股價盈利Dynamics （七）—睇收入增長見頂見底，要遲一季。但其實睇公司「指引」，都大約睇到。十分有用！ (Patreon)

業績強但股價跌，好多原因。除咗預期，估值，大市。仲有：指引

「指引」往往重要過「業績」，好合理

港股指引就得啖笑，美股就有晒數字出，不能太兒戲

Facebook今次業績好勁，但「指引」已經預示咗下季收入增長會放慢

順手講埋，睇某啲華文媒體，真係會出事

我地之前嘅文講過，收入升幅見頂，往往股價都見頂。　今次都好似係！

咁所以，唔使等出咗業績「確認」。往往早一季我地就知收入見頂見底

睇返歷史，係咪可以捉到頂同底？都似乎大約得

睇返以前嘅業績，其實畀指引嗰時，已經大約睇到收入嘅trend

事後睇返，捉頂嗰啲易啲，捉底就真係有啲難

當然了，都只係事後睇，不能保證下次都會咁。雖然今次都好似係

預告：下次睇埋Netflix

1. 呢篇唔深，但煩，亦係要花時間睇。但十分重要。

2. 第五篇講咗Facebook最新個業績，第六篇算番外篇，講下疫情以黎嘅收入同盈利走勢。

業績強但股價跌，好多原因。除咗預期，估值，大市。仲有：指引

3. 關於「Facebook（或任何股票）業績強但股價唔強」，除咗一路講「業績冇話好唔好只有勝唔勝預期」外（事實Facebook亦勝預期），仲有本身估值（夠殘就點差都好快上返嚟），仲有債息（亦涉及大市估值），大市當時走勢等等外

4. 仲可以講一樣嘢，好多人都留意到：指引保守。

「指引」往往重要過「業績」，好合理

5. 好多時，指引重要過「業績」本身，亦都好合理，因為股價係炒預期。況且，唔少「業績」嘅嘢往往都反映咗。你出個業績好差，但話畀大家知之後兩季會好掂嘅，股價多數升，反之亦然。

6. 港股嘅情況，啲「指引」就往往唔「量化」。即係你只能從管理層啲語氣，用字，甚至面口估下佢地覺得之後會點。事實管理層亦可以特登玩你，反正咩叫「審慎樂觀」任佢講，下年生意多一倍又得，下年生意得返一半亦得。

港股指引就得啖笑，美股就有晒數字出，不能太兒戲

7. 但美股（日本股都好似係）嘅情況，就比較好啲。大公司嘅，管理層好多都會畀到量化嘅指引。唔止話你知「下季會好啲」，係直頭話你知「收入會去到幾多億至幾多億」。甚至好多其他數字，上幾多客，吸幾多錢，做幾多訂單，有時都會有量化指引。

8. 固然「指引」不代表實做到，但都有個譜，都係管理層正式訊息嘅一部份，全部有白紙黑字紀錄，總不能亂咁吹水，下季差幾條街就只講句「唔好意思」，不能咁過份的。

Facebook今次業績好勁，但「指引」已經預示咗下季收入增長會放慢

9. 於是就有趣啦喎，睇返Facebook 今次 3Q23業績，對第4季（4Q23）嘅收入指引係：365-400億美元。特別甶意個range係35億，以往只係25億。咁都冇話硬性要幾多，可能真係因為「前景唔明朗」，又或者只係因為個收入基數大咗

10. 順手睇埋，Aastock呢個中文報導，有啲R頭。「Meta預計，第四季收入介乎365億美元至400億美元」，呢度明丫。但下一句，「受到外幣推動，料第四季收入年增約2%」。到底寫乜？即係個收入增長按年得返2%？好大件事喎

順手講埋，睇某啲華文媒體，真係會出事

11. 睇返官方Transcript（大多數公司都有），原文係：Our guidance assumes a foreign currency tailwind of approximately 2% to year-over-year total revenue growth in the fourth quarter based on current exchange rates。留意tailwind係指「正面影響」，意思大約係指「上面嘅指引假設匯率變化帶嚟2%嘅正面影響」

12. 教訓？首先，最好就睇原文，不過唔多實際。咁第二，就睇英文媒體好似好啲（例如CNBC）。就咁睇華文嘅，都真係揀啲好啲嘅嚟睇。真係會死人的。

13. 最後，公司預計全年總支出870-890億，低過之前嘅880-910億，冇乜特別，純係話你知連呢啲都有指引。

14. 好啦，留意啦喎，好重要喎。公司指引，下季收入365-400億，即管當中間數，383億。首先留意同市場預期相比，似乎比預期低些少。但都唔係最重要

15. 最最最重要係：咁既然有下季嘅數字。咦！我地咪即係大約知道下一季嘅收入按年增長會點囉

但我地之前嘅文講過，收入升幅見頂，往往股價都見頂。　今次都好似係！

16. 呢個點解咁重要？因為，之前嘅文就討論過呢個問題！冇錯，我地見到往往啲收入增長升幅見頂回落，或者見底反彈之時，就亦係股價轉角之時。但上次嘅文我地都講過個問題：呢啲係我地睇歷史數字見到嘅，但如果在此刻，今季增長「見頂回落」，我地要下一季先知真係見頂嘛，然後等到業績出嚟仲有多一個月　—　上次嘅文，我地就討論，點樣可以解決呢個問題。上次嘅其中一個「解決方法」，就係話你知，你到出埋下一季嘅數字先走人/飛入去，都仲係有啲用嘅。

17. 不過上次都有預告過，有冇方法做好啲？有！實際上，因為公司會畀指引。其實呢一季，你大約已經知道下一季嘅增長係點啦。正如今次嘅數出嚟之後，下季收入365-400億，當中間數383億。你一計出嚟就見到，計中間數，似乎個增長，又再見咗頂啦喎。

18. 事實上，4Q22嘅收入係322億（高基數！）。咁下季做到365-400億，即係按年升13-24%。留意3Q23收入按年升23%，即係話，除非你真係做到400億（或更多），否則都好大機會係增長見咗頂

19. 唔敢話100%肯定，但照我地以往啲文嘅邏輯，咁可能代表，Facebook短期股價都見咗頂（10月中見過330蚊，而家300）

咁所以，唔使等出咗業績「確認」。往往早一季我地就知收入見頂見底

20. 放心，呢個咁重要嘅課題，接下來我會詳細講。我地又重溫返，到底之前嗰兩次轉角，係咪可以「早少少」睇到？唔使到等多一季業績？答案係，一半半，可能都可以。

21. 好快講多次，股價21年9月頭見頂。然後事後睇，2Q21嘅收入按年增長（56%）係頂位，3Q21 嗰次（10月公佈）就見到增長放慢（35%）。

22. 同樣地，講多次，股價22年10月尾見底。然後我地見到，3Q22嗰次收入就應該見咗底（跌4%），到4Q22公佈（2023年2月頭）見到冇惡化（都係跌4%）。

睇返歷史，係咪可以捉到頂同底？都似乎大約得

23. 上次都係講呢個問題，股價21年9月頭見頂，22年10月尾見底。但我要到2021年10月底/2023年，睇多一季，我先「確定」到真係放慢/見底嘛。

24. 上次嘅文講，咁你21年10月尾先沽，2023年2月頭先飛入去，都仲有水位嘅。下下真係捉到正咩。

25. 不過，可唔可以早啲？答案係，其實似乎可以，因為有畀指引！

睇返以前嘅業績，其實畀指引嗰時，已經大約睇到收入嘅trend

26. 時光倒流返去2Q21業績，21年7月尾。相當好嘅業績，但公司指引呢？冇畀實數，但講話下半年嘅增長會顯著放慢。再細心啲睇，其實所謂「冇畀實數」，係指同再上一季（1Q21）嘅指引一樣。又或者，當時分析員係預期3Q21收入282億（最後做到290億）– 兩個情況，你都其實計到估到去到3Q21個按年增長會大跌。就唔使等到10月尾出3Q21業績先知。再講一次，股價係21年9月尾先見頂，而呢個指引係7月尾出，照計有時間畀你「靚走」

27. 同樣地，睇返3Q22業績，22年10月尾公佈。相當差，收入跌4%，公司史上第一次按年跌。盈利直頭跌一半。不過，睇指引，公司指引4Q23 300 – 325 億（最後做到322）。咁如果做到上限，就真係會見到「跌幅見底」。留意股價亦係差不多時間見底　—　其實係出完業績插多一棍就見底。

事後睇返，捉頂嗰啲易啲，捉底就真係有啲難

28. 不過，你要認真挑剔嘅：你會見到，2Q21業績嗰次捉見頂，易過3Q22業績嗰次捉見底。道理好簡單：2Q21嗰次嘅指引，除非真係做到上限，否則多數都見到收入升幅會放慢。但3Q22嗰次呢？除非真係做到上限，否則收入倒退幅度仲有得惡化喎。雖然最後佢真係做到上限，但3Q22時你睇指引，都不能估到嘛，你頂多係用個中位數啫。

29. 解決方法？其實都冇乜。不過，真係事後拗嘅，當然都係睇估值。3Q22時啲估值，似乎你可以容許自己有個大啲嘅同情空間，即管「估」公司有機會做到上限。

30. 但講到尾，你估真係神仙咩。其實到出埋下一次「確認」先沽出去/飛入去，你見到都相當唔錯了。

當然了，都只係事後睇，不能保證下次都會咁。雖然今次都好似係

31. 大約係咁，嘔心瀝血。但至少勉強我地事後睇到，啲股價同盈利或收入增長嘅關係。似乎真係睇個「增速」幾時見底見頂，而有時我地大約可以由啲公司指引，或者分析員估嘅數睇到。

32. 不過，以上呢啲都係十分事後先知嘅嘢，我亦話唔到畀你知，係咪下次都會係咁（但，今次業績見到Facebook 4Q23 增長應該放慢，然後果然股價早排就好似見咗頂）

預告：下次睇埋Netflix

33. 下篇（或下幾篇，希望寫短啲）我會再睇下Netflix嘅情況。講明先，我完全唔肯定係咪一樣work．唔work咁點？我都唔知點。

34. 但唯獨預告下：Netflix嘅情況，會唔會跟本唔係睇收入同盈利，係睇個訂戶人數？到時睇下，用邊個數字比較容易「解釋」