美股業績暫時大多數好過預期 ，但係咪好事？睇你點睇。聯匯四十年，爆煲未？賭脫勾嘅期權呢？沙利文9月免話中東好和平，幾日就爆鑊勁，咁佢係咪錯？咩叫啱？啱又有乜用？中東開戰，港股美股照升，可見＂避險＂得啖笑 (Patreon)

值得講嘅嘢大把，但好多人將時間用在錯嘅地方

美股業績差不多全部都好過預期，係咪好事？睇你點睇

舊年業績差，納指年頭瀉到年尾，跌足35%—但結果就係黃金機會

「市況好波動　好多壞消息　唔好買住」—咁幾時先買？

股票似洗頭水，減價好事定壞事？態度決定心態，心態又決定結果

預告：五大科企今季盈利預計升33%！你冇睇錯

聯匯四十年，爆煲未？

不過，垃垃KOL日日錯，都冇問題。廿年後真係脫勾，佢又啱。係咪？

其實乜嘢叫「啱」？啱又點？投資要「啱」咩？

傳說中嘅「賭聯匯脫勾期權」，個個話冇咁著數，但結果個客收高息喎

「銀行梗係劏客啦，點會畀你收9厘息，肯定有內幕知會脫勾」

銀行使Q同你對賭？低水平唔緊要，但唔好懶醒，否則會變JPEX苦主

沙利文9月30號話中東幾廿年最平靜，即時被打臉，咁係咪「燈」？

畢菲特話下年美股升，你樓下個看更話下年跌，結果美股跌。誰是專家？

畫出腸：結果當然重要，但唔係用嚟判斷所有嘢

所以最好就睇身家睇人工，因為係長期累積嘅嘢

畀你估中又點？執行唔到，有乜用？你講足30年地震，我日日縮枱底？

中東衝突一星期，美股港股升2%，「一年就100%」—說好的避險

值得講嘅嘢大把，但好多人將時間用在錯嘅地方

1. 值得講嘅嘢唔少，但多數人都係將啲時間錯誤咁用（我有時都會）。好老土講，錢你可以賺到更多，但時間你唔會有更多，所以時間真係好寶貴，你未意識到，證明你用得未夠好。

2. 值得你關心或者諗嘅嘢？大把。

美股業績差不多全部都好過預期，係咪好事？睇你點睇

3. 首先當然係美股業績，最初有百事，剛剛有BlackRock，仲有一大堆銀行股（上星期五Wells Fargo，花旗，JP Morgan，剛剛有美銀同高盛）—差不多全部都好過預期。

4. 星期三收市仲會有Netflix同Tesla，然後最尾當然又係堆大科企。

舊年業績差，納指年頭瀉到年尾，跌足35%—但結果就係黃金機會

5. 固然，業績好過預期，但你見呢排市況唔算特別好（但也唔差）。不過至少又可以「擔心」少一樣嘢。因為舊年嘅第三季業績，係搞到美股港股暴瀉嘅。納指舊年由頭瀉到尾，高位跌三成半

6. 但，又真係兩睇。睇圖見到，就係舊年呢個時間，美股就見底。正係「壞消息」時先應該買，又一例證，係咪？但多數你只會事後先發現。所以就試下克服佢，特別係聽少啲人講「嘩市況好波動，好多壞消息，等好返啲先買」—好返先買，就摸頂啦。係要逆向操作的

「市況好波動　好多壞消息　唔好買住」—咁幾時先買？

7. 所以另一個角度睇，啲業績全部好過預期，股價唔跌，你又冇執平貨嘅機會

8. 亦都拉返到去早排先寫過嘅「股票像洗頭水」—關鍵就係，到底你真係長期持有食盡個浪，定係投機去「估」。你係長期投資嘅，股價跌，往往未必係壞事，舊年我肯定後悔買得唔夠多添啦。舊年呢個時間，Nvidia 120蚊咋！Facebook 100蚊有找添呀！直頭大平賣！

股票似洗頭水，減價好事定壞事？態度決定心態，心態又決定結果

9. 但如果你係舊年第一二季飛入去，又唔諗住坐得長嘅（雖然對好多人嚟講幾個月都好長），就梗係唔開心

10. 呢啲就係態度決定心態，心態又決定結果。

預告：五大科企今季盈利預計升33%！你冇睇錯

11. 有關美股業績，下一篇會細講，但呢個圖夠晒有趣，你可以思考下先

聯匯四十年，爆煲未？

12. 另一樣值得思考嘅嘢：聯繫匯率四十年。No news is good news。官府啲嘢當然大家冇乜心機睇，呢篇唔長，入面講嘅嘢唔算難明，但當然官方嘢就都係四平八穩嗰幾味。雖然入面講嘅嘢你都可以諗下（有部份我係唔同意的），有時間可以睇下，總好過你睇啲垃圾KOL，年年唱脫勾日日講乾塘

不過，垃垃KOL日日錯，都冇問題。廿年後真係脫勾，佢又啱。係咪？

13. 但有趣嘅係，即使佢過去十年同未來二十年日日都講錯，但去到廿年後有一日脫勾，佢都好似係「啱」喎。而包括金管局在內，冇人會保證未來廿年都唔會脫勾（無論係主動定被動），我都唔會寫包單—於是呢度你可以思考一個好重要嘅問題：乜嘢叫「啱」？你可以慢慢諗。

其實乜嘢叫「啱」？啱又點？投資要「啱」咩？

14. 但在呢個情況，我可以話你知，「啱」又點？我從來唔認為你投資賺唔賺到錢，同你睇某啲單一事啱唔啱，有好大關係。

15. 舉多個例，Kyle Bass之類嘅笑話，就不再講，但社運時期啲人當佢神咁拜，明顯係感情同政見影響晒判斷—而反正Kyle Bass又唔係賭自己錢！仲要係雞仔注。「錯」有乜所謂？反正都錯咗好多次，但依然大把網友聽。

16. 正如讀者不停同我講，朋友send呢篇分析畀佢，台灣啲乜春報導又點講（呢啲，就係垃圾報導啦），又話阿根廷俄羅斯沽晒啲人民幣大陸冇晒外匯儲備就撻埋香港嗰啲（其實使唔使咁複雜？邊個話我冇錢先可以搶人嘅錢？），港紙又失守blah blah blah

傳說中嘅「賭聯匯脫勾期權」，個個話冇咁著數，但結果個客收高息喎

17. 不過更有趣嘅，檢閱下，傳說中嘅「賭聯匯脫勾」—我記得好似舊年都有銀行推，但搵唔返。而家搵到嘅係今年2月，中資行推。

18. 故事好簡單，就係中資行有隻產品，聯匯唔甩呢，個客就拎9厘回報啦。聯匯甩呢，個客就輸錢。即係類似賭聯匯啦下

19. 咁當時啲KOL嘅分析，當然係「中資行有內幕」—銀行就梗係劏客（這點我冇反對），邊有咁著數畀你拎到9厘，即係肯定會甩啦，哈哈哈。

「銀行梗係劏客啦，點會畀你收9厘息，肯定有內幕知會脫勾」

20. 你可以諗下，以上嘅思維有甚麼問題。無論如何，客就似乎真係收咗9厘息。問題又嚟啦喎，唔通銀行開善堂？

21. 你可以思考下，但首先我好似經常都強調：銀行使Q同你對賭咩！唔該，戒咗呢啲咁低水平嘅思考。第二，你覺得大陸會容許中資行自己賭匯聯？

銀行使Q同你對賭？低水平唔緊要，但唔好懶醒，否則會變JPEX苦主

22. 無論如何，啲KOL錯到七彩，但一樣大把人不停每日嚟問我。所以你會見到，多數人，就多數係錯嘅。唔識嘢嘅傻仔佔大多數，你就唔好做其中一個。水平低都唔緊要，頂多上流唔到，但更加唔好低水平仲要貪心或者懶醒，否則就會買JPEX幣。

沙利文9月30號話中東幾廿年最平靜，即時被打臉，咁係咪「燈」？

23. 再舉個例，白宮安全顧問沙利文，9月30號先講中東地區比過去二十年更平靜（是真的，唔係巴士的報aka星島老屈佢，我懶搵英文原文啫）　—　咁大家都知，一個星期後，就爆發幾十年嚟最大嘅以巴（或以哈）衝突

24. 好啦，問題係，沙利文係咪「錯」？（甚至更差嘅，討論佢係咪「燈」？）。又或者，當時如果埃汾話，「條友都唔識嘅，好快又打過」—然後一個星期後就開打　—　咁我又係咪「啱」？係咪「準」？係咪「專家」？

畢菲特話下年美股升，你樓下個看更話下年跌，結果美股跌。誰是專家？

25. 呢類問題，舊文講luck versus skills講過（叫咗你睇架啦！）。畢菲特話下年美股會升，你樓下個看更話佢都低能，下年實跌。結果美股下年真係跌，咁係咪你個看更叻過畢菲特？又或者，2022年摩洛哥有個乞兒話祖國世界盃必入四強，摩連奴哥迪奧拿或講波佬話好難，最後摩洛哥真係入四強，咁係咪個乞兒叻過晒佢地？

26. 我發現唔少讀者都唔鍾意自己諗，可能香港人太忙。咁好吧，畀埋教訓你，畫出腸（但咁樣唔好，記得多啲自己思考）

畫出腸：結果當然重要，但唔係用嚟判斷所有嘢

27. 首先，「結果」當然重要，但唔好完全用個「結果」去判斷所有嘢，特別係一兩件事，特別係一啲其實好難估嘅事，特別係仲要冇任何時限，冇具體條件。

28. 第二，富二代除外，但一般我都係比較敬重高人工或有錢嘅人（而我的讀者好有錢）。因為財富係累積返嚟，「咁叻點解咁窮？」。仲有，幸運地獲得巨富嘅人，往往好易敗晒，你經常都睇到（特別係外國）啲友中完彩票但十幾廿年後就變返窮光蛋。

所以最好就睇身家睇人工，因為係長期累積嘅嘢

29. 固然你睇JPEX啲苦主，有人可以輸幾千萬，令我最感慨嘅係「居然咁笨七嘅人都可以咁富貴」（當然可能係富二代）—但另一角度睇，咁結果佢咪會輸返出嚟咯！你聚到財，又唔會太易輸大錢，當然係實力同智慧嘅表現。呢啲持續嘅成績，先係用嚟判斷一個人　—　而唔係「佸中」聯匯脫勾，中東開戰，摩洛哥入四強。

30. 當然仲有，而家網上嘅嗰啲「燈唔燈」，「準唔準」嘅文化，絶對係冇益。如果某大師真係咁「燈」—咁其實佢應該發過畢菲特，不是嗎？只係去研究某個人準唔準燈唔燈，對你提升水平冇乜幫助。

畀你估中又點？執行唔到，有乜用？你講足30年地震，我日日縮枱底？

31. 然後仲有最後嘅係：畀你真係估中，又點？「估中」中東開火嘅網友，發到達未？如果咁準點解冇發達？

32. 一樣嘢「啱」，但拎唔到嚟執行，有乜用？我日日話會地震，咁到有一日真係地震，但呢啲預言有何價值？唔通我每晚都縮在枱底？你真係唔好笑，啲網友不停同我講台海會打仗，聯匯會爆煲，其實有乜分別？你瞓身沽空港紙未？不如我1YEN 同你換1港紙啦，請PM我，我手頭上有幾百萬YEN，你話會港紙跌到變廢紙嘛。我捱義氣哽咗佢。

中東衝突一星期，美股港股升2%，「一年就100%」—說好的避險

33. 然後可以再講兩句「以巴開戰」—簡單嚟講，呢啲就係你唔使關心嘅嘢！我完全不關心—我意思係，我其實好關心，但唔係在投資嘅context。正如我會寫俄羅斯軍頭，但同我買美股有乜關係？見到廚師叛變就驚全球核戰，沽晒美股？

34. 有圖你睇，五十年最勁嘅中東衝突後，美股升，港股都照升。雖然唔夠2%。但，一個星期多啲咋喎，「個個星期1.5%，一年就78%」（其實係117%）

35. 當然唔會「個個星期升1.5%」，但呢個例子無非想話你知：考慮到只係一個星期多啲，呢排嘅升幅，絶對唔少。

36. 咁又點？咁即係，最初念口簧嘅乜鬼「地緣政治風險升溫，投資者避險，股市會受壓」，聽落好有道理，但根本唔係咁回事。

37. 最有趣嘅係乜？就係：如果一個星期真係跌2%，咁佢呢啲分析又變咗「啱」，而埃汾最初質疑「根本唔關事」就係「錯」，又可以做「燈」了

38. 見到冇？請改變你嘅思維。而呢啲乜嘢「地緣政治」，真係同你投資無關。你日日拎30分鐘去睇KOL講嘢（即使唔垃圾嘅都好），不如做下其他嘢。

Patreon舊文目錄，可以睇返晒以前所有文。