Home
Artists
Search
Recent
Random
Posts
DMs
Tags
Random
Importer
Import
FAQ
Account
Register
Favorites
Login
JPEX補腦系列：甚麼是投資（五）—馬會賭場，贏家嘅錢一定嚟自輸家，所以唔係投資。但股票唔係呢回事。呢個就係分別。順手諗下，保險公司呢？你供嘅錢，好似唔夠賠畀你的。咁錢由邊度變出嚟？ (Patreon)
Downloads
Content
照舊，Attach埋兩篇信報月刊文畀你
前文提要（睇過可skip）
記住，係一定睇「成個遊戲」，「成個系統」
賭場，絶對冇可能做到「多數錢長期都贏錢走」，但點解？
入球大我又開1.8，入球細我又開1.8，每邊100萬錢買，點會輸錢？
「咁如果啲人全部買晒入球大，又真係開入球大呢？」
既然馬會同賭場長期必勝，但又有啲賭仔贏錢 — 咁錢從何來？唔啱數
梁思浩中六合彩嘅錢，就係嚟自其他唔中嘅人。但股票唔係咁回事
你30蚊買股票40沽，贏。我40蚊接你，坐到100蚊，又贏。錢何來？
啲錢，come from nowhere，係創造出嚟的，唔係有其他輸家
保險公司呢？我明明供嘅錢都唔夠佢賠畀我，咁係咪其他人津貼我？
原來保險公司拎我啲錢去買QQQ賠返畀我 — 咁我自己買咪得咯？
前文提要（睇過可skip）
1. 繼續呢個系列，「甚麼是投資」，第一篇講咗，「舉例」點解唔好，要用「定義」同「驗證方法」。第二篇大約講埋，「點解啲嘢要咁定義」。第三篇入直路，話你知，係咪投資，唔係睇係咪贏錢，係咪有技術，係咪長線，係咪合法，係咪低買高賣。第四篇，就講到我心目中嘅一個判斷標準。你睇成個「遊戲」，係咪多數錢（唔一定要多數人），可以長期，可持續地贏錢。
2. 仲有，我上一篇同你解咗，股市的確係多數人輸錢，少數人贏錢。亦都係類似「80-20」，20%嘅人贏咗市場上80%嘅錢，甚至更多。但你不能話係「少數人贏咗多數人嘅錢」，更加不能話係「人地贏嘅錢嚟自你輸嘅錢」。俗啲講句，你輸錢係你自己廢，你輸嗰少少錢，根本唔夠大戶食餐飯，唔好咁睇得起自己。人地要靠「贏」你嘅錢先掂，就死得
3. 換個角度講，你要某啲人贏錢，好易，贏大錢都得，梁思浩中咗幾次六合彩，我呢排賭幾次波都贏錢，JPEX啲友開頭都贏錢，仲拎過錢出嚟 — 但呢啲個人，一時嘅經歷，改變唔到「成個遊戲」，「成個系統」嘅本質。
記住，係一定睇「成個遊戲」，「成個系統」
4. 你見我由上篇開始，不停強調「成個遊戲」，「成個系統」呢啲字眼，因為係睇呢樣嘢。你買股票輸錢，不代表股票就唔係投資 — 可惜你見好多人連呢樣嘢都唔識分。「我贏到錢，就係投資」。更廢嘅就係，「人地贏到錢，就係投資」。再廢嘅就係「見到人地好似贏到錢」（其實係做媒），就覺得係投資。
5. 記住，係要成個系統，長期嘅大多數錢，可以贏到錢。呢個就係我覺得幾好嘅定義
6. 因為，只要有咗呢句嘢，我地就可以去到下一步。你可以諗下，有乜嘢「系統」，先可以做到呢啲嘢？
賭場，絶對冇可能做到「多數錢長期都贏錢走」，但點解？
7. 又係舉反例嘅時間。你去賭場，係絶對冇可能有呢回事。個別賭仔可以贏到錢，你好好彩又快收手嘅，你可以發達。但「成個系統」，所有人夾埋，肯定係輸錢。證據？否則澳門冇咁多稅收，賭博公司賺唔到咁多錢。
8. 馬會嘅情況一樣，個別賭仔可能贏錢，你可能中六合彩脫貧，但「加埋晒」，所有人，必定長期夾埋係輸錢。否則馬會點有錢做善事出糧交博彩稅？
9. 好啦，你諗下以上呢兩種「系統」。首先，點解你一定冇可能長期贏錢？我相信你知道，因為賠率嘛。好簡單嚟講，買場波，總入球大細，實開一邊。大嘅佢賠1.8畀你，細嘅又賠1.8。咁我當兩邊都有100萬錢買落去，咁到時根本開乜都好，佢都贏硬你。當然你會拗，
入球大我又開1.8，入球細我又開1.8，每邊100萬錢買，點會輸錢？
10. 喂，咁如果嗰場300萬買晒大，10萬買細，然後開咗大，咁馬會咪輸錢咯。你可以諗下答案。
11. 首先，「係唔會咁側埋一邊嘅」，因為網友覺得自己最醒，買大嘅人又覺得自己實中，買細嘅都係。另外，實際上，不停有人買晒大，然後個賠率會越拉越低（越嚟越「熱」），可能落到1.5，另一邊「細」嘅賠率，會越嚟越好，可能去到2.5，自然「吸引」啲以為自己最醒，覺得「好分」嘅人去買。
「咁如果啲人全部買晒入球大，又真係開入球大呢？」
12. 三來，馬會在「一場波」，當然可以輸錢，正如某一場波，的確可能「賭仔煲爆莊」。但，夾埋晒呢？就冇可能（呢個亦係點解我一路強調係長期，持續）。
13. 四來，實務上，馬會可以將啲賭注「射」出街。因為馬會係香港獨市生意，你外圍就犯法，所以賠率一定差。佢將呢啲投資，「賣」出街咪得。
14. 所以，馬會又好，賭場又好，長期必然贏錢
既然馬會同賭場長期必勝，但又有啲賭仔贏錢 — 咁錢從何來？唔啱數
15. 好啦，嚟啦喎，咁既然馬會同賭場，長期必贏。咁但，你又真係見到有啲人贏錢嘛，梁思浩又好，埃汾呢排又好。咁智力問題嚟啦喎。梁思浩贏嘅錢，點嚟？我贏嘅錢？點嚟？
16. 你以為係贏馬會贏賭場？當然唔會，都話馬會賭場長期必勝
17. 咁所以，你估到了，梁思浩贏嘅錢，就係「嚟自」其他買六合彩嘅人！！！—實情以我所知冇分開一個個pool，你話梁思浩贏錢嘅，嚟自買波嘅人，亦得。
18. 亦即係話，其他買六合彩嘅人，輸咗好多錢。然後呢啲錢有啲去咗梁思浩或者中頭獎嘅人度，亦有啲去咗馬會度
梁思浩中六合彩嘅錢，就係嚟自其他唔中嘅人。但股票唔係咁回事
19. 如果在買馬嘅情況，更加明顯（不過我唔賭馬，所以唔肯定，有錯請指正）：買馬嘅，根本就係啲人投注晒，成個彩池。然後有幾多錢，馬會抽起咗一截，之後先派返畀買中嘅人。更加明顯地，贏馬嘅人，啲錢嚟自輸馬嘅人，仲要馬 會中途抽咗水
20. 一個字：內捲。塘水滾塘魚
21. 馬會同賭場呢啲「系統」，贏家嘅錢，嚟自輸家。唔止，輸家仲補貼埋個莊家（賭場本身，或者馬會）。
22. 點解會咁？一定係咁。因為呢個係一個塘水滾塘魚嘅遊戲。你贏嘅錢，必定係嚟自其他輸錢嘅人。否則邊度變出嚟？馬會唔會貼錢畀你，賭場亦唔會貼錢畀你。
23. 點解贏家嘅錢一定嚟自輸家？因為，呢啲系統，本身係唔會「gen」到任何錢出嚟嘅！馬會無啦啦點會變錢出嚟？佢係將輸錢嘅人分畀贏錢嘅人，中間抽水之嘛。
你30蚊買股票40沽，贏。我40蚊接你，坐到100蚊，又贏。錢何來？
24. 但你諗下，股票就唔係咁回事喎。之前嘅例子好清楚啦，唔明嘅講多次，你40蚊買1股Nvidia，跌到30蚊你怕死，止蝕，輸咗10蚊。大戶埃汾買咗你嘅貨，然後隻嘢升到上400蚊，埃汾執咗370蚊
25. 但，條數唔啱喎，你輸咗10蚊之嘛，埃汾點會贏370蚊？邊度嚟？唔係交易所送畀佢喎，亦唔係「其他散戶」輸畀佢（佢就係買咗你嘅1股之嘛）。咁佢嗰370蚊收益，點嚟？
26. 留意，即使埃汾400蚊沽出去，獲利370蚊，都唔代表買嗰個就「蝕」咗畀埃汾。因為可能之後再升呢？對新買家嚟講，埃汾嘅角色，咪等於當年30蚊沽Nvidia嘅角色之嘛。
27. 你應該睇到呢個例子，同埋馬會賭場，有一個好大嘅分別。就係，隻Nvidia升到400蚊 — 埃汾嗰370蚊利潤，係咁樣走出嚟嘅，唔係嚟自當初沽畀佢個人，唔係嚟自其他人。馬會賭場，就缺乏咗呢個機制，唔會有錢變出嚟（實務上，馬會同賭場，都會有自己嘅投資—但呢啲錢佢地拎晒，唔會拎嚟賠畀你，發夢冇咁早）
28. 咁但，你又會問，咁呢400蚊點變出嚟的？當埃汾真係30蚊買Nvidia，400蚊沽咗，咁呢370蚊，到底邊度走出嚟？係咪Nvidia畀埃汾？又唔係喎，埃汾沽咗Nvidia，間公司唔會少咗370蚊現金，唔會有人要寫支票畀埃汾嘛
29. 你真係可以諗下，呢370蚊點嚟。
30. 短答案：呢啲就係「投資」啦。呢370蚊，你可以話come from nowhere，自己爆出嚟。亦即係，個價值係呢個系統自己創造出嚟的！
啲錢，come from nowhere，係創造出嚟的，唔係有其他輸家
31. 你有呢種能力嘅系統，就係投資，先可以長玩長有，先可以長期大多數錢都係賺錢。否則馬會賭場嘅，因為永遠係輸家補貼贏家（同埋馬會賭場自己），成個系統冇任何嘢創造出嚟，所以「所有參加者」，長期夾埋必然輸錢 — 因為再講一次，個系統冇價值冇錢變到出嚟，你嘅錢只能嚟自其他人，有一舊錢贏，就有更多錢輸。
32. 細心諗下。
33. 我呢度仲想插播，一個同馬會或者賭場幾相似，但唔一樣嘅系統：保險公司。
保險公司呢？我明明供嘅錢都唔夠佢賠畀我，咁係咪其他人津貼我？
34. 之前我大約寫過，保險公司同賭場都有啲似，都係某啲人補貼另一啲人。你開車好小心，從來冇問題嘅，咁你啲保費就好似「白交」。然後有啲人有意外，咁佢嘅錢邊度嚟？就嚟自你。好似咁計，但唔係真係完全係咁。
35. 如果你有返咁上下年紀，四十歲以上，供咗多年保險，甚至claim過嘅，你大約計到條數：你供嘅保金，好似唔夠冚你claim嘅錢喎。你做個手術幾十萬，但好可能你咁多年交嘅保險都未有咁多啦。咁錢邊度嚟？
36. 正路估，你覺得好似馬會咁，嚟自啲冇病冇痛嘅人。實際上？唔完全係咁。往往根本「成個系統」，保費公司收嘅保費，都係唔夠賠錢嘅。
37. 咁你心態，咁保險公司點出糧？點解仲有錢賺？
38. 因為一個字：投資。你咁多年交嘅保費，總額未夠你開次刀 —「但保險公司將你啲保費年年去買QQQ咪夠畀！」。大約係咁。
39. 你問，馬會賭場可唔可以咁做？理論上得，但實際上唔會。馬會賭場當然都拎你啲錢去投資，但唔會益你。況且，馬會賭場呢啲交易，時間太短。你買份保單幾十年，保險公司先可以拎去買QQQ，然後碌大舊佢。
原來保險公司拎我啲錢去買QQQ賠返畀我 — 咁我自己買咪得咯！
40. 最後離題講，唔知有冇人問：咁其實我係咪即係唔使買保險？我拎舊錢去買QQQ都夠？答案：理論上，係！但有兩個問題：首先，大吉利是，你買QQQ第二年就出問題，咁點算？你舊QQQ唔夠賠，可能要輸錢添，但保險公司一定照賠畀你。第二點亦有啲似，可能你買QQQ都輸錢呢？可能之後美股跌足咁多年呢？但只要保險公司唔執笠，你買咗咁多，廿年後，你有事佢就要賠畀你 — QQQ唔掂，係保險公司嘅問題，佢自己諗掂佢。佢減花紅又好，新保費收貴啲又好，總之係同你無關嘅。