股價盈利Dynamics（二）—睇埋大市，美股又幾時見頂幾時見底？同債息嘅關係呢？ (Patreon)

與其話「睇事件」，不如話「睇盈利」。只係國泰嘅盈利同「事件」關係太密切

呢個系列會用Facebook Netflix做例，點解？

睇返Facebook Netflix三年股價圖。幾時見頂幾時見底？咩位大上大落？

順手講埋3年之前嘅事情

你睇股價Dynamics，仲要睇埋宏觀因素，最好就消除咗佢

好似Time Series，失業率都去調整個季節性咁

點解上篇講國泰又冇提？因為國泰「自己」因素強過「宏觀」好多

Dynamics熱身：睇埋美股大市，幾時見頂幾時見底？發生乜事？

見到同債息關係好大，咁債息又幾時見頂幾時見底？發生乜事？

跟進問題一：點解2020年2021年債息升股市升，但2022年開始掉轉？

跟進問題二：咁債息又由乜推動？

1. 介紹返，美股業績期話咁快又去到尾聲。今個星期會有一堆科企，所以趁而家完成埋呢個「股價dynamics」嘅短系列。之後會仲寫返「甚麼是投資」，同埋寫下近排好多人問嘅「債券投資」，以及「保費融資」等等。

2. 講返，上篇用咗國泰做例子，相信大家會明白我想做乜。無非睇下股價同一啲「事件」嘅關係，最重要係畀你睇下點「炒預期」。

與其話「睇事件」，不如話「睇盈利」。只係國泰嘅盈利同「事件」關係太密切

3. 但其實與其話係「睇事件」，不如話係「睇盈利」（同收入）。國泰嘅情況，睇社運睇開關封關就知，因為對收入同盈利嘅影響太過明顯。一冇得飛，一定輸到趴。你拎啲餐飲股酒店股收租股，都會類似咁上下。

4. 但講科企，就冇咁簡單。做全世界生意，你個別地方嘅事近乎冇影響，唔存在話「以色列打仗冇人敢落廣告大大影響Facebook Google之類」。咁你話去到疫情之類，好似有影響，但個影響唔係咁clear cut—國泰冇得飛就實死，但科企部份可能甚至受惠。

呢個系列會用Facebook Netflix做例，點解？

5. 呢個系列我會用兩間公司做例，Facebook同Netflix．點解揀呢兩隻？因為夠chok，呢幾年上落好大。當然Nvidia都係，但Nvidia多咗「炒AI」呢樣嘢，睇個dynamics 又另一回事。

睇返Facebook Netflix三年股價圖。幾時見頂幾時見底？咩位大上大落？

6. 以上係Facebook同Netflix三年股價圖，上面係Facebook，下面係Netflix，我地就好似之前睇國泰咁，睇下股價幾時見頂？幾時見底？仲有，你明顯見到圖入面有幾個位大升大跌，發生乜事？

順手講埋3年之前嘅事情

7. 點解揀3年（即係由2020年10月尾開始），因為唔想撈埋疫情前啲嘢講得太長。順手提埋你呢兩張圖「左手外邊」你睇唔到嘅嘢，即係2020年嘅事。2020年發生嘅事好簡單，年初疫情席捲全球，全球股市狂跌，2月至3月一個月跌咗三成，以上兩隻當然都係大跌。但去到3月尾聯儲局出「無限QE」，狂印錢，股市就止瀉，好快美股就收復失地，甚至升穿疫情嘅高位，創歷史新高。呢啲就係2020年嘅事。我地呢度討論打後發生嘅嘢。

8. 呢度就要插播多樣嘢：宏觀因素。所謂宏觀因素唔一定係指咩「經濟好唔好」，「油價高唔高」「通脹高唔高」之類。相信大家都有發現，最主導股市嘅，往往就係債息同美匯指數（所謂「美金」強弱）。

你睇股價Dynamics，仲要睇埋宏觀因素，最好就消除咗佢

9. 所以畀個壞消息你：你睇股價dynamics時，仲要睇埋呢啲嘢。用個好簡單嘅講法：金融海嘯股災時，我任你間公司點掂，即使你啲生意近乎唔受影響，點叻都好，一樣跌到九彩（有冇咁嘅公司？當然有。例如當年嘅中移動。美國金融海融會唔會令中國人冇錢交電話費？）。同樣地，無限QE狂印錢下，好多垃圾股票都照升（例如堆妖股meme股，GameStop之類），雖然最後都會畀地心吸力拉返落嚟。地心吸力係乜？主要都係收入同盈利。

10. 亦即係話，你去睇啲股票嘅郁動時，理論上仲要「拆走」大市嗰部份。點做？都唔係太難做，雖然我唔打算做，亦唔打算深入解。但，用最簡單嘅語言講，例如你搜集啲同時間有關嘅數據，術語叫做Time Series。咁有部份明顯係有季節性，例如係失業率，或者消費數字。你係可以用啲數學嘅方法，去除咗個季節性嘅影響。點做？不太難，但呢度唔解，自己搵本Econometrics 或Time Series 101，唔會太難。而你平時見到新聞報出嚟嘅「失業率」，一般都係經咗季節調整，所以唔存在乜鬼「大學生畢業投入勞動市場嘅月份推高失業率」（但如果我冇記錯，啲零售銷售數字就好似冇經季節調整，所以你最好睇按年增長，唔好睇金額）

好似Time Series，失業率都去調整個季節性咁

11. 在股票嘅情況？其實都未必太難做。Instead of你去做一個每日股價升跌嘅表，你可以做一個「每日相對於指數升跌」嘅表　—　實情就係每日將你隻股票嘅回報，減走大市嘅回報。例如隻股票昨日升2%，今日升3%；但大市昨日升4%，今手升2%，咁你就去plot 相對表現：-2%，1%，類似咁。同樣地，你亦可以用「relative price」，例如計下一股 Netflix 除標普指數嘅點數咁。

12. 唔想去到咁technical，但總之，你隻股票升跌，除咗係佢自己嘅因素，亦有大市嘅因素，呢個好明顯啦。

點解上篇講國泰又冇提？因為國泰「自己」因素強過「宏觀」好多

13. 不過好在，某啲股票在某啲時刻呢，個「自己」嘅因素，明顯大過「大市」因素。例如乜？例如國泰嘅情況！

14. 頭先講咗，2020年，美股港股都係3月見底。但你見到國泰就真係玩到7月尾先見底，6月頭嘅政府救助方案後半個月，仲要跌多30%。咁呢啲就見到，係公司本身嘅嘢了。

15. 同樣地，上面你見到Facebook Netflix嘅圖，明顯見到有幾棍大上大落，一日升跌十幾二十%，咁標指納指就唔會有一日升跌十幾二十%，呢啲就見到係「公司」本身嘅嘢。

16. 當然了，呢一篇最後都講一講，國泰嗰種dynamics嘅分析，一樣可以用於講「大市」。呢篇仲有少少篇幅，就同你講埋「大市」，之後就正式講Facebook Netflix

Dynamics熱身：睇埋美股大市，幾時見頂幾時見底？

17. 上面係標普指數3年圖。個形態都幾易睇，由2020年3月（圖嘅左手外面，記住張圖係2020年10月開始）開始，一路去到2021年全年，基本上都係好穩定嘅升勢。2022年呢？年頭跌到年尾，但你見到2月，7月，10月時有啲反彈。你可以話，2022年嘅反彈，一路延續到今年上半年。到今年下半年，就回調。

18. 以上呢段嘢，最好你save起佢，連埋上面個圖都得

19. 因為之後，就會拍埋債息解。其實最理想係試下兩個圖放埋一齊，但冇咁嘅資源。做金融工作或者做新聞嘅讀者，公司有Bloomberg Refintiv FactSet之類，可以試玩下

見到同債息關係好大，咁債息又幾時見頂幾時見底？發生乜事？

20. 呢一個，就係10年美債債息嘅圖。2021年都係由頭升到尾，但幅度不大。咁比較返，美股2021年都係由頭升到尾，你可以話因為債息仲係好低水平，升幅都不大，冇乜影響（而且美股嘅估值亦未貴）

21. 但去到2022年就比較有意思。2022年美債債息走勢，見到上半年一路升　—　然後你睇返，美股就係上半年一路跌（除咗2月有少少反彈）—有趣地見到債息7月時回落一排，美股又係反彈一排。然後債息再升過，美股亦再跌過。然後大家都知，我成日提，舊年10月11月左右，債息見頂（當然嗰時你未必知，但至少事後見到），美股就見底，由嗰時一路升到今年年中。但打後，最近今年下半年，債息越升越有，破埋之前頂位，美股亦都高位回落。

跟進問題一：點解2020年2021年債息升股市升，但2022年開始掉轉？

22. 好啦，兩個啟示。首先，應該好多人都聽過，我都BUY嘅一樣嘢：高債息，就利股票不利，原因好多，亦唔止係「融資成本」咁表面，更重要係打擊咗估值。買美債都收5厘6厘息，啲友買股票嘅意慾係應該低好多。問題嚟啦喎，你會見到：但2021年唔係咁喎，債息升股票都狂升　—實情2020年下半年都係咁，債息狂升（當時10年美債債息壓到0.5厘不夠），但美股照升。你心諗：咪矛盾囉。點解一時債息升股市跌，一時又債息升股市升。

23. 答案：係！好多呢啲「反向/正向關係」，並不是任何時間都適用，所以唔好太鑽牛角尖。特別想話你知，「債息vs股市」嘅反向關係，已經係算係「好強」，但一樣都會出現2020年中至到2021年尾，債息又升股票又升嘅情況。但至少事後我地都可以解：2020年中至2021年尾呢浸，債息實在太低了。換個講法：0.5厘債息，真係唔買股票就笨。但我好難答到你，點解去到2021年尾呢個位，就債息「太高」，又返返去「債息升股市跌」。股票唔係自然科學，冇得咁樣永遠定律，否則個個發達

跟進問題二：咁債息又由乜推動？

24. 問題二：如果我地認同債息推動股市，或者至少係同步咁郁，咁到底，係乜推動個債息？呢個問題之前討論過多次，不重覆。但小心啲，唔只係「加息」—其實係「加息嘅預期」。好簡單，你見2022年3月先第一次加息，但之前啲債息都狂升。同樣地，做乜舊年10月債息短暫見頂回返咁多？唔多唔少係睇到開始停加息（後來又發現加極都有，後話，所以債息又升過）

25. 煩？仲未完。咁呢啲「加息的預期」，又邊度走出嚟？就大約都係同「通脹嘅預期」有關。換句話講，大約係啲人聞到通脹會升溫，就會覺得就快加息，債息就會上，股票就落。成個過程，係比啲數字「真實出現」早好多，再一次示範「炒預期」嘅機制

26. （最後仲有一個因素：聯儲局本身嘅買債（亦即係「印錢」），呢期已經退出咗，難怪債息係咁升）

27. 係咪好複雜呢？是的。但認真研究，就係咁。唔想咁煩嘅，買ETF吧，冇問題的。切忌一知半解又以為自己好識，然後成日抱怨覺得「點解唔係咁」，或者太有信心「一定會係咁」

28. 以上講美股大市，同埋美債債息嘅關係，你可以當係好似我講國泰同社運開關封關咁，熱多次身。你亦可以理解做，下篇我地講Facebook Netflix時，你都不要忘記佢地嘅股價，亦都受「大市」同「債息」影響　—　雖然，都見到某啲位，明顯係「公司」自己嘅因素推郁股價

Patreon舊文目錄，可以睇返晒以前所有文。