Home
Artists
Search
Recent
Random
Posts
DMs
Tags
Random
Importer
Import
FAQ
Account
Register
Favorites
Login
［呢篇重要］JPEX補腦系列，甚麼是投資（八）—股市好似都係接火棒，咁係咪龐氏騙局？到底咩係龐氏騙局？有乜特點？點解JPEX係，而股市唔係？股票係咪要沽咗先有賺？你賺嘅錢嚟自邊度？係因為有人買先值錢，定因為值錢先有人買？ (Patreon)
Downloads
Content
前文提要（睇過可跳）
上篇重點讀者問題：紅酒波鞋係咪投資？點解？
是日讀者問題：股市都係接火棒之嘛，咁係咪龐氏騙局？
我40蚊買Nvidia，升到上400，我賺嘅錢，係咪嚟自接我貨嗰個？唔係！
問題二：一隻股票，我係咪要沽咗先等於賺錢？當然唔係！
你講畢菲特幾多身家，進帳幾多，會唔會堅持要佢沽咗巴郡先計？
係因為有人買，我隻股票先有價值。定因為有價值，先有人買？
首先，乜嘢係龐氏騙局？唔好未搞清楚就亂用。輸錢唔一定係騙局
龐氏騙局有乜定義特色？新錢冚舊錢！咁股市係咪？JPEX幣呢？
但冇騙徒話你知係新錢冚舊錢，所以你睇佢背後嘅錢點嚟，透唔透明
龐氏騙局另一特點：保證回報。股票有冇保證？JPEX呢？
龐氏騙局特點：高息，但冇風險
龐氏騙局特點：到期時，佢會水你roll over．你沽股票會唔會？
龐氏騙局，一定要搵新人。JPEX要宣傳，你買股票呢？
最後，龐氏騙局不能持續，但股市玩咗百幾年
快手出埋呢篇，計返9月都有19篇文，都算係夠數嘅。嚟緊10月會去一個星期日本，但照計唔會太大影響，頂多幾日冇文。
1. 照舊，Attach埋兩篇信報月刊文畀你。
2. 呢個系列夠長，但我覺得寫得好。你真係要了解投資嘅本質，否則你只會輸錢，或者贏得唔夠多。由頭到尾睇晒固然最好，但獨立睇都仲係得。睇完，之後好多問題你自己識答。至少，你都睇下面嘅sum up，當「懶人包」，「一句講完」，乜都好。
前文提要（睇過可跳）
3. 「甚麼是投資」，第一篇講咗，「舉例」點解唔好，要用「定義」同「驗證方法」。第二篇講「點解啲嘢要咁定義」。第三篇講，是否投資，唔係睇係咪贏錢，係咪有技術，係咪長線，係咪合法，係咪低買高賣。第四篇，講我心目中嘅判斷標準。成個「遊戲」，如果可持續，多數錢可以贏錢，就係投資。第五篇解，馬會賭場本身不能創造任何價值，贏嘅錢，嚟自輸錢嘅人，所以唔係投資。第六篇，個遊戲會創價價值，就會係positive sum game
上篇重點讀者問題：紅酒波鞋係咪投資？點解？
4. 上一篇（第七）答咗讀者問題，關於波鞋紅酒之類。我冇話唔係投資，但呢個同「知識」或者你有冇眼光，冇必然關係，買馬買波嘅人一樣都好熟行情，但改變唔到本質。回歸基本，都係睇係咪positive sum game，有冇創造價值（而我覺得紅酒波鞋之類係有，不過你可以諗下點解。我之後會講）
5. 我再講一次，呢個系列非常之好。另一個讀者問嘅問題，仲有趣。佢似乎認為，股市係咪都係Ponzi Scheme（龐氏騙局）？
是日讀者問題：股市都係接火棒之嘛，咁係咪龐氏騙局？
6. 讀者點解咁諗？因為我舉個例，例如你50蚊買咗Nvidia，但40蚊沽咗，我同你接咗。然後隻嘢升到400蚊，我賺咗360蚊。咁我嗰時話，我賺呢360蚊，唔係嚟自你呢個「輸家」，條數根本唔啱。我用呢個例子，去說明股市唔係靠贏家賺輸家錢。事實呢個例子中，你60蚊先沽畀我亦得，你同我都賺錢。
7. 我甚至叫讀者諗下，我嗰360蚊嘅利潤，係點嚟？但呢度就有趣啦，有讀者認為，「咪嚟自400蚊同你買嗰個」 — 咁即係，要有條友在400蚊接我火棒喎，仲唔係龐氏騙局？
8. 諗真啲，其實咪同JPEX幣一樣！你都係低位買然後高位沽畀人之嘛。咁股票有乜分別？咪又係龐氏騙局。
9. 而的確有人覺得股票係龐氏騙局。我當然唔同意，我估多數人都唔同意（但會有啲人同意）。咁你係我，你會點答？你可以諗下。
我40蚊買Nvidia，升到上400，我賺嘅錢，係咪嚟自接我貨嗰個？唔係！
10. 在講落去之前，我會先插播兩個小問題。首先，我買隻股票，40蚊升到400蚊，賺360蚊。讀者個睇法似乎係，咁我沽咗出去，有人用400蚊同我買，我咪賺。所以我嘅錢，係「嚟自」呢個人。但真係？不如思考下？
11. 首先，呢個400蚊買嘅人，呢刻根本冇任何損失。我賺嘅錢，點會係「嚟自」佢？正如最初40沽畀我嗰個人，都可能賺錢，但然後我又賺一大筆，咁佢嘅錢，點會「嚟自」我？
問題二：一隻股票，我係咪要沽咗先等於賺錢？當然唔係！
12. 第二個問題，亦係一個好基本，但好多人唔諗嘅問題：一隻股票，我係咪要「沽咗」先算賺咗？唔通40蚊升到上400蚊，但我冇沽到，就「冇賺」？似乎唔係。因為你諗下，唔通400蚊跌到1蚊，你冇沽，就冇蝕？梗係唔係啦！
13. 呢個亦係好十分討厭啲人同我講「食糊」嘅原因，因為你唔係要沽咗出去，先係賺。固然你會話，40蚊升到400蚊，我唔沽，咁打回原型，咪冇賺到。係。但你冇賺到，唔係「因為」你冇沽，係「因為」隻嘢打回原型嘛！！！亦即係，如果佢升到4000蚊呢？你冇沽係咪冇賺？當然唔係。但你沽咗，就冇賺了。
14. 再講一次，我認為呢個「唔沽就即係冇賺」絶對錯（但好多人深信）。因為你諗下相反，400蚊跌到1蚊，你唔沽係咪冇蝕？唔會咯。又或者掉轉諗，你今日40蚊沽咗隻股票，聽日平手沽走，三年後佢升到400蚊。你有冇蝕錢？係冇的（你只係谷氣）。咁既然變咗現水就係賺蝕唔關你事，咁點會坐住隻嘢唔沽又係冇賺蝕？
15. 所以，你問我，隻嘢只要升咗上去400蚊，我就已經賺咗。根本唔係要沽出去先賺。所以我賺嘅錢，亦唔係嚟自400蚊買嗰個。
你講畢菲特幾多身家，進帳幾多，會唔會堅持要佢沽咗巴郡先計？
16. 正如你講李嘉誠有幾錢，畢菲特有幾錢，佢今年身家多咗幾多。你會唔會要佢沽晒啲長實巴郡先計係佢嘅錢？唔會丫嘛
17. 然後，仲有另一個問題：我隻股價嘅價值，係咪嚟自股票機報價？呢個問題仲tricky。
係因為有人買，我隻股票先有價值。定因為有價值，先有人買？
18. 亦即係等於問，係因為有人用400蚊買，我股Nvidia先有價值。定係因為我股Nvidia 有價值，所以有人用400蚊買？ — 你覺得呢？
19. 答案比你想像中複雜，但我傾向覺得係後者。原因真係遲下先解。但如果你啲嘢，係只靠有人買先有價值嘅，咁似乎未必係投資。我在山頂有間豪宅，冇報價，但難道呢間嘢就冇價值？
首先，乜嘢係龐氏騙局？唔好未搞清楚就亂用。輸錢唔一定係騙局
20. 然後，我地可以返返去龐氏騙局嘅例子。照舊，唔該，睇定義。就算你講唔出定義，都話畀我知，有乜特色，用乜去判斷。搞清楚呢啲嘢好重要，否則你只會自說自話，好似網上啲傻仔咁，左右不分，總之見到唔啱聽嘅人就話人左膠。你唔好見到輸錢，就話係龐氏騙局。
21. 你成日聽人講，龐氏騙局，咁到底乜嘢係龐氏騙局？有乜特色？如果你都答唔出嘅。首先你唔好亂咁用呢隻字，另外你都要多啲思考，點解有啲字你唔知係乜，都要講。
22. 你唔好舉例（話咗唔好用舉例！），同我講邊啲係龐氏騙局。你亦唔使真係要識得講個定義（證明呢個系列開頭兩篇幾咁重要），但我估唔少讀者可以答得出，龐氏騙局嘅「精髓」，有乜特色。
龐氏騙局有乜定義特色？新錢冚舊錢！咁股市係咪？JPEX幣呢？
23. 你會諗起乜？好簡單。五個字，新錢冚舊錢。仲有，必定爆煲。點解？因為不能持續。咁你可以諗下，股票係咪咁？似乎唔係。
24. 你可以睇維基，睇下龐氏騙局有乜特色。睇英文版吧，唔使睇晒，睇有乜特色就夠。於是你會見到，JPEX幣，相當明顯係龐氏編局—唔使爆咗煲我都知，因為爆煲係必然—龐氏騙局爆煲就係必然。
25. 我地首先睇第一個好大嘅重點：龐氏騙局，就係新錢冚舊錢，用新嘅人錢，畀返錢舊嘅人。股票，明顯唔係，因為你買隻股票，佢唔會無啦啦畀錢你（派息除外，下面解），我隻Nvidia升上400蚊，唔需要Nvidia自己去畀任何錢我，或佢搵任何人嘅錢派畀我。見到分別冇？但JPEX，就係拎新人嘅錢，派畀舊人做息。
26. 不過有個小問題，股票嘅例子比較明顯，唔係新錢冚舊錢。但，JPEX，你點知係新錢冚舊錢？都係我講啫，好似事前冇乜好肯定嘅證據？的確係。因為騙徒唔會話你知係騙徒，冇人會話你知，佢係拎新錢冚舊錢。
但冇騙徒話你知係新錢冚舊錢，所以你睇佢背後嘅錢點嚟，透唔透明
27. 所以去到第二樣嘢：背後嗰樣東西。佢點解釋，背後嘅錢點嚟？留意，輸錢爆煲嘅，唔一定係騙局，大公司會執笠，但未必係騙局。分別在邊？就係你知唔知佢背後做乜。一舨股票，你係知嘅，亦都要有核數，固然有人做假數，但至少都有個人核數。但好多龐氏騙局，你根本唔知佢啲錢點走出嚟 — 但總之佢就係話有啲嘢變到錢出嚟。因為你會知道，如果冇嘢變到錢，咁即係新錢冚舊錢，即係騙局啦。
28. 個分別就係，背後嘅透明度。你買Nvidia，你知道佢背後做乜（雖然你未必明），你大約見到佢啲錢點嚟，點解賺錢，點解蝕，點解賺咗好多錢可以派畀你。但你買JPEX幣呢？請問嗰20%息，邊度嚟？佢都解釋唔到，而好多人根本唔會問。你買ASML嘅，人地大大方方話你知佢做乜，每年賣幾多機。但啲騙局，就係神神秘秘，有啲絶世發財好橋，「但唔講得畀你知」。
龐氏騙局另一特點：保證回報。股票有冇保證？JPEX呢？
29. 然後，就係保證回報。股票從來唔會保證回報，你可以年年升15%，你揀股勁或者夠好彩，一兩年10倍都得，但冇人會「保證」。相反，龐氏騙局，差不多一定係保證你收到幾多回報 - JPEX幣正係咁（順帶一提，世紀老千馬多夫，就冇「保證」回報，高招，所以一路都好難咬定佢係龐氏騙局—不過佢啲嘢，十分神秘，唔話你知買咗乜）
龐氏騙局特點：高息，但冇風險
30. 之後，就係高息。股票唔會保證有高回報，可以保證嘅，只有債券（唔違約的話），同埋定期存款，但呢啲東西嘅回報唔會高。你見一啲有得保證，但又回報遠高於美債嘅嘢，九成都係騙局。JPEX就係保證呢啲回報。股票？冇喎。就算你見股息率高嘅，佢都唔會保證下年一定派到，就算保證派到，亦唔包股價唔會大跌。因為回報，根本就嚟自風險。你間公司佢自己要有高回報，當然要冒險。
龐氏騙局特點：到期時，佢會水你roll over．你沽股票會唔會？
31. 仲有一點：龐氏騙局嘅特點，就係未必咁易拎到錢。一般嚟講，開頭拎錢係冇問題嘅，否則你唔會放大錢落去。但留意一點：往往之後，你舊錢到期，佢就會叫你roll over，甚至用更高嘅息利誘你。目的當然係減低佢嘅資金壓力，太多人拎錢佢好快爆煲。你見JPEX走去調高啲手續費，走去叫人買新嘢，完全就係咁。相反，你要沽隻Nvidia嘅，邊個會阻你？按個制就得，幾千萬港紙都一下搞掂（順帶一提，所以我唔明點解有人問啲錢放晒股票的話，急用錢點算。沽股票要幾耐呢？）
龐氏騙局，一定要搵新人。JPEX要宣傳，你買股票呢？
32. 仲有一樣嘢，龐氏騙局，一定涉及要搵新人，因為要有新人嘅錢，先派到錢畀舊人。所以你見一定不停宣傳，不停在Social media搵新嘅老襯。相反，股票嘅嘢，Nvidia使唔使周圍要人買佢嘅股票？固然公司嘅IR Investor relation 要做呢啲嘢，但本質真係唔同。況且，好多人忘記咗—你買Nvidia嘅錢，係唔會走咗落公司度，唔會公司拎去派畀其他人。但JPEX就會，你啲錢咪畀佢挪用咗
最後，龐氏騙局不能持續，但股市玩咗百幾年
33. 最後，亦正係因為龐氏騙局不能持續，所以必定係會爆煲的。因為你去到某個位就搵唔夠新人，你就要走佬。但，港股都玩咗超過半世紀（睇你由幾時計），美股玩咗百幾年 — 長玩長有，點會係龐氏騙局？