香港政府綠債（下）：講咗好，咁有乜唔好？順手講埋所謂嘅「政府會還唔到錢」，兼且教你識別廢柴朋友同KOL (Patreon)

綠債不及銀債，唔係因為4.75厘不及5厘，而係因為：冇得原價質返畀政府

黑天鵝：美國加20厘息都好，銀債都可以質畀政府。綠債冇呢回事

買定息債最驚乜？當然係驚加息。蝕章，兼且會跌價

而留意，上次綠債係「破發」的，啲廢柴KOL又講到世界末日

不過講到尾，都只係「可能加到20厘啫」—正路係唔會嘅

綠債仲有一個問題：金額太細

掃盲時間，討論呢個「政府會唔會還唔到錢」嘅問題

「政府赤字」「會還唔到錢」「要打老人家主意」

我都話，同你side bet．政府還唔到錢嘅，我一賠十。還到，我殺你個本

可以留意下：香港政府債券，4厘息。低息過銀債綠債。咁代表乜？

「政府出街4厘借到，做乜要益香港市民？有親呀？」

仲有留意，綠債200億，銀債550億。「半條三跑都未夠」

點解講呢啲？因為，幫你識別啲傻仔朋友同廢柴KOL

1. 上篇講咗綠債嘅背景，有乜好嘅地方。今篇大結局，篇當然要講下冇咁好嘅地方，仲會講埋傳說中嘅「政府冇錢要呃大家錢」。

綠債不及銀債，唔係因為4.75厘不及5厘，而係因為：冇得原價質返畀政府

2. 可以首先講，佢不及銀債嘅地方，並唔係因為綠債4.75厘銀債5厘。呢個都小事。最大分別係，銀債可以原價塞返畀攻府！呢個「期權」（真係期權嚟的）相當值錢。

3. 點解？首先，銀債冇咗買賣差價呢個問題，你等錢用就原價塞畀政府。另外，即使黑天鵝，美國下年加到20厘息，你都可以原價塞畀政府，然後拎啲錢去做個十幾廿厘嘅定期！也就是「退可守」

黑天鵝：美國加20厘息都好，銀債都可以質畀政府。綠債冇呢回事

4. 好啦，咁綠債嘅情況，最怕係乜？其實在債券101寫過（嗰時啲人又鬧悶又話長，真煩），買所有定息債嘅情況都一樣　—　你最怕，當然係出面加息！買定息債，即係一早同意用個定息借3年錢畀人，鎖死咗。所以出面減息你咪著數，加息咪唔著數

買定息債最驚乜？當然係驚加息。蝕章，兼且會跌價

5. 首先之前寫過，加息的話債價會跌，綠債iBond也不例外（但銀債冇「市場」就冇呢回事）。另一角度睇，你「蝕章」，出面加到20厘息，但你舊錢只能收到4.75厘息（而根本加息時債券跌價，就係反映緊呢樣嘢）

6. 亦即係話，如果出面仲不停加息，你隻嘢係會跌價的，綠債iBond都會。事實上，上一隻銀債，而家跌到96.5，係「破發」的。然後有啲弱智反政府KOL又喺度嘈，發現新大陸咁，又覺得係香港政府嘅錯，覺得綠債有問題　—　扯，SVB買美債輸到破產添呀。咁大家都知，綠債「破發」，係因為過去兩年，美國由零息加到5厘

7. （順手一講，有人問如何識別啲廢柴或垃圾KOL，如果講咗上面嘅嘢嘅，不睇為妙）

而留意，上次綠債係「破發」的，啲廢柴KOL又講到世界末日

8. 咁但，你可能問，我坐到尾嘅咪冇影響？答案：係。也是債券101解嘅嘢。只要香港政府還到錢（呢個問題可以最尾講，你當住還到先），咁你咪半年收一次息（100蚊收4.75嘅一半，即係2.375），到期拎返100，冇任何影響。冇錯你係「蝕章」，中途加到廿厘息，你就提早鎖定4.75厘。但至少，你唔會真係「蝕錢」

9. 「咁呢個破發96.5有乜影響？」。首先，主要係心理上啦，有啲人見到輸錢就發癲的嘛，特別係睇得垃圾KOL多，可能走去「止蝕」。另外，再煩氣講多次，你坐到尾嘅真係冇任何影響，但如果萬一你真係中途等錢使，然後又咁啱美國加到20厘息，你隻嘢跌咗價，咁你沽出去就真係蝕一截了。

10. 呢度亦留意一點：你在銀行做定期，其實都有類似嘅東西的。佢罰息，都會跟個prime計，出面如果加到20厘息，你個定期都好似有可能輸錢的

11. （但好認真咁計，你到時拎返舊錢又可以做十幾二十厘定期啫，所以真係「蝕」，都唔係好多）

不過講到尾，都只係「可能加到20厘啫」—正路係唔會嘅

12. 不過講到尾，上面呢啲，都真係「可能」啫。實情呢，可能性極低。你話係咪「冇可能加到20厘」，我當然不能保證一定唔會。但正常地，美國最多咪加多一次息，兩次息。分分鐘仲有得減。所以你估息口見頂，都係正路嘅

13. 咁當然了，如果掉轉，未來兩三年，美國減到零息（未必冇可能），咁你隻嘢會升價添，你大可以中途沽咗佢套現都得。

14. 咁然後你見到了，銀債可以原價踢返畀政府，真係一個極偉大嘅發明。擺明益老人家呀。

綠債仲有一個問題：金額太細

15. 最後仲有一個問題，我覺得反而係最大嘅問題。因為我啲讀者好富貴，而綠債，正路你真係只會分到5萬至10萬（我其實估5萬都冇）。咁講真，唔係幫到你好多嘢。直接啲講句，如果用我個「50歲以上先諗買債」嘅講法，又或者例話60-40咁話，咁你50歲甚至退休先幾皮嘢，都幾弊，照計只係強積金都唔止啦。

16. 所以5-10萬，真係幫唔到你幾多。不過啦喎，你夠厚面皮，動員力夠好，屋企多兄弟姐妹嘅，咁你全家動員，五個一齊，倍大個數，就會好啲嘅。

掃盲時間，討論呢個「會唔會還唔到錢」嘅問題

17. 最後，掃盲時間，討論呢個「會唔會還唔到錢」嘅問題。

18. 其實我真係覺得相當厭煩兼困惑，居然要討論呢個問題。不幸地似乎真係有讀者會問。又或者，佢地在網上，見到啲友講「香港政府負債好重」「香港人均負債好多」「香港政府赤字好重」「又冇賣地又冇印花稅收啲人又走晒」「儲備乾塘」，之類嘅東西

19. 然後到銀債綠債，啲友就會講，「嘩冇錢到要打劫老人家，打佢地主意」「嘩係咁發債仲唔係好唔掂」

「政府赤字」「會還唔到錢」「要打老人家主意」

20. 我諗，都真係唔使一一討論，但可以講下以下嘅嘢

21. 首先，都係我嘅「身體很誠實」測試。十分簡單，你認為，或者「你個朋友」認為綠債銀債會找唔到數，會任何一期嘅息或金還唔到嘅，歡迎你聯絡我私下side bet．一賠十，你同我買10萬，佢任何一期還唔到嘅，我賠100萬畀你。但如果佢3年內冇miss任何payment，我就沒收你10萬蚊

22. 1倍10，好吸引啦．Anyone？咁耐都冇人搵我買。咁其實，已經解釋晒所有嘢。你啲「朋友」再同你講嘅，你就自己做莊，睇佢有乜嘢講。

我都話，同你side bet．政府還唔到錢嘅，我一賠十。還到，我殺你個本

23. 正經少少講。首先，上面都貼過，香港政府嘅3年債券，街度都只係4厘息邊。呢個咁簡單嘅事實，十分重要，有三個角度演繹。

24. 首先，香港政府借錢，係平過美國政府借！你望下3年美債咩息口？但當然了，香港政府借港紙，美國政府借美金，當中又唔完全可比。

可以留意下：香港政府債券，4厘息。低息過銀債綠債。咁代表乜？

25. 但帶到第二點，如果真係「會」還唔到錢，點會只係4厘息？你睇下啲乜鬼內房債幾多厘息？

26. 仲有，根本香港政府債券嘅息口，仲平過發綠債或銀債。係「冇錢」想「cap水」都好，發政府債平好多，金額亦大好多。明冇？

27. 咁可能你就會問，咁做乜政府咁笨，有4厘唔借，要出近5厘借綠債銀債？

「政府出街4厘借到，做乜要益香港市民？有親呀？」

28. 呢個問題啦喎，5年前問我，我會答你當係福利，收買人心。不過講真，家陣都唔使投票，都冇乜呢啲必要。雖然你都仲話可以「維下穩」，「收買下人心」。

29. 比較好嘅答案，就真係「搞啲政績」，幫助香港債券市場發展呀，甚至吹埋啲咩「綠色金融」之類嘅東西。

30. 你亦留意到，今次綠債只係發150至200億。上次銀債550億。我任你啲「朋友」點講都好，至少你會見到一個事實：兩次都係超額，供不應求。咁如果政府好窮，要打劫老人家，做乜唔發多啲？人人爭住畀錢政府喎，回應大家訴求唔好咩？因為，係有發債總額嘅，不能想發幾多就幾多。

仲有留意，綠債200億，銀債550億。「半條三跑都未夠」

31. 你睇銀債（550億）綠債（200億）呢啲額亦知道，濕濕碎啦。起條三跑都1500億呀！政府總負債15000億呀！銀債綠債嘅額咁細，講到世紀大陰謀咁，真係呃埋你都未夠畀息啦

32. 知唔知點解要講呢啲？唔係幫政府抬轎（我使？佢又冇畀錢我），唔係sell你去買銀債綠債。

33. 咁固然係想幫你掃盲，教育下你

點解講呢啲？因為，幫你識別啲傻仔朋友同廢柴KOL

34. 但仲有一個更加重要嘅功能：照妖！

35. 你邊啲朋友同你講上以嘅謬論，或者你見邊啲KOL不停咁講呢啲，就真係垃圾無誤，睇少啲。

36. 都話，一賠十嘅賭局，冇一個嚟同我賭。你諗下有乜深意？即係根本佢講到「會發生」嘅嘢，自己都唔信

37. 同情地講，你咁串佢嘅，可能佢會話「我係話有可能啫，你點保證唔會？」。都唔好拗咩「美國夠可能違約」「聽日可能外星人侵略」。但至少你見到，嗰啲友，就係將「我係話有（極細）可能」，包裝到好似好大件事咁。

38. 咁你可以諗下，佢地係弱智，定係用心不良。Either Way，你都應該遠離。