永續債討論（上） (Patreon)

永續債係乜？有乜風險？

債仔唔使還本，咁我買永續債咪好蝕底？

留意：永續債，唔計入「負債比率」，唔當liabilities

永續債同股本放埋一齊，但公司清盤，永續債分得先過股東。

睇報價：新世界隻永續隻，40幾蚊。但，真係好奇怪咩？「美債都係咁」

11厘息喎！有冇咁著數？咁當然有風險。唔好忘記，只收息咋喎

11厘息，即係9年佢生生性性，我先拎返晒個本，未計通脹。

「即係你估2027年美國核彈炸香港，就唔好買了」

仲有一個問題：可以Call，提早塞返錢畀你，你冇得反對

提早還畀你，聽落幾好？但個權在佢度，你估佢幾時會咁做？

咁但，明明出面高息，又話新世界想贖隻嘢，又咩回事？

留意隻永續債，出面44蚊。咁如果公司自己買返呢？

讀者問：點解11厘息走去贖？唔係低息好咩？

隻嘢點解11厘息？因為43蚊。但點解43蚊？「30年美債都差不多」

1. 去咗日本，但希望都盡量出文，不過硬件上係比較麻煩嘅

2. 上次寫咗新世界業績，但今次呢篇同之前兩篇關係唔係太大，完全唔睇上兩篇都得。都係嗰句，冇興新世界甚至冇興趣港股都值得睇。因為今篇講「永續債」，全世界都有，各類公司都有發

3. 不過真係笠返個頭盔，呢個唔係我極之熟嘅範圍。而我唔在香港搵資料又難啲，又未搵到朋友問，又唔想搞到遲幾日先出。所以，以下寫嘅，唔包冇錯。有錯我遲下會更正，但如果你真係想買永續債，就請你問清楚其他人。

永續債係乜？有乜風險？

4. 都唔止一個讀者問「永續債」，今次就答埋。有人問有乜風險，有人問既然唔會到期咁咪好蝕底。又有人問，做乜新世界隻永續債，十幾厘息先走去贖，唔係越低息越好咩？

5. 「永續債」是甚麼，都不太難解，睇字面都知。正常債券有到期日，到期你就拎返個本。永續債就冇嘅，冇任何義務還本，「一借冇回頭」。咁都得？咁但要年年畀息嘛，你坐得耐咪有機會收息都超過個本。況且，永續債一般都高息。

債仔唔使還本，咁我買永續債咪好蝕底？

6. 又留意啦喎，唔好懶醒，啲嘢要諗到好仔細，分到好仔細。我話「有機會」收息都超過個本咋下，冇話一定。點解？固然有機會隻永續債，一年就爆煲。但另外有啲情況，佢提早還畀你：佢「唔需要」還本，但「可以」還本畀你嘛。債仔可以提早還債，你供樓都可以提早還咁。呢部份陣間解。

留意：永續債，唔計入「負債比率」，唔當liabilities

7. 有一個好有趣嘅嘢你留意：永續債，由於唔使還本，所以好多時唔計入「債務」，你見我上篇講Net Debt，都冇計呢個數。好合理啫，唔使還本嘛。「但要還息喎」　—有時，甚至可以唔還息。下？咁都得？都得嘅。但有拖冇欠咁，遲啲還啫。陣間細講。

8. 另外，你睇財報，會見到「永續債」係放在「權益」嗰度，而唔係同啲「貸款」放埋一齊。實際上，你見個名係叫「永續資本證券」，冇個「債」字，叫「永續債」只係一般叫法。英文啲人多數叫perpetual ，唔使加個bond字。正係因為唔使還本，所以呢部份似股本，多過似債。

永續債同股本放埋一齊，但公司清盤，永續債分得先過股東。

9. 但始終「永續債」要畀息。另外，留意如果公司清盤，「永續債」嘅當係債仔，分錢次序排得高過股東，所以其實係「永續債」有時叫做hybrid，半股半債，混能車咁

10. 然後我地睇下，永續債嘅報價，同埋乜嘢係「息口」。就睇下新世界呢隻永續債。你亦可以大約望下啲terms．（留意佢有幾隻的，但用呢隻做例先）

睇報價：新世界隻永續隻，40幾蚊。但，真係好奇怪咩？「美債都係咁」

11. 首先睇個報價。傳說中嘅跌到40幾蚊，是真的。但，「美債都100蚊跌到得４40幾蚊啦」（真的！），所以唔好咁快下結論。

12. 上面寫明perpetual，冇到期日，但一年畀4.8票息你（留意一般永續債息都高過普通債，因為你拎唔到本嘛！）。低？你睇下賣幾錢先。Bid Ask，明啦，咁你買就梗係Ask，你買嘅係貴嗰個價，43.84。嚟啦喎，即係你拎43.84蚊去買，但每年收4.8息喎！

13. 咁個「債息」係幾多？拿，債券系列101講過（啲人又話悶又話長又話冇用），「債息」就係你當下呢個價錢買嘅「母年回報」。呢隻係永續，冇得拎本，所以冇本計，回報就係你每年收幾多息口。43.84蚊，一年收4.8嘛，咪4.8/43.84，10.9厘息咯！（下面當11厘齊頭）。

11厘息喎！有冇咁著數？咁當然有風險。唔好忘記，只收息咋喎

14. 咁你話11厘有咁著數？見仁見智，存在多數都合合地理，就當然冇穩穩陣陣11厘息。我買隻債3年後到期嘅，佢3年唔出事就得。但我永續嘅，即使而家11厘息，我坐9年先收得返個本喎（仲爭少少），捱過10年先有得「賺」。亦即係，9年內佢爆煲或債務重組，我都有問題。係9年喎！然後第10年我先開始「賺」。咁你見到點解咁高息啦？因為你好可能冇本拎的。

11厘息，即係9年佢生生性性，我先拎返晒個本，未計通脹。

15. 實際計法，你畀43.84蚊嘛，一年先收4.8，咪收9年息（43.2）都未夠拎返個「本」—第10年圥有少少「賺」喎。再講白啲，10年你先收返48蚊，本係43.84蚊，10年後你先賺4蚊（大約10%）　—　留意，未同你計通脹喎。

「即係你估2027年美國核彈炸香港，就唔好買了」

16. 當然了，去到10年打後，你就真係年年收10厘了。但頭9年，佢爆咗煲呀，重組呀，你都一定輸錢（雖然如果玩到第9年先出事你都冇乜輸，係輸通脹）．咁你某程度上，係賭佢9年之內會唔會有問題。「即係你估2026美國拎核彈炸香港嘅就唔好買了」

仲有一個問題：可以Call，提早塞返錢畀你，你冇得反對

17. 而仲有一個問題，公司可以「贖」返隻嘢，術語叫Call，你當可以提早割你禾青，如果我冇理解錯，就係原價100蚊畀返你（睇最低，Issuer call）．即係我還返舊錢畀你，冇拖冇欠，當然以後唔再畀息，你就收返個本。

提早還畀你，聽落幾好？但個權在佢度，你估佢幾時會咁做？

18. 聽落好似幾好？提早收返本添喎。但留意三樣嘢。首先，個權在佢度，你就當然冇權要佢提早還錢（否則仲得了？），咁佢幾時會用呢個權？一定係對佢有著數之時。第二，佢要還本畀你，你冇得唔收，冇得話我想收多幾年息。咁所以第三，你估下佢幾時會提早還畀你？當然係低息嗰時！公司可以平啲借到錢，咪借平錢還貴錢，好似借私人貸款找卡數咁。但你呢？你係拎返本，但冇得再收高息，而出面嘅環境都再冇高息

19. 亦即係，零息嗰時，咪質返畀你咯。問題嚟啦喎，而家絶對唔係咁情況。事實上你睇到，有個「call date」，2023年9月（最低Issuer Call有寫），過咗，佢都冇去做。好合理，出面高息。況且，聽講公司水緊嘛

咁但，明明出面高息，又話新世界想贖隻嘢，又咩回事？

20. 問題係，你睇媒體報導都有講，新世界就似乎有打算「贖」返呢隻嘢。但呢個「打算」真係冇乜約束力，雖然我估佢地係真係有「打算」。

21. 但，上面咪話，而家走去提早還100蚊？唔似喎。呢個就係我唔肯定嘅地方，我都問緊新世界，希望有個講法。

22. 不過我懷疑，佢地唔係用Issuer call呢樣嘢，我估佢地係想就咁在市場度買呢隻嘢。真係唔肯定，所以我真走去問新世界，都識啲人嘅，但當然答唔答我就唔知。

留意隻永續債，出面44蚊。咁如果公司自己買返呢？

23. 因為，隻永續債，出面跌咗好多，跌到44蚊嘛！11厘息嘛，上面講咗。咁我公司44蚊買返隻債，就應該有著數了，因為當年肯定唔只拎44蚊（但唔肯定係咪100蚊，可能有折讓，雖然好似都接近100）。原理好似回購股票咁。

24. 呢度就係讀者問我嘅嘢啦，亦係值得思考嘅地方。讀者嘅問題問：喂，點解11厘息走去贖？唔係低息好咩？

讀者問：點解11厘息走去贖？唔係低息好咩？

25. 你諗真啲？其實，呢個「11厘息」，係乜？係代表新世界要畀11厘買返隻嘢咩？定新世界要畀11厘借錢？

隻嘢點解11厘息？因為43蚊。但點解43蚊？「30年美債都差不多」

26. 首先講，隻嘢點解跌到43蚊？兩個原因。其中之一固然係新世界負債高啦，樓價又跌啦，啲人覺得新世界走數或重組債務嘅機會大咗啦（但唔代表真係會走）。上面都講過，永續債，你有排坐喎。

27. 但更大嘅原因係：美國加息！

28. 我Facebook貼過呢張圖，你睇，美債高位都跌到50蚊咋！咁美國爆煲未？

29. 事實上，狂加息，債券嘅價咪跌。越長嘅債，跌幅越大，duration嘛！長債價格對債息上升更加敏感，所以TLT一定跌得多過SHY（但如果反彈時都會快好多）。永續債，duration亦係好長嘅（可以好難計，因為中途可能割禾青提早贖）

30. 我好肯定，「債券101」個系列寫過！當時又有讀者話悶（其實嚟嚟去去係嗰一兩條友，好似冇再訂，但真係非常煩）

31. 好啦，如果新世界真係市場上44蚊買返隻債，會發生乜事？下篇文再講。下篇就完晒永續債系列

32. 再講一次，呢兩篇文，特別係關於隻永續債點「贖」（Call？定在市場買？）嗰部份，我都唔肯定100%啱。之後我會再問人，但如果你真係諗住買，你最好問真正熟嘅人，唔好當我講嘅嘢實啱。