美國通脹高過預期，但加息預期跌晒，分分鐘今年唔加。呢排港股跑贏美股，點解？或者問，點解港股咁差？真係因為＂經濟差＂？ (Patreon)

快講美國通脹數據：叫做略為高過預期，但市場反應不大

但加息預期跌喎，可能唔再加息，點解？

「戰爭會拖低經濟增長限制加息空間」「戰爭會令通脹飛升要再加息」

任你講乜都好：今年標指升咗13%，納指升30%　—　但大把壞消息

呢排港股跑贏美股喎，點解？

實情問返基本問題：點解港股咁差？

經濟唔好（如果真係唔好）？根本唔係主因

市值＝盈利Ｘ市盈率。而家明顯係市盈率收縮

新世紀股價20年新低，但樓價租金又20年新低？

最大嘅問題：當然係外資減持

1. 已回港，會回復返正常出文—應該話會畀平常更多，補返去日本時出少咗嘅文。

2. 仲有快手講講，美股已進入業績期，暫時堆業績都幾好，星期五幾間銀行都好，Black Rock都不錯。

快講美國通脹數據：叫做略為高過預期，但市場反應不大

3. 首先快講下星期四晚出嘅美國通脹數據。一句講晒就略為高過預期，但市場反應唔算太大

4. Headline CPI按年升3.7%，上次都係，而街估3.6%，所以見到略為高過預期。按月嘅情況亦差不多，CPI按月升0.4%，上次係0.6%，街估係0.3%。按月升幅係回落，但冇預期中回咁多。核心CPI嘅，落望好睇啲，按年升4.1%，上次係4.3%，街估亦係4.1%，大致符合預期，所以市場反應真係唔太大

但加息預期跌喎，可能唔再加息，點解？

5. 然後再快手睇，加息預期。11月1次嗰次鐵定唔會加，唔使點睇，頂多又聽下聯儲局啲官講乜（留意近排開始態度軟化）。12月中嗰次呢？比較有趣，估加息嘅機會三成左右。留意一星期前曾經見過四成幾，主要因為當時啲就業數據強勁。

6. 亦即係你可以話，出完通脹數據，整體啲加息預期係跌咗嘅。係咪幾有趣？上面先講啲數字好似略為高過預期

7. 然後再睇埋美匯美債。10年債息，過去一個星期，係跌嘅（留意9號美債冇市，但股市有開）。

8. 美匯指數呢？睇你邊個位計起，但可以話係先回後升少少。

9. 你要夾硬解嘅，當然可以講同中東局勢有關。事實見到星期一二市場反應不大，但星期四五又好似拎返出嚟講。任你點演繹，你可以話咩擔心捲埋更多國家落水之類。

10. 只係好簡單嘅一個例子都會見到，市場走勢由好多嘢決定。到底債息回落係「因為」通脹數字唔太差，定係「因為」中東局勢啲人避險？任你講。正如加息預期跌，理論上「應該」係同通脹關係最大，但你要「政治主導」嘅，一樣可以解做「投資者預期戰爭會拖低經濟增長限制聯儲局加息空間」（而根本相反地，你講「投資者擔心戰爭會令通脹飛升令聯儲局要再加大力度加息」亦得！）

「戰爭會拖低經濟增長限制加息空間」「戰爭會令通脹飛升要再加息」

11. 甚至乎，我都未同你講，近排聯儲局官員啲口風，應該係幾明顯放軟嘅。呢個亦係一個因素。

12. 所以，真係唔好太鑽牛角尖，係都要「搵個解釋」。市場就係好多因素影響，更何況你只係睇幾日嘅，根本唔使特別去演繹。

13. 睇法？都係冇乜變，而家當然可以買股票，值博率當然唔係太高，但等等等亦唔知等到幾時，況且到好值博時你又未必咁買，機會又可能一閃即逝。與其搞咁多嘢，捉個時機，仲要未必捉得到，捉到買買唔得多，不如買得大，坐得穩。

任你講乜都好：今年標指升咗13%，納指升30%　—　但大把壞消息

14. 殘酷嘅現實係：任你講咩地緣政治風險，加緊息，經濟唔好　—　但標普指數今年暫時仲係升緊13%，納指更加升足30%　—　如果今日就埋單，今年就已經係相當好嘅一年　—　咁你話「未加完息股市唔會好」「地緣政治低股市」，係咪事實？年頭有人同你講聯儲局今年都一路加息，以巴會爆發50年嚟最大衝突，你又信唔信納指會升30%？（甚至都未講SVB爆煲，我諗已經好多人唔記得咗）

15. 根本個思考方向唔係咁

16. 仲有值得講下嘅係，呢排固然你見到美股好返啲，好可能因為債息回落。

呢排港股跑贏美股喎，點解？

17. 但同時間，港股呢排都唔錯，甚至表現仲好過美股！（冇呃你，睇圖）。一個星期升到4%，還好啦。固然都係大落後

18. （固然我個圖係星期三整嘅，但，上個星期港股都仲係有得升，而美股係要跌嘅）

19. 但至於點解港股呢排表現好返少少？實在唔知。固然因為美國債息回，美金早排轉弱。但表現仲好過美股喎。咁可能因為平。亦個講法話係因為匯金入市增持內銀（但我上面個圖係未出現呢件事的）

20. 仲有個講法話因為中美關係回暖（似乎係的，話習拜會添），亦係有趣的。如果可以持續（好大個問號），港股上升空間都可以好大。

實情問返基本問題：點解港股咁差？

21. 其實，應該由最基本問起：點解港股咁差？

22. 理由就肯定唔止一個。但，大家應該知，我就唔太Buy「香港經濟好差」「大陸經濟好差」呢個講法（雖然十個有十一個都會咁講，但你幾時見多數人係啱嘅？）。首先股市唔代表經濟，今年表現最好嘅國家ETF係阿根廷（留意係美元報價），難道阿根廷經濟好？另外，德國今年經濟衰退添，股市照升8%。二來，經濟好差咩？都討論過多次。但三來，即使經濟差，都唔係好似股市反映咁差。

經濟唔好（如果真係唔好）？根本唔係主因

23. 點解咁講？好簡單啫，你睇估值咪已經睇到。盈利低嘅，咁你個市值咪低咯，好合理。但而家明顯係即使盈利有增長，甚至就算係要倒退都好　—個市盈率嘅收縮，係遠大於盈利本身嘅數字。所以，根本所謂「經濟唔好」（如果真係唔好），唔係主因

24. 即係乜？數字具體講。即係，以前建行（舉例）可能10億盈利，15倍市盈率，150億市值咁計。咁而家你當經濟差，得返8億盈利（事實建行盈利年年都升緊），咁15倍市盈率，就得返120億市值，跌兩成，咁就係因為盈利影響。但而家呢？就似乎係得返8億盈利，但10倍市盈率，所以得80億市值，冇咗一半。而呢度嘅市值跌幅，主要係嚟自估值收縮，大約係咁

25. 現實係更神奇：例如上面嘅例子，現實講緊係盈利有得升，10億升到12億。但個市盈率由15倍變到5倍。所以市值由150億變到60億，死未

新世紀股價20年新低，但樓價租金又20年新低？

26. 另一個好相似嘅例子：大家都有睇，新世界股價跌到20年新低。恒隆都係咁下。問題嚟啦喎，租金樓價係咪跌返去20年前？明顯唔係。將來會唔會？唔知。但短期都唔唔似會。

27. 講得簡單啲，幾時都係市值＝盈利Ｘ市盈率。港股嘅跌幅，主要係嚟自估值收縮。盈利增長固然不振（以前寫過，大陸對企業不友善），但更重要係估值收縮。

市值＝盈利Ｘ市盈率。而家明顯係市盈率收縮

28. 點解估值收縮？當然都好多原因。增長慢落嚟係一個問題，大陸對資本家唔友善又係一個因素，債息升都係一個因素。「政治風險溢價」上升又係一個原因（但其實呢個原因幾屈機下，任你講）

最大嘅問題：當然係外資減持

29. 但應該仲有一個因素：外資減持。

30. 明報嘅呢個系列，做得極之好。又再講一次，平時叫你地睇下傳統媒體又話貴又話冇時間，但就日日有人嚟問我「我見到有KOL咁講」「我朋友send咗篇文畀我」「我上Youtube啲人係咁講」—然後你話我知，你冇時間。嘻嘻。

31. 冇錯，理論上外資減持，股票變得更抵。股東減持，唔應該影響股票本身嘅價值。不過去到咁大規模嘅減持，情況就會比較惡劣。

32. 亦即係話：係好平，係抵，但邊個買返上去？外資嘅可能有啲唔買得，或者驚畀人鬧（例如呢個例子）。即使覺得抵買敢買嘅，亦怕法律風險（點知會唔會有一日買中資股要打靶？）。夠膽冒險嘅，亦會諗：得我一個買，有鬼用。況且，平嘅市場亦都唔係得中國，唔少新興市場都係大落後，只係冇中港咁誇張。

33. 無論如何，我諗我想講嘅係：抵買，就真係似乎抵買的。但由抵買到會升返，甚至大升，時間可以好長。

34. 或者掉返轉講你會比較易明：好似疫情後，2020年3月至到2021年堆發夢股meme股咁。係擺明泡沫架啦，好多人都有講。但照升。係超貴，但照升。咁最後都真係爆煲喎　—　但都真係用相當長嘅時間。

35. 而家港股嘅情況，你可以話掉返轉。咁就真係睇你有冇無比嘅耐性。

36. 我自己就都仲係有一路買港股。但例如有啲人完全唔買港股，我亦理解。事實過去十年美股跑贏晒（雖然又之前有十年係美股跑輸）

37. 不過老規矩，即使你完全唔買港股都好，都唔太應該100%美股嘅。

Patreon舊文目錄，可以睇返晒以前所有文。