［如果餘生只畀你買一隻股票］「全餐」：環球指數ETF（下，完） (Patreon)

「假全餐」URTH：MSCI World Index　—　但個World係乜？

URTH 冇中港冇台灣冇印度 – 扯，咪即係IDEV + SPY！

VT ACWI  SPGM就真全餐了，有埋新興市場

VT同ACWI又有乜分別？邊隻好啲？

ACWI集中多啲大股，呢排都係大股跑出，但點解ACWI又唔係跑贏VT？

咁你見到，當然三隻「真全餐」，之前回報係不及「假全餐嘅」

咁到底，URTH VT ACWI SPGM揀邊隻？

明明之前咁多年呢啲嘢都跑輸美股，做乜仲要買？做乜要分散？

嚟多次美股迷失十年，你會點？「咁會唔會全世界股票迷失十年？」

真問題：「真全餐」都60%美股，有分散到咩？點解仲係咁多美股？

咁如果我真係睇好新興市場，想分散呢？

結論：多數人都係買得太少股票，唔係太多。仲有，好睇你本身有乜

如果拎支槍指住你，餘生只能買一隻股票，買乜？

彩蛋：URTH ACWI URTH VT 十大國家，十大持股

1. 快手講講，以後每篇文最尾都會有返啲開戶link，方便你地唔使次次嚟問我，但我又唔使次次賣一次廣告

2. 呢兩篇講「全餐」，今篇會完。上篇講到，100%股票。買指數ETF就最好（雖然實際上你同我都係會買啲個股），MPF亦係咁玩。咁但，MPF就有環球股票基金，咁自己買呢？首先唔使買基金，另外，亦真係有「環球指數ETF」，所謂嘅「全餐」。

3. 另外我亦講到，你計回報嘅，扯，分乜散？買美股好過買環球。梗係啦，之前十年美股跑贏晒。但你咁講嘅，冇人買SPY添，買晒QQQ啦。甚至根本唔好買QQQ，買晒Nvidia啦。呢啲想法嘅問題，上一篇討論過（其實每隔幾日我就講一次，但你見啲人都係咁的）

4. 個Excel我呢度放多次，上次提咗四隻，我話三隻係「真全餐」，URTH係「假全餐」。

「假全餐」URTH：MSCI World Index　—　但個World係乜？

5. 好啦，首先講URTH。點解講呢隻先？你見我之前都成日講呢隻。因為，你Google 「MSCI World ETF」，好可能就搵到呢隻嘢。

6. 但我講過，URTH係「假全餐」—唔係不能買，但真係留意呢點。

7. 點解係「假全餐」？好簡單，因為你睇佢嘅持股國家。美國佔七成啦，6%日本，4%英國，3%法國…….一路數落去。喂，中國呢？OK你話中國爆煲外資唔買，印度呢？冇喎。台灣呢？冇喎。

URTH 冇中港冇台灣冇印度 – 扯，咪即係IDEV + SPY！

8. URTH，雖然追縱MSCI World Index—但呢個指數，雖然叫World，但只係講已發展市場（不如去海關舉報？）。係喎，個「世界」係冇中國印度台灣的。所以你真係唔好笑，個名叫World，但同你想像嘅真係未必一樣

9. 所以我話呢隻係「假全餐」，因為只得已發展市場。另一個方法講，呢隻嘢，咪即係IDEV +SPY，歐洲美國＋日本。再講一次，唔係唔好，唔係唔買得，但你認清。

VT ACWI  SPGM就真全餐了，有埋新興市場

10. 另外三隻，就係「真全餐」啦。我先講VT同ACWI，比較下

11. 睇持股先，VT呢，60%美國（留意「假全餐」URTH係七成），6%日本，4%英國。之後你會見到3%香港（就係中資股），仲有些少（不足2%）印度，就真全餐嚟的　—　新興市場係少，但唔係冇。

12. ACWI呢？其實都係差不多，都係美國六成，之後有啲日本英國，有少少香港（中資股）。但佢十大國家入面冇印度，有台灣。無論如何都係真「全餐」

VT同ACWI又有乜分別？邊隻好啲？

13. 兩隻有乜分別？主要在個指數，VT個指數相對地大細股都有，ACWI就比較集中大股。但你睇十大持股，當然睇唔出。你睇最大持股咪又係蘋果，微軟，亞馬遜，NVDA。何止呢兩隻一樣，根本連「假全餐」都係呢四隻，甚至SPY QQQ都係呢四隻！因為就係最大嘅公司嘛。

ACWI集中多啲大股，呢排都係大股跑出，但點解ACWI又唔係跑贏VT？

14. 另外，上面有講，既然ACWI多啲大股，咁過去幾年都係大股勁過細股，係咪ACWI好過VT好多？至少見到出嚟回報分別不大。點解會咁？首先，VT話就話大細股都有，但只係相對於ACWI而言啫，都係大股佔好多。另外，ACWI管理費係貴啲嘅—幾有趣，佢集中大企，理論上成本仲低啲，但偏偏收貴啲。所以拉出嚟，兩隻回報真係冇乜分別。

15. 至於SPGM？其實都係差不多，都係真全餐。但AUM明顯細好多。

咁你見到，當然三隻「真全餐」，之前回報係不及「假全餐嘅」

16. 由於呢三隻係「真全餐」，所以你亦見到，點解「假全餐」嘅URTH回報好啲—因為URTH冇乜新興市場，而且多啲美股（URTH七成，「真全餐」嗰幾隻六成）。而過去五年十年都係美股領放全球嘛，咪會咁。

咁到底，URTH VT ACWI SPGM揀邊隻？

17. 咁講到尾，三隻或四隻，到底揀邊隻？答案係：你都估到，多數都冇定論。如果有一隻明顯好啲嘅，其他執笠啦。不過在呢度嘅討論，URTH應該係唔使考慮嘅，因為我地討論「真全餐」。

18. 另外三隻「真全餐」？真係差唔多。SPGM咁低AUM，就未必應該買，都唔知之後會唔會加價或做唔住。VT定ACWI好啲？應該差不多，「不如每隻一半啦」，因為真係答你唔到之後係咪都係巨企跑出。但真係拎支搶要我只能揀一隻，不如都係VT吧，管理費平少少。

19. 好啦，我估去到呢度，你應該有幾個疑問。

明明之前咁多年呢啲嘢都跑輸美股，做乜仲要買？做乜要分散？

20. 第一個，廢廢地，但可能照有人問，我自問自答—可能有人問，明明之前咁多年呢啲嘢都跑輸美股，做乜仲要買？我再講一次，你講以往表現，就肯定你買晒QQQ無敵，分乜鬼散。但，將來呢？我覺得係值得去分散嘅。

嚟多次美股迷失十年，你會點？「咁會唔會全世界股票迷失十年？」

21. 嚟多次美股迷失十年，你買晒美股嘅，都幾愁。「會唔會全世界股票都迷失十年」—答你唔到，但好似真係冇乜試過。即使美股迷失十年中，就其他新興市場好。

22. 你問我，我個問題反而係另一個角度：喂，你啲「真全餐」，都成60%美股喎，邊係分散？邊有分散嘅作用？

真問題：「真全餐」都60%美股，有分散到咩？點解仲係咁多美股？

23. 呢個就真係有趣嘅問題，甚至你可以去到問，點解「環球指數」都仲係六七成係美股？肯定唔係「因為」美國經濟體系最大　—　冇錯美國經濟體系係最大，但呢個唔係最大原因。你見啲指數入面，中國佔好少的，難道中國經濟體系細過英國法國？

24. 當中涉及好多原因，包括股市市值啦，有幾流通啦之類。咁美國嘅情況，雖然經濟「只係」佔全世界十幾二十個巴仙（視乎你計PPP定nominal，不詳解），但股市市值佔全球市值嘅比例，就高好多。而在美股在環球指數嘅佔比，又再大過佢在股市市值嘅佔比　—　咁畢竟，你見成堆最大嘅公司都在美股。

25. 所以你買「全餐」，都真係仲係六七成美股。我唔知會唔會同你心目中嘅想法好唔同

咁如果我真係睇好新興市場，想分散呢？

26. 咁你話，你睇好「新興市場」（不一定係由或）嘅，買「全餐」，係咪有啲蝕？答案：都好似係（雖然又提你一次：你嘅「睇好」有幾準？）。好簡單，例如上面啲「真全餐」都好，印度只係佔2%。我當印度股市升10倍，但你買呢隻嘢，因為印度得2%，所以你「只係」贏20%（或者18%，唔好煩）。

27. 「咁你如果有印度靈童報夢，知道一定升10倍，就梗係借盡孖展買印度股啦」

28. 但正經啲，如果你真係想要「新興市場」exposure，咁應該點？其實咪還原基本步，亦係我而家做緊嘅嘢。你要「新興市場」，咪買EEM。覺得中國爆煲印度台灣萬歲，咪買EMXC。台灣韓國你都唔想要？你咪自己買INDA全印度。梗有一款啱你。但最緊要平衡

結論：多數人都係買得太少股票，唔係太多。仲有，好睇你本身有乜

29. 結論？都係我在講座次次講嘅嘢：除咗一路講嘅「投資必勝法」（買得大，坐得長，分段買，地理分散，唔好成日睇），仲有兩大原則：

30. 首先，多數人都係買得太少股票，唔係太多，所以如有疑問，都係應該買（但依從必勝法嘅分散分段則）

31. 但第二，講英文型啲，total portfolio approach，即係「視乎你買咗乜」　—　你而家成手都係中港股嘅，咁你新錢咪買URTH。但你只係得美股嘅，新錢你咪買「真全餐」，甚至IDEV + EMM或EMXC

32. 當然乜都唔諗嘅，一隻VT救全家啦，睇你忍悶嘅能力有幾高！

33. 但我嘅做法？其實都係2800+ SPY + IDEV + EMXC，新錢我就一定係EMXC 同 IDEV多，因為本身都唔少美股港股個股了　—　見到冇？「total portfolio」

如果拎支槍指住你，餘生只能買一隻股票，買乜？

34. 但最一後一句：不如咁講，如果以後只準你買一隻股票，揀咗冇得改，以後你只能買呢隻股票（或者唔買）。咁我都係會揀VT。一命救全家。

彩蛋：URTH ACWI URTH VT 十大國家，十大持股

35. 最後，有啲餸頭餸尾醒埋畀大家。我寫完晒先發現，原來之前我有紀低URTH ACWI VT URTH 同SPY嘅 十大國家，同十大持股。反正整咗，呢度貼畀你

36. 但留意，呢堆嘢我早幾個月前整，而家會有些少唔同。叫做畀你有個參考。點解我唔整多次？因為打晒篇文先發現，另外亦冇時間，三來亦都唔係重點，四來你上ETF.com 或者MoneyDJ甚至Yahoo Finance都即時睇到

37. 希望大家鍾意呢個系列

CitiGold戶口開戶link

花旗信用卡開戶link