「全餐」：環球股市指數ETF （上，兩篇完） (Patreon)

「全餐」：環球股市指數ETF

唔好搞咁複雜，買指數ETF　—　咁但，買邊隻？全餐幫到你

點解我都唔係100%指數ETF？都有啲原因

指數ETF係白烚雞胸食草的話，全餐等於全素Whole Food

MPF配置，我話100%股票，咁但，揀邊隻基金？就係環球

MPF嘅分配，應該即係你自己嘅分配，甚至MPF可以進取啲

ETF中嘅ETF：買隻「環球股票指數」嘅ETF咪得—有冇咁嘅嘢？有！

比較下四隻「全餐」：URTH，VT，ACWI，SPGM

係架，你問AI都得，但只睇數字嘢，太表面了

你睇回報就根本唔使「全餐添」，買晒美股啦，分乜鬼散。但，真係？

全餐一年都有8-10%，但同標指納指爭一截，「咁分散嚟做乜？」

「買乜鬼美股ETF？借盡孖展買TQQQ啦」，「買乜鬼TQQQ？買NVDA啦」

啲友都識講「過去表現不等於將來啦」，美股之前迷失十年又唔講？

你可以搵好多理由支持美股下一個十年都會跑贏，但迷失十年時一樣存在

1. 好，寫咗C基金系列，寫埋2000萬阿嬋系列，其實對大家好有用，務必再睇。但再加上之前就寫貼現窗，真係寫得太多呢啲「心法」嘢。

2. 好似好耐冇講市場，冇講啲具體嘢。再唔寫呢，又有人鬧架啦。

3. 所以都轉返口味先，但我依然之後會寫「貼現窗」嘅教訓（但一句：睇少啲垃圾。渣打爆咗煲未？港紙爆咗煲未？）

「全餐」：環球股市指數ETF

4. 再講市場之前，講樣貼地嘅嘢，一路想寫，呢排市況太靜就趁而家寫。就係：環球股市指數ETF，亦即係「全餐」

5. 「全餐」真係一樣好重要嘅嘢，雖然好似好少讀者直接買，甚至我自己都冇。原因之後講，但主要係買「全餐」唔係幾過癮。不過，利口不利腹，過癮嘅嘢往往就唔太有益，自己拎個平衡咯。

唔好搞咁複雜，買指數ETF　—　咁但，買邊隻？全餐幫到你

6. 讀者聽我講過好多次，對絶大多數人嚟講，唔好搞咁多嘢，定期買指數ETF算，個股小注怡情。原因亦寫過，絶大多數人，包括基金經理甚至包括我，長期都係跑輸大市。

7. 但你話，點解我都唔係100%指數ETF？都解過，首先係我作為KOL/作者嘅身份，總要搵啲嘢寫，總要買啲個股感受下—但如果你唔係食呢行飯，大可不必。第二個原因亦解過，100%指數ETF係好，但好似你餐餐白烚雞胸食草咁，比較難堅持，會冇乜癮，會同人冇話題，會冇乜朋友。咁就睇你個人有幾頂得悶有幾忍受到冇朋友　—　但我亦目測，多數讀者呢方面嘅能耐都不及我。證據？好簡單，你地經常會同我講「我聽人講點點點」，「啲朋友傳過嚟話點點點」—證明你地都仲係比較多朋友。

點解我都唔係100%指數ETF？都有啲原因

8. 但講返，話多買指數ETF少買個股，都真係已經見到有啲難度。咁買「全餐」呢，就仲勁，你可以話係ETF之中嘅ETF，指數ETF我都唔揀，一隻搞掂。嘩，真係好悶的。指數ETF係食白烚雞胸食草的話，「全餐」等於你全素甚至Whole Food了

指數ETF係白烚雞胸食草的話，全餐等於全素Whole Food

9. 但，總有啲人可以做得到。況且，大家做唔到，都畀個目標自己。所以寫「全餐」

10. 都係寫得太虛，但不如由MPF講起。有人問MPF配置，其實一般嚟講，MPF配置咪就係你自己嘅投資配置，冇乜分別。甚至MPF更加應該進取啲，反正你一定可以做到每月定期，平均成本，亦都唔存在你可以手痕沽咗佢去旅行　—　你唔好手痕換嚟換去就得

MPF配置，我話100%股票，咁但，揀邊隻基金？就係環球

11. 而我一路講嘅「投資必勝法」，大家都聽過啦。地域分散，時間分散，然後買到大一大，100%股票。50歲以下都肯定100%股票，我甚至懷疑55歲都係。即使去到退休人士，都要有返近50%股票。

12. 咁啲人聽咗都明，但就問，咁買乜股票？或者在MPF情況，買乜基金？其實最簡單嘅答案，就係「全餐」。

13. 在MPF嘅情況下，會有啲「環球股票基金」嘅東西。你大約望下，見到啲地理分配正正常常，然後揀隻收費最平嘅就好。呢個MPF嘅課題，遲下講，或者反應好嘅我接住即講

14. 另一種方法，當然亦可以「散叫」，咪自己拼個全球出嚟。呢張圖我在 Facebook Page貼過，個Post你都可以睇下。

15. 但在非MPF嘅情況，你自己想100%股票，咁買乜好？講咗啦，指數ETF為主。咁買邊幾隻？點分配？例如我都講過，SPY + 2800 + IDEV + EMXC，美股，中港，歐日，新興市場走中國，四大台柱咁。比例？你自己決定。亦都好睇你本身買咗乜

MPF嘅分配，應該即係你自己嘅分配，甚至MPF可以進取啲

16. 但，都嫌煩嘅？咁簡單，「全餐」啦。

17. 即係，既然有已發展市場指數，有新興市場指數，當然有環球股票指數啦。

ETF中嘅ETF：買隻「環球股票指數」嘅ETF咪得—有冇咁嘅嘢？有！

18. 咁買隻追「環球股票指數」嘅ETF咪掂！有冇咁嘅嘢？有！係乜？就係「全餐」。而且係ETF，費用極低，基本可以令絶大多數基金經理失業（講咁講，但實際上唔係。因為基金已經變成一個marketing遊戲—你見咪又係大把人買）

比較下四隻「全餐」：URTH，VT，ACWI，SPGM

19. 各位觀眾，就係呢個表，Excel都畀埋你。四隻「全餐」。URTH，VT，ACWI，SPGM。預告定，其實URTH唔係真「全餐」，另外三隻先係真「全餐」。

20. 下面我放埋美股，SPY同QQQ，即係標普指數同納指（其實係納指100）做比較。

係架，你問AI都得，但只睇數字嘢，太表面了

21. 呢啲資料不難找，你搵MoneyDJ 或者ETF.com都有。不過一來我有幫你整理。二來呢？二來係，你上網搵都見到唔少人有整理，台仔有唔少，甚至好快AI都識幫你比較。問題係，只係睇數字嘢，就太表面。所以先要有我存在。

22. 個表照計不用我多解，留意回報嗰度，左邊少少嘅5年10年係「年度化」咗。右邊少少嘅5年10年係「累計回報」。然後你發現啲數計出嚟爭少少，冇乜特別，只係我用唔同嘅source，日子可能爭幾日。

你睇回報就根本唔使「全餐添」，買晒美股啦，分乜鬼散。但，真係？

23. 首先一樣嘢：如果你睇過去回報呢，「咁根本唔使討論」，全部100%美股啦，分乜散。甚至你全部100% QQQ啦，分乜散。

24. 短期嘅睇嚟嘥氣，睇長少少，即係點都睇5年10年。咁你見，「假全餐」URTH一年9%左右，三隻「真全餐」就8%左右—btw，真係magic number，多次寫過股市回報拉長一年就8-10%，你見到就係咁上下。但一年8%，都夠你10年一倍有多，好似慢慢地，但拉夠30年就10倍以上了　—10年先一倍多啲，30年先10倍，聽落真係唔夠勁　—　但你買得大就唔係講笑。況且，呢啲係冇乜太大難度做到嘅。

全餐一年都有8-10%，但同標指納指爭一截，「咁分散嚟做乜？」

25. 但當然，你睇美股就不得了。標指一年大約10-13%，十年就100蚊變320蚊。納指更不得了，一年16-18%，五年一個開，十年就100蚊變530。呢度兩個好簡單嘅常識，首先，複利的威力，一年爭少少，之後就爭好多。第二，上星期三有個讀者問咗幾好嘅問題：埃汾又話要股票贏一倍起碼，但如果你買晒指數ETF又好似難啲喎？實情都係嘅，你買指數ETF要一年贏幾倍，近乎不可能（個股就有）。但首先，你買指數ETF要一年輸七成又好似冇乜可能，但個股絶對會，Nvidia Facebook呢啲大公司都係。另外，你坐得夠長，買指數ETF，幾年一個開，十年幾個開，都係做到嘅　—　最緊要你買得大

26. 事實係，你MPF十年前100%美股嘅，一定可以出去恥笑所有人。正如你十年前買Nvidia嘅，一樣變股神。但有幾多係skill幾多係luck？（順帶講，十年前MPF買晒美股，相對地冇咁難，因為MPF你唔會日睇，又唔太能夠成日trade．相反，我畀你十年前買Nvidia都好，你中間都會take profit，止蝕之類,更加難坐到尾—所以見到冇？啲人鬧MPF廢，但亦有幫你贏到大錢嘅功用）

「買乜鬼美股ETF？借盡孖展買TQQQ啦」，「買乜鬼TQQQ？買NVDA啦」

27. 但呢度嘅問題以前都講過。我貼MPF個Post，都有啲人走去回「我一早MPF 100%美股啦」—呢個係好定壞，我就唔係好敢講。咁你計成績，100%美股肯定贏晒所有嘢啦。但，寫過多次，結果不一定可以完全代表個過桯。

28. 呢度嘅問題，亦都等於你話，扯，買乜鬼SPY，all in QQQ歷史上更好啦。扯，買乜鬼QQQ，梗係all in TQQQ．扯，買TQQQ咁慢，梗係買晒NVDA。扯，買NVDA咁慢，梗係借晒孖展買NVDA期權—　當中嘅問題，大家明白啦

29. 另一個角度睇，啲人平時都識講啦，「過去表現不代表將來」。係架，美股，特別係科技股，過去十幾年跑贏晒大市。咁但，十幾年嘅歷史係咪夠長？答案：唔係！（所以我平時話「長線」係三五七年，己經將就返大家）。

啲友都識講「過去表現不等於將來啦」，美股之前迷失十年又唔講？

30. 以前寫過，美股迷失十年，2000-2010嘅事，納指你坐十年都未回家，摸頂甚至仲要輸一半。十年喎。呢十年，正係新興市場跑贏晒美股嘅年代。

31. 下一個十年會點？唔知。未必真係又鐘擺返去新興市場跑贏，可能唔會，可能會，唔知。但我可以肯定一樣嘢：你出嚟同我講一啲美股未來十年都會跑贏嘅理由　—　我相信你在2000年講一樣啱。「美國有創意　有民主　集晒全世界人才　美元霸權　制度好　保證私有產權　教育好」—呢啲嘢，2000年都係咁架啦

你可以搵好多理由支持美股下一個十年都會跑贏，但迷失十年時一樣存在

32. 再講一次，美股嚟緊十年係咪跑輸？唔敢講。你問出面嘅人多數都覺得唔會，你估下點解？因為人係短視嘅。舊年贏佢咪覺得之後都勁。正如C基金2020年一個開啲人咪飛晒入去，以為之後年年一個開。契媽情況都一樣

33. 但有一樣我估幾客觀嘅嘢：美股貴！好難有人否認，況且呢樣嘢相對客觀。所以呢，我估都有一定機會，美股嚟緊幾年可能會跑輸。「咁係咪全部唔買美股」？梗係唔係啦。原因？咪嗰五隻字：如果我錯呢？

34. 無論如何，我相信冇乜人可以話美股肯定冇可能重覆2000-2010嗰十年嘅情況。所以，雖然之前十年好勁，但我依覺得分散是個好東西。「全餐」是好東西。

35. 下篇講埋呢四隻嘢，即時出埋。

CitiGold戶口開戶link

花旗信用卡開戶link