股價Dynamics （三）：補充返點解講大市反而冇講盈利，因為好少一件事在一夜間大大打擊成個指數盈利。今篇講Facebook，舊年兩次業績後都跌26%，但一次之後再跌50%，另一次就見底。我點去分？至少事後試下睇證據 (Patreon)

固然dynamics只係事後解，但人性嘅貪婪同恐懼鐘擺，就不停上演

畀你自己做功課：美匯指數同美股嘅關係

美匯美債同股市嘅「關係」，有理由支持，所以值得睇

留意，只係講美債美匯，但冇講盈利對美股影響，點解？

因為，好少單一事件，會單日重創成個指數嘅盈利

正題：Facebook，畀埋個Excel你睇，畀晒之前嘅業績你

先睇股價圖，Facebook 2020同2021年，大約都跟大市

去到2022年，就戲肉。兩次業績，都跌26%

你睇圖，見到2月嗰棍，好似長過10月嗰棍好多　—　係假象

「那些年」害人不淺。請用log scale

360蚊跌到90蚊，而家又330蚊。講真，咪又係嗰間公司。點捉？

舊年2月業績跌26%，標誌大瀉開始。但10月又跌26%，就見底。點分？

300蚊跌到200蚊，你飛入去，點知跌到90蚊—然後而家又300蚊

咁我點知，第一棍26%後再要跌多一半，但第二棍26%後就見底？

固然dynamics只係事後解，但人性嘅貪婪同恐懼鐘擺，就不停上演

1. 之前兩篇文都講咗點樣「解釋」返股價同盈利/事件嘅關係。固然係事後解，但鑑古知今，況且好多人連事後解都解錯。況且，呢啲fear and greed，boom and bust，恐懼同貪婪嘅鐘擺，都真係不停咁上演。畢竟估值好睇情緒，而人嘅情緒就係鐘擺。

2. 第一篇用咗國泰做例子，睇下社運封關開關政府打救同股價嘅關係。第二篇同你講，要留意埋大市嘅走勢，亦都順手睇埋美股同10年債息嘅關係。

畀你自己做功課：美匯指數同美股嘅關係

3. 上篇原本話睇埋美股同美匯指數（美金）嘅關係，結果因為太長，都冇寫，費事再重覆。其實個Dynamics同10年債息大同小異。不如留畀你自己做功課，睇返美股走勢同美匯指數嘅關係

4. 極速答案：粗略地講，美匯指數同10年美債債息走勢差不多，但唔係真係完全一致。而美匯指數同10年債息，同美股似乎有一定反向關係，你見舊年美匯同美債債息見頂，之後股市就反彈。但美匯好似仲早咗一個月。

5. 點解？都好多人聽過。美匯指數同美債唔多唔少都係「避險」，所以會同美股相反關係。另外，亦因為美債債息點都影響股市估值，簡單嚟講就係「買美債都5厘息咁我點會貴一貴追股票？」

美匯美債同股市嘅「關係」，有理由支持，所以值得睇

6. 強調返，呢啲「關係」，背後有一定嘅理由支持，就係比較好嘅「關係」。有時你見有啲嘢好似有「關係」，但唔係好解到原因嘅，就冇咁實用了。例如你睇股票A-Z，分開上下兩半，可能都同股價表現有啲關係。但呢啲就唔值得你去研究

留意，只係講美債美匯，但冇講盈利對美股影響，點解？

7. 仲有留意嘅係，上篇文我提到「市值—市盈率Ｘ盈利」，寫國泰篇文（第一篇）都有講盈利（開關封關社運呢啲就等於「盈利」了），但反而寫標普指數嗰篇（第二篇）我提都冇提「盈利」

8. 原因呢？因為，其實冇乜真係好單一嘅事件會影響「成個指數」嘅盈利。單一事件影響當然會有，但唔會好似「封關」對國泰咁大影響，一件事將你嘅盈利由正正常常打到蝕到趴

因為，好少單一事件，會單日重創成個指數嘅盈利

9. 甚至你話加息，衰退，對「成個大市」嘅影響，都唔會係好似「封關」對國泰咁勁。因為你見到，唔少公司在衰退或加息下，盈利唔會太大影響，甚至仲有得升，咁會補足返一啲盈利大倒退嘅公司。所以你見標普指數啲盈利，唔會好似個別公司咁大波動，亦同樣地，你見到標普指數唔會好似個別股票咁大波動。都話Facebook都會一日跌25%（巨企喎），但標普指數好似史上都冇見過。

10. 況且，加息，衰退之類，都係一個好漫長嘅過程。再重手都不能一下加10厘息，經濟再衰退都係要個時間。

11. 咁你話，「金融海嘯呢？」「世紀疫情呢？」—咁你見到，去到呢啲事件，就似乎真係可以「一件事」打擊成個標普指數嘅盈利。所以，你見嗰啲日子，咪真係見到指數幾日之間大瀉　—　但呢啲真係十年先見一次嘅。

正題：Facebook，畀埋個Excel你睇，畀晒之前嘅業績你

12. 補充完上篇文。好啦，到個別股票，就真係比較睇盈利。呢度我畀埋個Excel你，你可以拎去玩其他股票。啲圖都全部在個Excel．至於盈利數字，你上Macrotrends都搵到。

13. 寫呢篇文時，星期二黃昏，Facebook 未出業績（香港時間星期三朝早會見到）。就先講Facebook，因為呢幾年股價波動好大

14. 幫你搵晒之前嘅業績媒體報導（4Q20，1Q21．2Q21，3Q21，4Q21，1Q22，2Q22，3Q22，4Q22，1Q23，2Q23），對你幾咁好。特別留意埋，佢有寫埋股價反應。

15. 另外，一般都係季結後一個月左右出業績。即係2月頭，4月尾，7月尾，10月尾。

16. 唔止，幫你整埋個表了。Excel入面都有，陣間會再有其他圖。

先睇股價圖，Facebook 2020同2021年，大約都跟大市

17. 嚟啦喎，睇股價圖。圖嘅左邊你見唔到，但2020年當然係跟大市，2月大插，然後3月尾見底，無限QE嘛。之後一路升，2021年9月見頂。

18. 呢一轉都真係跟大市，不用討論太多。不過你真係要睇嘅，期內三次業績（4Q20，1Q21．2Q21）都好過預期。頭兩次出完業績升，7月尾2Q21嗰次出完就跌，話「展望保守」咁話，但股價之後都仲有得上。呢度好大程度都仲係同大市差不多，不深究

19. 睇多次個股價圖，2021年9月見頂後，一路跌。但3Q21嗰次業績（10月尾）股價反應都正面。

去到2022年，就戲肉。兩次業績，都跌26%

20. 去到2022年，戲肉嚟啦喎，見到2月插咗支好大棍嘅。記住呢個日子，幾日由300蚊跌到200蚊，冇咗三成。

21. 然後？去到10月又插咗支好大棍嘅。記住埋呢個日子。

22. 經過呢兩次，你見股價由350蚊跌到90蚊，死未。

你睇圖，見到2月嗰棍，好似長過10月嗰棍好多　—　係假象！

23. 仲有一樣嘢值得你留意：2022年10月嗰棍，望落好似唔係好大，冇2月嗰棍咁誇張。但你睇真啲，一樣係兩個星期跌咗30%！130跌到去90蚊。

24. 呢度出現咗一個問題：你地睇圖，就會以為2月嗰次跌得多好多，其實唔係。點解有咁嘅錯覺？好簡單，因為嗰時係300跌落200蚊，跌三成係100蚊。去到10月130跌到90蚊，跌三成係40蚊。咁你在個圖睇，咪好似第二棍係第一棍一半都冇。

「那些年」害人不淺。請用log scale

25. 點避免呢啲錯覺？登登！log scale！中學老師冇教啦。「那些年」套戲害人不淺。用咗log scale，即時睇到，兩棍嘅長度一樣。當中嘅數學不詳解，但你見到右手邊個scale，100到200，同200到400，係一樣咁長嘅，因為都係升100%，但在平時嘅linear graph，200到400，就會係100到200 double 咁長

26. Log scale股價圖唔係好深，但的確平時唔係常用。畀個rule of thumb你：長期嘅，去得5年以上，就用log scale．又或者，如果股價大上大落嘅（好似上面嘅例子），就用

27. 無論如何，去到舊年11月頭就見底，然後就海濶天空，升極都有。舊年11月頭90蚊，而家320。而今年年頭都只係120蚊

360蚊跌到90蚊，而家又330蚊。講真，咪又係嗰間公司。點捉？

28. 講真，咪又係嗰間公司。所以你見好多都係由情緒推動（而估值亦好大部份由情緒推動）。唔信？你可以睇下星期三朝早，公司出嘅業績，睇下收入幾多，純利幾多

29. 無論如何，貼多次呢個圖。關鍵就係睇下，2022年嘅事。特別係嗰兩棍。重覆一次，第一棍係2月，4Q21業績。第二棍係10月，3Q22業績。兩次都係出完就跌兩成幾。有趣地，第一次係標誌咗股價瀉足大半年，第二次就見到見咗底，大反彈。固然事後先睇到，但而家睇返，有冇乜嘢我地可以學習到，幫到將來決定（或者幫到將來「不決定」，例如唔好低位打靶）

舊年2月業績跌26%，標誌大瀉開始。但10月又跌26%，就見底。點分？

30. 首先睇多次4Q21業績，鍾意嘅可以睇埋中文。見到盈利低過預期啦（但留意收入高過預期），用戶數量低過預期啦，然後畀嘅收入指引亦都低過預期啦。你睇明報見到講埋用戶數字史上第一次跌啦，蘋果iOS私隱政策打支啦，TikTok挑戰啦，全部都好負面。難怪一日跌咗26%，好似係歷史單日蒸發最多市值嘅股票（要做到呢樣嘢，除咗要單日跌得多，亦要個市值夠大）。

31. 但當然你問我，亦都同個估值有關，恐懼與貪婪嘛，去到嗰啲位，一有閃失，股價就可以跌得好勁。雖然後往事後先知，但你的確可以睇下嗰啲位嘅估值。陣間我再畀個例子你

32. 最難搞嘅係乜？最難搞嘅係，你信埃汾，覺得多數人就多數係錯，你唔信啲網友話「冇人用Facebook/IG」，你信小朱，諗住「別人恐懼時我貪婪」—單日跌　26%喎，應該史上最大單日跌幅　—　飛入去仲冇死！

33. 咁你見到了，呢棍300蚊跌到200嘛。你200蚊飛入去，跌到90蚊先見底喎，即係輸多超過一半。

34. 更令人吹脹嘅係：200蚊買，你坐到而家，就超過50%利潤了！一年半之嘛，相當不錯。

300蚊跌到200蚊，你飛入去，點知跌到90蚊—然後而家又300蚊

35. 啟示係乜？都只能答你，睇長線啲，股價反映公司實力，但都要啲時間，況且公司嘅「實力」都要啲時間反映出嚟。仲有，你嗰啲咩「止蝕」嘅，都係嘥氣，永世搵唔到大錢。首先好多人講「10%止蝕」，咁但一棍插26%，點止？況且，都話跌完26%再跌多一半，中途你止咗好多次蝕了，冇乜可能坐得到佢彈返上300蚊

36. 「但我就可以啦」，我早早已經買，舊年咁震都冇沽過。

37. 平常心，股價係可以好波動咁。咁大間咁屈機嘅公司，都可以350蚊跌到90蚊又上返330蚊，兩年間嘅事咋。好多時唔係公司嘅問題，係投資者嘅問題

38. 好啦，然後我地再fast forward去到一年前，即係舊年嘅10月尾，3Q22業績．鍾意嘅亦可以睇埋中文。

39. 一樣，盡是見到負面嘢，股價一樣係跌26%。你睇啲驚嚇啲嘅標題，仲會見到純利跌一半，腰斬，元宇宙燒錢啦。見到公司盈利低過預期，連續兩季收入按年倒退（但收入數字其實高過預期，用戶數字都係），預告之後嗰季都會係。留意去到呢個位，股價已經由380蚊跌到90蚊，四份一都冇。

咁我點知，第一棍26%後再要跌多一半，但第二棍26%後就見底？

40. 好啦，100億嘅問題：點解同樣係「業績差」，低過預期，同樣係一完就大瀉26%。點解第一次跌完都仲可以跌多50%，但第二次就結果見到見底？我點去捉？

41. 呢個問題，實在太難答。但主要，都真係估值。另外，就係睇下佢啲盈利會反彈，定係繼續倒退。偏偏呢兩者都係好難掌握，當然了，易嘅個個發達。事後睇到已經幾難得，下篇就試下事後睇。

—