安謀ARM IPO，美國通脹數字。仲有思想實驗：之前貼過美股半年大升後，下半年多數都升。但再之前又貼過大跌後，多數都升。咁即係點？ (Patreon)

星期三美國CPI：Headline高過預期，核心通脹OK，咁即係點？

主要，都真係通脹受控嘅

咁到底，加完息未?照計下星期先知

ARM IPO：找知好多人搶，好多大客，提早截飛。So？

550億估值，仲有冇得上？你話呢？

不如睇埋公司嘅收入同純利？

我知，今年第二季AI先爆發，但公司收入指引又如何？

另外兩隻值得望下嘅美股IPO

7月頭寫咗三篇「量化分析」，睇下美股上半年升，之後會點

咁你話，矛盾喎。上半年升又話下半年多數升。之前又話大跌後多數升。

但，真係矛盾？冇。美股長升，但咩情況，會升得多啲？

JPEX疑似爆煲嗰壇嘢，夠晒花生。其實就正係我呢排寫嘅嘢！但你地可以思考下先，我應該週末先再寫。因為今日有啲更趕急嘅嘢寫。

星期三美國CPI：Headline高過預期，核心通脹OK，咁即係點？

1. 首先跟進返星期三晚出嘅美國CPI，其實都唔係好多嘢要講。懶睇嘅，一句話你知：大約符合預期。但亦即係，各樣嘢都冇乜變過，依然唔係好明朗。9月就一定唔會加息（但個議息會議好重要），11月呢？一半半。冇錯，同數字出之前冇乜變

2. 個CPI數字，大約符合預期。固然你會見到有啲媒體講「高過預期」，但只係丁屎咁多。你當合符預期啦。

3. 之前篇文都唔記得講，如果我冇睇錯（你可以慢慢查），個通脹數字，之前好多個月都低過預期。而呢樣現象，往往係一個鐘擺，甚至係cluster。即係「成日低過預期」，之後就往往會出現一排「成日高過預期」—點解會咁？都有得解。因為幾次低過預期後，啲人就會越估越低。

4. 無論如何，今次嘅數字大約合符預期，悶得很，但亦都方便初學者學下睇。Headline CPI嘅，按年升3.7%，上次係3.2%，預期係3.6%。即係高過預期少少，而且由低位反彈兩個月。聽落都驚驚地？

5. 不過你睇按月嘅，Headline CPI升0.7%，就同預期一樣。至於點解按月就同預期一樣，但按年會高過預期？之前都解過，但簡單嚟講，只係好細分別，唔使過度演繹

6. 點解個headline CPI回升？主要因為能源價。

7. 但唔好搬龍門，重點當然係睇扣咗能源同食品嘅核心CPI。核心CPI嘅，按年升4.3%，同預期一樣，上次係按年升4.7%。而呢個數字，係兩年低位

主要，都真係通脹受控嘅

8. 所以，「通脹反彈」定「通脹受控」？睇你點睇。往往升市啲人就話受控，跌市就話通脹反彈咁。要戒除呢種用股市走勢演繹返數據嘅壞習慣。你問我，個數字咪就係…….冇乜特別

9. 但講咁多，最值得關心嘅，始終係息口走勢。

10. 不幸地，正如上面講，出完呢堆數字後，並冇明朗咗，可以話完全一樣。9月加息嘅可能性係零，但11月嗰次，都仲係近乎一半半。你見美匯指數，債息，甚至股市，所有嘢變動都不大。

咁到底，加完息未?照計下星期先知

11. 你亦都見到，有啲大行就估唔會再加，即係7月嗰次真係最後一次。但有啲估11月再加　—　首先，大行估呢啲東西就會準啲，因為易過估股市。但都見到有分歧。有分歧係正常，所以你咪見到……利率期貨顯顯，11月加息嘅機會，真係一半半。況且，而家先九月中。

12. 不過，可以留意下9月20號呢次會。因為係一年四次嘅「大會」，就會有埋啲經濟預測，同息口指引。到時會明朗啲。

ARM IPO：找知好多人搶，好多大客，提早截飛。So？

13. 另外要講嘅係，今年美國最大嘅新股，ARM（其實係英國公司）。星期四晚上市，簡單嚟講，唔好追。

14. 我知好搶，超額10倍，提早截飛添。但呢啲其實同值唔值得買，冇乜直接關係。特別係好可能會高開，你仲要係上市後先追，更加唔抵。

15. 我知好多大公司客（so？），我知AI熱（但Nvidia都無乜力破頂了），但講到尾，都係估值。更唔好講 上市後SoftBank仲拎住90%，有排掟。

550億估值，仲有冇得上？你話呢？

16. 你睇公司，拎550億美金估值，然後可能仲要高開。但就計550億，而舊年嘅收入係27億，純利5.2億。計下price to sales，20倍起碼。市盈率，過百倍

17. 然後個收入，仲要係按年倒退嘅。唔係下話？

18. 當然，你可以話呢啲只係歷史數據，係去到今年3月，咁Nvidia都係近兩季啲收入先開始爆上。

不如睇埋公司嘅收入同純利？

19. 況且，ARM有講打算改個收費模式，變相加價咁話（但，點解而家先加？會唔會根本加唔到？只係上市之前咁講？或者根本加價幫唔到收入，可能趕走生意？）。但，都只係話預今年收入升10%，下年就20%（聽住先）

我知，今年第二季AI先爆發，但公司收入指引又如何？

20. 咁你可以相比下，Nvidia嘅收入，按年應該可以升幾多？順手快手計下數。Nvidia估嚟緊呢季（第三季）收入160億，照計再下一季都至少做到咁嘅數。72+135+160+160，全年530億收入，舊年就270億，收入差不多一個開咁升，先勉強支持到個估值。

21. 所以，似乎就唔好搞我了。當然，ARM嘅賣點係—間公司相當細（雖然已經係今年最大IPO），500億市值，Nvidia嘅20份一咁上下，要第一日彈上去，應該不太難

另外兩隻值得望下嘅美股IPO

22. 我反而覺得，值得望下隻Instacart。其實我完全唔了解，但留意個上市估值已經劈咗75%，相信比較合理（你亦可以想像下：如果佢用之前嘅估值上咗市，你嗰時追，而家有乜後果）

23. 另外，仲可以望下隻Birkenstock，60億美金估值。半年（應該係半年，唔肯定）收入6.5億，半年純利4000萬。望落都貴貴地，但照計個純利今年好返好多。之後先細望

24. 不過，兩間都係叫你望下咋，冇叫你要買。唔好第時買咗又話點你。到時有時間我再細心睇

25. 最後，已經9月，話咁快就快又第四季。又玩下回顧兼思考實驗。

7月頭寫咗三篇「量化分析」，睇下美股上半年升，之後會點

26. 7月頭嘔咗三篇「量化分析」，講「升咗半年之後會點」。個人覺得係相當滿意嘅。未睇嘅記得睇多幾次（第一，第二，第三）。趕時間嘅，齋睇最尾一篇吧。

27. 仲有提定你，舊年我都做過類似嘅嘢，只係嗰次係研究「跌咗好多之後買會點？」，有好多篇（呢篇，呢篇，呢篇，呢篇），可能你是但睇一篇都得。有啲講季度，有啲講半年，有啲講唔同指數。

咁你話，矛盾喎。上半年升又話下半年多數升。之前又話大跌後多數升。

28. 你夠聰明嘅，可能都會質疑好似有啲「矛盾」。留意，「質疑」係冇問題的，但唔好「challenge」，因為我都未必有答案！

29. 質疑乜？「喂，跌晒你又話之後多數升得多」「升咗半年你又話之後半年都係仲升」—咁即係點？即係幾時都升（其實好似係？）。但係咪兩者都會有一個係「好啲」嘅時機？

但，真係矛盾？冇。美股長升，但咩情況，會升得多啲？

30. 你有啲呢問題，係好嘅。「當然你去質疑我老點你就唔係太好」。我其實自己寫都已經有諗呢啲問題。我唔敢話我有「答案」，但會將我嘅想法遲下同大家分享。

31. 不過你想要結論嘅：就其實梗係，大跌後買，係好過大升後買啦。十分粗略地講係咁嘅。都合符你常識啦。首先估值重要，另外，別人恐懼時我貪婪嘛。咁你發現，「恐懼」係差不多必定等於跌市。你好少見升市嘅VIX會好高。

32. 另一個睇法，以前都寫過。因為美股長升，所以無論你condition on乜，出嚟結論都係升。但總有啲condition係好啲（不一定有原因，例如你搵單數月份同雙數月份，都會搵到有一個好啲）。咁你見到，大跌後買，就真係好過大升後面。上面解咗。

33. 結果暫時今年下半年，美股，升咗少少咁大把…….