新世界（三之二）：股價已返到未出業績前嘅水平。利息開支？肯定會大升。但頂得住嘅。況且仲有樓賣 (Patreon)

你睇新世界股價，而家已經返返未出業績之前啦。講到世界末日咁

新地一日跌一成添，新世界都未有

你見啲人，真係只睇一日股價架咋，仲唔睇其他嘢

收入，毛利，稅前利潤都有得升。固然因為低基數，但點都唔係水深火熱

重頭戲：大削派息。但，有得唔減咩？

高負債，環境又麻麻，就只能減派息。唔減，就仲大鑊

唔減派息，「一係供股」，「或者批新股」—　幸好兩樣都冇，亦應該唔會做

其實派唔派息，應該同股價冇關　—　至少諾貝爾獎得主咁講

加緊息喎！係！利息開支會大升？都應該係！頂唔頂得住？OK嘅

然後又點？樓就起完，有盤賣，有新商場。點都返到啲錢

1. 上篇講咗新世界擺明高負債，股價亦反映咗，教埋你點睇負債。但照計，冇乜事嘅。壓力梗有，但怕且死唔到人嘅。

2. 今篇就入直路，睇業績。放心，寫埋呢篇完。雖然仲有篇後記，講啲技術細節。

你睇新世界股價，而家已經返返未出業績之前啦。講到世界末日咁

3. 好啦，新世界星期五收市，中秋出業績。冇錯星期五ADR仲有得升，但始

終成交太少，返到港股復市先見真章，星期二嘅股價先反映。但嗰日係咪跌得太多？又唔算。

4. 首先，星期五新世界股價已經跟大市炒咗上去，星期五好似升5定6%，星期二嘔返晒出嚟，再嘔突些少。不過亦留意，嗰日港股都係大跌嘅。你可以話互為因果，但新世界佔恒指都唔算多，所以係恒指拖低佢，多過佢多低恒指吧

新地一日跌一成添，新世界都未有

5. 另外，你見之前新地出業績，單日跌成10%，新世界冇咁多添。新地當時又跌乜？大約係「預告」會減派息

6. （但，你亦可以話新地跌嗰日新世界都有跌，也是，因為都會驚新世界步新地後塵，結果都有啲似）

7. 更有趣嘅係，你見之後幾日，新世界股價都OK，甚至彈返上嚟。而家基本上返到去出業績之前嘅水平。呢個圖已經解釋到

你見啲人，真係只睇一日股價架咋，仲唔睇其他嘢

8. 咁所以，你話個業績好唔掂？我就唔多同意。問題係：你見啲友，只係睇一日嘅股價！（而即使嗰日都有其他因素）

9. 咁我地，不如睇返份業績，順手都學下嘢。Attach埋畀你。睇19，21同22頁都夠，Profit and loss同埋Balance Sheet。留意埋，新世界6月結，所以呢次係2022年7月至2023年6月嘅全年業績

收入，毛利，稅前利潤都有得升。固然因為低基數，但點都唔係水深火熱

10. 數字不重覆，純利係跌嘅，但不見得差過預期（記住都係睇同預期爭幾多）。收入有得升，毛利有得升，稅前利潤都有得升。固然係因為再之前一年封晒關，低基數。咁但至少，啲嘢都有增長　—　總好過冇，點都唔似係水深火熱。

11. 如果你睇公司自己出嘅稿，會見到有講個「核心盈利」升　—　但講真，呢啲嘢就算吧啦。「核心盈利」呢味嘢，可以代表好多嘢，最好你睇清楚背後係乜。佢今次個「核心盈利」，我就覺得有啲取巧

重頭戲：大削派息。但，有得唔減咩？

12. 當然另一個問題，你睇媒體報導都見到，大削派息。但我覺得根本唔係壞事，亦係好多人預咗（有冇預減咁多就另一回事）—或者話，你覺得公司仲有得揀？「咁定係想派完息供股」？

13. 個原因就非常簡單：都話高負債，人人都知。咁就梗係要減派息。其實同我地討論「甚麼是投資」都有啲相似。你諗下，派息點變出嚟？一般要由盈利度出嚟。固然偶然你可以派突。但，去到負債咁高，唔減派息可以點？

高負債，環境又麻麻，就只能減派息。唔減，就仲大鑊

14. 唔減派息，勉強維持返嘅　—　咁個負債比率咪會仲高。現實冇得如果，但我好懷疑，如果公司唔減派息，股價反應可能仲差。

15. 再講一次，派息不能無啦啦走出嚟，總有代價的。你一路派得高，純利又跟唔上，負債咪越碌越大（所以我亦好想知電訊盈科8號仔點收科，可能最後都係賣畀聯通）

16. 如果唔減派息，咁個負債仲高，誰埋單？唔知噃。當然啲騎呢KOL或網友就係一個「我唔理你總之我點都要年年收到咁多息」，完全係中二病兼野蠻。呢度嘅讀者應該聽過好多次，股票就係隨時會減派息，甚至唔派息的。

唔減派息，「一係供股」，「或者批新股」—　幸好兩樣都冇，亦應該唔會做

17. 事實上，啲人覺得好難聽。但我會話你知：「唔減派息，咪供股囉！」。

18. 呢個某程度上，亦係領展出現嘅情況，都係高負債。不過有一樣嘢唔同，好多人忽略咗：領展，係冇得「唔派息」嘅。因為係REIT（房託），賺幾多就要派九成，所以先會出現呢頭派息轉頭又供股嘅情況　—　唔該，真係畀少少常識。咁作為發展商，至少新世界有個彈性係可以選擇削派息

19. 況且，以前都寫過多次，供股都未係最衰　—　如果佢定向咁批手新股，就仲衰。因為你連揀都有得揀。當然好多膚淺嘅小朋友，以為批股好過供股，因為自己唔使拎錢出嚟　—　呢種諗法弱智之極。事實上，供股你都可以唔供。「但會畀人攤薄嘛」—扯，批新股你咪又係畀人攤薄！但個分別係，供股至少你有得揀跟，係比較公平嘅，David Webb都咁講（一拎佢出嚟啲網友就收聲架啦）

20. 仲有一樣嘢：鄭志剛上次中期業績，2月嗰時，講到明唔會供股批股集資。今次公司都重申咗一次，「可見嘅將來」都唔會供股批股。但，細心啲諗，其實乜嘢叫「可見嘅將來」？講真，你可以話即係冇講過。佢鍾意嘅，下星期一即時供股得唔得？一定得。你咪鬧，但真係絶對合法。梁振英嗰時都話N屆唔選特首啦，吹咩。

21. 不過，又不能完全太過cynical咁諗。法律上，公司真係可以星期一就轉軚。事實上，有時又真係「因為情況轉變超過預期」。咁但，都怕畀人鬧嘅，都要面嘅。特別係鄭志剛，過去搞咁多嘢，都係為自己面子啫。如果唔係極之水深火熱，佢就真係唔會走去一個屈尾十反口嘅。

22. 總之，我不能話你知佢一定唔會供股批股，但照計未來半年都唔會嘅　—半年後？咁你再聽下次業績佢點講

其實派唔派息，應該同股價冇關　—　至少諾貝爾獎得主咁講

23. 最後一點，其實以前都寫過。你真係學院派呢，就應該讀過：派唔派息，同公司股價應該無關。固然啲人一句「象牙塔學者離地」就抹殺所有嘢，十分膚淺。但呢個理論，當然在現實亦有其限制。不過呢啲咁深咁悶嘅就唔呢度解了（呢兩位仁兄，M&M，拎諾貝爾奬添呀，都唔及你啲網友咁醒）（仲有，睇Investopedia，都好過網上九成嘅華文KOL，可見真係外國月光圓啲）

24. 咁當然，嗰日股價係跌。但寫咗啦，之後幾日就返晒嚟。所以你話係咪好大件事？我就唔認同啦。

25. 不過呢個例子又再畀你見到，真係不能只睇住個「股息率」做人　—　有機會減甚至停的嘛！講到尾，都要公司賺到錢先有息派。

加緊息喎！係！利息開支會大升？都應該係！頂唔頂得住？OK嘅

26. 好啦，然後又點？加緊息喎。係。咁所以，個利息開支，肯定會繼續升？都肯定。升幾多？隨你計。不過你見公司有講融資成本4厘，之後應該唔止（一路仲加咗息嘛）。咁你可以自己計下。

27. 但用一個簡單嘅方法睇，睇返業績，19頁。淨財務開支（留意有收入同開支），17億。比起之前勁升（之前一年根本係「淨收入」）。嚟緊？會再升！升幾倍都唔奇。

28. 你求其估嘅，當1370億Net Debt（上篇文寫咗），7%利息（呢個係幾極端嘅假設了，照計唔會嘅），一年96億利息開支（嘩），真係可以升幾倍。

29. 不過睇返，公司營業溢利都110億，來年怕且keep到（舊年6-12月都未開關），所以，食得起嘅。就算食唔起，咪蝕錢咯（我估唔會嘅），但有幾大不了？當然唔係好事，但，未見過公司蝕錢咩？蝕少少，蝕一兩年，死唔到人嘅。你睇國泰同TVB？（但，怕且新世界唔會嘅，我講好極端嘅情況啫）

30. 但，正係因為你見到負債重，咁，就真係要減派息了。

31. 然後又點？之後利息開支會勁升，但怕且死唔到人。雖然個負債比率未必好快跌得返落嚟。

然後又點？樓就起完，有盤賣，有新商場。點都返到啲錢

32. 仲有留意，新世界之前有幾個project（甚麼Skycity，啟德體育園之類），都已經差不多搞掂，或開埋張。你可以見到，啲開支高峰期過晒。來年就多啲租收，亦都會有啲樓賣　—　固然啲租金同樓價水平，同之前估計應該爭啲。但總係有啲錢返嚟。所以，怕且最壞情況過咗嘅（咁但，美國加息加到20厘就另一回事）

33. 咁你話，點解我又唔買？都好多原因。主要係冇錢，同埋已經太多港股，仲要太多個股，都話新錢都係ETF。你去買？我唔會好反對，但亦唔會好贊成。中性

34. 下篇你當係後記，我會再講埋新世界隻「永續債」，同埋佢保險嘅「負債」之類。呢啲比較技術性啲嘅嘢

Patreon舊文目錄，可以睇返晒以前所有文。