「哈馬斯，你點睇？」—開CNN睇囉。不過介紹返，贖罪日戰爭之後50年，油價升7倍。好多？但美股升咗150倍 (Patreon)

好彩冇讀者嚟問我哈馬斯點睇，咁我就主動講啦

「網上傻仔何其多，問你笑得幾多個」—唔使花時反駁。遠離低質嘢就夠

你網上啲KOL，今日就識以色列局勢，之前又係烏克蘭專家

兩次大戰，無數次金融危機，衰退熊市　—過去100年，股市升咗幾多？

「地緣政治升溫　避險情緒升　油價升　金價升　股票受壓」—　係廢話

不過可以講下，50年前嗰場以色列戰爭，就間接令到金本位制死亡

當年油價3蚊升到12蚊，而家90蚊。嘩，升咗咁多！—　好多咩？

當年嘅1蚊，都等於而家7蚊了

港股？升咗10倍至40倍，甚至未計收息

美股？100蚊變15000蚊！150倍

當中計及咗股息再投資。不過，石油黃金，有冇得派息畀你？

好彩冇讀者嚟問我哈馬斯點睇，咁我就主動講啦

1. 可能我時運高睇唔到，又或者讀者真係學精咗。總之，我十分高興，冇讀者走嚟問我，「以色列哈馬斯開火你點睇」—我有寫過，最怕呢種問法，咩叫「我點睇？」，開CNN睇囉。定你其實想問其他嘢？。亦好似冇讀者問我，「係咪即係股票冇運行，要買石油黃金」—答案是否定的，但呢個問法好過第一種問法。

2. 所以下次唔好問我「高盛話港股會見3000點，你點睇？」「Elon Musk話會再爆金融危機，你點睇？」「我朋友send篇文同我講阿根廷會用晒中國外匯儲備然後中國會拎埋香港嗰啲然後聯匯會崩潰，你點睇？」

3. 留意，你本身問「我點睇」，冇問題　—　問題係乜？問題係，你根本唔係想問我點睇。你真係關心歷史咩？不如直接問其他嘢。正如你問我，「高盛話恒指會見3000點，你點睇」。我會答你「關我乜事，關你乜事」—但明顯呢個唔係你想要嘅答案嘛。你係想問，「我係咪要沽晒啲股票佢」。

「網上傻仔何其多，問你笑得幾多個」—唔使花時反駁。遠離低質嘢就夠

4. 正所謂「網上傻仔何其多，問你笑得幾多個」。我固然冇時間冇興趣冇動機去不停指出每個廢柴KOL嘅謬誤　—　但你都唔使。你要嘅係睇高質嘅嘢，遠離垃圾。唔識分咩？我Patreon同Faecbook成日教你分。都係分唔到？咁都好易，多啲思考，少啲睇評論。真係要睇新聞嘅，睇傳統媒體（但你當然可睇網上版睇app，我冇話睇傳統媒體代表要買份紙，雖然呢個係我嘅做法）

你網上啲KOL，今日就識以色列局勢，之前又係烏克蘭專家

5. 但講返，「擔心中東局勢」，就唔係傻仔，你有咁嘅擔心好正常。但一如以往，台灣會打仗又好，入侵烏克蘭又好，俄羅斯兵變又好。首先，你覺得你識幾多？你睇嗰啲評論又幾多？幾多個香港人識希伯萊文？況且，識希伯萊文就專家？香港成街都係識英文嘅廢柴，唔通好識英國政治？非洲啲乞兒都識法文添呀。然後第二，地緣政治嘅影響，只係畀啲小朋友誇大。就算有，都唔係咁簡單直接。仲有第三，當然係樂觀著勝。

兩次大戰，無數次金融危機，衰退熊市　—過去100年，股市升咗幾多？

6. 全世界經歷咗兩次世界大戰，死咗N咁多人，好多次金融危機，無數公司爆煲。加埋無數咁多次熊市（然後有讀者同我講美股呢排走勢好差，一個月跌咗5%），無數咁多次經濟衰退，以及四五百次支爆　—　然後你睇股市升咗幾多倍？

7. 當然所謂「正路」嘅分析，我都識講，根本你都識講：地緣政治風險升溫啦，投資者避險啦，咁股市就冇運行啦，油價金價升啦，美金強啦，大家應該保持觀望啦，持盈保泰啦，增持現金啦，做好風險管理啦（最後四句近乎係廢話）

「地緣政治升溫　避險情緒升　油價升　金價升　股票受壓」—　係廢話

8. 油價，好似升咗一棍，係咪「因為」中東？唔知，但當係。不過，金價冇升，美股港股就升足咁多日，美金亦冇特別強。

9. 基本上，呢啲所謂「分析」，你啲網友都識講嘅，即係全無價值。

10. 你叫我好認真答你嘅：咪玩啦，哈馬斯堆中東佬，窮過乜（雖然背後可能伊朗撐腰），突襲一次就得，玩得幾日自然收檔，都未使美國好似幫烏克蘭咁幫手。伊朗報復？是但啦。油價大升拖低全球經濟？你估仲係50年前咩

11. 不過如果有睇我在Facebook寫「梅爾夫人」套戲（只係寫咗兩句），就可以講多啲。整整50年前，阿拉伯佬亦係在咁上下時間，亦係猶太人放假，就突襲以色列，是為「贖罪日戰爭」

12. 「歷史驚人的相似」—不過，就係有啲地方似，有啲地方唔似

13. 50年前嘅美國總統係邊個？係尼克遜。佢應該係「有啲爭議」，但在佢任內真係發生好多事。水門事件，尼克遜訪華，越戰撤軍。中東打仗呢啲相對小事，但間接造成咗一樣嘢—　金本位制收檔，自此美金任印（其他貨幣都係）

不過可以講下，50年前嗰場以色列戰爭，就間接令到金本位制死亡

14. 詳情舊文寫過（好長的），但好簡單講，當時正係阿拉伯佬集體禁運，石油危機，就變成美元危機，最後「布列頓森林體系」（Bretton Wood System）呢個戰後怪胎失守，美國單方面廢除金本位制　—打後美金任印，似乎係令到股市比以前升幅更勁（但當然，1973年前已經有美股）

15. 但大家知道了，石油已經冇以前咁重要。況且，人類嘅科技一路有進步。仲有，美國亦都有兩手準備，唔會只靠中東嘅石油。更唔好講「贖罪日戰爭」後，埃及脫離蘇聯控制，同以色列建交等等。

16. 話晒都五十年，而家「其他中東佬」對以色列嘅仇恨，同當年應該冇得比。「即係你阿爺仲會同你講打日本仔，但你一年去四次日本」。你見，原本沙地阿拉伯都同以色列建交—甚至有人話係呢件事引起伊朗支持哈馬斯偷襲—相比於沙地阿拉伯，伊朗同以色列嘅仇口就大好多。原因亦好簡單。首先美國反伊朗，但拉攏沙地阿拉伯。但仲有就係：沙地阿拉伯有錢，伊朗窮。窮就比較多仇恨

17. 大約係咁。講真，你真係想知我「點睇」中東局勢？定其實你想問我「我有個朋友話股票有排跌，你點睇？」。定其實你想問我，而家仲買唔買得股票？

當年油價3蚊升到12蚊，而家90蚊。嘩，升咗咁多！—　好多咩？

18. 值得一講嘅，係油價。睇「梅爾夫人」有講，油價由3蚊升到上12蚊（咁上下）。然後你會諗，嘩，而家成90蚊喎　—　原來油價都升咗咁多。

19. 真係？但介紹返，50年前喎。50年前香港樓幾錢尺？50年前恒指幾多點？

20. 呢度可好快睇下，油價，嗰時就真係3蚊升到上12蚊。高位同低位計，爭好多，但去到而家，即係升8倍至30倍

當年嘅1蚊，都等於而家7蚊了

21. 如果1973頂位計嘅，油價即係50年升8倍。好多咩？其實，只係CPI，都1蚊升到7蚊。

22. 正係我以前嘅文寫過，「甚麼是投資」系列會再寫，但呢度都好快講一次：大宗商品，計nominal terms可能都仲係投資，但計real terms就多數唔係。用人話講：大宗商品價格，照計只會大約同脹差不多，好難跑贏。原因？以前解過，遲下再解

港股？升咗10倍至40倍，甚至未計收息

23. 但，股票呢？wow．1973年，港股高位1770點。但低位去到400點咁滯。一樣，高低位爭好遠。但，即使港股而家咁廢都好，呢度都係升咗至少10倍，甚至去到40倍。十分明顯地，係跑贏油價好多，好多，好多。

24. 更加唔好忘記，上面都未計股息。50年喎，個效應好甘，但我懶搵懶計了。而好肯定嘅係：石油同黃金唔會派息，以後都唔會。

25. 至於美股？仲有趣，1973年，你當100點左右。而家標普指數4300點，43倍升幅 – 甚至未同你計派息！

26. 所以？In real terms，大宗商品不是投資，頂多大約跟通脹（咁當然好過你放曲奇餅罐必然跑輸，但商品價格嘅波幅不見得比股票細）。但股票？就可以長期跑贏通脹。點解？個系列好似解過啦，創造到價值嘛。點嚟？之後再解

美股？100蚊變15000蚊！150倍

27. 順手睇多一個source，仲有趣。Cap埋圖，但都解一次你知，1973年到而家的話：

28. 100蚊買標普指數，而家係15000蚊，150倍。點解同頭先講40倍唔同？正是因為股息再投資。留意，複合都只係一年10.5%左右　—　見到時間嘅威力，複利嘅威力，同埋要stay invested

29. 然後，計及通脹後嘅 real return，都仲有20倍，即係一年跑贏通脹6.3%。

當中計及咗股息再投資。不過，石油黃金，有冇得派息畀你？

30. 然後我地大約計返，10.5-6.3，即係一年通脹大約4.2%。50年累積，就係一蚊變8蚊。同上面講1蚊變7蚊爭咗啲，你可以慢慢研究，佢有埋raw data，但唔算爭得太遠

31. 你可以諗下有乜教訓，同埋乜嘢係投資。你仲可以諗下，原來股息再投資，同就咁指數嘅回報，可以爭咁遠。然後可以再諗下：我買石油黃金，何來有股息再投資？

32. 所以，你話你應該買乜？