美國CPI 前瞻：到底加息幾時停？另外，由債息圖學投資101 (Patreon)

星期三美國CPI，係咪通脹反彈？

Headline CPI，好大機會連彈兩月，但係咪真係通脹重臨？

但你睇核心通脹，就連跌6個月，跌到一年低位。

咁即係通脹係咪死灰復燃？你話呢？

美債債息就升到16年新高，但美匯指數甚至未升穿舊年高位。點解？

美股（特別係科技股）企得咁硬，我有啲意外，呢個亦不一定係好事

原本估5月加息最後一次，又落空。之後估7月最後，又落空

千萬唔好以為「沒完沒了」，因為你唔使估中先獲利。而狼最後會來

睇債息圖學投資101—2020年3月起加息到而家，但債息唔係一路升

1. 都話唔講咁多心法了，講返市場，費事你太悶。

星期三美國CPI，係咪通脹反彈？

2. 首先都講返，星期三晚美國會出CPI數字，照計你睇到篇文時都出咗數字。但依然值得講。

3. 數字自己上Trading Economics 睇，headline CPI嘅，上次係按年升3.2%，今次街估按年升3.6%，TE估低少少。但即係無論如何，個headline inflation，都會連續兩個月反彈。

Headline CPI，好大機會連彈兩月，但係咪真係通脹重臨？

4. 你睇按月嘅，可能仲驚啲。CPI按月嘅數字，上次係按巿升0.2%，今次街估按月升到0.6%，TE估低少少。但無論如何，都會見到「按月反彈」。

5. 固然主要都只係narrative，媒體或評論都係事後講，升400點有一個講法，跌400又有另一個講法，但至少畀你知道發生緊乜事。

6. 係咪真係「通脹反彈」？又未必。

7. 因為，正常真係睇撇除食品同能源嘅「核心通脹」。核心數字又如何？核心CPI嘅，上次按年升4.7%，今次街估按年升4.3%，TE估高少少。但無論如何，都係連續6個月回落，去到一年低位。所以你話「通脹受控」一樣得。

8. 咁即係點？首先，市場反應，甚至媒體講乜，都未係最重要。

但你睇核心通脹，就連跌6個月，跌到一年低位。

9. 但大約可以講個大環境你知，美國經濟固然保持動力，不過明顯之前嗰啲「搶人」，辭職潮，請唔到人，狂加人工呢啲東西，已經回順晒。租金亦都係跌緊嘅。

10. 咁但同時間，你睇其他新聞都會見到油價高，商品價有啲反彈，糧食價高。咁呢啲東西會影響個headline inflation。

咁即係通脹係咪死灰復燃？你話呢？

11. 亦即係因為人工壓力紓緩，租金壓力都放慢，但食品能源價格升，所以你會見到好似headline inflation反彈，升得快，但core inflation一路跌，咁嘅現象。根本冇任何「矛盾」（況且，經濟數據有矛盾有幾出奇？）

12. 講呢啲做乜？當然係因為呢啲東西會涉及加息（短息），亦都間接地會影響債息（長息）。前者就影響埋香港啲按揭，後者影響仲多，影響全世界股市。

美債債息就升到16年新高，但美匯指數甚至未升穿舊年高位。點解？

13. 遲下我會再細講，但如果你睇美股，近期都係麻麻地，唔上唔落。你亦見到因為債息跌完又上，一度升到十幾年新高　—　咁股市梗係麻麻地。另外，美匯指數都係咁上下走勢，但冇咁誇張。而家先返返年頭嘅位，甚至舊年高位都未到。

14. （遲下可以解下點解債息升到十幾年新高，但美匯指數反而係舊年嘅高位都未到。固然都係事後解，但都有啲得著嘅。你亦可以諗下係咩原因，冇話對錯，只係思考實驗）

15. 事實上，你問我，最驚奇嘅係美股居然仲咁硬淨，特別係科技股。你見到債息咁升法，科技股居然都唔係點跌　—　我講嘅唔係5%嗰種，係10-15%甚至更多嗰種。

16. 唔好以為企得硬一定係「好事」，因為企得硬，你又點買？呢啲位買啲科技股，都要少少勇氣。因為你點都知真係貴貴地。相反，差不多一年前，大瀉落嚟，嗰時買就絶佳時機啦　—　至少你事後睇返係

美股（特別係科技股）企得咁硬，我有啲意外，呢個亦不一定係好事

17. 得意嘅係，往往嗰刻你覺得最唔應該買，事後會見到最應該。相反亦都係，有時嗰刻你覺得最應該買，事後睇返最唔應該。又係老話題，恐懼與貪婪，同埋估值。你「覺得」應該買，往往係因為升咗好多，又好多人講，氣氛亢奮　—　而真係好多時見到呢啲位買最笨。相反亦係。但講過多次，當局者迷，往往事後先發現。況且，沉醉其中，其他人勸你你係聽唔入耳。所以，都真係上少啲網，唔好同人討論股票。

18. 講返，通脹數據出後先再寫。但近排債息又高，美金又強。點解？都係因為個「加息壓力」揮之不去。的確5月頭嗰次，已經估99%加完（我都咁估），但結果7月又加多次。好啦，7月頭嗰次又真係估「今次真係加完」- 但結果又好似仲會有多次。

原本估5月加息最後一次，又落空。之後估7月最後，又落空

19. 既然市場係炒預期，咁個加息預期，死咗又復活，死咗又再復活，自然會令到債息反彈，美匯反彈　—再講一次，美股特別係科技股企得咁硬，我都已經好意外。

千萬唔好以為「沒完沒了」，因為你唔使估中先獲利。而狼最後會來

20. 但我一再強調，唔好以為咁係「沒完沒了」—冇錯係不停估不停落空，但首先，狼真係會來，唔使太耐，總會見最後一次。另外，雖然不停落空，但你見美股已經累積唔少升幅　—　千萬唔好以為要「估中」你先有收獲

21. 仲有，好重要，你可以睇多次19段嘢，然後望下呢個10年債息嘅圖，由2020年尾到而家　—理解下次本市場點運作。都係招牌菜，但你可以玩多次。

睇債息圖學投資101—2020年3月起加息到而家，但債息唔係一路升

22. 試下解釋呢個圖，固然係事後，但都睇到好多嘢

23. 聯儲局由2022年3月開始，一路加息，係咪？但你睇圖，首先會見到：債息唔會2022年3月先升上去！係2020年尾已經係咁升，只係當時仲係低水平，股市又未大跌，啲人唔討論。點解升上去？當然係會「預期」加，雖然最後等到2022年3 月先加，但你不能話呢個「預期」錯。

24. 第二，2020年3 月開始加，加到而家冇停過，但個債息圖，唔係一路咁上的。

25. 中途啲回調係乜？往往係，啲人開始估「停加」

26. 例如舊年7月，你見個圖開始回，因為啲人估會停。最後完全落空，債息再破頂，股市再跌。

27. 但更得意係，去到10月，啲人真係估會開始放慢　—　結果估中。咁你見債息由舊年10月，一落回到今年4月（中間有起跌但整體都係跌），亦正係美股表現最好嘅日子。

28. 4月之後呢？就係呢幾個月發生嘅事。你見5月又估最後一次，又唔係。7月又估真係最後，都仲唔係。於是債息升極都有，破埋頂（但奇怪地美股科技股仲係好硬淨）

29. 咁，而家即係點？「其實，真係應該加多次停了」

30. 呢啲都係出今次CPI前嘅嘢，但畀你睇下。都係睇CME，9月呢（20號），就冇人估加息了。得返咁短時間，照計即使出個CPI數字好差，聯儲局都唔會忽然逆市場期望（當然要嘅一樣得，亦試過）。況且，早兩日先放完風，真係唔會9月加

31. 但11月呢？呢刻（出CPI前），大約4成人估仲會加，亦即係6成人估根本7月嗰次已經係最後一次，但明顯兩種意見未分高下。又睇下出完個CPI，會係重燃11月加多次嘅期望，定係真係見到7月嗰次原來真係已經係最後一次

32. 咁理論上，後者係比較有利股市嘅，但世事當然唔係咁簡單。出完數字再寫。

33. 但記住一樣嘢：唔係2020年3月開始加息，債息就一路升上去 – 未加已經升定，而中途亦都有回落。債息反映嘅，唔係「加息」，係「加息期望」-係有啲唔同的

CitiGold戶口開戶link

花旗信用卡開戶link