新世界永續債跟進。如何理解一件事。美國星期四通脹數據。美股業績期 (Patreon)

新世界：點睇業績，點理解一件事

新世界業績：已返到出業績前。咁所以減派息有幾災難？

新世界出業績嗰日係大跌。但係佢拖低大市，定大市拖低佢？

唔想搞咁複雜？得。個個月買QQQ，唔使識乜嘢係「Net debt to equity」

唔識唔係大忌。但你以為自己識就大鑊。或者，你去以為某啲人識

幾多KOL話減派息基金會狂掟股價有排衰？一星期後，又點呢？

補充埋：新世界隻永續債。「我100蚊買佢43蚊贖我咪冇仇報？」唔會嘅

星期四又出美國通脹數據。今次又係好關鍵

聯儲局上個月今年再加多次息，但市場唔係咁估。點算？

最後留意，又到美股業績期。舊年就拖到美股大跌。今次呢？

1. 個「甚麼是投資」一定會寫，應該唔會爛尾，但而家中途都係插播講返市況，因為呢幾日都有啲嘢要留意，亦唔想太多日冇文。

新世界：點睇業績，點理解一件事

2. 首先跟進下新世界17，嗰三篇就寫完晒。照舊，即使你完全冇興趣新世界，甚至冇興趣港股，都應該睇下。因為重點根本唔係新世界，係涉及「點理解一件事」，點睇業績等等。而最後一篇甚至係寫「永續債」，只係拎新世界做例子，甚至同間公司都冇乜關係。

3. 話說回頭，正如Facebook Page都有貼，新世界股價，話咁快已經返返去出業績之前，跑贏恒指同其他發展商。Crisis？What Crisis？

新世界業績：已返到出業績前。咁所以減派息有幾災難？

4. 固然業績之前，今年都跌咗三成。咁當然係因為樓價跌租金跌遊客乏力美國加息，而新世界負債又重過其他發展商。呢啲解釋都合理　—　但你留意兩樣嘢。首先，任何「解釋」資產走勢，真係最好有返咁上下長嘅日子。你拎一日半日嚟講，好多時冇乜意思（除非例如以色列開火油價升呢類明顯嘅例子，陣間會講）。

5. 而另外，當然業績後走股價走勢，應該係反映「業績」入面嘅新資訊。在呢個情況，就係新世界減派息（以及盈利下跌，負債比率再升少少等等）—咁但你見到業績後股價，就睇得到，根本所謂「大災難」，「減派息有排跌」，完全冇理據　—　只不過啲友只係會睇一日嘅反應

新世界出業績嗰日係大跌。但係佢拖低大市，定大市拖低佢？

6. 而之前都寫咗，新世界出業績嗰日港股都大跌，而以新世界在恒指咁輕比重，明顯係係大市拖低新世界，多過新世界拖低大市。況且，你見之前新地16出業績，暗示將會減派息，一日跌一成添　—　但當然你亦同時可以話，嗰時新世界都有跌，所以之前已經部份「反映咗」新世界減派息呢個因素　—　新地都減得，唔通新世界會唔減咩！

唔想搞咁複雜？得。個個月買QQQ，唔使識乜嘢係「Net debt to equity」

7. 搞到咁複雜？係架，如果你想認真諗，就至少係要咁諗。但唔想咁煩？亦冇問題，我一路都話其實你投資唔一定要「識」好多嘢，你個個月買SPY 買QQQ，你連乜嘢係Net debt to equity都唔使識，一樣財富增值。

8. 當然，你想知多啲知識幾時都係好，甚至你可以應用在你工作上（例如打金融工嘅，或者做KOL做記者嘅）。但唔想搞咁複雜，亦無不可

9. 最忌係乜？最忌係你唔識，但以為自己識。又或者唔識，但你走去聽某啲人講。

唔識唔係大忌。但你以為自己識就大鑊。或者，你去以為某啲人識

10. 你可以睇下，新世界減派息，幾咁多人講到世界末日，甚至借題發揮講到股價有排跌？我唔會話嗰啲係「垃圾」KOL，但你而家見到，出完業績股價如何？所以，千萬唔好以為啲人講嘅嘢「必然」—應該講個幾百次，唔好直線思維（減派息，市場好驚，基金失望，會不停掟貨），更何況有時連個直線思維都係錯嘅。

幾多KOL話減派息基金會狂掟股價有排衰？一星期後，又點呢？

11. 說回新世界。首先，我一路都冇買，亦冇咁嘅打算，即使而家月供港股好似都廿幾隻，都冇打算有新世界。本地發展商我只有長實1113，頂多你話太古19有少少，領展823就收租股咁解。所以真係純學術討論，即使減派息唔代表世界末日，即使股價業績後跑贏　—　都不代表我要買，或者你要買，係咪？

12. 但通過呢啲故事，你咪會知道業績應該點睇，以及邊啲KOL嘅水平低，少睇為妙。

補充埋：新世界隻永續債。「我100蚊買佢43蚊贖我咪冇仇報？」唔會嘅

13. 順手補充，新世界隻「永續債」，我就真係問咗佢地！當然佢地嘅私下回覆不能代表官方立場。但簡單嚟講：我嗰篇寫嘅嘢，應該冇乜大錯。

14. 你冇睇嘅，快手講一次。新世界有隻永續債，跌到43蚊咁上下—點解？首先固然係上面有提嘅因素（樓價租金遊客加息負債高），有啲人擔心新世界。另外亦根本因為加息之下，債價自然大跌（30年美債都100蚊跌到50啦，TLT高位都跌一半的）。

15. 於是我提到，新世界有機會「贖」返隻債。但用字一定要精準。點贖？我篇文提過，隻債有call option，新世界可以call返佢。有讀者擔心：喂，咁我最初90蚊買，而家43蚊畀佢call走，咪冇仇報？—情況好似隻嘢跌六七成然後畀人私有化咗咁。但我有解，係不能咁狗嘅。佢個call，係要「原價」100蚊去做嘅。

16. 咁我篇文都有寫，而家還境下，新世界call，冇乜著數（甚至未必有錢）。事實上今年9月已經可以call，但都冇動靜。固然9月後就幾時都可以call，但多數（不過唔係全部）call呢，係一到可以call嘅日子就做

17. 不過，唔call都好，仲有另一個玩法嘛：就係，佢自己拎43蚊在市場買咪得！買完之後，隻嘢自己畀息自己，即係等於消失咗。

18. 你話，call同佢在市場買，有乜分別？分別大咯。首先，係佢畀100蚊定43蚊嘅分別。但仲有，前者係你一定要畀返佢，後者你可以唔理佢。就好似強制私有化，同埋大股東自己在街回購/增持咁嘅分別。請注意，即使新世界就咁43蚊在市場買，唔代表你就會收到錢　—　因為你賣出去根本唔知係畀邊個（除非佢出個tender offer咁，要你填表畀佢），你亦可以唔賣。

19. 無論如何，你見我寫嗰時笠晒頭盔　—　於是你見到，一來我都算負責任，唔肯定，怕解錯嘅嘢，我必定會有啲保留。另外你亦見到：我係知道有乜嘢係自己唔肯定嘅。唔肯定嘅嘢，我係會去問人的。

20. 介紹返，啲人睇我寫文（特別係Facebook啲金融垃圾食物），會覺得我好自大。或者係吧。但呢啲真係只係表面。心中我當然係知道邊啲嘢唔識。你諗下，我假假地一個學霸，CFA，做到星展嘅研究部董事（話大唔話細唔細），我都仲有咁嘢唔肯定　—　得罪講句，你睇嗰啲廢柴KOL，點解你覺得佢地會識嘢呢？定只係佢地講咗啲你想聽嘅嘢？

星期四又出美國通脹數據。今次又係好關鍵

21. 另外，又再一個月一次嘅美國CPI數據，星期四會出。不幸地，近排環球債市股市，都仲係好受美國長息（債息）同短息（聯邦基金利率）影響，而呢兩樣東西又好受經濟數據（主要係就業同埋通脹）影響

22. 照舊，睇trading economics（TE）．Headline CPI街估按年升3.6%，上次係3.7%。CPI按月呢？街估升0.3%，上次係0.6%。核心CPI呢？街估按年升4.1%，上次係4.3%。

23. 即係點？當然係出咗至知。但大約個故事都係通脹已經回落，但仲係幾頑固，似乎離2%仲有好大距離，所以短期減息冇乜望（短期我指半年內）。

24. 話時話，如果好記性嘅，會記得上次聯儲局議息（9月尾），官方預測指引，有講今年仲有一次息加。而家都10月中，11月頭有次會，12月中仲有次。＼

聯儲局上個月今年再加多次息，但市場唔係咁估。點算？

25. 自己上CME睇吧，唔貼圖了。但你會見到，市場似乎暫時估11月12月都未必會加息　—　呢個不一定係好事。

26. 但市場做乜咁估？又疑似係因為局方近排開始轉口風。咁都得？冇話唔得。反正局方嗰啲預測，又唔係未改過

27. 咁你問我，到底今年會唔會加息？其實都真係……一半半。但亦不重要。反正亦都冇人話過，一到最後一次加息，或者一到減息，債息就會勁跌然後股票狂升。

28. 不過整體嚟講，正路地債息回落對股市都會係好事。而正路地通脹真係受控而又停加息甚至減息，債息應該會跌嘅。雖然，好多嘢都可以唔係好正路。

最後留意，又到美股業績期。舊年就拖到美股大跌。今次呢？

29. 最後都介紹返，又去到美股業績期。又係銀行股開始打頭陣。剛剛出咗百事，今個星期五就有JP Morgan．

30. 記得舊年呢個時間，美股業績期就拖累美股大跌。不過歷史當然未必就咁重覆。之後再寫

Patreon舊文目錄，可以睇返晒以前所有文。