香港政府綠債（上，即時出埋下篇）：唔買都要睇呢篇文。基本嘢，有乜吸引。順便推介一個財經作家 (Patreon)

綠債：唔買都睇下（呢篇文）

綠債冇銀債咁吸引，咁即係吸唔吸引？

我唔會抽。咁做乜又叫你抽？

順手推介一個財經作家，我舊同事老公，早已上岸

想抽綠債嘅話，點抽？唔好笑，真係要討論的

當股票買定當債券買？在銀行定券商買？

綠債，所有定息債，即係賭將來三年加息定減息啫

4.75厘息，吸唔吸引？就至少吸引過定期存款。「同埋香港政府債券」

如非必要，就唔好中途賣咗佢了

呀仲有，唔好借孖展

1. 呢兩篇講香港政府綠債，上下集一齊出。今篇先講基本資料，同埋有乜賣點。下篇講有乜唔好，同埋金融掃盲

綠債：唔買都睇下（呢篇文）

2. 綠債星期一開賣。唔使急，早買冇著數，唔會先到先得，亦唔會提早爆額截飛。你等到27號先買都得（其實28號午飯後截，但有啲行提早，唔好咁炆水啦）

3. 媒體報導，可以睇呢個，同埋呢個。無論如何，無論你抽唔抽（我都唔抽），呢篇一定要睇。

綠債冇銀債咁吸引，咁即係吸唔吸引？

4. 畀個結論你先：綠債，就冇銀債咁吸引。問題銀債要夠老先抽到，綠債人人有。咁綠債「冇銀債咁吸引」，即係吸唔吸引？普通啦。亦視乎你係乜人。對我，就冇任何吸引力，但唔係個個係我。

5. 再講白啲，50歲以下嘅，都話100%股票，所以甚麼銀債綠債iBond定期存款債券，全部不用做。但如果你50歲以上，或者50歲以下但始終唔太信或者唔想100%股票，咁呢個綠債，好過你做定期，甚至坐現金。亦照計好過你買其他債券。明冇？

6. 例如以前都講60-40，退休人士應該40%債券。好啦，咁綠債（同銀債），就可以做到嗰40%。亦即係，佢係定期存款或者債券嘅更好替代。但如果你根本唔買債唔做定存（例如我），就未必要買

7. 玉於甚麼「綠色」之類，就算罷啦。

我唔會抽。咁做乜又叫你抽？

8. 我會唔會抽？當然唔會，都話100%股票，我連銀行戶口現金都唔多留，點會拎幾萬蚊買綠債？

9. 咁兩個問題，第一，點解我唔買又叫你買？第二，點解我都唔買仲要寫，又要叫你睇？畀你好快諗下答案，即時開估

10. 點解我唔買又叫你買？簡單，人人risk profile唔同，年紀亦唔同。

11. 問題二，點解我唔買又寫？除咗係「因為有讀者適合買」外，仲有個原因：你睇呢篇文，當101，當金融知識，會更了解個市場（「市場」是好多嘢，唔止係港股美股）。再加上，學埋點樣去「分析」一件事。

順手推介一個財經作家，我舊同事老公，早已上岸

12. 好啦，轉數夠快嘅讀者，實情可以去睇「水哥」張宗永篇文（Attach埋畀你了）。水哥是我舊同事老公，我同佢不相識。不過佢就行內知名，亦早早「上岸」。經常有讀者叫我推介啲好文或好作者，睇水哥嘅文吧（然後叫你幾百蚊訂一年明報你話好貴）。

13. 實不相瞞，信報月刊編輯之前叫我推介啲其他作者幫佢地寫嘢，我都係拋咗佢個名。留意我同水哥不相識，同佢老婆亦近乎唔識（只係舊同事），加上以我呢啲「華文媒體充滿垃圾」嘅講法，都好少可我會推介一個人。唔係話我巴閉，而係佢巴閉。你睇佢寫篇文，非常簡單，冇我咁長氣。

14. 不過，針冇兩頭利。既然佢寫得精要，咁如果唔係做金融嘅讀者，或者冇咁叻嘅讀者，有時就未必睇得明（我寫文就係保證解到你明）。水哥本身太勁，仲要自己做金融，有時好多嘢佢亦唔會解，當你明架啦。當然仲有，佢係唔會推介你買乜買物嘅。

15. 仲有，我唔會話水哥「離地」，但佢真係太富貴了，所以未必完全了解啲普通人嘅問題（雖然我啲讀者都好富貴）

想抽綠債嘅話，點抽？唔好笑，真係要討論的

16. 正題，想買嘅話，點買？唔好笑，都真係要討論。

17. 以前寫iBond講過，IBond可以當債咁買，亦可以當股票咁買。實務上，亦即係在銀行抽，定在券商抽嘅分別。話定你知，應該在券商抽

當股票買定當債券買？在銀行定券商買？

18. 即係點？即係你固然可以當債咁買賣，買美債咁，銀行做莊，開個Bid ask畀你（張圖隨手找的，不用深究間住嘅係乜，遲下可能講），亦好似你買賣外匯咁，你係同銀行交易。你買10萬澳紙，係銀行唱畀你，唔係第二個用戶沽畀你．但你買10萬港交所，就唔係銀行或券商沽畀你，係第二個市場上嘅人。明白分別冇？

19. 但另一方面，iBond亦在港交所上市，可以好似普通股票咁買賣，有個冧把，所以你在富途一樣可以抽，一樣可以二手買賣。明冇？

20. 今次綠債，亦同Ibond一樣，可以當債咁認購，亦可以當股票咁認購。「銀債呢？」。銀債係冇二手市場的，有冇留心聽書？

21. 咁應該當債咁認購，定當股票咁認購？答案係，當股票咁認購，在券商抽。

22. 原因？好簡單，以往經驗見到，在港交所買賣嘅差價，照計實好過銀行開嘅Bid Ask。當然，如果你肯定自己唔會中途沽嘅，你可以話冇乜分別，都係坐到尾。但，冇必要限死自己啫。

23. 當然了，仲有我嘅偏見：銀行真係比較多蛇蟲鼠蟻，即係你一大舊錢去抽銀債綠債唔中，銀行又可能會嚟搵你，引你落塔。記唔記得之前個阿嬋嘅故事？都係做定期，之後到期，去銀行，就有機會畀人埋身。

24. 最後補一句：理論上，銀行都可以畀你將綠債當「股票」咁抽，反正銀行都可以抽新股。但實際上，以我所知，多數銀行唔畀你咁玩。原因？當然係當「債」，佢食水會深啲（但其實都係爭少少啫，又唔係講到銀行好無良嘅）

綠債，所有定息債，即係賭將來三年加息定減息啫

25. 好啦，綠債是個點嘅玩法？好簡單，即係鎖定個高息3年。你可以話，就睇你賭下未來三年會加息定減息。

26. 咁正常地，都係唔會有得點再加，可能一次咁大把。況且放心，呢啲賭輸咗，賭錯咗，都冇乜損失嘅。

4.75厘息，吸唔吸引？就至少吸引過定期存款。「同埋香港政府債券」

27. 息口方面，4.75厘，差過銀債少少（5厘），但依然吸引。況且，好多人冇留意，4.75厘係「最低」。因為佢個派息會同香港CPI（你當通脹）掛勾，CPI低過4.75都好，照派4.75厘。但如果CPI高過4.75，就跟CPI派

28. 咁你可以比較下，首先，你買香港政府債券，都冇呢個利息。正如水哥講，用返三年比，政府債券而家4厘息。況且入場門檻高好多

29. 同定期存款比呢？一樣，綠債好過定期。首先，定期唔會畀你鎖到3年息。而雖然美國仲加緊息，但而家最近做嘅定期，息口都差過早幾個月做（因為開始真係估停加息）。況且，銀行定期門檻高啦。中途你想拎錢，會罰你息啦（多數唔會要你嘔突，但等於你白做咁咯）。仲有上面都有講，「你去銀行做大額定期，就有機會惹啲蛇蟲鼠蟻埋身」

30. 不過留意返，綠債有二手市場，但總會有買賣差價（股票都有啦）。你當債咁抽，銀行做莊，個差價再大啲。當股票咁抽，在港交所買賣，差價就細啲，但依然會有些小。平時我買股票當然唔會理呢啲嘢，問題係綠債呢啲冇得炒，你只係搏收4.75*3嘅14厘息（三年夾埋！），買賣差價冇咗1%的話，都唔係細到可以唔理

如非必要，就唔好中途賣咗佢了

31. 所以，如非必要，唔係真係極等錢用，就唔好搞咁多嘢，唔好中途買賣了。但當然話說回頭，在你「真係等錢用」嘅情況下，你提早拎錢嘅成本（即係個買賣差價），有可能好過你做咗定期存款中間斷嘅（但只係「可能」，陣間解）

呀仲有，唔好借孖展

32. 最後記住了，唔好走去借孖展買！個分配機制同銀債iBond一樣，循環分配派啤牌，唔會你認購幾千萬分多啲畀你。所以亦唔使大手，你拎10萬蚊去認購，好夠的了，照計都唔會分到咁多。

33. 再講一次，應該係經券商認購好啲。