JPEX思考．點解驚跌市？畢菲特話洗頭水減價，你應該好開心 (Patreon)

鍾意追trendy話題嘅，睇JPEX吧。萬騙不離其宗，值得你留意

我早排寫「C基金」同「馬拉松銀行阿嬋」，都中咗七八成了

Bitcoin會唔會畀20厘息你？當中係有分別的

留意：一買就輸錢嘅，多數唔係騙局。

舊文Index，可以睇返晒以前嘅文。

我最鍾意悶市，其次係跌市，最唔鍾意係升市

你買咗2000萬美股，當然想升市，怕跌。但如果你剛出嚟做嘢呢？

個倉唔大嘅，升100%你都收唔到山，跌20%你又唔會死，仲可以買多啲

畢菲特話：當股票係洗頭水咁，你成日要買，佢減價應該開心喎。思考下。

不過，股票真係唔係洗頭水。你啲股票都係要變返做錢的。

前提一：唔好借錢。前提二，你啲嘢要「最終升返」

升200%，你退唔到休。跌50%的話，你冇借錢，保住份工，根本冇嘢驚

鍾意追trendy話題嘅，睇JPEX吧。萬騙不離其宗，值得你留意

1. 容許我一講再講，如果大家係鍾意留意啲trendy 話題（似乎多數讀者都係），咁呢排JPEX壇嘢絶對值得你留意。總好過你去留意咩俄羅斯兵變，完全冇建設性。睇JPEX，根本萬騙不離其宗，但就係大把傻仔。

2. 記住，small mind先講人，唔好將焦點集中在張智霖，林作，莊思敏。而係你睇成個局，或者點解有啲人咁豬（但又咁有錢！），同埋睇下點避免。

我早排寫「C基金」同「馬拉松銀行阿嬋」，都中咗七八成了

3. 真係中晒早排我寫「C基金」「2000萬阿嬋」嘅多數嘢，活學活用。你冇睇真嘅，記住睇返。之後（應該周末）我會又整個長系列。唔少嘢都之前講過，有七八成一樣，但當然亦都有啲新嘅手法。

Bitcoin會唔會畀20厘息你？當中係有分別的

4. 不過簡單一句嘅：20厘息，根本已經唔使討論，騙局無誤。留意你買Bitcoin，佢唔會畀10厘息你。當中係真係有啲分別的。所以我有買Bitcoin ETF，雖然輸錢。但講過好多次，你輸錢贏錢，同件事係咪shitty，冇必然關係。我甚至講過，一買就輸錢嘅，多數唔係騙局。因為騙局好少令你一開頭輸

。

留意：一買就輸錢嘅，多數唔係騙局。

5. 我真係唔明，點解啲人可以咁弱智。但你亦應該感恩，亦都應該明白。就係因為有呢啲咁嘅人，呢個世界就有貧富懸殊。而你係我嘅讀者，你應該唔會變佢地。

6. 記住，你辛勞或天賦累積返嚟嘅財富，要好好保護。

舊文Index，可以睇返晒以前嘅文。

7. 講開舊文，亦都可以講下。其實除咗Patreon官方嘅功能（認真麻麻），我都係有個Index的，係有個熱心讀者義務幫我整（再次多謝你先）。但，原來我好耐冇貼出嚟，所以有啲新讀者唔知，或者舊讀者都冇keep低

8. 呢度貼多次，你係可以搵返晒以前嘅文的。唔好以為必然，好多作者係唔會畀你睇晒以前嘅文的（例如賣相賣片嘅女仔）。以後我都會在每篇文最尾嘅「簽名」貼返。

9. 講返大市，聽晚聯儲局議息，之後會出啲經濟預測，到時寫。又睇下大市爆上定爆落。我估：冇乜方向。

我最鍾意悶市，其次係跌市，最唔鍾意係升市

10. 呢排大市繼續比較悶，唔知你覺得係好事定壞事，我覺得係好事。我作為投資者，最鍾意悶市，其次係跌市，升市我反而唔太鍾意（但作為「作者」或KOL嘅角色就掉轉）

11. 點解鍾意跌市多過升市？

12. 事實上，你問我，最驚奇嘅係美股居然仲咁硬淨，特別係科技股。你見到債息咁升法，科技股居然都唔係點跌　—　我講嘅唔係5%嗰種，係10-15%甚至更多嗰種。

你買咗2000萬美股，當然想升市，怕跌。但如果你剛出嚟做嘢呢？

13. 但亦係有辣有唔辣，如果你已經碌咗2000萬買晒QQQ，梗係想啲股票金槍不倒。但如果你係剛出嚟做嘢嘅，其實納指跌20%對你近乎冇影響。而又或者你係有2000萬現金但冇買股票嘅，你好可能好想佢跌下添，因為而家買你都有啲驚，但你又知道不能永遠現水。

個倉唔大嘅，升100%你都收唔到山，跌20%你又唔會死，仲可以買多啲

14. 講呢啲，就係畀你體會下，跌市唔可怕，特別係你未退休的話。甚至跌市對你先係好事。

15. 亦係畢菲特嘅講法：點解啲人驚跌市？如果你當股票好似日常品咁，好似買洗頭水咁，佢減價你唔係應該開心？可以平啲買。

畢菲特話：當股票係洗頭水咁，你成日要買，佢減價應該開心喎。思考下。

16. 呢段說話值得你思考。

17. 但當然了，股票唔係洗頭水，首先「忽然減價」你難免覺得係有問題，樓下間餐廳忽然賣套票你都思疑佢就執笠啦（有呢種懷疑心係好事）。另外，股票真係唔係洗頭水，洗頭水你直接用，但股票你最後，在某個時間，都係好可能要將佢變返現錢嘛（當然你收息亦得）。

18. 另一個想法就係：喂，我10蚊買完支洗頭水，我係想20蚊買返出去嘛，而家跌到得返2蚊，仲點開心？「買埋咁多洗頭水嚟把托咩，邊有咁多頭洗」

不過，股票真係唔係洗頭水。你啲股票都係要變返做錢的。

19. 呢度可以分幾個角度講。首先，股票真係唔係洗頭水，你買多多都得嘅，唔會用唔晒。但另外，10蚊買返嚟20蚊賣返出去呢個用途，畢菲特冇講，佢就真係當你用洗頭水。但現實的確係，你要將啲洗頭水賣返出去的

20. 所以，問題其實係短線定長線，同埋銀碼

21. 股票跌我唔會好開心，但我亦唔會好唔開心。同樣地，升我都會開心，但唔會極開心。

22. 再直接啲講，我當你係個做咗幾年嘢嘅讀者，你嘅股票倉，可能幾萬蚊至幾十萬？我當今年納指升5倍都好—好爽啦？問題係，其實都唔夠你退休（當然你可以拎去買樓嘅）。你仲要諗，升咗5倍，咁之後你仲買唔買？

23. 所以，跌市真係唔使點驚。但大前提係嗰幾個：首先，你冇借錢。第二，你保住你份工，甚至在你事業上一路越搵越多。第三，你啲嘢「真係」會升返。未必係一年，但三五七年，佢應該係要升返。

前提一：唔好借錢。前提二，你啲嘢要「最終升返」

24. 第一點不用再多講，但第二點我呢排都成日提。我個Patreon未必幫到你發達，個源頭都係靠你嘅收入，但，至少我可以幫你保障你辛勞得嚟嘅成果　—　你見啲友真係碌到2000萬一樣可以畀人呃，買C基金又好，信銀行經理又好，信微信女又好，日日有啦。

25. 甚至去到一個位，你真係好懷疑啲友啲錢點搵返嚟，「咁嘅智商都搵到2000萬」—但，撇除佢本身係富二代呢種情況的話，其實都解釋到。正如我講過，工作能力，同投資能力，又真係兩回事，甚至個相關性都可以幾低下。C基金李生搵你嘅錢咪叻，但佢投資不見得好叻（況且個機制下，佢根本唔使叻）。正如你可能人工低過我，但你投資嘅能力可以高過我，呢種情況成日出現。

26. 當然仲有第三點，你啲嘢，「最好」真係長線會升返。長線可以係五年十年，但真係佢要升得返　—　就算升唔返，都唔好跌太多（咁你平均成本入市都仲有機會贏錢）

27. 但你見，呢個「五年十年後會升返」，都唔係真係點保證到（投資邊有保證？）。固然將來冇人知，但至少我地睇「以前」　—　咁例如你幾十年前買日本股，或者近十年買港股，都真係五年十年後都未必升得返。

28. 美股？你睇最近十年梗係得，但一樣有過迷失十年。

29. 所以上次嘅文，講「全餐」。全球股市，就真係冇乜試過衰足十年嘅　—　雖然，都未必有得保證。

30. 況且，得閒再搵下數字，但「全餐」嗰堆嘢，2000-2010年，係咪贏錢？都未必。唔好忘記雖然嗰十年新興市場跑贏，但「全餐」美股為主嘛。佔你六成嘅美股跑輸，成隻嘢係咪有運行？　—　但，嗰十年嘅「全餐」，又總會好過你齋買美股。配合埋分段，就更加好啦（其實美股都係，迷失十年，你有分段買嘅，都應該中途回咗家）。

31. 另外唔知有冇讀者會留意到，上次講堆「全餐」，四隻ETF，其實歷史都唔係好長。十年多啲，最長嘅都只係15年　—　其實係唔夠長的。因為真係冇2000-2010年嘅數你睇。

32. 不過呢度有啲技術細節可以講，堆ETF就15年歷史，但啲指數照計唔止15年，有機會可以搵得返。而就算有隻指數係某個年份推出，佢「以前」嘅歷史都可以搵到嘅。即係例如可能2023年我先整隻「金磚十一國」指數，十一國炒埋一碟。但，2023年啲數，都係計得返的，你入面啲股市之前都存在嘛。

升200%，你退唔到休。跌50%的話，你冇借錢，保住份工，根本冇嘢驚

33. 記住，升200%，你又唔係唔使做。跌50%，只要你冇借錢的話，正常對你生活都冇任何影響。大家都係凡人，係會有情緒，贏錢時得意洋洋覺得自己好叻，輸錢就輸到懷疑人生。但至少希望講咗呢段，可以令你情緒冇咁波動。

Patreon舊文目錄，可以睇返晒以前所有文。

CitiGold戶口開戶link

花旗信用卡開戶link