［活學活用］六十歲畀銀行經理呃2000萬，如何避免？（三）- 幾時都係睇利益，人性。而你拎晒啲錢買股票，咪冇錢畀人呃！ (Patreon)

廣告兩則：CitiGold同花旗信用卡

至於信用卡公司，又點賺你錢？又可以討論下

其實好多東西，都係某啲用戶，補貼另一啲用戶

其實全部都係睇「人性」，alignment of interest, principal agent

金融中介，基金經理，當然係最大利益衝突

你stay invested，啲錢拎晒去買股票，咪唔會有咁多錢畀人呃！

「扯，之前有人賣埋層樓救個網上情人添」

我仲要糧單都冇，銀行想水我借錢都水唔到

咁但，如果要用錢又點算？又解下

1. 之前兩日搞講座，冇文出，呢幾日會出返。呢兩篇完埋個「2000萬阿嬋」理財教訓。我在講座都有講「魯迅」嘅故事，我要拯救大家嘅心靈，避開呢啲陷阱，否則你識再多冧把都冇用。2000萬輸剩200萬，你就唔使翻身。

廣告兩則：CitiGold同花旗信用卡

2. 正題前賣下廣告，最後一次，因為有新嘢。之前Facebook Page貼過Citigold個優惠（詳情呢度），呢度都冇貼過，而家延期到10月3日。簡單嚟講，富貴讀者，有一大舊錢想泊（例如賣咗樓又未移民嗰啲），值得諗下。高息存款，而且可以開埋離岸戶口。詳情Facebook Post有，呢度不重覆。

3. 我嘅開戶Link在呢度，申報下我係有得分返少少嘅

4. 另外仲有，花旗信用卡。詳情可以睇 Post，簡單嚟講，開返張，top up啲電子錢包（Payme 支付寶　Wechat Pay）都有優惠，成本等於零（記得準時找卡數）。開戶 Link在呢度

5. 另外，上面係搵咗張最低收入要求嘅畀大家。但明顯我啲讀者好富貴，有讀者話想出其他花旗卡。一樣都係有以上嘅優惠（可能迎新優惠再好啲添），畀埋link你，Premier Miles卡呢度，Prestige卡呢度

至於信用卡公司，又點賺你錢？又可以討論下

6. 當然呢啲東西都可以帶返去之前嘅討論：「點賺你錢？」。信用卡點賺錢大家好清楚，但如果你係啲期期都準時還交數嘅人，又年年都記得waive 年費嘅（記得做）。咁信用卡公司真係蝕畀你的，相信大家都知。

7. 不過另一個幾殘忍嘅角度，少啲人講，但相信你都諗到：實際上，其實即係啲冇紀律嘅人，會信用卡透支，min pay嗰啲友（唔好做！），或者唔記得waive年費嘅人（原來係唔少咁嘅人的）　—　就係賺呢啲人嘅錢，亦係佢地補貼緊啲有紀律嘅人。

其實好多東西，都係某啲用戶，補貼另一啲用戶

8. 有財政紀律嘅你，會唔會覺得無良？我就唔會咁覺得嘅。當然你唔舒服嘅，就諗少啲呢啲。順帶一提，其實唔少嘢嘅運作都係咁，都係某啲用戶補貼另一啲用戶，公司再中間賺啲錢。例如乜？例如：人壽保險。你可以話長命嘅人，補貼啲買完兩年暴斃或者自殺嘅人，所以保險公司好想你長命百歲，一定鼓勵你做運動。又或者，車險更加明顯（雖然我冇開車）。負責任嘅司機，往往補貼緊啲不太負責任嘅人。咁但你又不能話不公平嘅，唔通你為咗有得賠特登亂開車咩（順帶一提，可能大家都知，新牌仔，或者買啲「飛仔車」嘅友，聽講保費貴啲。你年年紀錄良好，保費自然平，因為保險公司想你續）

9. 至於「我賺乜」？咁你估到了，都話你開戶我有得分。你諗下，我其實係取代咗啲銀行低等sales嘅功能，即係例如商場或街邊擺both嗰啲。我唔知嗰啲友點計，但點都有底薪啩？香港人工貴，你亦想像到嗰啲友唔會好大動力同你推。但例如銀行而家用呢種形式同我合作，開到戶佢先要分錢畀我，對銀行嚟講好易計數，唔會出現白出糧嘅情況。而且對推廣嗰個嚟講（即係我），一定有動力去做，因為唔會乜都唔做就有得分。

10. 但你估到，真係唔會分好多畀我。上次有寫過，呢啲冇伏嘅嘢，銀行分分鐘一個仙都賺唔到你（你清晒卡數的話），佢都冇肉食，自然唔會分到好多畀我。

11. 同埋你夠聰明嘅，亦都會估到，肯定係Citigold嗰個分得多啲。因為Citigold嘅戶係有錢人，銀行好肯埋呢啲人身。

12. 仲有，最初點解我係貼最低開戶要求張卡？好簡單，因為受眾最廣。我貼張Prestige嘅，收入要求高（雖然好多讀者好富貴），又要年費，相信冇乜人開。而最重要係：我可以話你知，你開平卡定係Prestige，我都係分咁多，咁我梗係貼張最多人會申請嘅。

其實全部都係睇「人性」，alignment of interest, principal agent

13. 我唔知會唔會有人覺得呢啲嘢「離題」，但，講到尾，就係「人性」，alignment of interest（即係大家係咪坐埋一條船），principal and agent（即係老細出糧畀你但你日日返公司去廁所）。

14. 了解呢啲嘢，你會明白好多嘢，避免到好多嘢。例如之前講C基金，個principal agent problem大到不得了，根本佢就可以將你嘅錢直接轉移去自己袋.又例如，2000萬阿嬋，亦係一樣。

15. 冇錯，今日續講呢個阿嬋。未睇過嘅，片在呢度。

金融中介，基金經理，當然係最大利益衝突

16. 第一篇同你講，自己嘅錢自己管，親人另一半都未必信得過，何況跑數嘅金融L:？第二篇同你講，記得check單，幾時都諗下，人地對你咁好，有乜企圖，賺你乜。冇乜必要，就唔好亂啲跑數L嘅恩惠，因為受咗你會不自覺耳仔軟。

17. 去到呢度，我想講一樣有啲爭議嘅嘢：大家不一定要完全同意，但值得聽下。

你stay invested，啲錢拎晒去買股票，咪唔會有咁多錢畀人呃！

18. 無論係買C基金嘅人，或者畀銀行經理昆咗2000萬輸九成嘅人，定係Facebook貼嗰啲電騙案，CFO信Facebook啲乜乜大師轉1500萬畀人，乜都好，除咗以上兩篇文講過嘅嘢，仲有一樣嘢我成日提：

19. Stay invested，你買晒股票，你咪冇咁多錢畀人呃！

20. 有啲人聽落覺得好混帳，甚至心諗「呢條友係咪傻的」。你唔使即時認同我，但不如再三諗下。

21. 老虎證券嘅講座，我都有提到，我戶口經常得幾千甚至幾百蚊。更重要嘅係，我當然唔會在銀行買股票（我估你都唔會，咁貴）。所以我在銀行嘅relationship balance 極低，銀行根本唔會搵我呢啲人，自然冇機會跌入陷阱。

「扯，之前有人賣埋層樓救個網上情人添」

22. 固然你可以拗，扯，之前有啲友，賣埋層樓去救個「網上情人」都有啦，唔係唔留現水就唔會畀人呃。真係有咁嘅案例，愛情係盲目嘅（亦即係：姣到盲咗）。痴情到咁，豬到咁，中毒咁深，就好難救。但我講普遍性。

23. 正如你可以話，個1500萬CFO，可能賣咗自己啲股票去轉畀個騙徒。2000萬阿嬋，可能都將其他銀行啲投資轉晒嚟。但多一重手續，就係麻煩啲，就減低你中伏嘅機會。正如以前都寫過，點解以前啲香港人，買樓賺大錢多，買股嘅好少？除咗買樓人人槓杆外，亦因為樓你坐得穩，唔會半夜手痕走去買咗佢

我仲要糧單都冇，銀行想水我借錢都水唔到

24. 我長期都冇現水咁滯，銀行L好難說服到我做任何嘢。而家我仲要糧單都冇，水我借錢都水唔到（但梗係唔係叫你主動辭工！）。太多現錢在手，係真係會招若好多蛇蟲鼠蟻。正如大家都聽過，你忽然中咗六合彩頭獎，就會有好多遠房親戚，初戀情人，忽然間個個有腎病，個個都對你念念不忘。正是富在深山有遠親 窮在鬧市無人問。我仲要又窮又住到山卡啦，根本冇人會嚟問我借錢。

咁但，如果要用錢又點算？又解下

25. 至於急用錢點算呢個問題，以前答過。股票孖展，甚至厚面皮問朋友借，再唔係沽股票。另外，Mox而家其實有免息現金周轉，啱晒「急用」，我都用過。但我之後先詳解，費事一日賣咁多廣告。但你心急嘅，開個Mox戶口先，用我嘅優惠碼，用呢條link．https://mox.com/zh/invite?code=29CGWB。我既開戶碼：29CGWB

26. 遲下慢慢解你知

「買股票都會畀人呃」

27. 所以是講真的，我確信你拎晒啲去買股票，就唔會進入呢啲騙局。係，買股票都有可能輸錢，但買股票畀人呃嘅機會細好多，而且往往條友都要坐監。你真係怕嘅，咪ETF咯，總冇可能成個股市係騙局啩。哦，你話「中國股市係騙局」，fine，咁你環球股市ETF咯，除非你話成個資本主義都係騙局啦

28. 你買股票當然有機會輸錢，但，你買C基金都「只係」輸一半啫，唔會好似阿嬋咁輸九成。

29. 寫得太長，下篇繼續。不過下篇仲長，因為想最後一篇埋尾