［股息再投資］50年買美股，有股息再投資就150倍，冇就得50倍。見到分別冇？但實際上執行當然有難處，同你解下。另外，我其中一個倉一年都收8萬蚊息，唔少錢了。而留意，石油黃金，從來唔會派息，將來都唔會。但亦留意，我冇話過唔派息嘅唔係投資 (Patreon)

50年前買標普指數，100蚊變15000蚊。但明明指數只係升50倍！

重點係：股息再投資！有做同冇做，50倍同150倍嘅分別

但真係知易行難，因為雞碎咁多，多數都係食咗佢算—特別係初投資時

後生仔倉細派息少，食餐好，人之常情。但有啲錢都仲係咁，就錯了

1萬蚊買盈富300蚊息，食咗佢。10萬/100萬，股息就唔少，唔好食咗佢

實行上嘅問題：美股唔派息喎

另一問題：收幾百蚊或幾千蚊息，都未必夠買一手港股喎！

100% invested，保平安。我收中移動幾千蚊息，但冇話一定要買返中移動

因為我有錢就買晒股票，所以收幾千蚊息，自然就買多幾千股票

dividend reinvestment 係個心態，唔一定係人地提供畀你嘅工具。

股票好過現水（否則你最初做乜買股票），咁收到現錢當然變做股票

畀埋真倉實例你：其中一個倉，我一年收息都8萬，再投資就唔細數了

300萬倉收8萬息，差不多啦，唔係全部港股嘛

油價升幅，同股票比，爭好遠　—　計埋股息再投資仲遠。

問題係：石油黃金從來冇派過息，將來亦唔會，所以亦冇得＂再投資＂

其實，數唔數得出，有邊個買石油買金可以變超級富豪？

但，唔好自作聰明，我冇話「一定要有息派先係投資」

1. 順手跟進埋，之前篇文講過所謂「以巴衝突」，入面我貼過呢個圖：

50年前買標普指數，100蚊變15000蚊。但明明指數只係升50倍！

2. 1973年買標普指數，到而家50年，100蚊變15000蚊，150倍！但你如果睇數字，1973年標普指數只係90-120點，而家4400點，當你當年90點買，而家都只係50倍唔夠，點計到150倍？

3. 因為，佢條數係當你收到嘅股息，全部瞓返晒落去。日子有功，個分別係50倍同150倍嘅分別

重點係：股息再投資！有做同冇做，50倍同150倍嘅分別

4. 所以，除咗講到煩嘅all in 買股票，買得大，持之以恒，複利的威利，要有耐性外　—　仲有唔好忽略咗一樣好重要嘅嘢：股息再投資。

但真係知易行難，因為雞碎咁多，多數都係食咗佢算—特別係初投資時

5. 問題係，比起其他幾樣嘢，要做股息再投資更加知易行難。因為，真係唔係好覺，特別係你組合價值唔大嗰時，亦即係你剛出嚟做嘢，剛開始投資時，我都經歷過呢個階段。雞碎咁多，啲股息你真係食餐飯（都未必得）

6. 1萬蚊買盈富基金先得300蚊（買美股得幾十蚊都唔奇），食餐飯冇咗。但好老土地，真係積少成多。

後生仔倉細派息少，食餐好，人之常情。但有啲錢都仲係咁，就錯了

7. 而且，開始投資時個個都冇錢，派息你去食好啲，人之常情　—　但留意，如果你係已經有唔少錢，但股票倉細，咁就真係犯錯了。冇錢唔係錯，剛開始時多數人都冇錢，但有錢都唔投資就係錯！

8. 換個講法：後生時個倉太細，買股票幾萬蚊，收息幾百，食咗佢，OK。但你身家幾百萬，但都只係買幾萬股票，然後照舊收息食咗佢，咁就係錯　—　而且仲有一個問題—積到有幾百萬，你應該唔再係剛出嚟做嘢，所以你嘅時間優勢根本不及幾萬蚊倉個後生仔。

1萬蚊買盈富300蚊息，食咗佢。10萬/100萬，股息就唔少，唔好食咗佢

9. 睇實數，1萬蚊買盈富基金，收300蚊息，你多數都係食豪啲食咗佢，因為銀碼太細，我嗰時都係咁（題外話：而家300蚊在香港都不能「食豪啲」了）。但，到10萬蚊收3000呢？100萬收3皮呢？就唔算太細嘅數，亦唔係大到離地嘅數—呢度大把讀者嘅股票倉都過100萬，我都過啦，10萬嘅我估多數讀者都有—咁去到呢啲數字嘅，你係「食豪啲」，定拎去再投資，就好大分別了。

實行上嘅問題：美股唔派息喎

10. 但我知實行上冇咁簡單，兩個問題。首先，買美股嘅，冇乜息派。呢個未必係壞事，因為等於「佢幫你再投資」。但無論如何，原理是一樣的，上面最初嘅例子都係用美股。

另一問題：收幾百蚊或幾千蚊息，都未必夠買一手港股喎！

11. 但仲有一個問題：有時你收幾千蚊息，都未必夠買一手港股（呢啲係港股老土嘅地方）。即使夠一手，你都未必一定會買。以前有啲港股有得以股代息（好東西），但而家得返好少

12. 實際上我嘅做法呢？其實都係老規矩，100% invested，幫你解決好多問題

100% invested，保平安。我收中移動幾千蚊息，但冇話一定要買返中移動

13. 例如我收中移動嘅息，幾千銀，咁我不一定要「買返」中移動　—　但我就真係拎呢啲錢去買返股票。買乜？咪每個月買嗰啲，甚至拎嚟買美股都得，啲錢冇記認嘅。

14. 根本幾千蚊你都可以搵到一手股票買，甚至拎去買美股。況且以前都仲話佣貴，而家平佣，交易費用呢個問題已大大改善。

因為我有錢就買晒股票，所以收幾千蚊息，自然就買多幾千股票

15. 原理好簡單：因為我就係開支後嘅錢，全部買晒股票嘛！咁只要我唔係特別因為中移動派息去食餐米芝蓮三星的話，嗰個月收幾千蚊息，自然我就會剩多幾千蚊，咪就買埋落去股票囉！

16. 真係買一手都唔夠？咁碌多幾個月買，到某個銀碼就買（事實我多數碌到兩萬蚊就買，個數都係隨意嘅）。所以我戶口的確大半嘅日子都唔會有兩萬蚊，好多時得幾千蚊。

dividend reinvestment 係個心態，唔一定係人地提供畀你嘅工具。

17. 呢個，大約答到你「收嘅息唔多，唔夠買一手」「隻股票冇得以股代息」之類嘅問題。其實dividend reinvestment 係個心態，唔一定係人地提供畀你嘅工具。

股票好過現水（否則你最初做乜買股票），咁收到現錢當然變做股票

18. 我個個月買2萬股票嘅，咁嗰個月收到2千股息，我咪會變咗買2萬2嘅股票。咁之嘛。最初你點解買股票唔放啲錢在曲奇餅罐？因為你覺得股票好過現錢嘛。既然係咁，收到現錢，當然應該轉做股票！

畀埋真倉實例你：其中一個倉，我一年收息都8萬，再投資就唔細數了

19. 最後，畀埋實例你睇。呢個係我其中一個股票倉，有美股有港股。咁首先，你見到個倉近300萬，賺緊21萬（都話唔少港股，所以比較差）。又，見唔見到98%股票？平時呢個比例仲高，「只係仲有啲股息未再投資」

20. 但更重要嘅係，過去一年（10月17到10月17），收咗82,000蚊息（留意埋，個「已變現利潤」一樣係呢個數，因為我根本冇沽過股票，但派息佢就當係「已變現利潤」）

21. 好啦，就真係唔少嘢。可以三個角度睇

22. 首先，一年82,000蚊，瞓返落去再投資，就唔係少錢了。

300萬倉收8萬息，差不多啦，唔係全部港股嘛

23. 咁但當然你會話，「扯咁因為你個倉大嘛」，當然。不過亦計下數。82,000/3,000,000，2.7厘息，應該啱數。咁你話，盈富基金都3厘息（其實而家差不多3.6厘了）。但我又唔係全部係盈富基金，固然有啲高息過盈富，有啲低過，拉勻晒係點我都冇計 —但仲有一樣嘢：入面仲有美股嘛！就冇乜息的。所以拉勻，2.7厘息，差不多啦。

24. 第三個角度睇：我成個倉都「只係」賺21萬（冇沽過，當然冇沽都係賺）—但一年我收息都收返8萬喎。真係收得兩年息，已經等於個capital gain

25. 咁你真係見到，去到港股近年呢啲情況，你計埋收息同唔計，回報就爭好遠。亦即係如此，股息再投資就更重要　—　雖然，其實係幾時都重要！

油價升幅，同股票比，爭好遠　—　計埋股息再投資仲遠。

26. 順手講埋，最初貼呢個圖，其實我係講油價。50年前「贖罪日戰爭」，油價10蚊咁上下，而家80。你心諗，升咗好多喎！但同股票比，相差太遠—特別係如果你計及股息再投資

27. 因為當中有一個好重要嘅問題：石油冇息畀你！黃金亦都冇！過去冇，而家冇，將來都唔會有。所以根本唔存在「再投資」呢樣嘢

問題係：石油黃金從來冇派過息，將來亦唔會，所以亦冇得＂再投資＂

28. 可能亦有人聽過，呢個亦係畢菲特唔買金嘅原因，正係因為黃金唔會生產更多黃金，（呢篇值得睇下，順手你再反思下「乜嘢係投資」）

29. 認真問你一句：畢菲特投資股票致富，但你有冇見到人買黃金買石油致富？幾千萬會，幾億可能都有。但你睇真正嘅超級富豪，有冇一個係齋買金齋買油發達？好似冇

其實，數唔數得出，有邊個買石油買金可以變超級富豪？

（你可能同我講洛奇奜勒，但首先，百幾年前了。另外：佢做石油生意發達，同佢買石油發達，係兩回事。正如你賣白粉，就唔等於會自己食）。即使Elon Musk，都係靠股票發達（自己公司股票）

但，唔好自作聰明，我冇話「一定要有息派先係投資」

30. 不過，又係唔好自作聰明，以為「一定要有息派先係投資」「一定要有息派先買」—十分明顯地，畢菲特間巴郡好長期都唔派息，蘋果都好長時期唔派息。甚至你買支紅酒佢都唔會派息，但我冇話過唔係投資。

31. 關鍵始終係「創造價值」。在巴郡或蘋果嘅情況，比較易理解，即係啲息派畀你，不如用嚟回購（因為美國嘅稅務問題），又或者留在公司啦　—　你使錢叻過畢菲特添曲喬布斯咩！100蚊畀佢投資好，定你自己好？

32. 但若果，真係到咗你手，你都係應該拎去再投資。

33. 至於紅酒等等唔派息嘅東西，我從來冇話過唔係投資，但的確紅酒都唔會生多啲紅酒出嚟，咁個「價值」何來？遲下會再解

Patreon舊文目錄，可以睇返晒以前所有文。