永續債討論（下） (Patreon)

新世界隻永續債跌到44蚊，如果佢自己買返，會有乜事？

其實隻嘢8月13厘息添，即係37蚊

新世界自己買返隻嘢，同用Issuer call，有乜唔同？

讀者問：點解11厘息先去贖？唔係低息著數咩。搞清楚，11厘息係乜？

內房債啲100厘息，唔通就派100厘畀你？

票息就定死咗，點會忽然畀到11厘息？票息同債息係唔同的！

永續債有乜風險？同普通債差不多，但多咗一樣

留意，永續債嘅債息，可以遲畀　—　有拖冇欠。亦唔算違約

其實，國泰優先股咪又係咁玩法咯

睇埋新世界普通債券，有隻半年到期，9厘息

9.3厘好貴？6個月美債都5.6厘息啦

另外有隻永續債，仲複雜。因為未過call date。而且啲息有機會加

留意，一般call date都比較長，正如你不能今日供樓半年後質返畀銀行

另外，啲息之後會加上去　—　其實國泰隻優先股都係咁玩

1. 上篇講咗永續債基本。都係嗰句，你對港股全無興趣都應該睇，因為全世界嘅公司都有發永續債，原理都差不多。

新世界隻永續債跌到44蚊，如果佢自己買返，會有乜事？

2. 好啦，上次講到，新世界有隻永續債，跌到44蚊。如果新世界買返隻嘢，發生乜事？咪即係cancel咗，自己畀息自己。正如上面講咗，佢拎44蚊出嚟，就同永續債嘅債主一刀兩斷了。咁當然佢之前都有畀過幾年息嘅。

其實隻嘢8月13厘息添，即係37蚊

3. 咁同上篇文講Issuer Call嘅機制有乜唔同？分別就係，44蚊，你可以唔賣畀佢嘅。事實之前隻嘢8月曾經去到近13厘息。即係幾錢？即係4.8/0.13，36.9咁滯。而家彈返唔少

新世界自己買返隻嘢，同用Issuer call，有乜唔同？

4. 其實有啲銀行，之前在金融海嘯都做過類似嘅嘢。匯控有，大新都好似有。又係啲永續債跌到好平，咁自己買返，咪有收益。

5. 咁不過，都要有錢先得嘅，你都要拎44蚊出嚟嘛。但而家新世界負債咁高，未必短期做。

6. 至於讀者個問題，「唔係低息著數咩？點解11厘息走去贖？」

讀者問：點解11厘息先去贖？唔係低息著數咩。搞清楚，11厘息係乜？

7. 短答案：債券101解過！（所以你話幾咁有用）

8. 長答案：係正好相反，梗係高息先走去贖！

9. 點解？因為好多人就係搞錯咗一樣嘢：新世界隻永續債，所謂「11厘息」，係代表乜先？係咪代表新世界要畀11厘息咩？梗係唔係啦！正如你見咩內房海航啲債，話100厘息，唔通佢地畀100厘息你？

內房債啲100厘息，唔通就派100厘畀你？

10. 明明債券，寫明晒畀幾多息（呢隻係4.8），新世界點會忽然要畀11厘息？根本冇可能

票息就定死咗，點會忽然畀到11厘息？票息同債息係唔同的！

11. 咁嗰11厘息又代表乜？讀者就係搞亂咗個票息（coupon rate，唔會變），同埋債券買賣時嘅「孳息」（yield）。後者，又名「債息」，亦即係你平時聽咩美國10年債息嘅東西　—　你諗真啲，美國國債之前發的嘛，一早講明幾多息，點會忽然間美國政府要畀多啲息你？

12. 新世界隻嘢11厘息，係因為隻債跌到好平。債券101寫過，「債息」11厘，你大約可以理解做「你（夠膽）今日買入去，就收返11厘回報」

13. 咁亦即係，嗰啲內房債，你夠膽買嘅，咪100厘回報—即係一個開。因為可能隻嘢跌到好平 – 問題係，佢到期還到晒畀你先係100厘回報呀下。況且，唔「爆煲」，亦可以債務重組，100蚊還50咁（但新世界唔會係咁情況啩）

14. 咁所以，梗係11厘佢先諗贖啦 —因為代表隻嘢跌到43蚊！

永續債有乜風險？同普通債差不多，但多咗一樣

15. 咁有讀者問，永續債有乜風險。其實同你買普通債差不多，亦即係你借錢畀人嘅風險。第一種風險當然係佢走數。第二個風險係通脹（好多人冇留意！），你諗真啲，通脹高，對債主不利，對債仔有利。我今日問你借100萬，30年後還返100萬畀你，我就好著數，你就好大件事。第三，就係加息。原理一樣，亦正如我地講點解加息債價就會跌。定息債，就即係鎖定息口借錢畀人。咁如果我一早鎖定咗3厘借畀人借10年，點知出面加息加到20厘，我咪「蝕章」咯。你隻債券，亦會大跌價，呢個亦係美國30年債嘅情況。

16. 加息，當然對債仔好，對債主唔好。亦因為咁，加息債價會跌（債主唔著數嘛）！債息會升（代表張借據個價格平咗，你買入去回報就好咗）！係同一樣嘢。

留意，永續債嘅債息，可以遲畀　—　有拖冇欠

17. 仲有，我上篇有寫過，永續債嘅息，可以「遲派」—有拖冇欠咁。你等住啲息開飯嘅，就貴客自理

18. 是真的，可以唔派住，都唔構成違約（普通債一派唔到息就當違約！）。但要一路加上去。同埋一般你未還晒所有呢啲永續債嘅息之前，不能派股息。

其實，國泰優先股咪又係咁玩法咯

19. 其實之前寫國泰（今年嘅事）咪寫過，國泰嘅優先股都係咁玩法，都係最初冇派畀政府，一路積上去。而優先股同永續債都幾，都係啲半股半債嘅hybrid．所以如果上次因為「我唔會買國泰」就冇睇文，又錯失咗啲嘢了

睇埋新世界普通債券，有隻半年到期，9厘息

20. 最後，順手睇多兩樣嘢。第一，新世界仲有其他普通嘅債券。例如呢隻，2024年3月到期。9.3厘喎，咩回事？順手再教你睇

21. 你大約可以理解做，隻嘢而家98.3蚊，之後後還返100蚊畀你。你話，呢度1.7%咋喎。但唔好忘記，半年唔使喎（0.44年，佢有寫）。咁你年度化返就3.9厘。

22. 咁你話，都仲同9.3厘爭好遠？唔好忘記，仲有息收，一年票息5.25。你話，3月到期，唔係每半年派一次，3月同9月派，咁唔係已經派咗最尾嗰期？都剩低唔夠半年就到期。不過留意，債券係有返accrued interest，會按比例計返畀你的。

23. 呢個9.3厘嘅「債息」，代表乜？咪就代表「埋晒單」（息加本，佢唔違約的話），你拎到嘅年度化回報，「債息」係咁意息

9.3厘好貴？6個月美債都5.6厘息啦

24. 最後你會諗，9.3厘咪好貴？兩睇。因為6個月美債都5.6厘啦，佢再高3.7厘風險溢價，唔係好誇

25. 第二，新世界有唔止一隻永續債，上篇文我只係拎咗最簡單嗰隻嚟講。呢有隻，6.15厘票息嘅，仲複雜。

另外有隻永續債，仲複雜。因為未過call date。而且啲息有機會加

26. 複雜在邊？首先佢未過call date，2025年先到（之前嗰隻今年9月已經過咗），所以你見報價有講next call date（1.44年），然後啲債息唔知點計（因為要計及可能call）．

留意，一般call date都比較長，正如你不能今日供樓半年後質返畀銀行

27. 留意呢啲債嘅 call date，會係發行後嘅幾年（3年好常見）。即係佢點都不能發完半年就call返你 – 原理類似你供樓，不能半年就還返晒畀銀行。呢個機制確保收息嗰個至少有幾年息收

28. 另外，你見佢有個Reset date，都係2025年。係乜？即係個票息（而家6.15），之後會再計過。

29. 點計？有埋公式，係到時嘅3年美債債息，再加最初新世界發債over美債嘅spread（即係3.2厘，定咗了），再加多3厘。

另外，啲息之後會加上去　—　其實國泰隻優先股都係咁玩

30. FYI，而家3年美債，4.9厘息。咁如果呢刻就即時reset，就會變咗4.9+3.2+3，11.1厘息，都幾係嘢。當然去到2025年嘅債息係點，你同我都唔知。

31. 但如果一切不變，11厘息就幾甘，留意呢個就真係新世界要畀嘅票息　—　所以有理由相信，佢地會解決咗呢隻嘢。唔一定今日，可以2025年後都仲得，但似乎冇乜理由係咁畀11厘息—　照計問銀行借一定唔使啦。

32. 又，呢種step up嘅東西，係咪似層相似？冇錯，國泰隻優先股，亦係咁做。舊文有寫過。當時嘅設計亦係希望鼓勵國泰快啲贖咗佢，唔好長期爭納稅人錢。

33. 再講一次，呢兩篇文，特別係關於隻永續債點「贖」（Call？定在市場買？）嗰部份，我都唔肯定100%啱。之後我會再問人，但如果你真係諗住買，你最好問真正熟嘅人，唔好當我講嘅嘢實啱。