真係見到公司有起起落落嘅）

睇指引，你就見到個收入增長會大跌

13. 仲有，話說22年頭呢次大插，係公司改名META後第一次，咁既然改完名出第一次業績就大插，當然又會有人將兩件事拉埋一齊。公司不務正業呀，投資埋啲燒錢元宇宙呀咁　—　你不能話呢個講法完全錯。但事實公司而家都係叫META，仲係燒緊元宇宙嘅錢，但股價已經90蚊上返300

咁啱嗰次亦係公司改名META後第一次業績。「不過而家仲燒緊錢」

14. 可見呢啲太過「吹水」式嘅論述，就唔好太認真。雖然呢個係人性，但最好信數字　—　因為數字一變，啲人嘅講法就唔同晒。你睇而家個個唔再話Elon Musk點巴閉啦，因為股價唔得嘛。

仲有，邊度睇公司指引？

15. 上篇用咗唔少篇幅，講「公司指引」。公司指引邊度搵？其實好易，Google就有，官方文件嘅一部份。順手講埋，你見好多時亦要睇埋啲業績同「分析員」預期相比如何。好啦，邊度搵？

16. 粗淺嘅，睇全年嘅，同你講過，Zacks都有，或者你搵Yahoo Finance都有

17. 不過想再精準少少嘅，固然Bloomberg Terminal會有，不過太貴，唔好嘥錢。但同時間，其實Financial Times都係有嘅（用Refinitiv嘅數據）（應該訂戶先睇到）

18. 順手都講埋，相信而家啲人冇咁迷信「大行報告」。好事，的確得啖笑，亦因為「資訊民主化」，大行嘅分析員未必好有優勢。

又，邊度睇「分析員預期」？應該睇乜？

19. 無論如何，睇「評級」，就最浪費時間，你根本唔使睇幾多人叫買入之類。「目標價」亦係多餘，我到而家都唔明咩叫「目檟價」。舉例，當一年間Facebook由200蚊跌到90蚊再升返上300蚊。咁大行A年頭話目標價係300蚊，啱唔啱？好似啱。大行B話目標價90蚊，又好似啱。咁到底咩係目標價？呢個課題，以前解過，不再詳細

點解睇「評級」睇「目標價」多餘？

20. 亦所以唔使嚟問我邊隻嘢嘅「目標價」係幾多—題外話，你一諗「目檟價」，就必定令你變得短視，一定賺得唔多。因為當蘋果而家100蚊，我同你講目標價1000蚊，你實唔信的。即使我話係5年目標價，你都唔會信。但事實股價係乭以升10倍，你只用「目標價」思維，就一定會係賺少少走咗。「到目檟價啦嘛」「食糊」—然後錯失晒之後嘅升浪。然後贏嘅只賺少少，唔夠你貼其他輸嘅股票。記住，贏嘅一定要贏得大，點都講幾倍，因為你總會輸錢。（反而你見之前啲「加密幣」嘅目標價，啲友就吹到天咁滯　—　但你咪理，呢樣亦令嗰啲人坐得穩，有啲賺到大錢）

21. 真正有用嘅？係呢啲嘢。分析員估緊下季幾多。呢度係盈利，見唔見上季出嘅數靚過預期一截？所以股價咪飛咗上嚟。又，收入都有的，唔貼了。

22. 好啦，但講到尾，係要錢的。Financial Times一年兩三千蚊，對剛出嚟做嘢嘅人，唔係細數。況且未必有時間睇，亦未必真係睇得明。不過又送埋呢啲data，見仁見智啦下。真係做金融，又負擔得起嘅，可以諗下。冇咁多錢冇咁多時間？亦冇問題，但寧願你接受自己「唔知」，好過以為自己乜都知，或者信啲亂講嘅人

23. 明顯呢篇文短啲，之後我地會將之前學過嘅嘢，應用落另一隻股票：Netflix嗰度。就當然會講得快啲。