Home
Artists
Search
Recent
Random
Posts
DMs
Tags
Random
Importer
Import
FAQ
Account
Register
Favorites
Login
JPEX 補腦系列：甚麼是投資（七）— 咁股市係咪龐氏騙局？都係同JPEX幣咁等人接火捧之嘛。仲有，利用自己知識去搵錢，又係咪投資？ (Patreon)
Downloads
Content
前文提要（睇過可skip）
讀者問，利用自己嘅知識在某啲領域搵錢，係咪投資？你話呢？
另一個問題：股市係咪都係接火棒，龐氏騙局，靠有人接你嘅貨？
我對「投資」嘅定義，唔係用「識唔識」去分（又，點解我要咁定義？）
買JPEX幣啲友都識講DAO，買波嘅人都識往績，但呢啲一樣唔係投資
而亦都唔係因為啲人買波買JPEX幣輸錢，「所以」唔係投資！
紅酒波鞋名畫係咪投資？一般係。但同你有冇「知識」無關
況且，其實乜嘢叫做「識」？
利用知識去獲利，當然係好東西，但呢個同投資冇乜直接關係。
正如你有內幕，你去炒iPhone，有何不可？但唔係投資
我亦冇話唔係投資你就不能做。正如寵物傳心唔係科學，但大把人做
咁，點解仲要走去分乜嘢係投資？因為涉及你係咪可以持續買大
下篇預告：股市係咪龐氏騙局接火棒？
1. 照舊，Attach埋兩篇信報月刊文畀你。但我發現啲人真係唔會睇，然後又會不停問啲已經答咗嘅問題。呼。
前文提要（睇過可skip）
2. 繼續呢個系列，「甚麼是投資」，第一篇講咗，「舉例」點解唔好，要用「定義」同「驗證方法」。第二篇講埋，「點解啲嘢要咁定義」。第三篇入直路，話你知，係咪投資，唔係睇係咪贏錢，係咪有技術，係咪長線，係咪合法，係咪低買高賣。第四篇，就講到我心目中嘅一個判斷標準。你睇成個「遊戲」，係咪多數錢（唔一定要多數人），可以長期，可持續地贏錢。第五篇我解咗，馬會賭場本身不能創造任何價值，所以贏錢嘅人，啲錢嚟自輸錢嘅人，亦因為咁，你去賭場一定唔係投資（即使你可能贏錢）。
3. 第六篇真係去到重點，要係投資，即係個遊戲要持續地，整體啲人係贏錢。所以即時去到另一個結論：你個遊戲，要係positive sum game．你先可以創造到價值出嚟。否則錢從何來？如果你個遊戲本身冇嘢變到出嚟，咁就只能係某啲人拎其他人嘅錢，就必然會爆煲。
4. 去到呢度，我嘅結論好明顯。我話畀你知，股票係投資。而你去買JPEX啲垃圾幣唔係。不過其他東西呢？買名畫呢？黃金呢？比特幣呢？我係未講嘅（雖然，我attach嘅文已經講咗，明顯係冇人睇嘅）
5. 不過既然成個系列都去到第七篇，中途有啲讀者有問題問 —原則上我多數唔想咁快答，因為好多時係「之後嘅文會講到」。加上我一向鼓勵讀者多聽少講，多思考。不過呢，如果唔答，陣間讀者又鬧我唔覆。所以，呢篇中途答少少。亦都利用呢兩個問題，當係呢個系列嘅「中期檢討」
讀者問，利用自己嘅知識在某啲領域搵錢，係咪投資？你話呢？
6. 第一個問題係，有讀者認為，唔係喎，我利用自己知識去搵投資機會。例如我識棒球卡識紅酒，買嚟收藏，咁難道唔係投資？等於我知道AI會大熱，一早買Nvidia，難度唔係投資？
7. 第二個讀者嘅問題仲有趣，我之前嘅文講過一個例子，你50蚊買Nvidia，40蚊沽咗，我接咗你嘅貨，之後隻嘢升到上400蚊。咁我嘅演繹，就係我贏咗360蚊—咁明顯，你只係輸咗10蚊，但我贏咗350蚊，明顯我唔係「贏咗你嘅錢」
另一個問題：股市係咪都係接火棒，龐氏騙局，靠有人接你嘅貨？
8. 不過讀者就會質疑，喂，咁我嗰350蚊嘅獲利，都係嚟自因為有條友400蚊買啫。咁實情，股市係咪都係一個龐氏騙局Ponzi Scheme？
9. 呢兩個問題，你會點答？
10. 第一個問題，比較易答。呢篇答下，順手解其他嘢
我對「投資」嘅定義，唔係用「識唔識」去分（又，點解我要咁定義？）
11. 首先係最基本嘅一樣嘢。有讀者唔同意我嘅定義，埃汾話呢啲係投資，嗰啲唔係。但佢會「覺得」唔係咁 — 於是返返到去我地頭兩篇文討論過嘅嘢（所以你話幾咁重要！！！！）。定義，當然可以係唔同人有唔同定義。但點解我要咁定義？當然係呢個定義會比較「好」。
12. 咁點解我話我嘅定義比較好？我當然會試下說服力。好簡單，讀者話「利用自己知識在個領域賺到錢」（佢指嘅係買賣，唔係打工啦）。但我在舊文，好明確咁話，係咪「投資」，同你有冇「技術水平」，冇乜關係。正如讀者都會引我嘅名句「我使唔使自己識整光刻機先可以買Nvidia？」
13. 點解我話用「識唔識」「有冇技術貪量」去區別係咪投資，唔係一個好驗證？好簡單，因為你呢個驗證，可能會將一啲大家都覺得唔係投資嘅嘢，當咗係投資。正如呢個驗證，會將一啲大家都覺得係投資嘅嘢，當咗唔係投資。
買JPEX幣啲友都識講DAO，買波嘅人都識往績，但呢啲一樣唔係投資
14. 例子？好簡單，我講過啦。你見買JPEX幣嗰啲，乜都唔識咩？肯定唔係喎。佢地一定識同你講去中心化，區塊鏈，識同你講DAO乜鬼。而如果你個個月買QQQ，技術成份係零，你唔使識任何嘢，你甚至唔使識QQQ代表乜，乜嘢叫納指100 — 但，難道你話買QQQ就唔係投資，買JPEX啲垃圾幣係投資？唔會丫嘛
而亦都唔係因為啲人買波買JPEX幣輸錢，「所以」唔係投資！
15. 仲有，有啲人「而家」覺得買QQQ係投資，但買JPEX幣唔係，只係因為見到QQQ贏錢，JPEX爆煲 — 但我在頭幾篇文，亦都大字寫明：係咪投資，唔係睇係咪贏到錢！你賭波夠可以羸錢，我呢排幾次都贏添。然後唔少人買美股都會輸錢 — 但唔通賭波係投資？美股唔係？ 當然唔會。所以，你見到不能用「輸唔輸錢」去定莪。你亦見到，「定義」係幾咁重要，否則根本浪費時間。科學家話蝙蝠唔係鳥類，我覺得係，吹咩。
16. 不過，仲有一個好重要嘅問題：名畫紅酒波鞋收藏品，一般嚟講，當！然！係！投！資！
紅酒波鞋名畫係咪投資？一般係。但同你有冇「知識」無關
17. 我信報篇文，好明確咁寫咗。但again，係冇人會睇的。
18. 睇到呢度，可能有啲人都會亂。但就係要你深入思考。
19. 我從來冇話紅酒波鞋唔係投資喎，我有咁寫過？冇。所以你點跳到呢個結論？明顯係有啲嘢你太快假設咗。
20. 「咁埃汾做乜又唔同意個讀者？」—我絶對同意佢嘅結論，紅酒波鞋，一般係投資。我只係唔同意佢嘅「區分方法」。
21. 即係話，我認為紅酒波鞋，係投資。但唔係因為「要知識」！而係因為「可以創做價值」—但至於點解可以創造價值？就係我原本之後要講嘅嘢（所以，最好真係睇晒咁多篇先）
22. 即係好似個讀者同我講，3同5都係質數，咁即係7都係質數啦？因為加2上去就係質數。佢個結論係啱喎，7係質數，但唔係因為佢講嘅原因。
況且，其實乜嘢叫做「識」？
23. 呢度仲會岔開去到一個好有趣嘅問題，我Facebook Page成日都講：就係，乜嘢叫做「識」？乜嘢叫做「知識」？同投資嘅關係又係乜？
24. 聽落你覺得好簡單，喂，我知晒邊個酒莊在邊，邊年嘅出產靚，邊隻手袋出產得少，邊隻金幣第時有意思。
25. 呢啲似乎係「知識」。但有幾個問題
26. 首先，你有冇知識，同呢個係咪投資，係兩回事。你見去賭馬賭波嘅阿叔，個個睇晨操睇往績，之前十場咩比數佢都知，陣容佢識背晒 — 但難道佢去買馬買波就可以長期贏錢？你識，人地唔識？況且，你識又點？馬會開盤嗰個根本唔使識。（呢種問題，可以睇我星期一在明報出嘅文，attach埋畀你）
27. 第二，咩叫識？你識背晒納指500間公司又點？呢個係咪知識？JPEX啲友識講DAO，又如何？李嘉誠使唔使識自己落石屎？唔通落石屎嗰個又去講，李嘉誠乜都唔識，做乜佢搵咁多錢？
利用知識去獲利，當然係好東西，但呢個同投資冇乜直接關係。
28. 仲有第三，「利用知識去獲利」，當然係好東西！呢個亦係我做緊嘅嘢！唔止而家，我打工咪係，你打工都好可能係。不過，呢啲唔係叫做投資。
29. 正如我舉一個例：你知道今晚有場波，打假波。咁你瞓身去買，贏埋。呢度似乎有一定技術含量，至少你有一啲特別嘅知識，而你用咗佢去搵錢，仲成功埋
30. 但，即使係咁，呢個都唔係「投資」。你本人有內幕，仲要係堅嘅，你買埋，拎埋錢，恭喜。但改變唔到賭波唔係投資嘅本質，係咪？
31. 之不過，去到最後一樣嘢。我從來亦冇話唔係投資，你就不能做。我有冇咁講過？好似冇。但似乎有啲人亦係咁假設咗。埃汾話呢個係投資，我就應該瞓身買。佢話呢啲唔係投資，我就一定唔掂得 — 我好似冇咁講過
32. 記住，諗嘢要深入啲
正如你有內幕，你去炒iPhone，有何不可？但唔係投資
33. 我舉一個例：睇相係咪科學？當然唔係（你唔好話我知係）。你去拜神係咪科學？當然唔係。寵動傳心師係咪科學？當然唔係。
我亦冇話唔係投資你就不能做。正如寵物傳心唔係科學，但大把人做
34. 但你去做嘅，我唔會話你笑你，因為從冇話過唔科學嘅嘢就唔做得。
35. 只不過，「嗰啲真係唔係科學」。
36. 正如我明報篇文都有寫，我都炒過iPhone，你都可以去炒演唱會飛。呢啲都搵到錢，甚至有一定技術含量。不過，呢啲唔係投資咁解之嘛。
37. 「點解唔係？」。咁你又要睇返我講嘅定義了。
38. 記住，係咪投資，同你「識唔識」冇關。大把買ELN嘅傻仔（睇我明報篇文）都覺得自己「識」，個個賭仔都覺得自己係專家，但改變唔到遊戲本質。你「利用」知識，當然係可以賺到錢，咁但，也不代表嗰啲係投資。你踢波好叻，搵好多錢，但你落場踼唔係叫投資，你拎賺到嘅錢去買股票先係。
39. 會唔會仲有人想問，「咁既然唔係投資都可以賺到錢」（是的）「投資又唔一定贏到錢」（是的）。咁點解仲要分？
咁，點解仲要走去分乜嘢係投資？因為涉及你係咪可以持續買大
40. 簡單答你：因為，如果係投資，長期大多數錢係贏錢嘅，你就可以放心，大大手咁買落去。但如果唔係嘅，你瞓身，就好危險。用返我內幕賭波嘅例子，今次你贏錢，下次呢？總有一次你會畀人老點。正如炒iPhone，你明知唔係贏硬，後來亦冇得炒。
41. 我地就係要搵啲，可持續，長期大多數錢都係贏錢，創造到價值嘅嘢。
42. 答一條都講咗一篇，下篇再答埋Nvidia嘅例子。你40買Nvidia，50蚊沽畀我，後來隻嘢去到400蚊。我賺嗰350蚊，邊度嚟的？明顯唔係嚟自你。咁邊度嚟？好似係「由」400蚊買嗰個人度嚟
43. 咁，其實咪好似即係接火棒？咁同Ponzi Scheme龐氏騙局有乜分別？起初我聽呢個問題，有啲啤一聲。但諗真啲，其實問得幾好。亦都好多人真係覺得股市係龐市騙局，大家不妨諗下係咪？
下篇預告：股市係咪龐氏騙局接火棒？
44. 我會簡單畀結論你，股市當然唔係龐氏騙局。JPEX幣就當然係。但比特幣呢？黃金呢？有啲深，但似乎唔完全係。呢啲之後會講
45. 再講一次：多思考，唔好太快跳去結論。