Home
Artists
Search
Recent
Random
Posts
DMs
Tags
Random
Importer
Import
FAQ
Account
Register
Favorites
Login
乜嘢叫投資？JPEX反思。 ARM上市，任何位買你都輸錢。聯儲局議息，今年加多次，咁幾時減？咁而家買定等減息先買？ (Patreon)
Content
推介下私人貸款，但無論如何唔好借錢買股票
關於JPEX：到底乜嘢係「投資」？
到底加密貨幣係咪「投資」？定有啲係有啲唔係？
ARM嘅股價，穿晒底，基本上你上市任何位買都輸
你要嘅，係一啲「任何位買都贏」嘅嘢。然後大大力買
美國議息，其實全無意外嘢，但點解啲人話「放鷹」？
今年再加一次息，咁幾時減息？下年啦
而家買，定等減息先買？你話呢？
1. 循例講多次，以後每篇文最尾，會有個「以往文章目錄」，你可以睇返晒以前嘅文。仲有，我會貼埋啲開戶link．呢排同花旗合作多，之前貼過CitiGold戶口，或花旗信用卡（增值Payme之選）就不再重覆。
2. 不過呢期有個新嘢呢度未講過，就係私人貸款。亦唔使我解係乜了，詳情Facebook Page有。息口嘅，自己去睇吧。不過勝在批唔批都好，都有800蚊Apple Store或惠康現金券。申請link在呢度。
推介下私人貸款，但無論如何唔好借錢買股票
3. 咁當然了，近乎所有情況下，都唔好借錢投資，已經解過。
4. 另外，不厭其煩講，呢啲東西我當然係有錢分的。作為你嘅腦力練習，不如估下，CitiGold，信用卡，私人貸款，邊樣我分得多啲？留意都係同一間公司。呢啲，先係鍛煉你智慧嘅機會。我會即時開估。
5. 你應該估到，CitiGold就分得多過貸款，貸款又分得多過信用卡。估唔到嘅，再諗下點解。我講埋畀你知，信用卡生意，銀行根本冇乜肉食，估都估到，你個個月清卡數嘅，近乎蝕畀你。冇乜肉食，自然唔會畀好多錢上客。私人貸款當然係賺你利息，銀行好賺啲。但CitiGold呢？銀行未必即時有賺，但有錢客仔，銀行好願意去識的。
6. 咁你了解呢啲咁簡單嘅生態，你咪估到，JPEX呢啲賣衡晒廣告搵晒林作莊思敏張智霖嘅，仲要可以畀19厘息，錢從何來？當然係有問題
7. 我上面呢啲產品全部都係合法，亦冇伏嘅嘢。我就唔會收錢去推介JPEX嘅。就算將來有啲「可能小伏」嘅，例如輪商牛熊證，甚至咩槓杆ETF反向之類，我頂多收錢幫佢地在Facebook Page推，但唔會呢度叫你買。就算叫你買，我都會講明（不過乜嘢叫伏，又係一個好值得諗嘅問題—有啲人，你叫佢買QQQ，佢輸咗錢，又鬧你點佢）
關於JPEX：到底乜嘢係「投資」？
8. 關於JPEX，你見我在Facebook Page不停講，日日講。但除咗夠花生，亦好值得你去學習。之後我會統整返做幾篇長嘅文。但你真係唔使研究入面係乜（好可能乜都唔係），正如我根本唔使研究C基金買乜，唔使理個馬拉松銀行經理買乜。根本你睇咗之前嘅文，就可以避開呢啲伏。19厘息，咪玩啦。
9. 非常，非常值得你去思考。我只係要啲時間整理下，唔想將之前寫C基金寫馬拉松銀行阿嬋嘅嘢簡單咁重覆。
10. 作為「備課」（如果有人會的話），你可以諗定幾個問題：首先，乜嘢叫「投資」？我寫文講過，之後再解，但你自己反問下自己。我估十個有九個嘅答案，都唔係太過「好」嘅答案。另外可能同你講下，到底加密貨幣係咪投資？會唔會有啲係有啲唔係？正如美股係投資好主意，但不等於每一隻美股都唔係老千，係咪？如果有啲加密貨幣係投資嘅，又點買好？都可以講。
到底加密貨幣係咪「投資」？定有啲係有啲唔係？
11. 以上種種，我全部在信報月刊寫過。好似幾十蚊一期。但你見啲人，係寧願睇垃圾KOL的。你真係唔好睇少個後果，我Facebook Page有寫，「明報」2022年3月已經寫咗JPEX各種可疑嘢，但啲友就信出面TG Group嘅網友。咁你話，輸晒啲錢係咪必然？
12. 醫生話你高膽固醇，叫你食少啲雞皮，但你照食，咁之後超標，係咪好合理嘅事（冇錯，呢個就係我。因為好食，同你睇垃圾一樣。但我唔會鬧返醫生轉頭，「同埋已經食少咗」）
ARM嘅股價，穿晒底，基本上你上市任何位買都輸
13. 另外，你見隻ARM嘅股價，穿晒底。固然冇穿「招股價」。亦即係，上市後你任何位買，到而家都輸錢
14. 好似有讀者走去第一日買，快手沽咗，有錢賺。恭喜。但呢啲即係KRE，3001，甚至 Peloton—再垃圾嘅股票都有啲位有大反彈呀，都「有人」賺到錢．就算嗰個係你，都改變唔到個本質。買JPEX幣啲友開頭都賺錢的。（而我唔係話Arm係垃圾，甚至KRE都唔係，3001都唔係，Peloton都好似唔係）
15. 你要搵嘅，係一啲「任何位買都贏嘅嘢」，或者至少「近乎任何位買都贏」。然後，大大注咁買落去！例如乜？Google之類。又或者，買「全餐」都近乎係。呢啲道理，舊文講過。
你要嘅，係一啲「任何位買都贏」嘅嘢。然後大大力買
16. 至少到呢一刻，我都覺得我叫你「唔好買ARM」嘅建議，好到不得了，因為多數你都會輸錢。當然佢日後會唔會大升，就講唔埋。我當然係可以錯的，亦都有錯過，將來亦都會。
17. 當然仲有一個重點：你冇買嘅股票，係唔會令你輸錢嘅。實不相瞞，領展上市嗰時，我都覺得完全唔掂，但後來隻嘢10年升10倍。人當然係會錯的，但我會知道自己睇錯，知道點解錯，之後會減少同樣嘅犯錯 — 雖然都係會繼續有錯。To err is human，但就真係唔好「大錯」，例如去買JPEX或信銀行經理之類，保證冇得翻生（買C基金都仲有機會救得返呀下，唔使絶望）
美國議息，其實全無意外嘢，但點解啲人話「放鷹」？
18. 最後可以快手講下，美國議息。其實差不多全無意外，但你見市場普遍反應「負面」，覺得「放鷹」。
19. 今次值得講多啲，因為唔止係「個市跌咪話放鷹」。我理解啲人點樣咁演繹，亦道理。但我會話，就只係因為「市場」部份人呢排太過一廂情願。
20. 即係點？即係好簡單。聯儲局嘅立場，同6月時完全冇變咁滯。問題係，似乎有唔少人（你當一半半，未必全部）係之前「睇死你會轉鴿」。結果冇轉鴿，咪覺得「放鷹」
21. 仲唔明？再講白啲。你睇6月時聯儲局嘅講法，肯定今年第四季仲要加一次息。但唔少人（你當一半半，又未到全部）就估，今次局方會轉軚，會話你知今年都唔加，提早收工。結果？而家近乎講明今年都仲要加
22. 好啦，講咗上面呢啲，咁你睇呢個圖，都極之簡單了
23. 最頂先，今明兩年嘅經濟預測，調高咗。失業率展望就調低咗。說好了的衰退（我都以為好大機會），一路都唔出現。所以真係唔好對啲咩「經濟預測」太認真。你錯失今年美股嘅升浪，都好傷。
24. 通脹方面，局方睇嘅PCE，展望近乎冇變，證明局方覺得在正確軌道上。如果睇core PCE，直頭調低咗今年預測。明顯地唔係咩咁「鷹」
今年再加一次息，咁幾時減息？下年啦
25. 戲肉，利率嘅走勢。留意而家係5.25-5.50，中間即係5.375，即係5.4。年尾去到幾多？5.6。即係5.625，即係5.50-5.75。加多次。介紹返而家都9月尾，得返兩次議息，即係可能10月尾，或12月。
26. 留意，呢個5.6嘅預計，同上次6月時一樣。所以我上面先講，根本聯儲局展望冇變咁滯。
27. 不過你亦可以話，見到2024年嘅展望提高咗。原本係4.6，而家係5.1 — 留意，低過而家水平，即係乜？即係下年減息！
28. 但，會唔會今年加多一次，下年再加多幾次先再減落去？理論上有可能，況且呢啲展望一季可以改一次。不過正路地，真係加埋今年年尾呢次，就收工
29. 但長期讀者可以話：喂，你5月都係咁講喎。冇錯丫，「因為聯儲局當時都係咁上下講法」。
30. 呢啲龍門，係會不停搬。但亦講過，總有停嘅一日，你要嘅係耐性。仲有，真係唔建議你去time the market
而家買，定等減息先買？你話呢？
31. 之後應該會好多人關心，咁係咪而家買得？定等減息先買？定點？我之後會幫你睇歷史，但歷史嘅嘢，一個參考啫。我嘅答案：幾時都買得。唔係玩嘢，亦唔係有啲讀者不滿嘅「咁使鬼聽你講」— 我嘅功能，就係年頭都話畀你知買得。你錯失今年嘅升浪（特別係科技股），你已經錯失好多嘢了。明冇？
32. 股票當然係幾時都買得。當然會有best timing，但事前捉唔太易。況且，你亦唔知要等幾耐。仲要可能升嗰時，你放咗假去咗緬甸古巴，然後兩日升咗10%，你又唔敢追。
33. 所以，唔使搞咁多嘢，有錢就買吧，頂多在啲配置嗰度多啲考慮，而呢幾個月都同你講，暫時美國科技股唔多抵搏，你見呢排都回唔少。
Files
