股價Dynamics （六） - 後生仔，都係專心搵錢。投資當然重要，但唔好花你好多時間。另外睇返，疫情下，Facebook嘅收入，受幾大打擊？用咗幾耐先回復？ (Patreon)

呢幾篇史上寫得最辛苦，但亦最值得你睇

你發現自己在家玩，冇Bloomberg，事倍功半。但裝又唔划算

嗰啲乜乜系統，就算幫到你提升回報　—　又係咪計得掂數？

如果啲訊號同系統幫到你一年額外3%回報—嗰條友變神級基金佬啦

就算真係幫到你2%回報　—　會唔會你拎啲時間提升自己收入好啲？

「但你又叫人訂明報信報」「叫人訂你Patreon喎」

後生仔嘅，當然都要投資，但唔好花好多時間。專心搵錢好過

講返Facebook 業績，睇下點分係咪「低基數」去drive

Facebook 疫情前嘅4Q19，收入同純利都係當時史上新高

1Q20疫情打擊，估下收入同盈利跌幾多？點解重要？

有趣嘅係，到2Q20，收入同純利已經反彈。說好了嘅「食晒疫情」一季

去到3Q20，收入同盈利已經高過疫情前　—　所以股價破頂，有幾奇？

說好了的「股市同實體經濟脫節」「經濟有排衰」「唔知幾時先復常」

呢幾篇史上寫得最辛苦，但亦最值得你睇

1. 呢幾篇應該係史上寫得最辛苦，但亦係其中幾篇最值得你睇嘅。你真係想認真分析股票，可能就係咁上下，呢種方向開始

你發現自己在家玩，冇Bloomberg，事倍功半。但裝又唔划算

2. 然後你發現幾樣嘢：首先，自己在家，冇Bloomberg之類，事倍功半，所以在呢方面真係「做金融」嘅有優勢—梗係拎公司部機嚟用。

3. 但另一方面，自己屋企裝部固然完全唔划算（兩皮嘢個月，我以前都有諗過，但好快覺得計唔掂數），除非你個倉幾億港紙，否則你計都計到，一年多20萬開支，但係咪可以幫到你「投資回報」咁多？似乎係否定嘅。

嗰啲乜乜系統，就算幫到你提升回報　—　又係咪計得掂數？

4. 甚至你用平啲嘅選擇，用Fact set之類，甚至各種古靈精怪嘅乜乜系統（例如呢啲）。我唔知幾錢，當一年2萬蚊（整得幾個怕且唔止）。即使你個倉有100萬都好，呢度都等於2%。佢係咪可以幫到你一年回報高2%？怕且係唔得。更唔好講好多人即使有100萬，都唔會stay invest 100萬。咁你計下嗰啲錢，佔咗你個倉嘅幾多%？

如果啲訊號同系統幫到你一年額外3%回報—嗰條友變神級基金佬啦

5. 好賴皮但好現實講句：發明嗰個可以拎到2%額外回報嘅，佢應該做咗神級基金經理。100萬倉都尚且如此，後生讀者幾十萬倉嘅，就真係冇可能一個月拎千幾兩千銀去訂呢啲東西。

就算真係幫到你2%回報　—　會唔會你拎啲時間提升自己收入好啲？

6. 而就算例如做呢啲嘢，幫到你回報都好（我好懷疑）。其實如果後生細仔嘅，一年多2%回報，固然可喜，但唔會太多錢。100萬倉都好，一年多2%，即係多2皮嘢　—　我幾肯定，你拎呢啲時間去做好你份工，照計拎到嘅回報更好。

「但你又叫人訂明報信報」「叫人訂你Patreon喎」

7. 「但埃汾又叫人訂明報信報？埃汾個Patreon都100蚊個月喎」。咁首先，一年都係一千幾百啫，同上面嗰啲爭得遠。二來，呢啲唔止係幫到你「投資回報」嘛　—　你諗真啲真係有分別。我訂啲乜鬼訊號系統，除咗（你以為）幫到回報，對你本身知識水平無任何幫助，亦唔會幫到你打工。我唔會因為你識用邊個信號系統而請你。但明報信報埃汾Patreon之類，照計係幫到你嘅知識水平嘅。

8. 呢個亦係我對啲怪力亂神，睇圖睇星座睇水星逆行之類嘅嘢，全無興趣嘅原因。你睇財務報表，睇公司嘅生意，即使幫唔到你投資，都令你了解呢個世界多咗，亦可能幫你升職加人工。但你老細唔會因為你識睇射擊之星而加你人工的（順帶一提，其實唔係「射擊之星」，Shooting Star 係流星）

後生仔嘅，當然都要投資，但唔好花好多時間。專心搵錢好過

9. 扯遠咗，但有時真係唔好本末倒置。特別留意同你嘅年紀有關：後生仔嘅，真係記住啲心法就得，未必要拎好多時間「研究股票」。你個倉細，畀你由10%變到15%，幫助都不大。倒不如專心工作，你加人工可以加幾倍，投入嘅錢多幾倍，自然低回報都掂，仲要坐得穩。相反，老嘢就可能真係可以花多啲時間「鑽研」。無他，在公司升到一定位置，人工高，但要再上已經好難，「唔使咁搏」。但亦因為人工高，又返工返咗一段時間，個倉夠大。你1000萬倉嘅，10%同12%回報，就爭得遠。開頭做嘅嘢嘅，就反而係你投入幾多先重要（包括你人工幾多，儲幾多，同埋會掉幾多去股票）

10. 唔想咁煩嘅，就真係還原基本步，個個月SPY或者URTH之類算。

講返Facebook 業績，睇下點分係咪「低基數」去drive

11. 講返Facebook 業績，再插播少少，我地由啲數字，可以快手睇埋，業績出嘅嘅按年增長，有幾多係因為「高基數」「低基數」。理論上，你睇按年增長嘅數，就已經排除咗「季節性」，所以往往好過睇按季增長。問題係，有時有啲one off 但唔係季節性嘅嘢（例如疫情），就有點難搞。概念唔深，只係要花啲時間細心睇

Facebook 疫情前嘅4Q19，收入同純利都係當時史上新高

12. 又係睇呢個表。首先睇下，疫情前嘅4Q19（綠色），Facebook 一季211億收入，73億純利，疫情前最好嘅一季。留意固然中間有起有落，但生意一路都好，去到4Q19直頭史上最強，說好了的Facebook已死

1Q20疫情打擊，估下收入同盈利跌幾多？點解重要？

13. 打後係疫情，當然有打擊。你見到1Q20收入得返4Q19嘅84%（一季冇咗15%），純利更加只係得返66%（一季冇咗三份一）。特別可以留意，某程度上你可以話疫情係「2月先爆」（睇你點定義），1Q20都未反映晒。

14. 知唔知睇呢啲有乜用？就係第時你可以有個參考。固然世事如棋局局新，次次爆鑊都唔同。但即係，成日講啲嘢要「量化」，否則下次再有啲災禍，你只係講「最壞情況」，就冇意思（最壞情況爆地球玩完乜都清零）。但例如有疫情做個參考，咁下次爆個冇咁勁嘅疫情，你要估數，你都大約可以有個譜　—　疫情間收入都只係跌15%之嘛，今次冇乜理由更多（但留意，都話1Q20未係「全面」疫情）

有趣嘅係，到2Q20，收入同純利已經反彈。說好了嘅「食晒疫情」一季

15. 有趣嘅係，所謂「完全反映疫情」嘅季度，係不存在嘅—因為你見到，2Q20，公司嘅收入同純利，已經反彈，高過1Q20。冇錯係仲未返到去疫情前，但，明明2Q20先係「全季反映」喎。

16. 點解會咁？其實當時你都可能估到。首先固然係聯儲局嘅「無限QE」定住咗市場同經濟。另外，你發現人類嘅適應力真係強。固然2Q20仲有好多限制，但你都見到生意照做，唔少去晒網上，所以數碼廣告亦都反彈。

17. 然後？去到3Q20，你冇睇錯，收入同純利，已經高過疫情前嘅4Q19！好值得你留意。生意金額由急插到反彈到破頂，用咗一年都未夠。

去到3Q20，收入同盈利已經高過疫情前　—　所以股價破頂，有幾奇？

18. 於是乎你諗下，2020年3月打後大市（特別係科技股）嘅瘋狂反彈，股價甚至創新高，係咪冇道堙？似乎唔係，因為收入同盈利都高過疫情前喎！股價也高過疫情前，有何不可？我都未同你計啲債息低咗好多！

19. 仲有一樣嘢：嗰時啲人話「股市同實體經濟脫節」，你諗下錯得幾交關？我就唔知咩叫做「經濟」，但你睇Facebook嘅盈利，係咪話畀你知，強得有理？更加唔好走去聽啲人講咩「經濟仲未重啟」「仲未復常」—都話，3Q20個收入同盈利已經創紀錄啦，而股價當然係炒預期，所以之前升定，合理之極！

20. 以上呢啲，其實唔係難明嘅嘢，但最好你再諗多次。因為你聽啲人講「疫情影響好深遠」「經濟有排衰」「唔知幾時先復常」，真係好似言之成理　—　但諗真啲，股市並唔係咁嘅邏輯。上面我同你睇盈利去解，一樣合理，甚至更加合理。

說好了的「股市同實體經濟脫節」「經濟有排衰」「唔知幾時先復常」

21. 不過打後嘅發展，就有啲搞笑。你睇紅字，睇收入銀碼，4Q21就見咗頂（到今季先再超越），但股價直頭21年9月見咗頂。純利呢？再早好多，4Q20已經見頂（到今季先再超越）。但唔多唔少啲純利受累於啲「元宇宙」開始，似乎睇收入會好啲。

22. 另外，正如最初講，似乎都係睇啲收入按年增長嘅趨勢，比較睇到同股價嘅關係。正如剛剛呢季（3Q23，收入同純利都史上最高，甚至好可能下季會再創季度新高，但股價反而好似10月中已經見咗頂。除咗債息，亦可能因為見到3Q23嘅增長已經係最高，4Q23一定會放慢。

23. 呢啲就係下篇講嘅嘢