股價Dynamics （五） —睇番Facebook 最新業績，鑑古知今 (Patreon)

Facebook 業績似乎「好」，又勝預期，但依然照跌。都唔奇嘅

Facebook 業績似乎「好」，又勝預期，但依然照跌。都唔奇嘅

業績無可挑剔，但好大程度一早知啦，仲要股價升咗咁多

收入同純利史上最高，收入按年升23%，3Q21以嚟最快

元宇由仲燒緊錢，但股價低位升咗3倍4倍，唔會等「燒完」

邪惡帝國嘅DAU，31.4億，按年升7%。又話冇人用？

然後收入增長主要嚟自……大陸！

收入同盈利都係史上最高，「但股價唔係喎」

2021年9月，股價380蚊，但1厘債息。而家300蚊，但5厘債息

舊年呢個時間，90蚊，2300億市值。而家一季116億純利。幾多倍市盈？

事後睇，舊年唔買就笨。「但我點知今年盈利會破頂？」—但，真係唔知？

假想實驗：舊年未來人同你講下年盈利腰斬，另一個話一個開。信邊個？

仲有，睇DAU MAU，大約估到。當然你啲網友就話「冇人用」

其實啲人用Facebook嘅時間好似少咗，但廣告商係咪十分care？

1. 半插播，首先我想講埋Facebook最新業績。你見業績似乎係「好」，亦都高過預期，但股價先大跌，再反彈少少。當然受好多因素影響。亦可以事後「解」，但唔好太執著。記住營運數字就最客觀，股價反應都係客觀但短暫，然後啲「解釋」就只係事後fit story

業績無可挑剔，但好大程度一早知啦，仲要股價升咗咁多

2. 睇返今次 3Q23業績，近乎係無可挑剔。不過你可以諗下，其實係咪一早知？仲要股價今年都升咗140%。係咪反映晒？點解一早知？陣間再解，但一個好重要嘅提示：上次業績（7月尾），公司已經有指引，我都有寫過下，一早知道今季度可能係史上收入同純利最高嘅季度。

收入同純利史上最高，收入按年升23%，3Q21以嚟最快

3. 想睇中文嘅，信報呢度，明報呢度，但好似要訂戶先有，是但。無論如何，業績真係好強，亦都好過預期。睇表（藍色嗰行，另外個Excel update咗，attachment有），見到今季收入同盈利，都係史上最高。

4. 你睇按年增速，亦都較上一季加快。收入按年升23%，3Q21以嚟最快添。純利按年升164%，固然舊年低基數，但計銀碼都係史上最高。

元宇由仲燒緊錢，但股價低位升咗3倍4倍，唔會等「燒完」

5. 其他東西方面，你見到元宇宙仲係燒緊錢，仲未摺埋的。不過，見到燒錢收字低過預期　—　又畀你見到一樣嘢，都係炒預期，同埋同一個「議題」不會不停咁炒。即係點？即係你見股價早已經低位彈返3倍4倍，我總不能不停咁講「元宇宙仲燒緊錢」而唔去買，而去估佢冇得升。唔會等到「唔燒錢」先升的（正如Nvidia唔會因為「AI」而每日不停咁升）

邪惡帝國嘅DAU，31.4億，按年升7%。又話冇人用？

6. 仲有值得留意嘅係，佢成壇邪惡帝國嘅DAU（每日活躍用戶），已經去到31.4億，高過預期，亦按年升7% —真係說好了的「冇人用」。可能有人質疑，係因為Threads嘅數　—　不過照計影響不大，因為Threads嘅用家，by default就一定係Instagram嘅用家，而佢嘅計法係唔會double count．你一日上齊Facebook Whatsapp Messenger Instagram Threads都好，都只係計一個人，但當然你一日入面是但用咗5樣其中1樣，都計你係每日活躍用戶

7. 如果計成個帝國嘅MAU，每月活躍用家，直頭去到40億。你諗下係幾咁誇張嘅數字。特別你留意，大陸理論上用唔到（但實情唔少人用）。

然後收入增長主要嚟自……大陸！

8. 講到大陸，亦有一樣十分神奇嘅事。公司有講，第三季嘅業績，主要就係由大陸嘅收入推動。又話用唔到？首先，依然唔少人用。但更重要嘅係：用唔到唔緊要，反正用戶唔會畀錢。但大陸公司照樣會落廣告嘛！（無論啲客係國內定國外　—　主要係國外啦下）

收入同盈利都係史上最高，「但股價唔係喎」

9. 好啦，講到咁好，收入同盈利都史上最高。「但股價唔係喎」。

10. 呢度就有好多原因，首先，雖然股價大約都反映盈利，但時間點上並唔會完全一樣。仲有，亦係要睇啲按年增長呀，趨勢呀，預期呀之類。

2021年9月，股價380蚊，但1厘債息。而家300蚊，但5厘債息

11. 當然仲有更重要嘅，估值。今次唔講到太深，但一樣嘢：Facebook股價2021年9月見頂，380蚊左右，嗰時債息1厘多啲。而家300蚊，但美國10年債息係5厘。債息點都有啲影響

12. 然後我地仲可以睇下其他嘢，例如舊年呢個時間嘅「估值」。舊年呢個時間，股價低位，90蚊左右。小學數學，而家300蚊7600億市值，當時90蚊，就2300億市值

舊年呢個時間，90蚊，2300億市值。而家一季116億純利。幾多倍市盈？

13. 有趣嘅係，剛剛一季，Facebook純利史上最高，116億（中間仲講咗無數咁多嘅金融災難，冇人用Facebook，俄烏戰爭，加息壓力）。你用舊年低位時嘅2300億估值，對返而家嘅116億一季純利。計出嚟，個年度化市盈率，5倍！

14. 事後睇，90蚊嗰時，唔買真係笨。當然只係事後，但真係，唔買都唔好沽。

事後睇，舊年唔買就笨。「但我點知今年盈利會破頂？」—但，真係唔知？

15. 但當然了，你會覺得，咁樣事後孔明啫，好屈機，好狗。拎個最低嘅市值，同最高嘅盈利比。係喎。

16. 而講到尾，「我鬼知今年盈利會反彈咁多咩，知嘅一早飛入去啦」

17. 呢度又可以拆開做兩個問題。首先，大家都冇水晶球，鬼知咩！我都係事後睇數講故事

假想實驗：舊年未來人同你講下年盈利腰斬，另一個話一個開。信邊個？

18. 但，係咪真係完全「唔知」？當然可能完全知，但，係咪完全估唔到？或者又做假想實驗，舊年10月尾，你見到兩個未來人，一個話你知下年呢個時間，Facebook嘅盈利會跌多一半。一個話你知，下年呢個時間，盈利會升返一個開。你會信邊個？固然唔肯定，但，係咪真係50-50？

19. 留意嘅係，絶大多數人，都係用最近發生嘅事判斷將來。人性通病，我都會犯，只係程度嘅分別。舊年呢個時間，股市係咁跌，Facebook係咁跌，啲數亦都差，你好可能會認為「會繼續差」　—　而忽略咗，其實好可能係週期。

仲有，睇DAU MAU，大約估到。當然你啲網友就話「冇人用」

20. 仲有第二個問題：其實你大約睇啲DAU MAU之類，就大約可以估到：下年同一個時間，盈利會升返嘅機會，似乎大過再要跌一半。雖然都仲係事後睇，但我覺得呢個判斷係公平嘅。

21. 當然了，作為一間咁多用戶嘅公司，其實大家都「睇得到」　—　但你「睇」嘢，係咪「真」？目測多數人都同我講，「冇人用Facebook」。

22. 好似我都少用咗，而事實上你好明顯見到啲人係少咗貼自己嘢。我甚至估，啲用戶用嘅「時間」少咗。但係咪真係啲人「唔用」？似乎唔係。

其實啲人用Facebook嘅時間好似少咗，但廣告商係咪十分care？

23. 另一樣嘢，就係當然你仲要留意埋啲個個用Instagram嘅新一代。我亦都好似冇乜見有人堅持到唔用Whatsapp。所以平時大家講嘅「冇人用」，有幾多係真？

24. 而對於Facebook 落廣告嘅人嚟講，你仲會上，就已經夠了。你會唔會再貼你自己啲生活相，其實未必係重點。當然，你可以話啲用家停留嘅時間少咗，都對落廣告嘅客有啲影響　—　但似乎真係唔係咁大？我係落廣告嘅（事實我都有落），我似乎只係關心你睇唔睇到我個廣告　—　你其他時間留幾耐，並唔係我最關心嘅事（當然了，Facebook似乎冇公佈呢個「每日上幾耐」嘅數字）