Home
Artists
Search
Recent
Random
Posts
DMs
Tags
Random
Importer
Import
FAQ
Account
Register
Favorites
Login
JPEX補腦系列：甚麼是投資（六） — 你要創造價值，個遊戲就要係positive sum game，先可以長期啲友贏錢離場。否則贏家拎輸家錢嘅，就不可能持續。點解龐氏騙局畀20厘息一年實爆煲，但長江基建可以年年加派息？ (Patreon)
Downloads
Content
前文提要（睇過可skip）
你贏嘅錢，嚟自邊度？如果要嚟自輸家，多數唔係「投資」
投資係positive sum game，其他有啲嘢係negative sum
賭錢，你贏嘅錢嚟自其他人。JPEX，龐氏騙局。股市，創造財富
啲人覺得股市同期指都係「賭個市升跌」。但前者係投資，後者唔係
你個系統，可唔可以皆大歡喜？定一定有人要仆街？
買股票投資可以上游，仲不損害任何人，幾咁之高貴
非道德問題，係可持續性—非投資嘅嘢，今次你贏人錢，下次就你輸錢。
你個系統，不能創造價值，就唔會人人都長期贏錢。
點解龐氏騙局，必然爆煲？因為只能靠新錢，而好快會乾
點解龐氏騙局年年畀20厘息好快死？但長江基建年年加派息都未爆？
1. 照舊，Attach埋兩篇信報月刊文畀你。
前文提要（睇過可skip）
2. 繼續呢個系列，「甚麼是投資」，第一篇講咗，「舉例」點解唔好，要用「定義」同「驗證方法」。第二篇大約講埋，「點解啲嘢要咁定義」。第三篇入直路，話你知，係咪投資，唔係睇係咪贏錢，係咪有技術，係咪長線，係咪合法，係咪低買高賣。第四篇，就講到我心目中嘅一個判斷標準。你睇成個「遊戲」，係咪多數錢（唔一定要多數人），可以長期，可持續地贏錢。第五篇我解咗，馬會賭場本身不能創造任何價值，所以贏錢嘅人，啲錢嚟自輸錢嘅人。
你贏嘅錢，嚟自邊度？如果要嚟自輸家，多數唔係「投資」
3. 所以到直路，一句：你個遊戲，贏家啲錢邊度嚟？如果係嚟自輸家嘅，咁差不多必定唔係投資，因為冇可能長期多數錢都贏錢。但如果贏家嘅錢唔係嚟自輸家，可以長期地啲錢夾埋都係贏錢嘅，就似係投資。
4. 一句，即係所謂「正和遊戲」「零和遊戲」「負和遊戲」，positive sum game，zero sum game，negative sum game嘅分別
投資係positive sum game，其他有啲嘢係negative sum
5. 賭場馬會，必定係negative sum game．所謂negative sum game，就係夾埋晒，所有參加者，必然係輸錢，否則馬會何來有錢賭場何錢賺錢？你話，「咁我計埋馬會同賭場嗰份咪zero gum囉」 - 你可以咁拗，但事實你係賭仔嘛！你唔係去開賭場嘛！（所以，如果你買賭場股，就似乎可能係投資啦！）
賭錢，你贏嘅錢嚟自其他人。JPEX，龐氏騙局。股市，創造財富
6. 賭錢，應該實係negative sum game，所以必然過唔到呢個測試，所以唔係投資。搞掂。同樣地，JPEX之類，錢從何來？點畀到20厘息你？隻嘢無啦啦點解可以有20厘息？好明顯地，係類似龐氏騙局（雖然好多人分唔到，甚至有讀者以為股市都係要「靠新人入場支持」），新錢冚舊錢，又或者未爆煲前上市cap一筆錢。但總之，佢個遊戲，係唔會 positive sum
7. 所以我亦可以答到你，點解同樣地，好似都係「賭個市升定跌」，但買股票係投資，炒期指買期權買牛熊證唔係？
啲人覺得股市同期指都係「賭個市升跌」。但前者係投資，後者唔係
8. 原因亦好簡單，因為期指期權牛熊證，都係negative sum game．期指最明顯，一個膁錢就另一個輸錢。但期權牛熊證都一樣，否則發行商嘅錢點嚟？我冇話你不能買，我知大把人會照買，但呢啲真係唔係投資。
9. 當然，有啲讀者其實都唔係好知，咁我點判斷乜嘢係positive sum game？有時你唔係好了解成個系統點運作，都真係未必分到（所以，要睇多啲嘢！），就會之後再講。
你個系統，可唔可以皆大歡喜？定一定有人要仆街？
10. 我呢個亦可以畀一個好簡單嘅方法你去test：其實同Nvidia嘅例子一樣，你可以諗下，你個系統，可唔可能皆大歡喜？可唔可人人贏錢？可以嘅，就係positive sum game，唔得嘅，就唔係。
11. 又或者你諗下，你贏嘅錢，嚟自邊度？係咪at cost of others？係咪嚟自他輸咗嘅人？再諗下，「莊家」，「中介」嘅錢又嚟自邊度？係咪嚟自一啲輸錢嘅人？
12. 在賭場嘅例子，好明顯啦，贏錢嘅人啲錢嚟自輸錢嘅人，馬會賭場自己賺嘅錢都係嚟自輸錢嘅人。期指亦都好明顯，你贏錢就有人輸。期權牛熊證可能冇咁明顯，但原理一樣：輪后啲錢，邊度嚟？當然係某啲人身上抽返嚟的。
13. 但股票呢？就唔係了。股票係可以人人贏錢的。我10年前買Nvidia，你10十年前買，大戶都10年前買，大家坐到今日，都賺到笑。問題係：咁我地啲錢嚟自乜人？不嚟自任何人，係冇人輸錢的。你可以話冇買嘅人「傻仔」，長期唔投資嘅人跑輸通脹（事實係咁），但佢地真係冇「輸錢」畀你，況且，佢地「輸嘅錢」，肯定不及你「賺嘅錢」
買股票投資可以上游，仲不損害任何人，幾咁之高貴
14. 所以，買股票除咗可以幫你上游，亦都係一種極之高貴嘅行為 — 贏錢，而唔傷害任何人。你又賺錢，我又賺錢，冇人受傷害，幾咁美好？反而牛熊證期指之類，必定係有人輸錢
15. 而我唔係咩道德高地，我係想指出：如果不停地係靠某啲人輸錢嘅系統，你係不可能長期持續咁搵到錢 — 同埃汾買波一樣，呢幾次我贏到錢，贏咗其他人嘅錢。但大家都知，再玩落去，一定係他朝君體也相同，再賭落去，下次就到我輸錢。
非道德問題，係可持續性—非投資嘅嘢，今次你贏人錢，下次就你輸錢。
16. 呢啲系統，先天就係冇得玩。
17. 然後我會再講，到底有乜系統，先可以係positive sum game？
18. 答案嚟自一個我呢幾篇文都有講嘅概念：創造價值，value creation
19. 點解Nvidia嘅例子，你30蚊買40蚊沽畀我，你贏錢。我40蚊買坐到400蚊，我又贏錢。點解有咁美好嘅嘢？就係因為佢升咗上400蚊嘛。你諗下賭場，期指，有冇咁嘅事？係冇的。
你個系統，不能創造價值，就唔會人人都長期贏錢。
20. 然後你諗下，如果你成個系統，不能「創造價值」—咁你個系統，係唔會長期地啲錢夾埋晒都係贏錢的。我收咗100蚊輸家嘅錢，我就只能賠返咁多錢出去 — 甚至乎更少，因為我仲要抽水。所以我只係收100蚊嘅輸家錢，賠90蚊出去。「參加者」夾埋，輸家輸100，贏家贏90，夾埋係負10 - negative sum game
21. 但如果唔係咁嘅，我收咗輸家嘅100蚊，但我個系統識變50蚊出嚟，咁就好啦。我收輸家100蚊，我抽水30蚊，我派贏家派夠120蚊，都仲得，因為仲有50蚊創造咗出嚟。輸家輸100，贏家贏120，加埋正 20 - positive sum game，見到冇？
22. 再極端啲，我個系統可以識變到200蚊出嚟，咁根本唔使有輸家！我派150蚊畀贏家，自己仲拎起50。對參與者嚟講，輸家係0，贏家贏150，加埋正150 – 很好
23. 你嘅問題，咁邊度變嗰個價值出嚟？就係骰票呀小朋友。下篇我會解。
24. 但記住，小學數學，你個遊戲可以係positive sum game，咁一定係有啲嘢在個系統入面變咗出嚟的，否則點可能拉勻晒，啲參加者夾埋晒係贏錢離場？
25. 重覆一次，我講「夾埋晒」— 你9個參加者每人輸10蚊，但剩返嗰個贏咗1000蚊，呢個依然係positive sum game，依然可以係投資。相反，9個人贏錢，每人贏10蚊，但輸嗰個輸1000蚊，呢個依然係negative sum game，唔係投資。
26. 你話，咁我冇咁黑仔丫，未必係到我。但咪即係埃汾買波咁，呢幾次我贏錢啫，但他朝君體也相同，你再玩，殘酷嘅數字概率，好快就選中你。
27. 好煩，但再講一次。Positive sum game先係投資，而你要係positive sum game，差不多必定要有「價值創造」
點解龐氏騙局，必然爆煲？因為只能靠新錢，而好快會乾
28. 比一個具體例子你：點解啲「龐氏騙局」，年年畀20厘息，必定會爆煲？因為大家都知，佢地「本身」唔會創造價值。我只係拎啲新人嘅錢，還畀啲舊人。但好快你就會搵唔到咁多新人，就會畀唔到錢。息越高就死得越快。
29. 但點解，好似長江基建咁，每年可以加到派息？點解唔會爆煲？因為好簡單，人地啲生意就係越做越大嘛！（我知股價輸錢，但我地睇返派息）。
30. 你可以諗下，長江基建2000年一年派緊0.6息，而家差不多一股2.5，四倍。然後2000年時股市13蚊咁上下 —如果你當年買，而家真係一年20厘息—等於啲友幾廿年前買個太古城咁。呢啲就20厘息，但唔係無風險，亦要時間。
31. 另一個角度睇，你間公司長期輸錢嘅，你係好難不停加人工不停開公數食米芝蓮的，因為佢會爆煲。相反，公司賺到錢嘅，你咪多呢啲嘢（當然，計整體，唔係講人數，輸錢嘅公司一樣可以肥上瘦下，但不能持續的，你公司不停輸錢，個高層真係不能年年出幾千萬人工）
點解龐氏騙局年年畀20厘息好快死？但長江基建年年加派息都未爆？
32. 之後去到直路，我地就睇下，各種遊戲，係咪positive sum game，係咪投資，有冇創造價值。仲有，成日講創造價值，咁到底即係乜？乜嘢可以創造價值？點解有啲遊戲可以創造價值（例如股市），點解有啲唔得？