股價Dynamics （四）：你最關心嘅：點捉見頂見底？可以試下。Facebook作為例子 (Patreon)

呢篇成個系列精華所在，唔太深唔太長，但要好集中地睇

舊年兩次績，FB都插25%，但我點知第一棍後仲要跌，第二棍見底？

同估值有啲關係，計下數

別人恐懼時我貪婪，用在個股唔係咁易　—我點知22年2月嗰下未夠驚？

我點知市盈率20倍算貴，10倍算平？

當時市盈率以為唔貴，但盈利一路跌，結果好貴　—咁點知幾時盈利跌？

解決方法幾個（但不完美）

到底有冇方法睇到，收入盈利走勢，同股價嘅關係？

其實好簡單：股價21年9月頭見頂，收入增長亦係2Q21見頂

同樣地，收入跌幅3Q22見底，股價就22年10月尾見底

但仲有一個好重要嘅問題：我幾時知2Q21收入增長見頂？10月尾先知

呢個問題點解決？答案係，唔使做到完美

下篇預告：不過想完美，都可以再試下

1. 呢篇真係堅，難學難精，但慢慢練習下。教下你，點足見頂見底。極難，但試下畀啲心得你

2. 呢篇文星期三晚寫，睇錯日期，原來Facebook 未出業績，香港時間星期四朝早出。但唔會點影響我呢系列文。

呢篇成個系列精華所在，唔太深唔太長，但要好集中地睇

3. 今次呢篇（同下一篇），成個系列精華所在。特別係呢篇後半部，概念唔深，亦都唔長，但因為涉及好多數字日期嘢，都幾煩。我都小心將篇文由頭到尾睇多次，希望唔好錯，有錯之後改。我建議你等得閒或者可以集中精神先睇，開埋啲圖同個Excel嚟睇，唔得閒就唔使急。因為呢篇真係要集中專注力。

舊年兩次績，FB都插25%，但我點知第一棍後仲要跌，第二棍見底？

4. 上一篇（第三篇）講到，Facebook 過去3年嘅股價走勢。貼多次個圖畀你。又，卒之可以極速咁個圖度加字加線，大家有福了，以後啲圖會更清楚（其實一硌都識整，但怕煩）

5. 最值得係2022年嗰兩次業績，一樣，貼多次數畀你，Excel都有。特別留意股價圖中有兩棍。第一棍2022年2月，4Q21嘅業績，第二棍，2022年10月，3Q22嘅業績。業績入面講乜上篇解咗，唔重覆。只係睇返，兩棍都係一下插25%，但第一棍之後跌足半年，跌多50%。第二棍之後，股價就回升，升幾倍。真係完全兩回事喎。

6. 固然業績嗰下好似係「壞消息」（一下跌26%好難唔去咁諗），但我點知幾時飛入去？點解第一棍時要捱多50%？第二棍就真見底？有冇多啲嘢可以睇到？

同估值有啲關係，計下數

7. 上次我話都同「估值」有啲關係，呢度計下數。

8. 先睇第一棍，4Q21業績，2022年2月插落嚟之前。股價300蚊嘛，小學數學正比例計到，當時7600億市值左右。睇表，103億純利。即使當你保持到（結果不能），一年400億純利。19倍市盈率，講真好難話好貴，但亦唔算好抵（唔好忘記當時債息仲不停上）。況且，公司嗰次盈利低過預期，又調低埋之後嘅指引，預示咗盈利會跌，上面計嘅400億純利，照計太樂觀，好難做到（結果亦係做唔到）

9. 不過去到第二棍，舊年10月尾，3Q22嗰次業績。都係相當差架下，一季純利得返44億（全盛時期一季100億，果然中文傳媒講腰斬冇錯，冇咗一半）。問題係，當其時Facebook跌到90蚊，即係2300億市值。又計下數，一季44億純利，當一年做到176億，咁就13倍市盈率咋喎。如果你計T12（過去12個月），直頭係單位數。喂，龍頭科技股喎。

10. 另一個更簡單嘅計法：單季盈利，就跌咗一半。但股價，就300蚊跌到90蚊。咁即使計及個盈利跌咗，你個市盈率都仲係平咗好多。

別人恐懼時我貪婪，用在個股唔係咁易　—我點知22年2月嗰下未夠驚？

11. 睇落去之前，可能你已經有更多問題。但首先，別人恐懼時我貪婪，實行起上嚟當然極難（否則個個發達）。特別係個股。2月嗰次單日跌26%，夠恐懼啦，但你點知仲要跌多一半？又點知去到10月尾嗰次，單日再跌26%，就真係見底？大市都仲話可以睇VIX，但個股就再難啲（雖然個股都有VIX，或者你睇RSI都得嘅）

我點知市盈率20倍算貴，10倍算平？

12. 上面我話，都勉強可以睇估值。問題係，我點知點解去到10倍就叫平？點解20倍就貴？答案係：唔知的，冇得十分準確。

13. 但仲有一個更重要嘅問題：2月嗰棍，我就咁計出咗嘅數（即係上面我做嘅嘢），上面計到，19倍市盈率。講真，真係好難話「喪貴」。記住，我係嗰季嘅100億純利，再X4咁計。但結果後來盈利大倒退嘛，後來一季得返44億。我用100億X4，太進取。

當時市盈率以為唔貴，但盈利一路跌，結果好貴　—咁點知幾時盈利跌？

14. 另一個角度講：我「原本」19倍市盈率，因為盈利跌咗一半，其實「變咗」40倍先真。所以事後睇返，好似幾貴 – 但我事先點會知？

15. 同一道理，10月尾嗰棍，我用嗰季44億計，13倍市盈左右。結果 end up見到啲盈利大反彈（雖然未返到去史上最高），用44億計X 4 直頭保守。事後睇，當時嘅13倍根本冇13倍，仲要平啲，因為盈利大反彈—但我點知會大反彈？

16. 呢度你見到，就係但凡你講「市盈率」嘅問題：盈利會上會落，而股價一定睇預期嘛。出咗嘅盈利，只係畀你有個參考啫，將來走勢先重要

17. 所以，始終最關鍵嘅係：我點會知道2月嗰次後，啲盈利一路跌？我又點知道，10月嗰次後，啲盈利就反彈？

解決方法幾個（但不完美）

18. 要解決呢個問題，其實係……相當難。但都可以做到啲嘢嘅。首先你可以試下，睇預期嘅市盈卜率，Zacks之類都會有，就唔使只係T12。固然分析員有時會估錯，但都係有個譜，同埋會修正得幾快。

19. 另一個方法？你去睇Price to sales，上落就冇咁大的。

20. 當然在Facebook嘅情況，仲有一樣嘢：你留意，其實嗰兩次大棍插嘅業績，公司嘅收入都冇低過預期，只係盈利低過預期。好可能就係啲乜鬼元宇宙開支拖累，但總會有個譜。一般嚟講，收入OK開支大令到盈利受壓，總好過開支冇高過預期但收入低過預期搞到盈利受壓。

21. 當然，公司亦都有畀指引。而對於Facebook呢類公司嚟講，你個收入 keep到，開支要控制不太難。換個講法：舊年10月嗰棍，雖然個利潤得返之前一半。但既然公司收入大約都keep到 – 講真，之後幾季嘅盈利，會好過舊年第三季44億定差過44億？照計好似係好過嘅機會大吧

22. 最後，你會見到，雖然2月嗰次見到用戶數字下跌。但打後，都見到公司用戶數字冇特別低過預期。留到用戶，照計啲收入就會返嚟吧。

23. 好啦，呢篇文剩低嘅部份，就真係要你好專注。唔深，唔太長，但多數字同日期。

24. 不過以上呢啲講法，都仲係有啲虛。到底有冇方法睇到，咩位啲盈利同收入會反彈？收入同盈利嘅走勢，又同個股價咩關係？就如同我地之前睇國泰同封關，美股同債息咁睇。

到底有冇方法睇到，收入盈利走勢，同股價嘅關係？

25. 我地可以再試下其他方法，例如，睇一睇呢個表，同埋搞出嚟嘅呢兩個圖。

26. 呢兩個圖，應該一目了然。見到嘅係，無論睇收入定盈利，個按年增長，都係在2Q21時見咗頂（2021年7月尾公佈），一路放慢，然後個按年增長由升轉跌，但去到3Q22或4Q22時就收窄（2022年10月尾，或2023年2月頭公佈）

其實好簡單：股價21年9月見頂，收入增長亦係2Q21見頂

27. 然後你睇多次個股價圖，wow，股價正係2021年9月頭咁上下見頂，然後就係2022年10月尾見底。Fit晒！

28. 係咪偉大先！講咁多，就係舖排呢樣嘢。

同樣地，收入跌幅3Q22見底，股價就22年10月尾見底

29. 於是，你見到了：其實大約見到，係睇收入同盈利增長「轉勢」嘅位。個增幅開始放慢，就係股價見頂。增幅開始加返快（或者話跌幅開始減慢），就係見底之時。

30. 好似好美好，但呢度留意幾樣嘢。

31. 首先，記住，係睇個「趨勢」—而唔係當時出嘅按年變幅數字。亦即係話，數字靚冇用，如果見咗頂就股價會唔掂。同樣地，數字差唔緊要，只要見左底就得。例如你睇收入增長，3Q21同4Q21都仲係幾好，但已經冇2Q21咁快，所以股價都無力再上。同樣地，你可以話3Q22或4Q22嘅增長仲係好差（睇盈利直頭高位跌一半）—但已經見咗底。所以，重要嘅係趨勢，唔係數字本身

但仲有一個好重要嘅問題：我幾時知2Q21收入增長見頂？10月尾先知

32. 但仲有一個更重要嘅問題，打醒十二分精神了：呢度請你好小心咁諗下個時序—固然，而家我地事後見到，2Q21已經係增長最勁，去到3Q21放慢。問題係，2Q21時（2021年4-6月），我點會知？出得業績嚟都7月尾。唔止，就算到7月尾，我都只係知道2Q21嘅數之嘛，我唔會未卜先知，知道3Q21嘅數係增長放慢喎。我要2021年10月尾先知喎！

呢個真係一個好值得諗嘅問題。

33. 類似地，你睇「見底」嗰下仲麻煩，因為3Q22同4Q22嘅收入跌幅，差不多。（所以你見我上面話3Q22或者4Q22見到收窄）。咁我應該計邊個？呢個反而小問題　—你見跌幅差唔多一樣都當見咗底啦，同埋嗰時都已經跌到相當平。換言之，你可以當3Q22已經係「見底」

34. 但都解決唔到個問題：我地而家知道3Q22增長見底，4Q22叫做反彈啫，但事實上，我4Q22（舊年9-12月）時唔會知嘛。到我見到4Q22嘅數，都已經2023年2月啦。

35. 亦即係最重要嘅問題。今日我地當然見到2Q21嘅數已係最美好，3Q21就放慢，股價就係2021年9月頭見頂。但我地係要去到2021年10月尾先見到3Q21嘅數，先肯定係放慢嘛

36. 同樣地，我地而家睇到3Q22嘅數已經最壞，4Q22冇再更壞，股價就係2022年11月頭見底。但我地係要去到2023年2月頭，先見到4Q22嘅數字，肯定個數冇再更壞嘛。

37. 見到問題了，「增長見頂」，你要到再下一季先確認到，到出得業績又多兩個月。反之亦然。咁點解決？

38. 你會點答？

呢個問題點解決？答案係，唔使做到完美

39. 畀個簡單答案你：就係上面呢個圖。即係點？其實，你在2021年10月尾，出埋3Q21嘅數，肯定見到放慢，然後先沽，都仲未係太遲。同樣地，你在2023年2月頭，出埋4Q22嘅數，肯定見到止咗血，先去追，都仲未係太遲。

40. 就唔好真係妄想，摸到最高沽，撈到最低買。事實上，2021年10月尾沽，2023年2月頭買，都相當不錯了

下篇預告：不過想完美，都可以再試下

41. 但，想貪心啲，得唔得？因為重覆一次，股價2021年9月頭見頂，2022年11月頭見底。正係放慢/加快嘅季度，只係未出業績未見到之嘛。有冇可能預先估到？

42. 當然冇可能100%得，但都可以試下嘅。下篇解。

43. 再講一次，希望大家覺得呢篇有用。畀咗呢個工具你，你自己可以實驗同思考下。