股價盈利dynamics（一）：先用國泰做引子。幾時見頂？幾時見底？當時發生乜事？ (Patreon)

到底股市點運作？股價同盈利之間嘅dynamics係點？

留意唔係講一兩日，一兩日就冇乜意思。頂多睇業績係咪合預期

係咪業績增長好勁就升上去？明顯唔係。咁係咪之前升定？幾耐之前？

難道國泰剛剛公佈啲客量按年升幾倍，股價會大升？當然唔會

點解國泰業績勁蝕都升？點解Nvidia盈利增長咁勁都跌？

唔使預測，解釋到歷史已經好勁。

國泰股價5年圖，股價幾時見頂？嗰時發生乜事？

好啦，咁股價幾時見底？2020年7月尾。發生乜事？唔知

政府6月頭救國泰，股價插多個半月，跌多三成。肯定畀人話「冇用」

20年國泰中期業績，蝕到趴，唔知幾時有得飛。壞消息，但股價一路升。

保持樂觀，我地經歷咗世紀疫情，總會復常，股市總會好返

其實係講科技股，但拎國泰做引子，因為易明。

五大科企盈利按年升34%—咁即係貴得有道理啦，難怪今年強勢

但，銀行股盈利一樣升三成，通通做到，但股價又唔多得。點解？唔知。

到底股市點運作？股價同盈利之間嘅dynamics係點？

1. 遲咗出文，因為搞緊呢系列嘅大製作，要用唔少數。講乜？都係美股業績，但我地睇下，到底業績同股價嘅關係。講得簡單啲，即係睇下「股市點運作」，股價同盈利之間嘅dynamics

留意唔係講一兩日，一兩日就冇乜意思。頂多睇業績係咪合預期

2. 留意唔止係講一兩日，如果係一兩日，好大程度上就係睇「合唔合預期」—留意，係睇「合唔合預期」，唔係「好唔好」。往往你都見到有啲公司一出業績插一兩成（Facebook Netflix舊年都試過），亦有時見到一日升一兩成（Nvidia之前試過，Netflix早兩日亦試過），往往都係同「預期」有關。

係咪業績增長好勁就升上去？明顯唔係。咁係咪之前升定？幾耐之前？

3. 但，睇長少少呢？幾年之間，公司業績當然有起落，股價亦都有起落。但兩者嘅關係，到底係點？係咪要見到個業績，好勁增長，股價先飛上去？定係，既然上面話係「預期」，咁即係可能唔係見到業績，好勁增長，股價先飛上去，而係「之前」預期佢好勁增長，股價應該已經升咗先？似乎係，炒預期嘛。咁幾耐之前升？

4. 你發現，同我地討論「股市幾時見底？」，有啲相似。就係舊年呢個時間左右，但明明而家仲加緊息。

難道國泰剛剛公佈啲客量按年升幾倍，股價會大升？當然唔會

5. 「見光死」之類，大家都會經歷過，亦都知道唔係話出個業績盈利升幾倍，股價就會升。舉例，難道你見國泰啲客量按年增長幾倍，股價就會飛上去？唔會的。但點解唔會？你可能都識答：鬼唔知咩。正是，舊年低基數嘛，況且你上Facebook上IG一早見到啲人去日本，點會等佢公佈先知？

6. 一宣佈「開關」，你已經預計到啲人個個衝出去啦，邊使等佢地真係去機場？又實情，你都唔使等宣佈開關，之前你都可以估到，就快會宣佈開關。

點解國泰業績勁蝕都升？點解Nvidia盈利增長咁勁都跌？

7. 呢類，十分完美示範咗「股價炒預期」嘅大理念。請細心思考下，兼且活學活甪。咁你就唔會去問，點解業績輸錢股價都升，點解而家啲人明明飛返晒反而國泰股價唔升。點解Nvidia啲數咁勁股價反而跌，點解開關香港地產股反而跌，點解舊年明明話內房危機但中海外688升咁多，點解舊年冇遊客又冇飛機但太古19升咁多。全部都係咁原因。

唔使預測，解釋到歷史已經好勁。

8. FYI，睇圖，國泰股價5年圖。非常非常重要。我唔使你預測，你可以講得返歷史，已經勁過好多人。睇落去之前，你可以自己解釋下，係乜造成啲股價上落。事後解，都未必人人解到

國泰股價5年圖，股價幾時見頂？嗰時發生乜事？

9. 首先睇，股價幾時見頂然後跌？你見2019年中已經開始跌。事後你會見到，業績在2019年下半年就大走樣。原因就當然同社運有關。但留意，股價2019年中已經跌，根本唔使等到2020年3月出返2019年業績先跌。因為2019年中你見到社運嘅情況，都知國泰下半年嘅數實好難睇。

10. 然後你見2020年上半年，再跌咗一浸勁嘅　—　當然就係因為世紀疫情。一樣，你唔使等8月出中期業績先知。一話封關你已經知一定狂蝕，甚至係爆疫情你已經估到啲飛機會停頓。

好啦，咁股價幾時見底？2020年7月尾。發生乜事？唔知

11. 好啦，股價幾時見底？睇圖睇到，2020年7月尾左右。嗰時發生乜事？基本上就係政府救。

12. 不過呢度你可以睇到幾樣嘢。首先，去到而家，我相信多數人都會贊成最初政府救國泰，唔救應該真係執笠（所以要救），事實亦都冇倒晒納稅人嘅錢落海。優先股息有拖冇欠，已經還返晒（上次講新世界永續債有提過，永續債都有類似安排，啲息可以唔畀，而不構成違約。只不過係要一路累積上去，而且你未找清呢啲數不能派普通股嘅股息，優先股嘅玩法亦差不多）。然後，國泰亦會贖返啲優先股。

13. 不過你諗下，當其時嘅輿論，又係咪咁講？我記得，雖然當時國泰形象相當差，但都真係多數人支持政府應該救嘅。但，不幸地少數嘅人可以大聲過多數，你見當時一樣好多人質疑「浪費納稅人金錢」，「有排都未飛得返」，「杯水車薪」　—　所以，網友啲意見，都係睇少啲。

政府6月頭救國泰，股價插多個半月，跌多三成。肯定畀人話「冇用」

14. 第二，睇圖。政府個救助方案，2020年 6月10號出嚟。但你見股價仲要插多三成咁濟，去到7月尾先見底。點解？「我都唔知」。但當其時你親歷其中，會聽到乜？「市場反應負面」，「證明個救助方案冇用」，「越救越跌」，「一路都飛唔返係咁泵水都冇用」。留意，都真係插多個半月先見底，我估你買咗國泰，都會同意呢啲講法

15. 所以你見到，真係唔好太過理會短期股價波動，根本冇得解。冇錯，個半月都只係短期。但你見我地而家事後睇，就大約講到成個故事。如果你日日睇住短期股價，然後自己夾硬解或聽人解，就會失晒焦。

20年國泰中期業績，蝕到趴，唔知幾時有得飛。壞消息，但股價一路升。

16. 第三，國泰2020年8月出中期業績，當然係蝕到趴。但你見股價之後都繼續上。原因？好簡單，鬼唔知會蝕到趴咩。況且，3月國泰出2019全年業績時，已經順手出埋2020年中期盈警啦（其實嗰時先剛宣佈封關，但，都唔使公司講，你估都估到實盈警。冇得飛梗係勁輸錢，你估真係賣飛機餐賣餐車幫補到收入咩）。咁所以，你唔使奇怪，點解到8月出完個「咁差嘅業績」，仲要係「都唔知幾時先有得飛」（結果等多兩年），但股價都仲一路升。

17. 當然仲有，保持樂觀，因為樂觀者必勝。悲觀者一定被淘汰，而懶清醒嘅所謂「智者」「淡友」必然冇發達，因為人類文明係進步嘅，股市一般係長升嘅。長淡係必輸嘅，渣現金冇乜可能跑得贏股市。

保持樂觀，我地經歷咗世紀疫情，總會復常，股市總會好返

18. 用「世紀疫情」去形容，的確冇誇張。你睇經濟活動停頓嘅程度，全部冇得飛，史上都冇乜見過。我地睇歷史書時，會奇怪以前啲人點捱過去。但五十年後一百年後，之後幾代嘅人，一樣覺得好神奇，「嘩佢地嗰時點忍受點頂得過架呢」—但，咪又係咁。

19. 你嗰刻會覺得，唔知幾時先有得飛，唔知幾時先復常，經濟唔知衰幾耐，股市幾時先好返。但明明就係總會有得飛返，總會復常，經濟總會好返　—　問題只係股市升返前，你有冇低位買，有冇stay invested，定係「壞消息」所以沽晒啲股票　—　事實上，美股甚至2020年3月已經見底，2020年中已經升穿疫情嘅新高

20. 所以，唔好再輕信乜嘢「好消息」「壞消息」。你可以判斷下，到底2020年政府救國泰嗰下嘢，係叫好消息定壞消息？似乎係好消息，但股價要跌多個半月先見底，插多三成。然後8月個業績蝕到趴，擺明係「壞消息」。但之後股價一路升。

其實係講科技股，但拎國泰做引子，因為易明。

21. 好啦，其實呢篇只係引子，我係想講美股科技股嘅。但做乜講國泰先？因為首先大家都清楚。二來，比較簡單，就真係只係睇「宏觀因素」—甚至我唔係同你講經濟好唔好之類。就只係社運，封關，政府救，開關之類嘅嘢。而對航空公司嚟講，實在太簡單了　—　封晒關冇得飛，就必然勁輸錢。

22. 但，去到其他公司嘅情況，就冇咁明顯了。

五大科企盈利按年升34%—咁即係貴得有道理啦，難怪今年強勢

23. 上次貼過呢個圖。固然只係「預測」，但唔好咁低質，唔好一句「分析員股嘅嘢都好信？」—事實上就係估得幾準，一般唔會爭太遠，事實今季暫時都有七成幾業績好過預期（但其實一向都係有近八成，今季暫時未算特別多好過預期，可以話啲分析員係特登估低的）

24. 好啦，固然你見到，銀行同五大科企增長最強。但係咪代表業績前我飛入去就實掂呀？當然唔係。如果你仲係咁諗嘅，請由頭睇多次今日篇文。咪講咗，係睇合唔合預期咯！

25. 事實上你見到，成堆銀行股嘅業績，都做到分析員嘅預期，差不多全部都好過預期，但近期股價又係咪特別勁呢？又唔係。

26. 銀行股盈利增長強，你會估到係因為加息對淨息差有利。咁但科企呢？點解咁高增長？係咪因為舊年基數低？就係我地下篇文會解嘅嘢。我就會好似睇國泰咁，睇返啲科企過去幾年嘅股價走勢。不過睇國泰我齋同你講封關開關政府救就得，睇科企就要用多好多數字　—　因為封關對國泰肯定大大鑊，但你根本講唔出對科企係咪差（似乎對某啲公司好添）。

27. 最後一講，如果五大科企真係做到34%嘅增長—咁你可以諗下，係咪似乎「貴得有道理」？今年股價升咁多，又好似十分合理，唔係某啲人所講嘅泡沫？又或者，都係要睇返係咪因為舊年低基數。正如頭先講嘅例子，國泰宣佈啲客量升幾倍，股價係唔會有反應的。一來周街都知，二來舊年低基數。

但，銀行股盈利一樣升三成，通通做到，但股價又唔多得。點解？唔知。

28. 當然了，你會問，「銀行盈利夠好，但又唔見銀行股咁強」。原因？我都唔知。當然「事後」可以搵到理由的，例如可以講「擔心之後壞帳」，「擔心就快減息不利息差」，但我唔多信服，寧願答你「唔知」

Patreon舊文目錄，可以睇返晒以前所有文。